KASAUKAN 3
3
Ulun ondo' kalo gumagaya' ra susuban ri Aki Kapuuno'
1 Kukuo rondo' bibiag ondo' mapintar kaga' intor ra ngaangai' bibiag ondo' binaal ru Tuhan i Aki Kapuuno'. Pangkuot kukuo no ra ruandu' no, “Motopot kia minindagu i Aki Kapuuno' ra kalo maakan min kinawa' intor ra ngaangai' puun ondo' soroi ra taman ti?”
2Taam ruandu' no, “Maakan mai kawa' intor ra moonong puun ralalom ru taman ti, kaa' ondo' kalo maakan ginio nakaunor ra tatanga' ru taman no. 3Sabap ra nanginggalar i Aki Kapuuno' ramon mangakan ra kawa' intor ra puun no kapoam mangambong; amon baalon mai, matoi akai.”
4Taam kukuo no, “Ginio kalo motopot; kalo matoi kau. 5Mindagu i Aki Kapuuno' koon raginio sabap nakapandai Io ra amon ru mangakan kau ra kawa' raginio, makapandai kau ra ngaangai' baal; masauk kau koson ri Aki Kapuuno' am makapandai ra atan ayuk ondo' moonsoi am malaat.”
6Nakito ru ruandu' no ra puun raginio moonsoi kaga' am kawa' no pana maamis kaga' akanon. Mangkara' io ra mapara' bonsoi amon ru mapintar io. Ginio ra pangupu' io ra kawa' no am akano' no. Io pana nantayar niayuk ra ralaki nano am ralaki nano pana nangakan ra kawa' no. 7Pakaakan ilo ra kawa' no, pangkaraan nilo naukab am nalimanan nilo ra nagibabaang ilo. Ginio ra pampikit ilo ra raun ru ara am taubi' nilo inan nilono.
8Paat ra mamai', nakaining ilo ra Tuhan i Aki Kapuuno' minugar ra ralalom ru taman am pansibuni ilo ra lolot ru puun-puun am kalo boo makito ilo ru Tuhan. 9Kaa' pampiau Tuhan i Aki Kapuuno' ra ungkuyon no, kon Nano, “Ati kou boo?”
10Taam ungkuyon no, kono, “Nakaining aku nampiau Kou giti ra taman ti; am malaa' aku, ginio ra pansibuni aku sabap nagibabaang aku.”
11“Osoi kia nambala' rirun ra nagibabaang kou?” nangkuot i Aki Kapuuno'. “Inakan min kia kawa' ondo' kalo paakanin Kuli?”
12Taam ungkuyon i, “Ruandu' ondo' pinamarangan Mu raki' ti nai nangani' raki' ra kawa' no am akano' ku boo.”
13 Pangkuot Tuhan i Aki Kapuuno' ra ruandu' no, “Kua guat baalo' mu ginii?” Taam io, “Rinuung aku ru kukuo saboi inakan ku kawa' no.”
I Aki Kapuuno' nangani' ra ukuman
14Indagu boo Tuhan i Aki Kapuuno' ra kukuo no, “Inulas kou sabap ra binaal muno; intor ra ngaangai' bibiag okou ayuk magiba' ra ulas: Intor raino mundus kou ayuk ra mugar am mangakan kou ayuk ra kaau ru tana' saboi ra pupus ru bayag muno. 15 Okou am ruandu' raginio mansisang, papag nano am papag muno magail mantutula'. Papag nano mamabak ra ulu muno am okou maninduk ra tunob nilono.”
16Indagu Tuhan i Aki Kapuuno' ra ruandu' no, “Janjain Ku pagon paat okou maapang am niayuk maruol ra okou maganak. Kabalu' pana raginio, okou lakat ayuk poyo makaguang lumampit ra ralaki muno, kaa' kumuku' kou riso.”
17 Indagu boo Tuhan i Aki Kapuuno' ra ungkuyon no, “Inining mu ragu ru andu' muno am nangakan ra kawa' ondo' kalo paakanin Kuli rirun. Ginio boo intor ra binaal muno, inulas Ku tana' ti. Okou mingkotog toojo mangandoi saboi ra pupus ru bayag muno maa' raginio tana' ti makaampos ra akanon ondo' maukop ra akanon min. 18Tana' ti makaampos ra tutuu' am tutuu' makaruui; tutuu' lumayau masauk ra akanon muno. 19Okou matipatoi mangandoi am rasangon koson mambaal ra tana' ti manangampos saboi sumaguli' kou ra tana' ti sabap intor ra tana' ti okou sinauk. Ginio nai ra okou sinauk intor ra tana' am sumaguli' kou niayuk ra tana'.”
20Inggalani' ri Adam andu' nano i Awa sabap ruandu' raginio noyo masauk ra ina' ru ngaangai' ulun. 21Ginio boo ra Tuhan i Aki Kapuuno' nambaal ri Adam am andu' nano ra bayang intor ra kungkung ru bibiag am Io pana nampabayang risilo.
I Adam am i Awa pinaugar intor ra Taman Idin
22 Indagu Tuhan i Aki Kapuuno', “Raino ulun no nasauk koson Ritakau am makakapandayan ra baal ondo' moonsoi am niayuk malaat. Ginio boo musiti' inggalarin ulun mangakan ra kawa' intor ra puun ondo' mangani' ra bayag, maa' raginio ulun kalo maayag ra sabubuoi no.” 23Ginio ra Tuhan i Aki Kapuuno' napaugar ra ulun no intor ra Taman Idin am sinusub No mangandoi ra tana' ondo' intor raginio io binaal.
24Giu' boo ra tampilon sirangon ru Taman no, Tuhan i Aki Kapuuno' napaayan ra kirub am rondo' ilang makaapui ondo' lumibut ra ngaangai' intok koson mantamung ra puun ondo' mangani' ra bayag. Ginio ra kolondo' sangulun pana makasubol am makainggaar ra puun raginio.
Àwon tá yàn lọ́wọ́lọ́wọ́ báyìí:
KASAUKAN 3: TMT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Hakcipta © Bible Society of Malaysia, 2013.