Luca 14
14
Zezusi hã romhuri zahârizém na, aibâ te te ipesezé wasu'u
1Zudeu norĩ te, romhuri zahârizém na ma tô Zezusi hã ãzé, aibâ nhorõwa u, isiré sa da. Aibâ hã, farizeu. Isiré farizeu norĩ ma, pire di, aibâ hã. Tawamhã tame 'ri para, isi'ubumro norĩ hã ma tô Zezusi hã 'madâ'â za'ra. 2Tame sãmra ré, ma aibâ ihâzé ré hã itẽme wi, Zezusihi u. Hâzé wa, te dupto zahuré di. Duré, paihi dupto zahuré di. 3Tahawa, ma tô Zezusi hã rowahutu'wa norĩ hã azadanha, farizeu norĩ me, ãne:
— E romhuri zahârizém na, wa za wa te 're dapese za'ra, sabadu na hã. E ma tô wawi sawi, 'Re ihâimana u'âsi mono hã, sabadu na, wa te 're dapese tõ za'ra mono da. E niha isimiroti na rob'ui'éré hã.
4Tane nherẽ, asa te te ãma sada'âbâ za'ra õ di. Tawamhã Zezusi hã ma tô aibâ hã pa'â. Ma tô pese. Taha pari, ma tô tãma rob'ru, morĩ da oto, 'ri tẽme. 5Tawamhã aibâ za'u si, te tãma nharĩ za'ra, ãne:
— Ãté ai'ra hã te za aiwi ti'maiwaptã'ã 'wa, â zô ab're u, ãté powawẽ hã. Tawamhã e â zô ab're hawimhã asiwi wazere aba õ di za, romhuri zahârizém na nherẽ.
6Tazahã taha wamhã asa te te ãma sada'âbâ waihu'u za'ra õ di.
Dama dawapu wasu'u, dama dapire wasu'u me
7Tawamhã wedeza na dasi'ubumroi wamhã, ma tô ni'wam norĩ hã dama ipire norĩ te na ai'ubumro, dame sô idahârâ za'ra norĩ hã. Ãne ma tô ãma da'madâ, Zezusi hã. Tahawa, ma tô tãma ãma romnhimiré'é za'ra, ãne:
8— Ni'wa hã asô hârâ wamhã, dasina damro u dame asa da, aimorĩ wamhã, dama ipire norĩ te na, asãmra õ di za. E marĩ wa. Ãté, aima ipire hã te dame tihâiba, dame sô idahârâ hã. 9Tawamhã te za aima tinha, 'ri tede'wa hã, õ niwĩ asãmra da, asãmrazém na sãmra da, aima ipire hã. Tahawa, te te aima inharĩ ma hã, asiséb di za. Da'rãsutu u, te za tô oto asã. 10Tahawa, ãne tõ da, dame asa da, asô dahârâ wamhã, da'rãsutu u, te za a'â asã. E marĩ da. 'Ri tede'wa hã si'uihâ na si te te aima pisutu da, dama ipire norĩ 'rata asãmra da, asa da. Danho'a te te aima pisutu wamhã, aima rowẽ uptabi di za. 11Tane, ni'wa hã pire wẽ te, 'râwi sina 're wata mono wamhã, 'Re ihâimana u'âsi mono, te za tãma pisutu, wapu na 're hâimana mono da oto. Duré ni'wa hã, tipire na 'râwi 're si'madâ'â mono õ wamhã, te za tãma pisutu, dama pire na 're hâimana mono da oto.
12Tawamhã dame sa da, sô ihârâ ma, te tinha, Zezusi hã, ãne:
— Dasaihurizé, dama 're 'manharĩ mono wamhã, ãté sô aihârâ za'ra õ di za, asiwadi norĩ zô hã duré asisãnawã norĩ zô hã, duré aimama norĩ zô hã duré isibrob ahâ norĩ zô hã, aiwaptoma 're isi'ubumroi mono norĩ zô hã. Ta norĩ zô aihârâ wamhã, asiré saihuri da, te za asa asô tihârâ za'ra, te te asa aima ãma wa'rãmi za'ra da. 13Tahawa, dasaihurizé hã dama 'manharĩ wamhã, te za isibrob'õ norĩ zô aihârâ za'ra, duré imorĩ'õ norĩ zô, duré i'rãtẽire norĩ zô, duré itob'a norĩ zô. 14Ãne wamhã, aima 're rowẽ mono di za. E marĩ wa. Ta norĩ hã simarĩ õ di, marĩ na te te aima ãma iwa'rãmi za'ra zéb da hã. 'Re ihâimana u'âsi mono si, te za asõprubzé wa'rãmi aima tisõ. 'Re inomro wẽ mono norĩ te te ahâiwa'utu wapsi, te za aima ãma uwaimra.
Dasaihuri za'ẽtẽ zé wasu'u
Mateu 22.1-14
15Tame ma tô aibâ hã dame nhamra, 'ri para, sa da. Tawamhã Zezusi te te dama iwaihu'uzé hã ma tô dame wapa. Tahawa, te Zezusihi ma tinha, ãne:
— 'Re ihâimana u'âsi mono, Danhib'apito uptabi na 're ihâimana mono zéb ãma, i'rata 're isaihuri mono norĩ ma, 're rowẽ uptabi za'ra mono di za.
16Tawamhã Zezusi hã te asa aibâ wasu'u hã tãma wasu'u, ãne:
— Aibâ hã dasa hã sa'ẽtẽ na te te dama 'manharĩ da, ma tô sina roti. Tawamhã te te dama 'manharĩ õ ré, ma tô da'apo're pu'u siro, da'ahâ na itẽme dasihutu da, isiré dasaihuri da. 17Sipi pari wamhã, tãma iromhuri'wai ma, te tinha, ãne: “Mo oto aimorĩ dazô, we dasi'aba'ré da. Dasa hã te oto dazô aimasa.” Ãne te tãma tinha. Tahawa, romhuri'wa hã ma tô datẽme mo, dazô hârâ da.
18— Tane nherẽ, te nasi aibâ norĩ hã siparabâsi niha tãma nharĩ za'ra, romhuri'wai ma, te te sima wẽ za'ra õ wa. Sô ihârâ 'rada hã te tãma tinha, ãne: “Ãma ĩmorĩ neza. Tane nherẽ, ti'a hã wa 'mai'uipra. Tamomop si wa za mo, te sabu da. Ãne asib'apito ma, ĩzadawa wasu'u na za.” Ãne te tãma iromhuri'wai ma tinha.
19— Tawamhã ihâiba amo hã te duré tãma tinha, ãne: “Ãma ĩmorĩ neza. Tane nherẽ, powawẽ hã wa 'mai'uipra, 10 na ihâiba za'ra na. Tamomop si wa za mo, te sabu za'ra da, te te romhuri wẽ za'ra zô. Ãne, asib'apito ma, ĩzadawa wasu'u na za.” Ãne te romhuri'wai ma tinha.
20— Ihâiba amo hã te duré tãma siwasu'u: “Nimosi, wa ĩmro. Tahawa, dame ĩsa da, ãma ĩmorĩ waihu'u õ di.” Ãne te romhuri'wai ma tinha.
21— Tahawa, te apâ mo romhuri'wa hã, tinhib'apito ma, te te sadawa wasu'u za'ra da. Te te wapari wamhã, ma tô ab'rui pese, isib'apito hã. Tahawa, te ãne tãma tinha: “Ai'aba'ré na dazô 're aimorĩ, 'ri nhi'riti na we danhimroi mono da, isibrob'õ norĩ hã, duré imorĩ wẽ'õ norĩ hã, duré itob'a norĩ hã, duré i'rãtẽire norĩ hã.” Ãne te tãma rob'ru. Tahawa, te ta norĩ zô si mo, we te te simroi mono da.
22— Tawamhã we te te danhimroi mono pari, te tinhib'apito ma tinha ãne: “Apito, wa tô aimreme hã ãma uwaimra, aima. Zahadu da'masisi õ di.” Ãne te tãma tinha.
23— Tahawa, te isib'apito hã duré asa tãma tinha, ãne: “Tane wamhã, dazô airĩtĩ mono pé, bâdâdi na. Da'manhopẽtẽ wamhã, ta norĩ hã te za we isimroi mo, ĩnhorõwa hã da te dasiwi 'masisi da. 24Tô sena, wa aima waihu'u za'ra wa'wa. Sô ĩhârâ 'rata norĩ hã, ĩsa na saihuri õ di za.” Ãne te isib'apito hã tãma tinha.
Zezusihi zazei'wa, 're inomro mono zé wasu'u
Mateu 10.37-39
25Tawamhã Zezusi norĩ hã si'aba'réi ré, te da'ahâ na isarina ai'aba'ré ni. Tawamhã ma tô Zezusi hã datẽme aipi'ra. Ãne te dama tinha:
26— Ãté, ni'wam norĩ hã te za we ĩtẽme ai'aba'ré, ĩzazei'wa, 're nomro mono da. Tawamhã te za te te 're ĩzawi pese za'ra, timama zawi nhipai u, duré tina zawi nhipai u, duré timro zawi nhipai u, duré ti'ra norĩ zawi nhipai u, duré tisisãnawã norĩ zawi nhipai u, duré tihâimanazém nhipai u. 27Tiza'ozéb ré, ĩzarina 're inomro mono ne, da te 're uprosi za'ra mono da nherẽ, te za ĩsiré 're nomro. Ãnei õ wamhã, ĩzazei'wa na te 're waihu'u za'ra mono õ di za.
28— 'Ri'wa na, wa za aima ãma romnhimiré'é za'ra wa'wa. Ãté, a norĩ wa'wa hã te za asima i'mairosa'rata 'wa, asima 'mai'ri wa'aba da, rob'madâ'âzéb da. Tahawa, te za a'â ãma i'mairowa'õtõ wẽ wa'wa, 'ri wa'âbâzéb da, rob'uiprazé hã iwab zô. 29-30Ãnei õ wamhã, ãté õne haré te za isãna'rata si i'mai'manharĩ 'wa. 'Ri 'rãihâ hã 'mai'uprosi aba õ di za. Da te sabu za'ra wamhã, te za ai'ãma 're dawa'ẽ za'ra wa'wa: “Oro te te 'ri 'ru za, te õne haré za.” Ãne te za ai'ãma 're dawa'ẽ za'ra wa'wa. Ãne, 'ri'wa na te aima ãma isimiré'é za'ra wa'aba zé hã.
31-33— Duré apito na, wa za aima ãma simiré'é za'ra wa'wa. Ãté danhib'apito te za dama 're 'manhamra. Isib'a'uwẽ norĩ hã dasi'wapé 'manharĩ'wa norĩ hã te ahâ na 're si'ubumro, 10 miu na ihâiba za'ra hã. Tawamhã ma tô apito hâiba amoi wasu'u wapa, danhib'apito hã. Dasi'wapé 'manharĩ'wa hã te we, u, ahâ uptabi na te te simro tinhib'a'uwẽ hã, 20 miu na, u, ihâiba za'ra hã. Tawamhã dazô wairébé õ ré, te za a'â nhamra, isib'a'uwẽ hã, dazada siptete za'ra zô. Dazada isiptete za'ra õ na, te te waihu'u za'ra wamhã, te za tinhitob'ru norĩ u da'mazatõ, te te tãma 'mazadawa wasu'u da, isib'apito za'ra ma. Isitob'ru norĩ hã zahadu romhâ ré, te za itẽme da'mazatõ, we dasihutu tõ da, dasi'wapé za'ra tõ da. Ãne, apito na te aima ãma isimiré'é za'ra wa'aba zé hã. Tane ĩzazei'wa, 're anomro aba mono da, marĩ hã asima 're sawi za'ra wa'aba mono õ di za, aipẽ'ẽ 're. Marĩ hã aipẽ'ẽ 're, asima 're sawi za'ra wa'aba mono wamhã, ĩzazei'wa na te 're aiwaihu'u za'ra wa'aba mono õ di za.
Dasai warĩrĩzé wasu'u
Mateu 5.13; Marcu 9.50
34Te duré dama tinha, Zezusi hã, ãne:
— Sa na hã dasa hã ãma se ti, dasai warĩrĩzé wa. Tane nherẽ, oto 're se si'utõrĩ mono wamhã, niha da te 're 'manharĩ waihu'u mono õ di, apâ se da. 35Sei õ wamhã, ti'a hã wẽ da, ti'ai wa, da te 're sa'wari za'ra mono õ di za. Duré powawẽ nhana ubumro nhisiwi, da te 're sa'wari za'ra mono õ di za. Taré, te za rob u, da te 're sa'wari za'ra, marĩ dai õ wa oto. Ãne romnhimiré'ézé hã. Asimipari pese za'ra wa'aba wamhã, ma'ãpé ĩwapari pese za'ra wa'aba ãma.
Àwon tá yàn lọ́wọ́lọ́wọ́ báyìí:
Luca 14: xavBP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011, Wycliffe Bible Translators, Inc.All rights reserved.