ZAA 'BƆGƲ 17
17
Zezwi yɛ ɔ 'wʋbhlinɩngwaa 'wlumö -bɛlɩ 'pa
1Zezwi gba-a wɛlɩ la'a 'bhë-ë, ɔ yɩlɩ-a ghayɩ 'n ɔ ji-a -bɛlɩ 'pa, ɔ nɛ: “-Atʋ, -bha yɛ nyini 'bhë, 'ghlimanɩ -na 'Gu -na 'Gu -kamö 'ghlimanɩ. 2Gba la'a -n 'nyɔ-ɔ -bha nɩkpa 'bhuo -gömöö 'wlumö, ɔ 'yɛ -wa bhuo -n 'nyɔ-a 'ye 'kɔgwlɛpɩ 'nyɛ. 3-Ɩ la'a -ɩ -yɛ-a 'kɔgwlɛpɩ-ɛ, mɩ-ɩ -yɛ-a naa, wa -jɩblɩnɩmö, -nmö -Lagɔɔ -Lagɔ -bhlʋ 'tɩ, 'bhë wa jɩblɩnɩ Zezwi 'Kli -ɔ -n tia-a. 4N yɛ ma'a dʋdʋkpata -gömö -na 'ghlinɔ tulua 'bhë, libho la'a -n nyɛ'ɛ la-a 'ye naa n nʋʋ, n kʋ 'ji bhɩa 'bhë. 5-Sɩka'a-a 'mö, -Atʋ, -ghlimanɩ'ɩ -bha -na yawʋ, 'pɩ 'nɩ-ɛ -bhla sɛ ji 'ghlinɔ la'a n ka la-a -bha -na yawʋ, -nyɛmʋ'ʋ 'ye.
6Ma'a 'pɩ 'wʋ nɩkpa la'a -n -sa-a -bha -n nyɛ'ɛ-a 'ye, n kʋa -nmö -Lagɔ -slʋnʋ 'bhë. -Na -lʋa wa glɩnɩ la -bha 'bhë 'n -n -jimʋ'ʋ-a 'ye 'nyɛ, 'n wa ji-e -na wɛlɩ -bha zʋ. 7-Sɩka'a-a 'mö, wa yɛ sɛ jɩblɩnɩ 'bhë naa, -ɩ 'bhuo -kpö -n nyɛ'ɛ-a 'ye, -ma -na 'mö ɩ 'bhönɩ -bha. 8-Wʋʋ yɛ-a, wɛlɩ -n nyɛ'ɛ la-a, n kʋa 'nyɛ 'bhë, 'n wa jiɩ-a 'wʋ nglu, 'n wa ji-a 'dɛdɛ'ɛ sɛ jɩblɩnɩ naa -ma -na yawʋ n 'bhö-ö -bha, 'n wa kɩ 'yɛ-a dlɩ 'wʋ naa -nmö tia'a -bha.
9-Wa la'a -n nyɛ'ɛ-a 'ye, -na -lʋa wa glɩnɩ -bhaa yɛ, wa yɛ n pa-a -bɛlɩ, n'n 'pɩ-ɩ bhëë yɛ -bɛlɩ 'pa 'le -wʋ. 10-Ɩ 'bhuo -kpö glɩnɩ-ɛ na -li, -na -li ɩ glɩnɩ -bha, -ɩ 'bhuo -kpö glɩnɩ 'yɛ-ɛ -na -li 'n ɩ glɩnɩ-ɛ na -li. -Ma wa 'mö na 'ghlinɔ 'tuluanɩɔ -bha. 11N'n-a 'mö ma'a 'pɩ 'wʋ -wʋ, 'mʋaa -nɩ-ɛ, wa-a ma'a 'pɩ 'wʋ. -Ma -na yawʋ n -wʋ-a ji 'le. -Atʋ -ɔ -wʋ 'wlawla, zʋʋa -ma -na 'nglɩ 'mö 'ji, -wa -n nyɛ'ɛ-a 'ye wa 'yɛ -bhlʋ -wʋ, sa n -nyɛmö 'sɔ -wʋ-a -bhlʋ. 12La n -nyʋa 'sɔ -bhlinɩ la-a 'wʋ-ɔ, -ma -na nglɩ -n nyɛ'ɛ la-aa 'mö n zʋʋ-a 'ji. 'Ji n zʋʋa-aa yɛ, wa gla'aa -bhlʋɔ 'bhë 'nɩ-ɛ 'mʋnɔ, 'n ɛ nɩ -ɔ ji la-a 'mʋnɔ glɩnɩ, wɛlɩ -ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö 'yɛ 'wʋ 'wlenɩɛ yɛ. 13-Sɩka'a-a 'mö, -ma -na yawʋ n -wʋ-a ji 'le. -Wʋʋ yɛ n gba-a wɛlɩ la'a ma'a 'pɩ 'wʋ-ɔ, wa 'yɛ -ma wa 'mö na 'mʋna -a mlinɩ-a 'ji ghlɩɛ yɛ -bha. 14N kʋa -na wɛlɩ 'nyɛ 'bhë, 'n 'pɩnɩkpa jua-a 'jɛbhɛlɩ, wa'a 'pɩnɩkpaa gla'aa -lʋa glɩnɩɛ yɛ, sa na 'bhë 'nɩ-ɛ la'a 'pɩnɩkpaa gla'aa -lɔ glɩnɩ. 15Ɛ'ɛ -lɛ -n 'kʋa ma'a 'pɩ 'wʋ -saa yɛ n -kamö -bɛlɩ 'pa 'le -wʋ, -n 'kʋa ma'a 'pɩ 'wʋ 'ji zʋ, 'Jinylozuzuko jua-a ghlɩɛ yɛ -bha. 16Wa'a 'pɩnɩkpaa gla'aa -lʋa glɩnɩ, sa na 'bhë 'nɩ-ɛ la'a 'pɩnɩkpaa gla'aa -lɔ glɩnɩ. 17-Na wɛlɩ, mɩ-ɩ -yɛ-a 'dɛdɛɛ, zʋnʋʋa -ma 'mɩ 'dɛdɛ'ɛ 'mö 'wlawla, wa 'yɛ -na 'ghlinɔ 'ji yawʋ bhɩanɩ. 18Sa -n tia'a-a ma'a 'pɩ 'wʋ, -sɩbha n tua 'yɛ na-a ma'a 'pɩ 'wʋ. 19Na -nɩ 'bhë, wa yɛ n zʋa-a najɩ 'wlawla wa 'yɛ 'yɛ -nɩ -ma 'dɛdɛ'ɛ 'mö 'wlawla zʋnʋɔ yɛ.
20N'n wa 'nyizee yɛ -bɛlɩ 'pa 'le -wʋ, wa gbagbawɛlɩɛ yɛ -wa la'a -wa ji'i-a dlɩ 'wʋ -kaa, wa yɛ n pa 'yɛ-a -bɛlɩ 'gamö. 21-Atʋ, wa 'bhuo 'yɛ -bhlʋ -wʋ, sa -n -wʋ-ɔ -ma na 'mö 'n n -wʋ-ɔ -ma -na 'mö, wa 'yɛ -sɩbha -ma -aa 'mö -bhlʋ -wʋ, 'pɩnɩkpa 'kɩ dlɩ 'wʋ -ka naa -nmö tia'a -bha. 22'Ghlinɔ -n nyɛ'ɛ la-a n kʋa 'nyɛ 'bhë, sa -a -wʋ-ɔ la'a -bhlʋ wa 'yɛ -sɩbha -bhlʋ -wʋ. 23N 'yɛ -ma wa 'mö -wʋ, -n 'yɛ -ma na -nɩ 'mö -wʋ, wa 'yɛ-a 'mö -bhlʋɔ 'bhë -wʋ tenyi tenyi, 'pɩnɩkpa 'yɛ sɛ jɩblɩnɩ naa -n ka'a tia 'bhë, sa -n -jɩbha'a-a -n kʋa -sɩbha 'jɩbha 'bhë.
24-Atʋ, n 'jɩbha naa, -wa la'a -n nyɛ'ɛ-a ye, la n glɩ-a wa 'yɛ -bha glɩ, wa 'yɛ -na 'ghlinɔ 'ji yawʋ bhɩanɩ. -Wʋʋ yɛ-a, 'pɩ 'nɩ-ɛ -bhla sɛ ji 'n -n ji'i-a 'jɩbha. 25-Atʋ -ɔ slɛnɩ 'mö, 'pɩnɩkpa -nɩmö-ö jɩblɩnɩ, -amöö -nɩ, n -kamö na-a jɩblɩnɩ 'bhë, 'n -mʋa la'a jiɩ 'yɛ-a jɩblɩnɩ naa -n ka'a tia 'bhë. 26N kʋa -nmö -Lagɔ -slʋnʋ 'bhë, -slʋnʋɔ n jua 'yɛ-ɛ -bhla, 'jɩbhajɩbhʋ la'a -n -jɩbha'a-a ʋ 'yɛ -ma wa 'mö -wʋ, n 'yɛ 'yɛ na-a -ma wa 'mö -wʋ.”
Àwon tá yàn lọ́wọ́lọ́wọ́ báyìí:
ZAA 'BƆGƲ 17: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996