VAKATEKIVU 17
17
Na Cilivi me Vakatakilakilataka na Veiyalayalati
1Ena gauna sa yabaki 99 kina o Eparama, a sa rairai vua ko Jiova ka kaya, “Oi au na Kalou Kaukauwa.#17.1 Vakaiperiu El Shaddai Mo vakarorogo vei au ka mo kakua sara ni cala e mataqu. 2Au na cakava na noqu veiyalayalati kei iko ka vakalewevuqataka na nomu kawa.” 3A bale ka cuva sobu vakatoboicu o Eparama, a qai kaya vua na Kalou, 4“Sai koya oqo na veiyalayalati au na cakava kei iko. O na yaco mo tamadra na veimatanitu e vuqa. 5Sa na sega ni vakatokai me yacamu o Eparama, ia sa na yacamu o Epara-ama,#17.5 Epara-ama: Na yaca oqo e balebale vakaoqo “na tamadra na veimatanitu” ena vosa vakaiperiu. ka ni'u sa vakayacori iko mo tamadra na veimatanitu e vuqa.#Roma 4.17 6Au na vakalewevuqataka na nomu kawa, era na tubu talega mai vei iko na tui eso, era na tubu mai vei ira na nomu kawa na veimatanitu.
7“Au na vakayacora na ka au sa yalataka vei iko kei ira na nomu kawa ena nodra veitabatamata era na muri mai me veiyalayalati tawa mudu. Au na nomu Kalou, ka nodra Kalou talega na nomu kawa.#Luke 1.55 8Au na solia vei iko, kei ira na nomu kawa na vanua o tiko vakavulagi voli kina oqo. Ena nomu na vanua taucoko o Kenani ka tawa mudu, ka'u na nodra Kalou.”#Caka 7.5
9A sa kaya na Kalou vei Epara-ama, “Ia o iko mo vakadonuya mo vakayacora na nomu i tavi ena nodaru veiyalayalati, o iko kei ira na nomu kawa ena veitabatamata mai muri. 10Oqo na ka mo vakadonuya mo cakava ena nodaru veiyalayalati kei ira na nomu kawa era na muri mai, me cilivi na tagane kece sara.#Caka 7.8; Roma 4.11 11Me tekivu oqo ka lako yani, mo na cilivi ira kece sara na tagane ni sa oti e walu na siga mai na gauna e sucu kina; era wili talega kina na bobula era sucu ena nomu vale kei na bobula era voli mai vei ira na kai tani. 12Oqo ena vakaraitaka ni dua na veiyalayalati tawa mudu na nodaru veiyalayalati. 13Mo ni cilivi kece sara, oqo e dua na i vakatakilakila ena yagomuni me vakaraitaka ni tawa mudu na noqu veiyalayalati kei kemuni. 14Na tagane e sega ni cilivi ena tawasei mai vei ira na kai nona, baleta ni sega ni vakayacora na noqu veiyalayalati.”
15A sa kaya na Kalou vei Epara-ama, “Mo kakua tale ni kaciva na watimu me yacana o Serai, sa na yacana o Sera.#17.15 Sera: Na yaca oqo vakaiperiu e kena i balebale, “raluve”. 16Au na vakalougatataki koya, ka'u na solia vua me vakasucuma e dua na luvemu tagane. Au na vakalougatataki Sera, ena qai yaco me tinadra na veimatanitu, ka na tubu mai vei ira na nona kawa eso na tui.”
17A tekiduru ka cuva sobu o Epara-ama ki na qele, ia sa qai tekivu me dredre ni sa vakasamataka vakaoqo, “E rawa li ni dua na tagane me sa yabaki 100 me qai vakaluveni? Ena rawa li me dua na luve i Sera ni sa yabaki 90?” 18A sa taroga vua na Kalou, “E vakaevei me sa kequ i sosomi ga o Isimeli?”
19Ia sa qai kaya na Kalou, “E sega, o Sera na watimu ena vakasucuma e dua na luvemu tagane, mo vakatoka me yacana o Aisake.#17.19 Aisake: Na yaca oqo vakaiperiu e kena i balebale, “o koya e dredre”. Au na vakataudeitaka vua na noqu veiyalayalati kei ira na nona kawa. Oqo ena veiyalayalati tawa mudu. 20O a kerea me'u maroroi Isimeli, ia oqo na ka au na cakava: au na vakalougatataki koya ka solia vua e levu na luvena kei na nona kawa. Ena tamadra e lewe tinikarua na ravouvou, ka'u na cakava e dua na matanitu levu mai vei ira na nona kawa. 21Ia, au na vakataudeitaka na noqu veiyalayalati kei na luvemu tagane o Aisake, o koya ena vakasucuma o Sera ena gauna vata oqo ena yabaki ka lako mai.” 22Ni oti na nona vosa vei Epara-ama na Kalou, a sa qai biuti koya.
23Ena siga vata ga o ya a cilivi Isimeli kina o Epara-ama kei ira na nona bobula era sucu ena nona vale kei ira sa voli ira mai: na tagane kece sara ena nona vale me vaka sa kaya vua na Kalou. 24A sa yabaki 99 o Epara-ama ena gauna sa cilivi kina, 25ka sa yabaki 13 o Isimeli. 26E rau a cilivi ena siga vata o ya, 27kei ira kece na nona tamata.#17.27 nona tamata; se nona bobula.
Àwon tá yàn lọ́wọ́lọ́wọ́ báyìí:
VAKATEKIVU 17: FNV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Fijian New Version Bible, Revised Edition © Bible Society of the South Pacific, 2017, 2021.