ZAA 'BƆGƲ 14
14
Zezwi-i -yɛ-a 'yuogblʋ -ʋ kwa-a -ma -Tɩbha -Lagɔ yawʋ
1Zezwi nɛ -bha ɔ 'wʋbhlinɩngwaa de naa: “'Kalɛ 'na-a 'lɩbhaya -nɩ. A 'tɛnɩ -Lagɔ dlɩ 'bhë a -tɛnɩ'ɩ 'yɛ na-a dlɩ. 2-Ma na -Tɩbhaa 'ligbë'ë glɩdee -bɛ -wʋ-ɔ -ma, ɛ nɩ la -sɩbha glɩnɩ, n kaya la 'dɩ -sanɩ 'bhë. Mö 'le n -wʋ -bha, n 'yɛ a 'bhle göganɩ. 3N -yɛ mö, n -yɛ a 'bhle göganɩ 'bhë-ë, ye n jiya-a jie, la n glɩ-a a 'yɛ 'yɛ -bha -nɩ glɩ. 4La 'bhë n -wʋ-a mö 'le, 'yuogblʋ -ʋ mö-ö -bha a -jiʋ.” 5Zezwi gba-a -sɩbha, Toma nɛ: “Nyininyɔ, la bhë -n -wʋ-a mö 'le, -aa la'a -bha -ji-e, samɩ -a ji-e 'mö-a -bhaa 'yuogblʋ de 'mö -jijinɩɛ 'nɩ?” 6Zezwi nɛ -bha ɔ de naa: “-Amö-ö -yɛ-a 'yuogblʋ, -amö-ö -yɛ-a 'dɛdɛɛ, -amö-ö -yɛ-a 'kɔgwlɛpɩ. -Bɛ 'nɩ bhɛlɩ ɔ 'yɛ -ma -Tɩbha -Lagɔɔ 'bhɛyɩ mö, 'n ɔ nɩ -bha na de 'plɩnɩ. 7A ka'a la -ji-e, a ji la na -Tɩbha jɩblɩnɩ. Tɛnɩ-a 'mö la'a a -jio, a kɔ 'yɛ yɩlɩ 'bhë.” 8Ɔ bhɩa-a 'ji, Filipö nɛ -bha ɔ de naa: “Nyininyɔ, -tuluanɩya -Tɩbha -Lagɔ 'ji -aa dlɩa 'yɛ 'mö ji.” 9Zezwi nɛ: “Filipö, n nyɛya 'sɔɔ 'wʋbhlinɩbɩ yɛ 'mö gwlɛ 'bhë -n nɩ'ɩ -ji-i? -Ɔ la'a -ɔ -yɩlɩ'ɩ-a ɔ yɛ -Tɩbha yɩlɩ 'bhë. 'Manɩɛ yɛ -n 'yɛ 'mö-a nʋ naa: -Tuluanɩya -Tɩbha 'ji nʋ 'nɩ? 10Sa n -wʋ -ma -Tɩbha 'mö, 'n -Tɩbha -wʋ -ma na 'mö, -n 'nɩɩ dlɩ 'wʋ -ka 'nɩ-ɩ? Wɛlɩ n gba-a a de, ɩ'ɩ-ɩ -ma na 'bhë 'mö 'bhönɩ, na -Tɩbha la'a -ɔ -wʋ-ɔ -ma na 'mö, mɔ-ɔ -wʋ-a ɔ libho nʋ 'le. 11N -yɛ nʋ naa, -Tɩbha -ma na 'mö, n-n -ma -Tɩbha 'mö nʋ-ɔ, a ka'a dlɩ 'wʋ, 'mɩ ɛ nɩ 'yɛ a de glɩnɩ-ɛ, a ka'a 'mʋ libhoo yɛ dlɩ 'wʋ. 12Sa'a n gba-a sa'a a de naa: -Ɔ la'a -ɔ ka'a dlɩ 'wʋ -ka, libho n -wʋ-ɔ la'a nʋ 'le, ɔ jiʋ 'yɛ -nɩ nʋ, -ɩɩ bhï-ï 'ghli-a -ɩ zi-a libho la'a 'wʋ, 'mɩ ɔ ji-a nʋɔ, -ma -Tɩbha yawʋ n -wʋ-a mö 'lee yɛ. 13-Ɩ la'a 'bhuo -kpö a ji-e na 'nglɩ 'mö 'jɩbhanɩɛ, nʋɔ n jiɩ -bha, -Tɩbha 'yɛ -ma 'Gu 'mö 'ghlimanɩɔɔ yɛ. 14Ɩ yɛ a -yɛ na 'nglɩ 'mö -lu 'jɩbhanɩ-ɛ, nʋɔ n jiʋ -bha.”
Zuzu 'Wlawla -Lagɔ ji-a 'yuo 'paa
15“A ka'a 'jɩbha a ji na gbö 'ji zʋ. 16-Amöö -nɩ-ɛ, -Tɩbha -Lagɔ n ji-a -bɛlɩ 'paa ɔ 'kaya kwanɩnyɔ -mʋmɔ -la, ɔ nyɛya 'sɔ 'yɛ 'wʋ -bhlinɩ -kitiki. 17'Dɛdɛɛgba -Zuzu -bha, -ʋ 'pɩ-ɩ bhë 'na-a ghlɩ, wa 'nʋ 'wʋ jɩnɩ 'bhë, wa 'nʋ -jie yɛ -bha. Abhaa -nɩ-ɛ, ʋ wʋya 'gbamö 'n ʋ 'yɛ 'yɛ-ɛ -ma a dlɩa zɔmöö yɛ, a -jiʋ. 18N 'na 'kaya kpiyi 'mö tɩ, ma'a a 'bhɛyɩ n ji-a jie. 19-Bha tʋ-ʋ 'wʋ -sɛ 'n 'pɩ-ɩ bhë 'na ka'a 'mö-a yɩlɩ, Abhaa -nɩ-ɛ, yɩlɩɛ a ji'i -bha, n -bhlɩɛ yɛ -bhlɩ a ji 'yɛ-a -nɩ. 20'Mɛ zlɩ la'aa 'mö a ji sɛ jɩblɩnɩ naa: N-n -ma na -Tɩbha 'mö, a-a -ma na 'mö, 'bhë n-n -ma a 'mö. 21-Ɔ la'a -ɔ -ji-a na gbö 'n ɔ zʋɩ-ɛ -bha, mɔ la'a mɔ-ɔ -jɩbha'a -bha. -Ɔ la'a -ɔ -jɩbha'a-a, 'mɔ na -Tɩbha ji-a 'jɩbhaa, na 'bhë n jio 'yɛ na-a 'jɩbha, 'n n 'kɔ-a najɩ 'ji tuluanɩ.”
22Zezwi gba-a sa'a, Zwidɩ, ɛ'ɛ -lɛ Zwida Isɩkaliɔtɩ, mɔ-ɔ 'jɩbhɔ-a ngli naa: “Nyininyɔ, sa ɩ -wʋnʋ-ɔ 'mö-a 'mö 'n -n 'yɛ-a -aa 'nyize -najɩ 'ji tuluanɩ, 'n -nn -lɛ-a 'pɩ-ɩ bhë -najɩ 'ji tuluanɩɛ ji 'nɩ?” 23'N Zezwi ji-a ɔ wɛlɩ -gömö -sa, ɔ nɛ: “Nɩkpɛ -ɔ ka'a 'jɩbha, na wɛlɩ ɔ ji-a 'ji zʋɔ, na -Tɩbha 'kɔ-a 'jɩbha, 'n n -yɛ na -Tɩbha 'sɔ 'yɛ-ɛ -ma ɔ 'bhɛyɩ sɛ -glɩ kwla'a ji. 24Nɩkpɛ -ɔ nɩ'ɩ 'jɩbha ɔ'ɔ zʋ -bha na wɛlɩ. Wɛlɩ a -wʋ-ɔ la'a 'nʋ 'le ɩ'ɩ-ɩ -ma na 'mö 'bhönɩ, -Tɩbha la'a -ɔ tia'a-a, ɔ 'mö ɩ 'bhönɩ -bha. 25Bhla n wʋya -bhla 'gbamö, 'dɩ n 'nyɛya-a la'a. 26Zuzu Wlawla -ʋ -yɛ-a kwanɩnyɔ -ʋ -Tɩbha -Lagɔ jiya-a na 'nglɩ 'mö 'yuo 'paa, mʋ-ʋ jiya-a ɩ 'bhuo ngli 'paa, -ɩ 'bhuo n gba-a a de, 'n ʋ 'kaya 'yɛ-a ɩ dlɩ glu -sa. 27-Gömöwlonɔ n tɩya-a yawʋ, na -gömöwlonɔ n nyɛya -bha, n 'nɩya-a 'pɩnɩkpaa swɩ 'mʋ -gömöwlonɔ 'nyɛ. 'Kalɛ 'na-a 'lɩbhaya -nɩ, nganɔ 'na-a 'lɩbhaya 'yɛ -nɩ. 28'Köbhë n gba-a a de a ka 'nʋ 'bhë, sa'a naa: Mö 'le n -wʋ-a 'bhë, n-n ma'a a 'bhɛyɩ nimï ji 'le. A ka'a la 'jɩbha, sa n -wʋ -ma -Tɩbhaa 'bhɛyɩ mö 'lee yɛ 'mʋna jiya la-a 'lɩbhaa, -wʋʋ yɛ-a, -Tɩbha -Lagɔ mʋ-ʋ 'ghli-a mʋ-ʋ zi'i-a 'wʋ. 29'Dɩ n wʋya-a la'a 'nyɛ 'le 'bhë ɩ 'yɛ ji. La ɩ -yɛ jinɩ-ɛ, a 'kɩ dlɩ 'wʋ -ka. 30N'n-a 'mö bhɛlɩ n nyɛya 'sɔ 'yɛ 'dɩɛ -bɛ -sa, -wʋʋ yɛ-a, pɩ la'aa 'bhitɩbha-a ji 'le, ɔ'ɔ -bha na -nɩ -gömö gba 'kikeyie 'bhë -ka. 31-Ma ɩ 'mö, 'pɩ-ɩ bhë 'yɛ sɛ -jɩblɩnɩ naa 'jɩbha n 'jɩbha-a -Tɩbha -Lagɔɔ yɛ, -ɩ ʋ nʋ-a n nʋ 'mɩ n nʋ -bha. A -sɔ 'wʋ, a-a 'bhö-ö la'a -a 'yɛ mö.
Àwon tá yàn lọ́wọ́lọ́wọ́ báyìí:
ZAA 'BƆGƲ 14: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996