MATIEE 'BƆGƲ 23
23
Zezwi nɛ ɔ 'wʋbhlinɩngwa möna -bha 'zwiföaa 'kadɩɛ de 'mö
1'N Zezwi ji-a nɩkpaa -zakpa -wʋ la-a -bha -yɛ ɔ 'wʋbhlinɩngwa 'sɔ 'dɩ 'mö zʋ. Ɔ nɛ: 2“-Lagɔɔ gböö nglipangwa -yɛ falizɩɛ 'sɔ, -bha Moyizɩɛ 'bhle 'wʋ wa glɩ -bha wa 'yɛ nɩkpa -Lagɔɔ gböö zɔmö -slʋnʋɔ yɛ. 3-Ɩ la'a 'bhuo wa paya-a ngli-e, a zʋɩ -bha 'bhë, a'a yɩlɩ wa nʋnʋli 'wʋ -nɩ. -Wʋʋ yɛ-a, -ɩ wa gba-a, wa 'bhï 'nɩ nʋɩ. 4Wa nglipalɩ -bhlee 'gbluku 'kadɩ, wa -kɩɩ sɛ gwa wa -kɩɩ nɩkpa -sulua 'bhë, wa'a nglu wa 'kʋa ɩ -susuie kwanɩ 'kikie 'wʋ. 5-Ma wa nʋnʋli 'bhuo 'mö, wa 'jɩbha 'jie 'kʋa 'wʋ mö. 'N wa cɛlɩ-a -Lagɔbɔgʋ 'möö wɛlɩkïbhï, 'n wa fɩ-a sabhöplebhï 'mö, 'n wa gwanɩɩ-a 'klʋ. -Lagɔ nʋ-ɔ naa wa gwanɩ wa -banɩ -yʋkʋpie 'ji ɩ 'yɛ 'gbëbhï 'ji -kaa yɛ, 'mɩ -sɩbhaa -yʋkʋpie la'a 'bhʋamanɩ wa 'bhʋamanɩɩ-a -nɩ wa 'yɛ wajɩ tuluaa yɛ. 6Wa -yɛ 'pɩpɩ 'wʋ mö, wa -yɛ 'yɛ -ma -Lagɔbudi'i mö, 'yugabhli wa libhï-a 'wʋ. 7Wa 'jɩbha nɩkpa 'kʋa -bha -gwlɩ 'ji bhalɩnɩ, wa 'kʋa 'yɛ -abhitɩbha la. 8Abha na -lʋaa -nɩ-ɛ, a 'na-a nglu wa 'kaya -abhitɩbha la -nɩ. -Wʋʋ yɛ-a, a 'bhuo -dagwie a glɩnɩ -bha, 'n a ka-a 'bhitɩbha -bhlʋ. 9A 'na-a la 'yɛ ma'a dʋdʋkpata -gömö kabönɩkpɛ a -tɩbha -nɩ. -Wʋʋ yɛ-a, -Lagɔ -ʋ -wʋ-ɔ -ma -Lagɔtapɛ'ɛ ʋ -bhlʋ tɩ-ɩ -yɛ-a a -tɩbha. 10A 'na-a nglu wa 'kaya nyininyiningwa la -nɩ. -Wʋʋ yɛ-a, Puanyɔ -ɔ -Lagɔ -sa-a -bha, ɔ -bhlʋ 'tɩ mɔ-ɔ -yɛ-a a Nyininyɔ. 11-Ɔ -yɛ-a a nyɩdɩɛ 'kadɔ, mɔ-ɔ ji-a nyɩgbajʋlʋ zʋɔ. 12-Ɔ la'a -ɔ -yɛ ɔjɩ 'kadɔ wlu 'mö 'wʋ 'libhinɩ-ɛ, sɛ -Lagɔ jio-a nyinianɩɛ, -ɔ -yɛ ɔjɩ sɛ nyinianɩ-ɛ, 'mɔ -Lagɔ ji-a 'kadɔ 'wʋ zʋa.
Zezwi yɛ -Lagɔɔ gböö nglipangwa -yɛ falizɩɛ 'sɔ wɛlɩ gbanɩ
13Abha -Lagɔɔ gböö nglipangwa -yɛ falizɩɛ 'sɔ, abha 'kwlɩsɔkangwa, a nʋ ngazɩli. -Wʋʋ yɛ-a, nɩkpa a sa-a -Lagɔɔ nyininyinipɩɛ 'yuogblʋ'ʋ. A 'bhï 'nɩ pla -ma, nɩkpa -wa 'jɩbha-a wa 'yɛ -ma pla, 'n a kla-a wa 'yuogblʋ. [ 14Abha -Lagɔɔ gböö nglipangwa -yɛ falizɩɛ 'sɔ, abha 'kwlɩsɔkangwa, a nʋ ngazɩli. -Wʋʋ yɛ-a, 'kuzlengwlɩ a li-a 'mö. 'Jie 'kaya 'wʋ möö yɛ, 'n a pa-a -bɛlɩ -vʋkɔ. Ɩ yɛ a -zijle 'mö a ji-a 'tɛ-ɛɛ.]
15Abha -Lagɔɔ gböö nglipangwa -yɛ falizɩɛ 'sɔ abha 'kwlɩsɔkangwa, a nʋ ngazɩli. -Wʋʋ yɛ-a, -gwlɩ 'bhuo a binɩ-a 'wʋ 'n a 'nama-a nɩkpa -wa ji-a a -zakpa 'möö -lʋa zʋɔ. A -yɛ -sɩbhaa -lɔ -bhlʋ ghlɩ, ɔ 'wlumö a nyimanɩ-a 'ji, 'n ɔ zʋ-a a 'bhïë bhla 'kɔgwlɛkosu'uo mömönyɔ.
16Abha 'lɔkpɔlɔkpɔngwa -ganɩ-a nɩkpa 'yu, a nʋ ngazɩli. A nɛ: Nɩkpɛ -yɛ -Lagɔbudu 'kadʋ 'mö zlugonʋ 'bhë ɔ nɩ -bha ɔ nglie wɛlɩ zʋ-ɔ, ɩ'ɩ nʋ -lu. Nɩkpɛ -yɛ -ma -Lagɔbudu 'kadʋ 'möö lɔlʋ 'mö zlugonʋ, -ɩɩ yɛ ɔ zlugo-a, ɔ nʋɩ tɛnyɩ. 17-Batibatingwayi, -lɔkpɔ a 'lɔkpɔ-ɔ -bha. -Lagɔbudu 'kadʋ -ʋʋ yɛ lɔlʋ glɩnɩ-a -Lagɔɔ 'nyizee -lu, ʋ -yɛ lɔlʋ 'sɔɔ do'o 'manɩ ka-a dlɩ yɛ 'nɩ? -Ʋ wa zʋ-ɔ -bha 'tabhle la'a 'klʋ yɛ wa 'kʋ -Lagɔ bʋbɔnʋɔ yɛ, nɩkpɛ -kʋʋ 'mö zlugonʋ, -ɩɩ yɛ ɔ zlugo-a, ɔ nʋɩ tɛnyɩ. 18A nɛ 'yɛ naa: 'Tabhle wa bʋbɔnʋ-a 'klʋ nɩkpɛ -kaa 'mö zlugonʋ 'bhë, ɔ -yɛ -bha ɔ nglie wɛlɩ -sa, ɩ'ɩ nʋ -lu. 19'Lɔkpɔlɔkpɔngwayi, bʋbɔnʋlu wa zʋ-ɔ -bha 'tabhle 'klʋ yɛ -yɛ 'tabhle -aa 'bhëë yɛ -lu la'a glɩnɩ-a -Lagɔɔ 'nyizee -lu 'sɔɔ do'o -mʋ ka-a dlɩ yɛ 'nɩ? 20Sa'a n gba-a naa: Nɩkpɛ -yɛ 'tabhle -aa 'klʋ wa zʋ-a bʋbɔnʋlu yɛ 'mö zlugonʋ, -lu wa zʋ-ɔ -bha a 'klʋ yɛ wa 'kʋ -Lagɔ bʋbɔnʋ 'mʋ ɔ zlugonʋ-a 'mö 'gamö. 21Nɩkpɛ -yɛ -Lagɔbudu 'kadʋ 'mö zlugonʋ-ɔ, -Lagɔ nyinʋʋ -bhaa yɛ 'mʋ ɔ zlugonʋ-a 'mö 'gamö. 22Nɩkpɛ -yɛ -Lagɔtapɛ 'mö zlugonʋ-ɔ, -Lagɔɔ glɩglɩbhɛyɩ -bhaa yɛ, ʋ 'bhë 'mʋ ɔ zlugonʋ-a 'mö.
23Abha -Lagɔɔ gböö nglipangwa -yɛ falizɩɛ 'sɔ, abha 'kwlɩsɔkangwa, a nʋ ngazɩli. -Wʋʋ yɛ-a, -li 'bhuo a ghlɩ-a, zapʋɔ 'möpalɩli 'kikiee -dlinɩkugbïa pa a nyɛ-a -Lagɔ 'bhë, -kpööwʋwʋɛ, ngazɩdlɩkakɩɛ -yɛ 'möslɛnɩslɛnɩɛ 'sɔ -ɩ ka-a -ma -Lagɔɔ gbö 'mö dlɩ yɛ, 'n a tɩɩ-ɛ -bha. -Ɩɩ 'bhï a 'yɛ la-a 'yu -ganɩ 'bhë a 'yɛ -mɩbha nʋ mɩ-ɛ -la. 24Abha 'lɔkpɔlɔkpɔngwa -ganɩ-a nɩkpa 'yu, 'mö a möna-a a ji-e -mizimizijeyi möna-a yɛ, 'bhë 'n a möna-a -sʋkʋ 'kadʋ.
25Abha -Lagɔɔ gböö nglipangwa -yɛ falizɩɛ 'sɔ, abha 'kwlɩsɔkangwa, a nʋ ngazɩli. -Wʋʋ yɛ-a, -dakɔ -yɛ 'bëë 'sɔɔ ku yawʋ a wɔlʋ-a, 'bhë 'n a tɩɩ-a pɩ 'mö. -Sɩbha a tɩ-ɛ -ma a dlɩa zɔmö -dabhli -yɛ nyanɩ 'sɔ. 26Falizɩɛyi -ɔ 'lɔkpɔ-ɔ, plɛtɛ -lɛ -ma -dakɔ 'mlɩ 'bhë, ʋ ku yawʋ 'yɛ 'wlala zʋ.
27Abha -Lagɔɔ gböö nglipangwa -yɛ falizɩɛ 'sɔ, abha 'kwlɩsɔkangwa, a nʋ ngazɩli. Tlitlilesikpï -ɩ 'pɔnʋ-aa swɩ'ɩ a -wʋ -bha. Ɩ ku yawʋ-ɔ 'wlala 'bhë -ma ɩ 'mö -wʋ-a -vlecelii, 'n -gazɩɛ 'kɔ -yɛ zɛzɛli 'bhuo 'sɔ ye-e -ma. 28-Sɩbha a -wʋ -bha, nɩkpa kaya 'wʋ yɩlɩ-ɛ, wa -tɔnʋ cɛ a -ga, -mɩlado'o -ma a dlɩa zɔmö 'kwlɩsɔkakʋ -yɛ 'jinyloli 'sɔ-ɔ ye-e -ma.
29Abha -Lagɔɔ gböö nglipangwa -yɛ falizɩɛ 'sɔ, abha 'kwlɩsɔkangwa, a nʋ ngazɩli. -Wʋʋ yɛ-a, -Lagɔɔ 'mögbanɩngwaa lesikpï a tli -bha. Nɩkpa -wa nʋ-a -Lagɔɔ dlɩyawʋnanɩli 'n a cɛlɩ-a wa lesikpï. 30'N a nʋ-a, -a -yɛ la -aa -lowlengwaa -lowlengwaa do'o -bhlɩ-ɛ, -a -nyʋa 'sɔ 'na la go 'panɩ -a 'yɛ -Lagɔɔ 'mögbanɩngwa 'lɩbha. 31-Ma a gbagbawɛlɩ 'mö ajɩ a -wʋ-a gbʋ köbha-a 'le naa, -wa 'lɩbha la-a -Lagɔɔ 'mögbanɩngwa, wa 'gwie a glɩnɩ -bha. 32Ɩ yɛ, a bhɩa-a 'mö a -lowlengwaa libho 'ji. 33'Mʋtɩmabhönɩkpayi, sa a ji-a 'jinylolie nʋnʋngwaa -kosu ngli 'mö 'wlʋwlʋnʋɔ 'nɩ? 34Ɩ yɛ n nyɛya-a 'dɩ naa: -Lagɔɔ 'mögbanɩngwa, gbʋjingwa -yɛ -wa 'pa-a 'jinanɩswɩ'ɩ -Lagɔwɛlɩ ngli 'sɔ 'mʋa n jiya-a 'wʋ tia. -Mʋmʋa a ji-a 'wlu 'wʋ -dɩɛ, a 'yɛ-a -mʋmʋa swi 'klʋ kʋnʋ, a 'yɛ-a -mʋmʋa -ma a -Lagɔbudi'i 'sɛlɩnɩ, -gwlɩ -mɩɩ -gömö wa -yɛ -gunʋ, 'n a 'kʋa-a -ma 'zwɩ zianɩ. 35-Sɩbha a ji-a nʋɔ, nɩkpa la'a 'bhuo -wa 'nɩ-a -lu nʋ a -lowlengwa 'lɩbha-a gboko 'mö, wa 'lɩbhalɩbhagbʋ 'kaya -gömö -wʋ. Nɩkpa 'bhuoo -tɩbha Adaa 'gu Abɛlɩ -ɔ nʋ la-a -Lagɔɔ dlɩyawʋnanɩli, tɛnɩ ɔ 'lɩbhalɩbhade, Balasie 'gu Zakali, wa 'lɩbhanɩ-ɛ -ma -Lagɔkʋkwa 'mö, -bha 'pɩɛ bʋbɔnʋde -yɛ -ma -Lagɔbudu 'kadʋ 'sɔɔ nyɩdɩ -n 'yɛ ɔ de nyini-e, 36-Lagɔnɩkpa la'a 'bhuo wa 'lɩbha-a, 'dɩɛ -dɩ n nyɛya -bha naa: Abha -sɩka'aa nɩkpa wa 'lɩbhalɩbhagbʋ ji-a -gömö -wʋɔ.
Zezwi yɛ Zelwizalɛmöö gbʋ 'mö wi
37Zelwizalɛmö, Zelwizalɛmö, -nmö lɩbha-a -Lagɔɔ 'mögbanɩngwa 'kɔmʋʋ, nɩkpa wa -tiamö-a 'wʋ -nmö 'lɩbhanʋa-a kpïaku nya. Sa nunu 'nɩ-ɛ la'a ʋ 'gwie -këpï zɔmö 'pa, -sɩbha na dlɩ 'jɩbha-a 'kɔmʋʋ n 'yɛ -na 'gwie 'wlu 'titanɩ, 'bhë a 'nɩɩ-ɩ 'wʋ nglu. 38A yie, -Lagɔ yɛ a 'gbë 'mö 'wlʋ 'bhë, a 'sokoo 'nyize ji-e -bha tʋ-ʋɔ. 39-Wʋʋ yɛ-a, a 'na ka'a-a 'mö -bhla yɩlɩ, la a ji-a 'ylɩ -bhlʋ gbanɩɛ naa: -Ɔ jinɩ-ɛ la'a -aa Nyininyɔ -Lagɔɔ 'nglɩ 'mö, -Lagɔɔ 'bhë 'pɔ 'nyupalɩ 'n -bha 'yɛ-a nyini.”
Àwon tá yàn lọ́wọ́lọ́wọ́ báyìí:
MATIEE 'BƆGƲ 23: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996