Zuwã 10
10
Pone'ẽrebâ 'madâ'â'wa na, Zezusi hã te te sina isimiré'ézé wasu'u
1Tawamhã Zezusi te duré pone'ẽrebâ tede'wai wasu'u hã dama wasu'u. Ãne te dama wasu'u:
— Tô sena wa za aima rowasu'u za'ra wa'wa, pone'ẽrebâ tede'wai wasu'u na. Pone'ẽrebâ hã wa'ra 're, 're simi'wara mono wamhã, isimisaihuri hã 'ridawa u, sô 're sisisi mono õ di. Wa'ra na si te za sô 're sarõtõ za'ra. 2Itede'wa si te za 'ridawa u sô 're ne, 're zasi mono da, wa'ra 're. 3Taha si 'ridawa u, sô 're simasisi mono wamhã, te za te te tãma 're 'ridawa, 'ridawa 'madâ'â'wa hã. Sô 're simasisi mono wamhã, imreme te za waihu'u za'ra, pone'ẽrebâ hã. Isisi mono bâ, te za sitẽme sô 're hârâ, rob u te te 're sani za'ra mono da hã. 4Tinhimizama hã rob u te te 're simroi mono wamhã, isõwa te za 're ne. Titede'wai mreme te te waihu'u pese za'ra wa, te za isarina 're nomro, isimizama hã. 5Pone'ẽrebâ tede'wai upana nherẽ, e te za dazarina 're nomro. Mare di. 'Re nomro mono õ di za, dazarina hã. Te za tiwi 're sisa're, imreme te te 're waihu'u za'ra mono õ wa.
6Tane nherẽ, marĩ te te iwasu'uzém na hã da te waihu'u za'ra õ di.
Zezusi hã 'ridawa na te te sina isimiré'ézé wasu'u
7Tawamhã Zezusi te duré dama tinha, ãne:
— Tô sena wa za aima ĩsiwasu'u za'ra wa'wa. Wa hã wa 'ridawa na ĩsina simiré'é, pone'ẽrebâ da te 're i'mazasi za'ra mono zém na wa'ra u hã. 8Pone'ẽrebâ hã, titede'wai upana mreme hã te te 're wapari za'ra mono õ di za, isipsaihuri norĩ mreme hã, danhibrob zô dapãrĩ'wa norĩ mreme hã. Tane 'Re ihâimana u'âsi mono zazei uptabi 'wa norĩ hã te te 're wapari za'ra mono õ di za, aimawi te te dama 're irowasu'u za'ra mono norĩ mreme hã, ĩwana datẽme 're inomro mono norĩ mreme hã. 9Wa hã, 'ridawa na wa ĩsiwasu'u, ĩsiwaprosi Danho'reptui'wai wa. Taha na ni'wam norĩ ĩ'ãma 're sisisi mono wamhã, te za tinho'reptuzé te te sina 're uwaimrami za'ra. Pone'ẽrebâ hã wa'ra u sima iwẽ na 're isisisi mono ne, duré sima iwẽ na apâ 're iwairébé mono ne, te za duré ta norĩ hã sima iwẽ na 're hâimana za'ra. Duré pone'ẽrebâ tisa te te 're isõpẽtẽ wẽ za'ra mono ne, te za ĩzazei'wa norĩ hã rowẽ te te 're sõpẽtẽ za'ra. 10E marĩ da, te isimisaihuri norĩ hã wa'ra u 're sisisi. Pone'ẽrebâ zô te 're nomro, te te dawi 're waibui mono wa, te te dawi 're simroi mono da. Tanei õ di, wa hã. Wa hã wa tô we datẽme mo, robzei u'âsi ĩ'ãma 're danomro mono da, duré 're dadâ'â za'ra mono ãna, 're dasi'ubumroi u'âsi mono da, hâiwa ãma.
Zezusi hã pone'ẽrebâ 'madâ'â'wa na te te sina isimiré'ézé wasu'u
11— Wa hã pone'ẽrebâ 'madâ'â'wa iwẽ na, wa ĩsiwasu'u. Pone'ẽrebâ 'madâ'â'wa iwẽ, i'u'âbâ za'ra dâ'â da nherẽ, tihâiba te te 're sawi mono õ di. 12Tite wa, te te 're azawi pese, tinhimizama hã, pone'ẽrebâ 'madâ'â'wa hã. Tãma iromhuri'wa hã tite õ wa, te te 're azawi pese mono õ di. Taré rob'uiprazéb zô si, te te 're romhuri. Robzahi hã we sô morĩ wamhã, te za tiwi wara. Pone'ẽrebâ, te za rẽme za'ra. Tahawa, te za 'mai'â, robzahi hã. Te te 'mai'âri wamhã, te za ãma ropé. 13E marĩ wa, te za tiwi wara, romhuri'wa hã. Itede'wai õ wa, duré te te 're azawi pese mono õ wa. 14-15Wa hã pone'ẽrebâ 'madâ'â'wa, isimizawi pese na, wa tô ĩsina simiré'é, ĩzazei'wa norĩ te 're azawi pese mono wa. Ĩmama hã ma tô ĩwaihu'u, ti'ra na. Wa hã wa duré õ hã waihu'u, Ĩmama na. Tane duré ĩzazei'wa norĩ hã wa tô te 're awaihu'u u'âsi, ĩnhib'a'uwẽ na. Ĩzazei'wa norĩ hã ma tô duré ĩwaihu'u za'ra, tinhib'apito na. Ta norĩ zada, wa za ĩsisawi ãna hã dârâ, te 're anho'reptui mono da. 16Ni'wam norĩ hã te duré 're nomro, ĩnhib'a'uwẽ 're hâimana za'ra mono da hã. Ta norĩ ãma, wa za pone'ẽrebâ na simiré'é za'ra, ĩnhimiwa'ra 're, 're isi'ubumroi mono õ na hã. Ta norĩ zama wa za ĩsitẽme ubumro. Tawamhã te za ĩmreme hã te te 're wapari pese za'ra. Pone'ẽrebâ norĩ hã maparane danhimi'ubumro hã siré oto 're isi'ubumroi mono ne, te za simisutu ĩnhib'a'uwẽ 're nomro, misi i'madâ'â'wa, tãma 're ĩhâimana za'ra mono wa za.
17— Tahawa, Ĩmama te te 're ĩzawi pese, ĩsisawi ãna, sada ĩdâ'â za'ra wa za, apâ ĩhâiwa'utu pari, 're ĩmorĩ u'âsi da. 18Dasi'uihâ na da te dasiwi ĩwĩrĩ da hã mare di. Ĩsi'uihâ na, wa za dârâ, dazada. Wa za duré hâiwa'udu, ĩsi'uihâ na. Ãne wa za 'manha, Ĩmama te te ĩma ipisutuzéb zarina.
19-21Tawamhã imreme, te te wapari za'ra wamhã, ma tô ni'wam norĩ hã dama nharĩ za'ra, ãne:
— Wa'uburé ré, 're morĩ wa, te ãne simiza'rese ãna wama siwasu'u za'ra. E marĩ da, te za bété imreme hã iwapari za'ra wa'wa.
Tawamhã ni'wam norĩ hã te duré dama nharĩ za'ra, ãne:
— Mare di. Wa'uburé ré, 're morĩ 'wa'âhã, aré mreme wẽ õ di. Mreme wẽ di, õ hã. E wa'uburé, ma tô pawapto, itob'a te te ito pese da hã. Mare di. Ta hã waihu'u pese õ di.
Zudeu norĩ hã, Zezusi te te siwi iwẽ'õ za'ra zé wasu'u
22-23Tawamhã zudeu norĩ hã daro mono bâ ma tô duré si'rã'õtõ, Zeruzalẽ ãma, 'Re ihâimana u'âsi mono ãma dawata za'ra da. E marĩ wa. Apâ 'ri za'ẽne hã te te tãma pisutu za'ra wẽ te, ãma 're idawata za'ra mono zéb da hã ma tô tasi'rã'õtõ ni, bâdâ dama ipire na, ãma dasipo're pu'u za'ra da, rowa'u'u wahâ, 're sa'wari mono ré. Tawamhã Zezusi hã te 'Re ihâimana u'âsi mono nhorõwa te, 'ri 'wawi wa'ra wa'wai baba 're mo, Apito Salomahã nhib'uriti na uriti nhisi wa'wai baba. 24Tamomo ma tô itẽme si'rã'õtõ, dama ipire norĩ hã, Zezusihi u. Taha wamhã, te tãma nharĩ za'ra, ãne:
— E niwa te za wama asiwasu'u za'ra. Wama asiwasu'u za'ra zéb zô hã, wanhimipari wa'a za'ra di. A hã, tô sena Danho'reptui'wa da, 'Re ihâimana u'âsi mono te te aipisutu wamhã, ma'ãpé sõ'awi wama asiwasu'u za'ra na, wa te aiwaihu'u za'ra da.
25Tawamhã Zezusi hã te asa tãma nharĩ za'ra, ãne:
— Wa tô aima ĩsiwasu'u pari za'ra wa'wa. Tane nherẽ, ĩmreme na 're ĩzaze za'ra wa'aba mono õ di. Ĩmama zadawa para, wa tô marĩ dama i'manharĩ waihu'u'õ hã te dama 're ab'manharĩ wẽ, da te 're ĩwaihu'u za'ra mono da hã. 26Tane nherẽ, asina 're ĩ'umnhasi za'ra wa'aba mono õ di, ĩnhib'a'uwẽ 're anomro aba mono õ wa. 27Ĩnhib'a'uwẽ si te za ĩmreme hã te te 're wapari pese za'ra. Duré pone'ẽrebâ tede'wa, tinhimizama te te 're i'awaihu'u mono ne, wa tô ĩnhib'a'uwẽ norĩ hã waihu'u za'ra. Ta norĩ si te za ĩnhimiroti hã te te 're 'madâ'â pese za'ra. 28Ta norĩ ma, wa za pisutu za'ra, 're dâ'â za'ra mono ãna, 're hâimana u'âsi za'ra mono da, hâiwa ãma 'Re ihâimana u'âsi mono 'rata. Ni'wa hã te te ĩwi 're waibui mono õ di za, ĩzazei'wa norĩ hã. 29Ĩmama, ma tô ĩma pisutu za'ra, ĩnhib'a'uwẽ si 're nomro mono da. Ta hã danhipai u, uburé dama pire di, Ĩmama hã. Uburé marĩ ma, pire di, hâiwa ãma ti'ai ãma zama. Tahawa, ni'wa hã te te tiwi 're waibui waihu'u mono õ di za. 30Wa norĩ hã aiwa wawaihu'u pese di, Ĩmama me.
31Tawamhã ta norĩ hã ma duré ẽne hã sada waibu, te te ãma siwi wĩrĩ da. 32Tahawa, te Zezusi hã duré tãma nharĩ za'ra, ãne:
— Wa hã Ĩmama te te ĩma ipisutuzéb zarina, wa tô marĩ dama i'manharĩ waihu'u'õ na te 're da'apawaptob u'âsi. E nima hã ĩnhimipawaptobzé aima wẽ za'ra wa'aba õ wa, te za asiwi ĩwĩrĩ 'wa, ẽtẽ na. Ma'ãpé, ĩma wasu'u za'ra wa'aba.
33Tawamhã asa te tãma nharĩ za'ra, ãne:
— 'Re da'apawapto mono wa, wa te wasiwi aiwĩrĩ õ di za. Aimreme wasété wa, wa za wasiwi aiwĩrĩ ni. Ti'ai ãma aipoto nherẽ, 'Re ihâimana u'âsi mono me, aiwa aiwaihu'u pese aba na asiwasu'u wa, wa za wasiwi aiwĩrĩ ni, aimreme wasétére wa.
34-36Tawamhã Zezusi asa te duré tãma nharĩ za'ra, ãne:
— E i'ra na ĩsiwasu'u wa, ma tô ĩmreme hã asiwi iwẽ'õ za'ra wa'wa. Duréihã 'Re ihâimana u'âsi mono, ma tô tinhimiroti hã te te dama 're awaihu'u, da te dasima ãma 're roti za'ra mono da. Ti'ra na ma tô roti'wa norĩ hã te te 're sisi za'ra. Ãne ma tô ibaihâ na ãma rob'ui'éré, isadawa wasu'u'wa hã. Tô sena, imreme ui'éré hã. Roti'wa norĩ hã, ti'ra na te te 're sisi za'ra mono wamhã, e wa hã ĩmreme wẽ'õre di, i'ra na ĩsiwasu'u wamhã, ti'ai u we te te ĩzatõrĩ nherẽ, 'Re ihâimana u'âsi mono hã. 37-38Ĩmama hã tiwaihu'u pese na, te te 're da'apawapto. Ĩzama, wa tô isine te 're da'apawapto. Tahawa, te za i'ra na ĩwaihu'u za'ra wa'wa. Isine, te 're da'apawapto mono õ wamhã, i'ra na hã 're ĩzaze za'ra wa'aba mono õ di za. I'ra na wa tô aima 're ĩsiwasu'u za'ra wa'wa aré. Tane nherẽ, ĩmreme na 're ĩzaze za'ra wa'aba mono õ di. Tahawa, Ĩmama hã tiwaihu'u pese na te te 're ida'apawapto mono ne, wa hã te 're da'apawapto mono wa, te za i'ra na 're ĩzaze za'ra wa'aba mo. Tawamhã te za iwaihu'u za'ra wa'wa, ĩ'ãma 're ihâimana mono na, Ĩmama hã. Te za duré ĩwaihu'u za'ra wa'wa, Ĩmama ãma 're ĩhâimana mono na.
39Tawamhã ma tô duré sima wẽ za'ra, te te siwi âri da, dama ipire norĩ hã. Tane nherẽ, tiwi simani za'ra wa, te te siwi âri õ di.
40Tawamhã apâ ma tô mo, Zodã pa u Zezusi hã. Tawamhã wisi wi, ma tô saprĩ, zara u. Zuwã Batista hã â dawabzuri te te dama 're i'ab'manharĩ 'rata mono zéb u, ma saprĩ. Tame te a'â nhamra, Zezusi hã. 41Tame sãmra ré, te da'ahâ na nasi itẽme aihutu ni. Nasi itẽme dasihutu wamhã, ãne te dasima rowasu'u za'ra ni:
— Zuwã Batista hã, imreme na da te 're saze za'ra mono da, marĩ dama i'manharĩ waihu'u'õ hã te te dama 're ab'manharĩ mono õ di. Tane nherẽ, tô sena ma tô Zezusi hã te te dama 're wasu'u.
42Tahawa, tame sãmra ré, ma tô da'ahâ na Zezusi hã saze za'ra ni, Danho'reptui'wa na hã.
Àwon tá yàn lọ́wọ́lọ́wọ́ báyìí:
Zuwã 10: xavBP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011, Wycliffe Bible Translators, Inc.All rights reserved.