MATIEE 'BƆGƲ 8
8
Zezwi yɛ 'lalʋlɩbhanyɔ -bhlʋ göpö
1-Gɔgɔgbʋ -ʋʋ 'klʋ Zezwi -gbla la-a ɔ kwli-e -ma, 'n nɩkpa -bebe jio-a 'bɩ bhlinɩ. 2'N 'lalʋlɩbhanyɔ -bhlʋ jio-a yawʋ nyini, ɔ 'pa-a -bha ɔ dlɩ'ɩ -kokomunigbö glu, 'n ɔ jio-a -bɛlɩ 'pa, ɔ nɛ: “Nyininyɔ, n -bhiamö yawʋ -göpö'ö, n -ji sɛ naa -n bhɛlɩ -n ka'a göpö.” 3Ɔ gba-a sa'a, Zezwi plu-a sɔ 'mö, 'n ɔ jio-a cɛ zʋ. Ɔ nɛ: “N yɛ nglu 'bhë, 'pʋ.” -Bha -gaganɩlɩ'ɩ 'n 'lalʋ ji-a nɩkpɛ la'a ku 'mö bhɩa. 4'N Zezwi jio-a 'dɩ 'nyɛ naa: “-N -yɛ mö -nn -sanɩ -na 'pʋpʋdɩ nɩkpɛ -nɩ. Mö -n 'yɛ -najɩ -Lagɔbʋbɔnyɔ 'ji tuluanɩ, sa -n -wʋ-ɔ 'mö-a -sɩka'a ɔ -kɩɩ yɩlɩ 'bhë-ë, bʋbɔnʋli Moyizɩ nʋ la-a naa 'lalʋlɩbhanyɔ -yɛ 'pʋ ɔ bʋbɔnɩɩ ɔ 'yɛ 'wlala zʋ, -n 'kɩ bʋbɔnʋ nɩkpa 'bhuo 'yɛ sɛ -ji naa -n yɛ 'pʋ 'bhë.”
Zezwi yɛ 'slʋjaa 'bhitɩbha -bhlʋɔ nyɩgbajʋlʋ göpö
5'N Zezwi ji-e -ma Kapɛnaɔmö mö. Ɔ nyini-e -ma, 'slʋjaa 'bhitɩbha -bhlʋ nyiniɔ-a yawʋ, 'n ɔ jio-a -bɛlɩ 'pa, ɔ nɛ naa: 6“Nyininyɔ, n -bhiamö yawʋ ji'i 'wʋ, na nyɩgbajʋlʋ -bhlʋɔ -li kalɩ-a ya'a tenyi, ɔ nɩma 'bhuo yawʋ ɩ 'bhlio-o -bha.” 7Zezwi nɛ: “N kɩ 'nʋ 'bhë, -a mö n 'kɔ göpö.” 8Nɩkpɛ nɛ: “Nyininyɔ, -n 'yɛ -ma na 'ligbë'ë pla n 'nɩ 'wʋ -ngwa, gba wɛlɩköbhë -bhlʋɔ 'nyize na nyɩgbajʋlʋ ji 'pʋ. 9-Wʋʋ yɛ-a, na 'bhë n -ji nyininyini bhle'e. La n glɩ-ɛ la'a, n ka 'bhitɩbhangwa, 'n n nyini 'yɛ-ɛ na-a -mʋmʋa. Na -lʋa n nyini-a, n -yɛ -bhlʋ 'dɩ 'nyɛ naa mö, mö ɔ mö -bha, n -yɛ -mʋmɔ 'dɩ 'nyɛ naa ji, ji ɔ ji -bha. N -yɛ na nyɩgbajʋlʋ 'dɩ 'nyɛ naa nʋ sa'a, -sɩbha ɔ nʋ -bha.”
10Zezwi 'nʋ-a nɩkpɛ la'aa nglie wɛlɩ-ɛ, ngli-i mönɔ -bha. Ɔ gö-a nɩkpa -wa -ganɩɔ la-a 'ji, ɔ nɛ -bha wa de naa: “'Dɩɛ -dɩ n nyɛya -bha naa: Sa nɩkpɛ -la ka-a -Lagɔ dlɩ 'wʋ, -ma Izlayɛlɩɛ ngëyi 'möö nɩkpa gla'a, n'n -lɛ -bhla -sɩbhaa nɩkpɛ yɩlɩ. 11-Ma ɩ 'mö, sa'a n gba-a a de naa: -Ma 'ylʋɔ gluwlʋnʋbhɛyɩ -yɛ -ma ʋ bhlinɩbhɛyɩ 'sɔ, nɩkpaa -bɛ ji-e -ma 'bhönɩɛ wa 'yɛ -ma -Lagɔɔ nyininyinipɩ 'wʋ mö, wa -yɛ Ablaamö-ö, Izakö -yɛ Zakɔpö 'sɔ 'yɛ-a -ma debhlʋ linɩ. 12-Waa bhï-ï 'sɔ-ɔ la-a -bha wa 'yɛ -ma 'bhle ghlɩɛ yɛ, wa gla'aa -mʋmʋa -ma 'pɩɛ 'misikpoko 'mö wa jua-a 'paa, wa 'yɛ-a -ma winɩ, wa 'yɛ-a gla 'mö li.” 13Zezwi gba-a sa'a 'bhë-ë, ɔ nɛ -bha 'slʋjaa 'bhitɩbha la'aa de naa: “Mö 'ligbë'ë, -Lagɔ -n ka-a dlɩ 'wʋɔ yɛ -ɩ -n 'jɩbhanʋ-a 'wʋ ɩ ji-a 'wlenɩɛ.” -Bha -gaganɩlɩ'ɩ -ma 'ligbë'ë, n nyɩgbajʋlʋ ji-a 'pʋ.
Zezwi yɛ nɩkpa -bebe göpö
14Zezwi 'bhö-ö -bha, 'n ɔ -yɛ ɔ 'wʋbhlinɩngwa 'sɔ ji-e -ma Piɛlɩɛ 'ligbë'ë mö. Wa nyini-e -ma, Piɛlɩɛ 'wʋtanglɔ ka wotloko -gömö, ɔ pö -bha dʋdʋ'ʋ 'n wa jio-o -bha ghlɩ. 15Zezwi zʋ-a nglɔ la'aa kɔtɩkpa cɛ, 'n wotloko jio-a -gömö 'bhö-ö. Ɔ -sɔ-a 'wʋ 'n ɔ jua-a 'wʋ pi.
16-Dudo'o nyini-a, 'n wa jio-a 'jinylozuzukuo -gömökangwa -la. 'N ɔ ji-a 'jinylozuzuku la'a ɔ nglie wɛlɩ nya kpëtinɩ, 'n ɔ ji 'yɛ-a guzungwa 'bhuo göpö. 17Ɩ 'plɩ-ɛ -sɩbha, -ɩ -Lagɔɔ 'mögbanɩnyɔ Ezayi gba la-a Zezwie yɛ ɩ 'yɛ 'wʋ 'wlenɩɛ yɛ -bha. Sa'a ɔ gba la-a naa:
“Puanyɔ -ɔ -Lagɔ -sa-a -bha,
mɔ-ɔ -saya-a -aa gwi 'mö,
mɔ-ɔ -saya-a nɩmalɩ.”
Sa Zezwi gba-a nɩkpa sɔ -wa nʋ-a wa 'kɔ -ganɩɛ de
18'Ylɩ -bhlʋ Zezwi-e -bha Galilee 'nyibada yawʋ, nɩkpaa -bebe -wa su-o -bha ɔ yawʋ ɔ yɩlɩɔ-a, 'n ɔ ji-a ɔ 'wʋbhlinɩngwa 'dɩ 'nyɛ naa: “A-a mö -ma 'nyie kïkë -mabha -gömö.” 19Ɔ kɩ ngli 'n -Lagɔɔ gböö nglipanyɔ -bhlʋ jio-a yawʋ nyini, ɔ nɛ naa: “-Abhitɩbha, de 'bhuo ma -n ji-a möö -ganɩɛ n -jimö -bha.” 20Ɔ gba-a -sɩbha, Zezwi nɛ naa: “-Gëtizleyiaa 'bhï ka ɩ 'mögʋdʋɩ, 'zɩ ka ɩjɩɛ 'lʋlʋɩ, la Nɩkpɛɛ 'Gu 'yɛ-a -nɩ sɛ glɩ-ɩ ɔ 'yɛ nyɛpɛ, ɔ'ɔ -bha -ka.” 21-Wa -ganɩɔ-aa gla'a nɩkpɛ -bhlʋ nɛ -bha ɔ de naa: “Nyininyɔ, n -jimö -ganɩ 'bhë-ë, na -tɩbha tlɩ -bha, nglu n 'kɔ zʋɔ mö 'bhë n 'yɛ ji.” 22Zezwi nɛ naa: “'Tati -gazɩ 'ji ɩ 'yɛ ɩ ligazɩ zʋ. -Nmöö -nɩ-ɛ, ji'i 'bɩ.”
Zezwi yɛ -podie 'nɩgbanɩ
23Zezwi gba-a sa'a ɔ de 'bhë-ë, ɔ -yɛ ɔ 'wʋbhlinɩngwa 'sɔ -gbla-a 'gɔlʋ 'mö 'n wa ji-a mö. 24Wa-a -bha 'nyi 'klʋ 'n -podie ji-a ji, ɛ 'mötɛnɩ yɛ 'n 'nyugbɔkɔlɩ ji-a 'gɔlʋ yena. Zezwi-e la -nɩ ngɔmö 'le. 25Ɔ 'wʋbhlinɩngwa nyini-e -bha ɔ yawʋ 'n wa jio-a gala, wa nɛ: “Nyininyɔ, -jiya 'wʋ! -Abha tlɩ -bha!” 26Zezwi nɛ naa: “'Manɩɛ yɛ a nganɩ-a 'nɩ? A -Lagɔɔ dlɩwʋkakʋ 'nɩ -zu.” Ɔ -sɔ-a 'wʋ 'n ɔ ji-a -podie -yɛ 'nyi 'sɔ 'wliyawʋ 'kpönɩ, 'n ɩ ji-a 'wʋ donʋ, 'n 'nyi 'klʋ ji-a blenyi zʋ. 27Wa 'bhuo 'n ngli jua-a möna, wa nɛ: “'Wuë! Nɩkpɛɛ -mɔ 'mö-ö -la -nɩ, -ɔ -podie -yɛ 'nyi 'sɔ zʋ-ɔ -sa -bha 'nɩ?”
Zezwi yɛ nɩkpa 'sɔ 'jinylozuzuku -gömö kpëti
28Wa nyini-e -ma 'nyie 'kïkë -mabhaa -gömö, -ma Gadalaa dʋdʋkpata -gömö, nɩkpa 'sɔ 'bhönɩ -ma lesikpï 'mö 'n wa ji-a Zezwi 'yuo ji. 'Jinylozuzuku wa ka-a -gömö, wa -yaakalɩ yɛ, 'yuogblʋ -ʋʋ 'wʋ wa -wʋ-a, -bɛ 'nɩ 'plɩnʋ la 'wʋ. 29Wa nyini-e -bha Zezwi yawʋ 'n wa ji-a 'mö 'kpö, wa nɛ: “-Lagɔɔ 'Gu Zezwi, 'manɩ -a -nyɛmö 'sɔ ka-a nyɩdɩ 'nɩ? La -Lagɔ -dɩ la-a -bha 'nɩ-ɛ -bhla nyini 'n -n -jiya-a yʋlʋa kwla'a jie?” 30La Zezwi ghlɩ-a nɩkpa la'a, -bhaa 'yude kokotiaa -zakpa-a la -bha 'wʋ li 'le. 31'Jinylozuzuku -ɩ -wʋ la-a nɩkpa la'a -gömö, 'n ɩ ji-a Zezwi -bɛlɩ 'pa, ɩ nɛ naa: “-A -bhiamö yawʋ, -n -kaya kpëti, -tatiya 'ji -a 'yɛ -ma kokotia -la 'mö pla.” 32Ɔ nɛ: “A mö a 'kɩ 'mö pla.” Ɩ 'bhö-a nɩkpa la'a -gömö, 'n ɩ ji-e -ma kokotia la'a 'mö pla. 'Mɩ kokotia la'a-a gua 'le 'n ɩ ji-e -ma -gɔgɔ 'klʋ 'bhö-ö, 'n ɩ ji-e -ma 'nyi 'mö bhlinɩ, 'n ɩ ji-a tlɩ. 33Ɩ ngokʋngwa yɩlɩ-a -ɩ la'a, wa fito-a 'n wa ji-a glɔ'ɔ mö, -ɩ bhuo-o 'plɩ-a, sa 'jinylozuzukuo -gömökangwa la'a 'sɔ 'pʋpʋnʋ-a 'mö, 'n wa ji-a ɩ 'tɩtɩ -sa. 34-Ma gbë la'a 'möö nɩkpa 'bhuo 'nʋɩ-a, wa -sɔ-a 'wʋ 'n wa ji-a Zezwi 'yuo mö, wa -nyɔɔ gbënɩ-a, 'n wa jio-a yawʋ bhia naa ɔ 'bhö-ö -ma wa dʋdʋkpata -gömö.
Àwon tá yàn lọ́wọ́lọ́wọ́ báyìí:
MATIEE 'BƆGƲ 8: BNT96
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bete New Testament © Bible Society of Côte d'Ivoire 1996