Maqtaeq 13
13
Siqyoeq Saeq-eu Garkawv
Mk 4:1-9; Lk 8:4-8
1Khoer aqyawf ngae nan, Yeqsur, nymr-anr nae dov-ir-awr, lan landzer nuirluf-eu mae. 2Khoerngae, tsawrhaq armaf mafma, aqyawf jawr-eu gar uiqle-euq mirnae, aqyawf, lawq-euq lafkhoer ur-ir-awr nuir ngae, tsawrhaq armaf mafma dawqtawvluf lan landzer yawfluf-eu mae. 3Aqyawf yawjeq majeq dawq zmq-awr nae aqyawf maf-anr ghawqmya jeq maeqnaeq-eu lafkhoer heulof-aer aer-eu mae:
“Siqyoeq saeq-eu tiq ghaq siqyoeq saeq-ir-euq mae. 4Aqyawf saeq ngae, siqyoeq tiqpavnav deuq-aq, garma-euq khoertav ga-ir-awr, arjir oe-awr siqyoeq khoer-anr tovdzaq jir-euq mae. 5Tiqpavnav deuq-aq, khaqlo myaq-eu tsanr-anr ga-ir-awr, mirtsaq maqtur-eu mirnae, arji yawkawr-aer jilar-euq mae. 6Aerkhawf, nanrma dovlar-awr, arji khoerdeuq-anr uqtsar lawfzaw ngae, duqcir maq ka’naf nya-eu mirnae, nyoeq-ir kov-ir-euq mae. 7Tiqpavnav deuq-aq, aqgan daefmyaq-eu tsanr-anr ga-ir-euq mae. Aqgan bawduv maerlar-awr, arji khoerdeuq-anr uvtaeq taq-euq mae. 8Aerkhawf, tiqpavnav deuq-aq, mirtsaq mirmuiq-anr ga-ir-awr arsiq siqle-euq mae. Tiqpavnav deuq-aq 100 bymr, tiqpavnav deuq-aq 60 bymr, tiqpavnav deuq-aq 30 bymr laer siqle-euq mae. 9Naqbawr tsof-awr khar gaqnya-eu tsawrhaq narhaq-awq.”
Aqjeq Mirnae Yawjeq Majeq Dawq Zmq-eu
Mk 4:10-12; Lk 8:9-10
10Khoerngae, zaqlanr deuq lar-awr Yeqsur-anr narhaq-eu, “Nawr aqjeq mirnae tsawrhaq armaf mafma-anr yawjeq majeq dawq zmqzmq-aer maeq-eu le?”
11Yeqsur heulof-aer aerkhof naeq-euq mae, “Aqjeq mirnae aernar-aq, mqtav mirkhanq-euq garkawv zaftaq-euq deuq nawmaf-anr taef-aer bi siqnya-awr, aqyawf maf-anr maqbi siqnya-aq. 12Aqsur ghaq maqkaq, jav-eu tsawrhaq-anr par biflanq naeq-awr, aqyawf par javkuf dzaeqlar taef-a. Maqjav-eu tsawrhaq-anr-aq, aqyawf kharjav-eu jeq khawf yurdovjir naeq taef-a. 13Aqyawfmaf haw khawf maq hawmawr nya-aer, narhaq khawf maq gaqnya-eu uqtaf, aqyawfmaf maq ghovshaw nya-eu mirnae, ngar, aqyawf maf-anr yawjeq majeq dawq-anr nae maeqnaeq-eu ma. 14Miqyaer gharduq ngaeqdan-eu Irsaqyar nae aertaq-euq dawq heudawq aqyawf maf-euq lafkhoer byanlar-euq mae:
‘Nawmaf narhaq-awr yagaq-euq khawf maq ghovshaw nya-aer,
Haw-awr ya’mawr-euq khawf, maq hawduq nya-a.
15 Aqjeq mirnae aernar-aq,
Tsawrhaq heudeuq-euq nuima ghanr-ir-awr,
Naqbawr naqbar bar-ir-awr,
Myavnuiv mivtaeq taq-euq mae.
Khoerlof-aer maqghae lawnmr-aq,
Aqyawfmaf, ngar jawr-eu paw pyawrlar taef-a.
Ngar, aqyawf maf-anr bi taqler-eu ma.
Khoerngae, aqyawf maf-euq myavnuiv mawrlar-awr, naqbawr coerlar taef-a.
Nuima khawf noeqsiq nyalar taef-a.’ (Isy 6:9-10)
16Aerkhawf, nawmaf-euq myavnuiv ya’mawr-awr, nawmaf-euq naqbawr khawf yagaq-euq mirnae guiqlanq huiq-eu mae. 17Ngar, nawmaf-anr aqdirma-aer aernaeq nyar, arhu-euq Miqyaer gharduq ngaeqdan-eu tsawrhaq ghawqmya ghaq hawr-eu tsaq-awr dawr-eu tsawrhaq ghawqmya ghaq, nawmaf nae ya’mawr-euq deuq-anr mawrmawf khawf maqya mawr-aer, nawmaf nae yagaq-euq deuq-anr gaqmawf khawf maqya gaq-aq.
Siqyoeq Saeq-eu Garkawv-euq Dawqtsuif
Mk 4:13-20; Lk 8:11-15
18“Khoermirnae, siqyoeq saeq-eu garkawv yawjeq majeq dawq khoer-euq dawqtsuif nawmaf narhaq sher-eq. 19Tsawrhaq tiq ghaq mqtav mirkhanq-euq garkawv yagaq-awr, maq ghovshawnya nar-aq, yawcawv ghaq lar-awr, aqyawf-euq nuima-euq lafkhoer saeqtaq-euq siqyoeq-anr yurdzae-eu mae. Khoer-aq, garma-euq khoertav ga-ir-euq deuq-anr aer-eu mae. 20Khaqlo myaq-eu tsanr-anr ga-ir-euq deuq-aq, tsawrhaq tiq ghaq, Miqyaer-euq dawq yagaq-euq naeq-aer laqkhaq caertavni hageuf-euq tsawrhaq-anr aer-eu mae. 21Aerkhawf, aqyawf-euq lafkhoer duqcir maq ka’naf nya-euq mirnae, ghawqmyanrni maqgmq-a. Dawq khoer-euq baqda’nae shaq-awr zanq-eu jeq hawr-eu khaeq-awr khav-eu jeq keuvle ngae, tiqpov taef-aer coq-ir-eu mae. 22Aqgan daefmyaq-eu tsanr-anr ga-ir-euq deuq-aq, tsawrhaq tiq ghaq, Miqyaer-euq dawq yagaq-euq khawf, mirtsaq-euq khoertav jawr ngae, khanqlanr-eu jeq hawr-eu pyurshuir myawqganq-euq jaqmyawf maershuir nae, dawq khoerdeuq-anr uvtaeq taq-euq mirnae, arsiq maq siqle nya-eu gar aer-eu mae. 23Mirtsaq mirmuiq-anr ga-ir-euq deuq-aq, tsawrhaq tiq ghaq, Miqyaer-euq dawq yagaq-awr ghovshaw nya-eu tsawrhaq-anr aer-eu mae. Khoerlof-aer ghae-eu tsawrhaq deuq-aq, arsiq siqle-eu mae. Tiqpavnav deuq-aq 100 bymr, tiqpavnav deuq-aq 60 bymr, tiqpavnav deuq-aq 30 bymr laer siqle-eu mae.”
Shmrma Saeq-eu Garkawv
24Yeqsur, aqyawf maf-anr yawjeq majeq dawq, yawqdawq yawq-anr nae heulof-aer maeqnaeq-euq mae: “Mqtav mirkhanq-aq heulof-aer dur-eu mae. Tsawrhaq tiq ghaq, aqyawf-euq caeryar-anr caer siqyoeq yawmuiq saeq-euq mae. 25Aerkhawf, tsawrhaq yufkhavluf ngae, aqyawf-anr muir-eu ghaq lar-awr, caer siqyoeq saeqtaq-euq gar shmrma saeq-awr can-euq mae. 26Caerji jilar-awr, ghobymq ghodov dovlar ngae, shmrma khawf dovlar taq-euq gar ya’mawr-euq mae.
27Khoerngae, yarsanr ghaq-euq kuirlaf zaqkhav deuq, aqyawf-anr tsafgaq lar-awr aer-eu, ‘Sanqpaq-or! Nawr, nawq-euq caeryar-anr siqyoeq yawmuiq saeq-euq maqngeur lor? Shmrma khoerdeuq aqgeugar nae daeflar-euq nga?’
28Yarsanr ghaq aer-eu, ‘Ngaq-anr muir-eu ghaq nae janr-euq nga.’ Kuirlaf zaqkhav khoerdeuq narhaq-eu, ‘Nawr, nga’maf nae bi ghawrdzae-ir mawf mir-a lor?’
29Khoerngae, yarsanr ghaq heulof-aer aerkhof naeq-euq mae: ‘Taq ghawrdzae-ir siq. Shmrma ghawrdzae nar-aq, caerbawq khawf ghawrdzae-eu baw-mr. 30Caer yaeq ngae keuvni, nyiq jeq luf-anr tiqkawv lof-aer bidaef-awq. Caer yaeq yamq keuvlar nar-aq, Shmrma jeqhu lavuiq-awr, miqdzaq-anr bafpuiv-eu gharduq ardzanq dzanqtaq-awq. Caer-anr-aq, ngaq-euq caerjir-euq lafkhoer pi’anr taq-awq laer ngar, caer yaeq-eu deuq-anr aernaeq ma.’ ”
Ghawqpaf Arnuiv-euq Garkawv
Mk 4:30-32; Lk 13:18-19
31Yeqsur, aqyawf maf-anr yawjeq majeq dawq yawqdawqyawq heulof-aer par maeqnaeq-euq mae: “Mqtav mirkhanq-aq heulof-aer dur-eu mae. Tsawrhaq tiq ghaq, ghawqpaf arnuiv tiq nuiv yur-awr yar-anr saeqtaq-euq mae. 32Ghawqpaf arnuiv-aq, arnuiv dawqtawvluf navmaqtser nyirdzaeq-eu khawf, huiqlar ngae, sanqlanq dawqtawvluf navmaqtser huiqdzaeq-awr, arbawq bawqma malar-eu mae. Khoermirnae, khoertav zaw-eu arjir uqpyaq-anr yafle-eu mae.”
Daeqtseq-euq Garkawv
Lk 13:20-21
33Yeqsur, aqyawf maf-anr yawjeq majeq dawq yawqdawqyawq heulof-aer par maeqnaeq-euq mae, “Mqtav mirkhanq-aq heulof-aer dur-eu mae. Zaqmiq aqbur tiq ghaq daeqtseq yur-awr, caermeu smr puq-euq lafkhoer dawvzaf taq-awr nae, dawqtawvluf bi poqlar-euq gar dur-eu mae.”
Yeqsur, Yawjeq Majeq Dawq Zmq-eu
Mk 4:33-34
34Garkawv khoerdeuq dawqtawvluf, Yeqsur yawjeq majeq dawq zmqzmq-aer, tsawrhaq armaf mafma deuq-anr ngaeqnaeq-euq mae. Yeqsur, yawjeq majeq dawq maqzmq-aer-aq, aqyawf maf-anr maq ngaeqnaeq-aq. 35Khoer-aq, Miqyaer gharduq ngaeqdan-eu tsawrhaq nae ngaeqtaq-euq heudawq byanlar-euq mae,
“Ngar, ngaq-euq khaqmae mrnga-awr nae yawjeq majeq dawq ja’maeqnaeq ma.
Mirtsaq bae ngae nae zaftaq-euq deuq ngar aernaeq ma.” (Jc 78:2)
Shmrma-euq Garkawv-euq Dawqtsuif
36Khoerngae, Yeqsur, tsawrhaq armaf mafma deuq-anr bighof-ir-awr irkanr urler-euq mae. Aqyawf-euq zaqlanr deuq lar-awr aer-eu, “Daeyar-anr daef-eu shmrma-euq garkawv yawjeq majeq dawq-euq dawqtsuif, nga’maf-anr ja’maeq naeqlaf-awq.”
37Khoerngae, Yeqsur, aqyawf maf-anr heulof-aer aerkhof naeq-euq mae: “Siqyoeq yawmuiq saeq-euq khoerghaq-aq, Tsawrhaq-euq Zaqyo mae. 38Daeyar-aq, mirtsaq heusiq-anr aer-awr, siqyoeq yawmuiq khoer-aq, Miqyaer uvlanr-eu jeq-euq lafkhoer jawr-eu tsawrhaq deuq-anr aer-eu mae. Aerkhawf, shmrma-aq, yawcawv ghaq-euq zaqdeuq-anr aer-eu mae. 39Aqyawf-anr muir-awr shmrma saeq-euq ghaq-aq, naef sanqpaq mae. Caer yaeq-eu aryamq-aq, mirtsaq heu arsaqsaq ngae nan-anr aer-eu mae. Caer yaeq-eu deuq-aq, mqtav ghaqkhaer mae.
40“Shmrma-anr dzanq-awr, miqdzaq nae keuqdzae-eu lof-aer, mirtsaq heu arsaqsaq ngae nan khoerlof-aer pyeuflar taef-a. 41Tsawrhaq-euq Zaqyo, aqyawf-euq mqtav ghaqkhaer deuq-anr khaerlef-awr, aqcawq-anr sanqtif bi tiflar-eu yawqjeq navluf hawr-eu zanrdawq-anr leur-eu jeq mr-eu tsawrhaq dawqtawv luf-anr, aqyawf-euq uvlanr-eu jeq-euq lafkhoer nae yurdovdzae taef-a. 42Khoernar-aq, aqyawf maf-anr miqdzaq tsawqbym-anr biqanr taef-a. Khoergar jawr-awr noeqshaq duidui-eu lafkhoer ngoerngoer-aer seuq yateuf taef-a. 43Khoerngae, tsaq-awr dawr-eu tsawrhaq-aq, aqyawf maf-euq Aqda-euq uvlanr-eu jeq-euq lafkhoer, nanrma lof-aer yawshaef bya taef-a. Naqbawr tsof-awr khar gaqnya-eu tsawrhaq narhaq-awq!
Pyurpanq-euq Garkawv
44“Mqtav mirkhanq-aq, daeyar-anr duqpanq taq-euq pyurpanq-anr dur-eu mae. Pyurpanq khoer-anr mawr-euq ghaq daeqkaq yaf-awr, aqyawf laqkhaq caertavni ghof-ir-awr kharjav-eu yawqjeq navluf anqdzae jir-awr nae, daeyar khoerkawq zeur-euq mae.
Arcar Carkhawf Saer-euq Garkawv
45“Khoeruqtaf, mqtav mirkhanq-aq, zawr muiq-eu arcar carkhawf-euq saer-anr povluf-eu jeqgaf gaf-eu tiq ghaq-anr dur-eu mae. 46Aerkhawf, zawr poeq-eu arcar carkhawf-euq saer tiq siq povmawr ngae, ghof-ir-awr aqyawf kharjav-eu yawqjeq navluf anqdzae jir-awr nae saer khoersiq zeur-euq mae.
Za Gheu-eu Garkawv
47“Khoeruqtaf, mqtav mirkhanq-aq, za gheu-eu gar dur-eu mae. Iqmalavshav-anr za gheu ngae, ngaqshaq ngaqder yawqjeq navluf pafler-eu mae. 48Ngaqshaq tiqbyanni pafler ngae, ngaqshaq nyaef-eu tsawrhaq za khoer-anr lan landzer gheudov laf-eu mae. Khoernar-aq, nuir-awr yawmuiq deuq baerjur-anr tseranr-awr, maqmuiq-eu deuq biqdzae-eu mae. 49Mirtsaq heu arsaqsaq ngae nan khawf khoerlof-aer pyeuflar taef-a. Mqtav ghaqkhaer oe-awr, tsaq-awr dawr-eu tsawrhaq hawr-eu yawcawv jeq mr-eu tsawrhaq-anr tserpav-awr nae, 50yawcawv jeq mr-eu tsawrhaq-anr-aq, miqdzaq tsawqbym-anr biqanr taef-a. Aqyawfmaf, khoergar jawr-awr noeqshaq duidui-eu lafkhoer ngoerngoer-aer seuq yateuf taef-a.”
Yawshuif Hawr-eu Yawoer
51Khoerngae, Yeqsur narhaq-eu, “Garkawv heudeuq dawqtawvluf nawmaf ghovshaw-euq ma lor?” Aqyawfmaf aer-eu, “Ghovshaw-euq ma.” 52Yeqsur, aqyawf maf-anr aernaeq-eu, “Miqyaer-euq mirkhanq-euq garkawv dzawtaq-euq zanr maeq-eu yawqghaq navluf, nymrsanr tiq ghaq, aqyawf-euq myawq taqduq-anr nae, myawq yawshuif hawr-eu yawoer yurdov lef-eu gar dur-eu mae.”
Naqzaqlaer Tsawrhaq, Yeqsur-anr Maq Hageuf-a
Mk 6:1-6; Lk 4:16-30
53Khoerngae, heulof-aer pyeuflar-euq mae. Yeqsur yawjeq majeq dawq khoerdeuq maeqnaeq ghaq ngae, khoergar nae dov-ir-awr, 54aqyawf-euq jawrkhanq-anr ghofler-euq mae. Aqyawf, zanrdawq khawqnymr-euq lafkhoer maeqnaeq tsovnaeq-euq mae. Aqyawfmaf zanq duidui ler-awr heulof-aer aer-eu mae: “Tsawrhaq heughaq teulof-aer ghae-eu zaqsiq tsawrganr hawr-eu baoq huiq-eu gardeuq aqgeugar nae za-euq nga? 55Aqyawf, lafmyawq lafsawv nya-eu khoerghaq-euq zaqyo maqngeur-a lor? Aqyawf-euq aqma-aq, Maqliv laer kur-eu maqngeur-a laq? Aqyawf-euq maernmr deuq-aq, Yaqkov, Yorsaev, Sirmoq hawr-eu Yurdav laer kur-eu maqngeur-a lor? 56Aqyawf-euq dmrma yawqghaq navluf khawf, heugar aqdui naeq-aer jawr-eu maqngeur-a laq? Aqyawf, teudeuq dawqtawvluf aqgeugar nae za-euq nga?”
57Aqyawfmaf, aqyawf-anr nuima maqsar-a. Khoermirnae, Yeqsur aer-eu, “Miqyaer gharduq ngaeqdan-eu tsawrhaq-aq, yawqha-euq jawrkhanq hawr-eu yawqha-euq nymrkhanq-euq lafkhoer maqngeur nar-aq, khanqsaer maqjav-aer maqghae-a.” 58Aqyawfmaf maqjan-eu mirnae, Yeqsur khoergar baoq huiq-eu gardeuq ghawqmya’ni maqmr-aq.
2018 ©
Bibles International ®
The Bible Society of Baptist Mid-Missions