Лука 20
20
20‑нҗи бап
Исаның эрк-ыгтыяры барада совал
(Матта 21:23-27; Марк 11:27-33)
1Бир гүн Иса ыбадатхананың ховлусында халка өвредип, Хош Хабары вагыз эдйәркә, ёлбашчы руханылар, Төврат мугаллымлары ве яшулулар Онуң янына гелдилер. 2Олар Иса: «Ханы, бизе айт, Сен бу затлары хайсы ыгтыяр билен эдйәрсиң? Бу ыгтыяры Саңа ким берди?» дийдилер. 3Иса хем: «Мен хем сизе бир совал берҗек. Маңа айдың, 4Яхя чүмдүриш ыгтыярыны ниреден алды? Гөкденми я-да ынсандан?» дийип сорады. 5Олар муны өзара маслахатлашмага башладылар: «Эгер Гөкден дийсек, Ол бизе: „Онда нәме үчин оңа ынанмадыңыз?“ диер. 6Эгер-де ынсандан дийсек, әхли халк бизи дашлар, себәби халк Яхяның пыгамбердигине ынаняр». 7Ахыры олар: «Биз ниредендигини билемзок» дийип җогап бердилер. 8Иса-да олара: «Менем сизе бу затлары хайсы ыгтыяр билен эдйәними айтҗак дәл» дийди.
Үзүмчилик ве кәрендечилер тымсалы
(Матта 21:33-46; Марк 12:1-12)
9Соңра Иса халка шу тымсалы гүррүң бермәге башлады: «Бир адам үзүм багларыны отурдып, оны багбанлара кәрендесине берйәр-де, өзи узак вагтлык башга юрда гидйәр. 10Хасыл мөвсүми геленде, үзүмиң мивесинден алып гелмек үчин, ол хызматкәрлериниң бирини кәрендечилериң янына иберйәр. Эмма кәрендечилер оны енҗип, бош ковуп гойберйәрлер. 11Ол башга бир хызматкәрини иберйәр, кәрендечилер оны-да енҗип, масгара эдип, бош ковуп гойберйәрлер. 12Ол үчүнҗи хызматкәрини-де иберйәр. Олар оны хем яралап, ковуп гойберйәрлер. 13Онсоң үзүмчилигиң эеси: „Мен нәме этмели? Гел, өз сөвер оглумы иберейин, белки, оны сыларлар“ өйдйәр. 14Кәрендечилер болса оны гөренлеринден, өзара маслахатлашып: „Мирасдар шудур! Гелиң, шуны өлдүрелиң, мирас бизе галар“ дийишйәрлер. 15Шейлеликде, оны үзүмчиликден чыкарып өлдүрйәрлер. Инди үзүмчилигиң эеси булара нәме эдер? 16Ол гелип, бу кәрендечилери өлдүрер, үзүмчилиги болса башгалара берер». Халк муны эшидип: «Даш эдеверсин!» дийди. 17#Зеб 117:22.Иса олара бакып: «Онда „Уссаларың рет эден дашы, бинаның бурч дашы болды“ диен язгының манысы нәме? 18#Иша 8:14-15.Ким бу дашың үстүне йыкылса, бөлек-бөлек болар. Эгер ол бириниң үстүне гачса, оны мынҗырадар» дийди. 19Төврат мугаллымлары билен ёлбашчы руханылар Оны шол вагтың өзүнде тутмагың ёлуны агтардылар, себәби Онуң бу тымсалы өзлерине какдырып айданыны аңдылар. Эмма олар халкдан горкярдылар.
Императорыңкы – императора
(Матта 22:15-22; Марк 12:13-17)
20Исаны гөз астына алып, Оны аңтамак үчин, бирнәче догручылсумагы Онуң ызына салдылар. Олар Исаны гепде тутуп, Оны хәкимиң хөкүмине ве ыгтыярына табшырмак максатлары барды. 21Шейлеликде, олар Оңа: «Мугаллым! Биз Сениң догры зады өвредйәндигиңи, адамларың дереҗесине бакман, Худайың ёлуны хакыкат билен өвредйәндигиңи билйәрис. 22Ханы айт, бизиң императора салгыт төлемегимиз догрумы я-да догры дәл?» дийип сорадылар. 23Иса оларың хилесине дүшүнип: 24«Маңа салгыт пулуны гөркезиң. Бу теңңедәки шекил билен язгы кимиңки?» дийди. Олар: «Императорыңкы» дийип җогап бердилер. 25Ол: «Онда императорыңкыны – императора, Худайыңкыны Худая бериң» дийди. 26Олар халкың янында Оны сөзүнде тутуп билмән, берен җогабына хайран галып, сеслерини чыкармадылар.
Дирелиш барада совал
(Матта 22:23-33; Марк 12:18-27)
27Өлүмден соң дирелишиң ёкдугыны айдян саддукейлериң кәбири Исаның янына гелип, Оңа шейле сораг берди: 28#Кан 25:5-6.«Мугаллым! Муса бизе бир адамың доганы перзентсиз өлүп, ызында аялы галса, доганы онуң аялыны алып, өлен доганының неслини довам этдирмелидир дийип языпдыр. 29Еди доган барды. Биринҗиси бир аял алып, перзент гөрмән дүнйәден өтди. 30Икинҗиси билен 31үчүнҗиси хем шол аялы алды. Шейдип, едиси хем шол аяла өйленип, ызларында перзент галдырман өлдүлер. 32Ахырсоңы аял хем өлди. 33Инди дирелиш гүни бу аял оларың хайсысының аялы болар? Оларың едиси хем оңа өйленипди ахырын». 34Иса олара шейле җогап берди: «Бу дөврүң адамлары өйленйәндир, дурмуша чыкяндыр. 35Эмма гелҗек дөвре ве өлүмден дирелише етмәге мынасып гөрленлер не өйленер, не-де дурмуша чыкар. 36Асла өлмезлер, себәби олар перишделер ялыдыр. Олар дирелишиң перзентлеридиклери үчин Худайың перзентлеридир. 37#Мср 3:6.Муса-да өлүлериң дирелйәндигини тассыклап, янян чалы барадакы бөлүмде Ребби „Ыбрайымың, Ысхагың ве Якубың Худайы“ дийип атландыряр. 38Ол өлүлериң дәл-де, дирилериң Худайыдыр, себәби Онуң үчин хеммелер диридир». 39Төврат мугаллымларың кәбири: «Мугаллым, говы айтдың!» дийди. 40Оңа мундан артык сораг бермәге хич ким милт этмеди.
Месих Кимиң Оглы?
(Матта 22:41–23:36; Марк 12:35-40)
41Онсоң Иса олара: «Нәме үчин Месихе Давудың оглы диййәрлер? 42#Зеб 109:1.Ине, Давудың өзи Зебур китабында шейле диййәр:
„Худай Реббиме#20:42 Реб – Зебурда бу сөз реб болуп, патыша йүзлениленде уланылды, бу ерде болса Реб Месихе дегишли. шейле сөзледи:
43Душманларыңы аяк астына салянчам,
Мениң сагымда отур“.
44Эгер Давут Месихе Реб диййән болса, Ол нәхили Давудың оглы боляр?» дийди. 45Бүтин халк Оңа гулак асып отырка, Иса шәгиртлерине: 46«Төврат мугаллымларындан әгә болуң! Олар узын дон гейип гезмеги, базарларда өзлерине салам берилмегини, синагогаларда баш күрсүлери, мейлислерде төри халаяндырлар. 47Олар дул аялларың өйлерини талап, гөз үчин узын-узын догалар окан боляндырлар. Шейле адамлар иң агыр җеза сезевар боларлар» дийди.
© Мукаддес Китап Терҗиме Институты, 2016