VAKATEKIVU 1
1
Na i Tukutuku ni Veibuli
1Ena i vakatekivu, ena gauna a bulia kina na lomalagi kei na vuravura na Kalou; 2a se lala tu na vuravura ka sega ni dua na kena i tuvaki. E a butobuto tu na dela ni wai, ka sa yavavala yani na Yalo ni Kalou#1.2 na Yalo ni Kalou; se na kaukauwa ni Kalou; se na cagi mai vua na Kalou; se na i cegu ni Kalou. ena dela ni wai. 3Sa qai kaya na Kalou, “Me rarama mai”; a sa rarama mai.#2Kori 4.6 4Ia ni sa raica na rarama na Kalou ni sa vinaka, sa qai tawasea na rarama mai na butobuto. 5Sa vakatoka na rarama me “Siga” kei na butobuto me “Bogi.” Ia na yakavi kei na mataka sa kena i matai ni siga. 6A sa kaya na Kalou, “Me tu na maliwa lala me wasea na wai, ka dui biubiuti rau.” A sa yaco me vakakina.#2Pita 3.5 7A sa bulia na maliwa lala na Kalou, a sa wasea kina na wai e cake mai na wai e ra; a sa yaco me vakakina. 8A sa vakatoka na vu ni maliwa lala e cake na Kalou me “Lomalagi.” Ena yakavi kei na mataka sa kena i karua ni siga.
9A sa kaya na Kalou, “Me soqoni vata na wai e ra ena dua na yasana, ka me votu mai na vanua mamaca.” A yaco me vakakina. 10A sa vakatoka na vanua mamaca me “Vuravura”, kei na wai sa soqoni vata mai me “Wasawasa.” A sa raica na Kalou na ka sa bulia ni sa vinaka.
11A sa kaya na Kalou, “Me ra tubu mai ena qele na veimataqali kau kecega, na co, na kau vakasorena kei na kau vuata.” A sa yaco me vakakina. 12A sa vakatubura na qele na veimataqali kau kecega, na kau vakasorena kei na kau vuata. A sa raica na Kalou na ka sa bulia ni sa vinaka. 13Ia na yakavi kei na mataka sa kena i katolu ni siga.
14A sa kaya na Kalou, “Me basika na vu ni rarama ena maliwa lala me wasea na siga mai na bogi, ka me ra vakatakila na gauna e tekivutaki kina na veigauna bibi eso, na siga, kei na yabaki. 15Era na cila tu ena maliwa lala ka vakararamataka na vuravura;” a sa yaco me vakakina. 16A sa bulia e rua na vu ni rarama lelevu na Kalou, na matanisiga me lewa na siga kei na vula me lewa na bogi; a sa bulia talega na veikalokalo. 17A sa vakatikori rau na Kalou ena maliwa lala me vakararamataka na vuravura, 18ka me rau lewa na siga kei na bogi, ka wasea na rarama mai na butobuto. A sa raica na Kalou ni sa vinaka. 19Ia na yakavi kei na mataka sa kena i kava ni siga.
20A sa qai kaya na Kalou, “Me ra tubu vakalevu mai ena loma ni wai na veimataqali ka bula, ka me ra veivukayaki na manumanu vuka ena loma ni macawa.” 21O koya oqo sa bulia kina na Kalou na ika lelevu ni wasawasa, na veika bula kecega e wai, kei na manumanu vuka kecega. A sa raica na Kalou ni sa vinaka. 22Sa qai vosa vakalougatataki ira na Kalou, ka kaya, “Mo ni vuavuai ka tubu me vuqa mai na veika bula e loma ni wai ka vakatawa na wasawasa, ka mo ni tubu talega na manumanu vuka mo ni lewe vuqa.” 23Ia na yakavi kei na mataka sa kena i kalima ni siga.
24A sa kaya na Kalou, “Me qai vakatubura na vuravura na veimataqali manumanu kecega: o ira era sa manoa kei ira era sa kila, na ka lelevu se lalai;” a sa yaco me vakakina. 25A sa bulia na Kalou na veimataqali manumanu kila kecega kei na veimataqali manumanu manoa kecega, kei na veika kecega sa qasi voli ena dela ni vanua; a sa raica na Kalou ni sa vinaka.
26A sa kaya na Kalou, “Me tou bulia na tamata e na kedatou i yaloyalo, ka me ucui kedatou. Era na lewa na ika ni wasawasa, na manumanu vuka, na manumanu manoa kei na manumanu kila kecega, na ka lelevu kei na ka lalai.”#1Kori 11.7 27A sa bulia na tamata na Kalou, me ucui koya. A sa buli rau na tagane kei na yalewa,#Maciu 19.4; Mari 10.6 #Vteki 5.1-2 28ka sa qai vosa vakalougatataki rau ka kaya: “Mo drau vakaluveni ka tubu me lewe vuqa ka vakatawai vuravura, ka lewa. Au sa solia vei kemudrau mo drau lewa na ika, na manumanu vuka, kei na veimataqali manumanu kecega sa bula voli e dela i vuravura.” 29A sa kaya na Kalou, “Raica au sa solia vei kemudrau na veimataqali co vakasorena e laukana kei na kau vuata kecega e dela i vuravura me kemudrau kakana. 30Ia, au sa solia talega na co drokadroka me kedra kakana na manumanu kecega, na manumanu vuka kei na veika bula kecega sa qasi voli e vuravura” a sa yaco me vakakina. 31A sa raica na Kalou na ka kecega a bulia ni sa vinaka sara. Ia na yakavi kei na mataka sa kena i kaono ni siga.
Àwon tá yàn lọ́wọ́lọ́wọ́ báyìí:
VAKATEKIVU 1: FNV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Fijian New Version Bible, Revised Edition © Bible Society of the South Pacific, 2017, 2021.