Wambeela 12
12
Mulugu onomwiithana Abaramu
1 Nabwiya ahiwoga ni Abaramu, wiira: <<Ohiye elabo yaawo, emudhi yaawo, vaade va ababo, odhowe elabo eyene gineeriimi guutoonyihedhe.#12.1 Mulugu ahimuruma Abaramu ohiya dhego thaaru dhinanilibiha mu egumi ela: abaabi, nlogo, ni emudhi. Mbwenye ahimuroromeliha okala ni oliye. Athu amohi yambeela omuhara Mulugu mwiibaribarini enohiya waweebedha awale-wale, enovenyihiwa mwiimudhini mweewa. Enahalana Mulugu ni nlogo naaye wi naakamihedhege, baahi. 2Ginowuwiira mulogo mulubale, guureelihe, givuwihe ndina naawo wi okale mareeliho. 3Ginoodha gaareelihe ayene eneere yuureelihege, gaaddubege ayene eneere yuuddubege. Malogo maatene a elabo ya vati enoodha ereelihiwe mwa we>>.#12.3 Mulugu ahiroromeliha wi elabo yaatene enoodha ereelihiwe mwaha wa Abaramu. Ororomeliha wula ohaakwanelihiwa mwa namabaliwelamo a Abarahamu oneethaniwa Yesu Kirixtu, ole akwile ni ovenyihiwa wi athu aatene evulumusiwe.
4Abaramu ahimaruwaga wona Nabwiya mwamwaaddeleliiye, aaligi vamohi ni Lothi. Abaramu amaruwile oHarani aganna yaaka makumi matanu nameenddi ni yaaka tanu (75). 5Ahimuthukulaga mwihiyanaaye Sarayi, vamohi ni mudhule Lothi ni dhooreela dhaaye dhaatedhene dhanniiwana. Ahaathukulaga teto athu alene yaalaba egali oHarani, odhowaga vamohi eyaaga oKanani.#12.5 Abaramu ahimuthukula mwihiyanaaye ni mwanakwaadhuni Lothi. Mulugu ohuniithanela mabasa aaye, wiithana wula onakala wa emudhi yaatene. Oliye kanafuna wi naahiye ahiyaniihu, naari omwiinya weehu. Vafiyiliiwa elabo elene, 6Abaramu oweedda ofiya niburo na oXikemu, musiddo mwa muthanko mulubale wa More. Mudhidhi olene aKanani yamagile elabo elene.
7 Nabwiya ahooneyela wa oliye, wiira: <<Ginowuuvaha elabo elena wi ekale ya anaawo>>. Abaramu ahisasanyavo ebuwa ya mukutho wa Nabwiya vevale vamooneyeliiye.#12.7 Vano Mulugu agamuroromelihe Abaramu elabo ya oKanani, Abaramu amujejihedha Mulugu wi eerihedhe. Abaramu kaathukulele kopolo voofuna wawaaka elabo anya. 8Okwaranyavo odhowaga omwaangoni epaddi ya wewo onakuma nduwa, ahimaga musasa waaye vaari va Beteli, wewo onadhowa nduwa, ni Ayi, wewo onakuma nduwa. Vevale ahisasanyavo teto ebuwa ya mukutho wa Nabwiya, olobelaga mu ndina naaye.#12.8 Beteli enatapulela Nyuba ya Mulugu. 9Nuwindo Abaramu ahimaruwaga, weeddaga ayaaga epaddi ya oNegevi.
Abaramu ni Sarayi egali wEgubuddu
10OKanani yahifiyawo dala yowoopiha, vano Abaramu ahithawela wEgubuddu, okala wewo mudhidhi mmohi.#12.10 Mudhidhi wa dala onowaapadduwela ooharihamo ni oohuharihamo. Kakalevo onaalaleyege wi onamwiiwelela Mulugu onakalege ookalana mudhidhi dhaatedhene. Moobuwelelo alena booratha. 11Yaaddamelaga wEgubuddu Abaramu ahiwogaga ni mwihiyanaaye Sarayi, wiira: <<Gihinona wi weevo oli mwihiyana ooriyesesa. 12AEgubuddu yowoona, enona wi weevo oli mwihiyanaaga, enogipa wi ehale ni weevo. 13Ndala weerege weevo oli murogoraga wi miyo gaakeliwe pama mwaha wa we, ni mwaha wa we goobowe>>.#12.13 Sara ni Abaramu yanna babiiwa mmohive mbwenye mmeewa kaali mmohive. Moone Wambeela 20.12. Aheere Farawo amfunaga Sara, anona wi aali mwadha Abaramu, eere ampe Abaramu ahinamuthukulele Sara vaade vaaye.
14Egafiyile, aEgubuddu yahoona ebaribareene wi mwihiyana ole ahitthabwa oriya. 15Anamalaba a Farawo, mwene o wEgubuddu, vamooniliiwa, yooddoddobela dha oriya wa Sarayi. Mowindala mwadha a Abaramu ahithukuliwa wi akalege vaade va Farawo. 16Abaramu ahaakeliwa pama mwaha wa Sarayi. Farawo ahimvaha mabila, ng'ombe, abuuru aalobwana ni aahiyana, anamalaba aalobwana ni aahiyana, vamohi ni akamelo.#12.16 Kamelo yaali aneenyama alubale yathukula dhoobo.
17Mbwenye Nabwiya ahimudheelana Farawo ni emudhi yaaye dhiredda dhowoopiha mwaha wa Sarayi, mwadha a Abaramu. 18Ndala Farawo ahimwiithana Abaramu, omukoha, wiira: <<Elaya egiireliiwe ddi? Mwaha bwaddi odhe ohugaaddelelege wi ola di mwihiyanaawo? 19Weerele ddi wi: <Di murogoraga>? Vano miyo gimutela oliye. Mwihiyanaawo ola omuladde, omudhowegena>>.#12.19 Mu ekalelo ya aEgubuddu oratha yaali yootakala vajinji. Hiyo teto kanirathege. 20Farawo ahaalamulelaga alobwana aaye wi emveleele Abaramu ni mwihiyanaaye ni dhaatedhene dhaali dhaaye, omvenyihamo mu Egubuddu.
© 2015, Wycliffe Bible Translators, Inc. All rights reserved.