ZLI VIRZI Ɓi madiɗa madiɗa ngi raˀa
Ɓi madiɗa madiɗa ngi raˀa
Ɗerewol mudumbuŋ ngir ɓimutoho, a zilaka «Zlivirzi.» Asi miga duniya ati mbur titira dumbuŋ na, maslufa ndra ɓi nah i naŋ. Yo i lumaka ɓi ngi mizli Israyeleye anga ma.
Ɗerewol misenna a wuɗuk a wuzla cuw:
Sapitr 1-11: Anga na, a wuɗ ɓa i slaka wala ngi duniya, ndra misi anga hana. Mbur i waka? Li naŋ ar duniya i wanaka? Ngiɓiˀay ar wala ngi mizli i gwat mizaˀã le ndrehhe vur mike? Mitisl vur ɓi nah ada kwa mbrike? Ɓi micah mudumbuŋ ngi ɗerewol Zlivirzi hana, a mbiɗi di i mi ngi cufuɗ tayna: ɓi ngi mbur mizile ati ngwas, ti di Bumbulvuŋ miga taŋ zleˀe (1-2); taŋ muwuɗkam ati Bumbulvuŋ (3); ɓi ngi Kayẽ ati Abel (4); ɓi ngi Nowe ati ɓi ngi mekepel madiɗa misirta duniya (6-9); ɓi ngi hay suburo a Babel (11). Gwat muslufa ɓi taŋ tayna, ar mbur titira maslufa hin malla vi na, hin naŋ anta ti ɗuv, naŋ kahana kahana gisiŋ gu ta.
Sapitr 12-50: A slufa ndra ɓi ngi Bumbulvuŋ muvula ɓi ngi lahavu da mburu, naŋ mizila dideˀ ngi Israyel mudumbuŋhoy ng’ar slra naŋ. Kaɓa ani: Abraham (12.1—25.18), mbur mupuɗaw asi naŋ mitiɓa Bumbulvuŋ le ati naŋ micinaŋ mi na, a bigi le, naŋ i mbur ɓa a sipaka sar naŋ. Yo mangal naŋ Izak, dideˀ naŋ Zakop, micakaŋ slimiɗ Israyel ma (25.19—36.43). Zozef (37.1—50.26) mangal ngisi ziri mizile ngi Zakopoy, naŋ dideˀ ngi sukwi cuw, miga ɓa Zakop ati ziri naŋ mizile mekelemey ati hay taŋhay gar a ram nga Ezipte, i naŋ vuna.
Wãˀ naŋ na, ɗerewol zlivirzi a dubuna ndra di dumbuŋ i ɓi ngi gwat Buymisemuŋ miga taŋ. A zli ti ɓi ngi Buymisemuŋ miga si gazlavay kuɗgulum, slra mibiga Buymisemuŋ i madiɗa, amma nah gar na, i gwat ngi si haŋ naŋ. Ɗerewol a kiɗ mi ti ɓi Buymisemuŋ miɓa ɗaˀ le, n’anta sa pula mizli naŋ Israyeleye ta. Asi gazlavay kurzluˀ, mbur mihirnga i Buymisemuŋ: a biga vu da mizli naŋhaya, a ga taŋ kiita, a ka taŋ mbuŋ waɗ a jina taŋ, yo a ɗiya ɓi taŋ ma.
Gwat Buymisemuŋ mawuɗ ɓa mizli a makaŋ di ya so na, anja a tiɓakaŋ, a tiɓaka ɓi naŋ miɓa ɗaˀ le na, yo ɓimuɗuva ati ɓimujuwa naŋhay na, anja a jaka taŋ a hirnga.
Ɗerewol misenna a lumo ɓi ngi sirik magala ngi Israyeley, ɓa ngi biga mizli tayna mingiram ar tiɓi, yo ɓa ngi jina taŋ a jaka tiɓi a mevele kuy kuy.
Àwon tá yàn lọ́wọ́lọ́wọ́ báyìí:
ZLI VIRZI Ɓi madiɗa madiɗa ngi raˀa: BEGDC
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible en Langue Guiziga © L’Alliance Biblique du Cameroun, 2011.