Maqtaeq 14
14
Bartirsaq Mrnaeq-eu Yorhaq Shir-euq
Mk 6:14-29; Lk 9:7-9
1Khoerngae, Yeqsur-euq garkawv gaqdoe-ir luf-eu gar sanqpaq Heqlor yagaq-awr, 2aqyawf-euq ghaqzaq ghaqkhaer deuq-anr aernaeq-eu, “Khoerghaq-aq, Bartirsaq mrnaeq-eu Yorhaq nga, aqyawf shir-euq gar nae ghofdaef lar-euq mirnae, baoq khoerdeuq aqyawf-euq lafkhoer gar mrluf-eu nga.”
3Aqyawf-euq maernmr Pirlirpuv-euq nymrdanq Heqlordir baqda’nae, Heqlor, Yorhaq-anr binyaef-ir-awr paf-awr kuv-anr dawvtaq-euq mae. 4Aqjeq mirnae aernar-aq, Yorhaq, aqyawf-anr heulof-aer aernaeq-euq mirnae mae, “Nawr, zaqmiq aqbur teughaq-anr sheuq-euq-aq, zanr-anr maqtsaq-a.” 5Heqlor, Yorhaq-anr saefmawf-eu khawf, mirkhanqzaq-anr guv-eu mae. Aqjeq mirnae aernar-aq, mirkhanqzaq, Yorhaq-aq, Miqyaer gharduq ngaeqdan-eu tsawrhaq mae laer sawxtaq-euq mae.
6Heqlor daefle-euq arnan-anr noeqkeuv-eu yawbui builuf ngae, Heqlordir-euq zaqmiq, tsawrhaq khoermyav ni-euq maeqshi garnyae nyae-eu gar Heqlor nuikhanrshir duidui-eu mae. 7Khoermirnae, aqyawf kharshar-eu jeq bif ma laer Heqlor, aqbur khoerghaq-anr sarjax dzaq-eu lafkhoer kamq-euq mae. 8Aqbur khoerghaq, aqyawf-euq aqma nae maeqnaeq taq-euq lof-aer shar-eu, “Bartirsaq mrnaeq-eu Yorhaq-euq uqduq, saerbyaer-anr bafanr-awr heugar, ngaq-anr ciqnaeq laf-awq.”
9Khoerngae, sanqpaq Heqlor noeqshaq-eu mae. Aerkhawf, aqyawf naeq-aer jawq-awr dzaqtaf luf-eu deuq-euq maeqshi kamq-euq baqda’nae, Aqbur khoerghaq shar-eu lof-aer janrnaeq-awq laer dawq bif-euq mae. 10Khoernar-aq, aqyawf, aqcawq-anr khaerghae-awr, kuv-anr ur-eu Yorhaq-euq uqduq bi tovlaq-ir-euq mae. 11Khoernar-aq, Yorhaq-euq uqduq, saerbyaer-anr bafanr-awr nae, aqbur khoerghaq-anr ciqnaeq lar-euq mae. Aqbur khoerghaq khawf, aqyawf-euq aqma-anr ciqnaeq-ir-euq mae. 12Khoerngae, Yorhaq-euq zaqlanr deuq lar-awr, Yorhaq-euq mawrdo-anr bafdov ghae-awr bafpanq ghaq-euq nar-aq, Yeqsur jawr-eu gar ir-awr dzawrnaeq-ir-euq mae.
Tsawrhaq 5,000 Ghaq-anr Bidzaq-euq
Mk 6:30-44; Lk 9:10-17; Yh 6:1-15
13Yeqsur garkawv khoer-anr yagaq ngae, khoergar nae aqyawf tiq ghaq taef-aer lawq-anr ur-awr, tsawrhaq maqjawr-eu gar ir-euq mae. Tsawrhaq armaf mafma deuq yasiq ngae, meuqdeuq-anr nae dov-ir-awr, kuirzoq nae aqyawf-euq maeqnan cantae ghae-euq mae. 14Yeqsur, lawq-anr nae dovlar ngae, tsawrhaq armaf mafma-anr ya’mawr-awr, aqyawf maf-anr ghawqshaq gaq-awr nae, aqyawf maf-euq lafkhoer nar-awr gawr-eu tsawrhaq deuq-anr lavtaq naeq-euq mae.
15Uqcif uqtaw tawle ngae, zaqlanr deuq, aqyawf jawr-eu gar lar-awr aer-eu, “Heugar-aq, bawrtsanq pyeuf-awr, uqcif khawf cifle shaw-iq-eu mirnae, tsawrhaq armaf mafma heudeuq-anr pyaeq-awr, pu doeni dzaqdzaq dawrdawr bi zeurdzaq-ir-awq.”
16Khoerngae, Yeqsur aer-eu, “Aqyawfmaf ghof-ir-eu laer maqya ghae-ar. Nawmaf, aqyawf maf-anr tiqjeqnav bidzaq-awq.”
17Zaqlanr deuq, aqyawf-anr aernaeq-eu, “Nga’maf heugar kaqmur ngaq siq hawr-eu ngaqshaq nyiq mawr anr-eu taef ma.”
18Yeqsur aer-eu, “Ngar jawr-eu gar yurlaf-awq.”
19Khoernar-aq, Yeqsur, tsawrhaq armaf mafma-anr daqzawq yarmof-euq khoertav nuir-awq laer dawq bif-euq mae. Khoerngae, kaqmur khoer ngaq siq hawr-eu ngaqshaq khoer nyiq mawr yur-awr, mq paw haw-awr, Miqyaer-euq guiqlanq-anr jaceuq-euq mae. Khoernar-aq, kaqmur khoer ngawqpyaeq-awr, zaqlanr deuq-anr bif-awr nae, zaqlanr deuq, tsawrhaq armaf mafma deuq-anr bifnaeq-euq mae. 20Aqyawfmaf yawqghaq navluf tiqdaev yadzaq-euq mae. Dzerlar-euq deuq hawr-eu yawpyaeq yawmeur deuq-anr ghovuiq ngae, khavpuq 12 puq byan-eu mae. 21Dzaq-euq tsawrhaq deuq, zaqmiq aqbur hawr-eu zaqdeuq-anr maqsawx-aer, zaqyo aqli taef-aer 5,000 ghaq aerghaqni byan-eu mae.
Yeqsur, Lan-euq Khoertav Can-euq
Mk 6:45-52; Yh 6:16-24
22Yeqsur, tsawrhaq armaf mafma deuq-anr bighof-ir luf ngae, zaqlanr deuq-anr-aq, lawq-anr yawkawr-aer biur-ir-awr, aqyawf-euq maeqhu nae lan-euq nuibaq paw bi irtsaev tawq-euq mae. 23Tsawrhaq armaf mafma deuq-anr bighof-ir jir-euq nar-aq, aqyawf tiq ghaq taef-aer gawqjawq-anr davler-awr, guiqlanq sharler-euq mae. Uqcif cifle ngae, aqyawf tiq ghaq taef-aer khoergar jawrluf-eu mae. 24Lawq khoerlawq, lan-euq ghanrcae irkeuv ngae, jaqlaer baw-eu arpyawq maqtsaq-eu mirnae, irluv dzae-awr, lawq-anr ciqtanq ciqtuv duidui luf-eu mae.
25Uqbya byataw, Yeqsur, lan-euq khoertav cancan-aer zaqlanr deuq jawr-eu gar oeluf-eu mae. 26Aqyawf, lan-euq khoertav cancan-aer oeluf-eu gar zaqlanr deuq ya’mawr ngae, tsawqguv-ir-awr gur-eu, “Naef nga!”
27Khoerngae, Yeqsur, aqyawf maf-anr yawkawr-aer aernaeq-eu, “Taqguv, ngar le! Nuima zifdanni ghae-awq.”
28Khoerngae, Beqtuvluv aer-eu, “Sanqpaq-or! Nawr jeq mar-iq ngaq-anr ircuf-euq khoertav nae nawr jawr-eu gar oe-awq laer dawq bifnaeq laf-awq.”
29Khoerngae, Yeqsur aer-eu, “Oe-awq.” Khoermirnae, Beqtuvluv, lawq-anr nae dov-ir-awr, ircuf-euq khoertav cancan-aer Yeqsur jawr-eu gar ir-euq mae. 30Aerkhawf, Beqtuvluv, jaqlaer laerma bawlaf-eu gar ya’mawr-awr guv duidui-ir-awr, ircuf-anr ga’nuif ghaeluf-eu mae. Khoerngae, Beqtuvluv gur-eu, “Sanqpaq-or! Ngaq-anr bibuq-ir naeqlaf-awq!” 31Khoerngae, Yeqsur, aqlaf yawkawr-aer cawqja-awr aqyawf-anr gheutaeq-awr nae aer-eu, “Jan-eu ghaq baq-eu tsawrhaq-or! Nawr aqjeq mirnae povpov lavlav-aer noeq-eu le?”
32Aqyawfnyaf, lawq-euq lafkhoer urler ngae, jaqlaer baw-eu naqler-euq mae. 33Khoerngae, lawq-euq lafkhoer urluf-eu deuq, Yeqsur jawr-eu gar lar-awr uqduq tanqtanq-aer aer-eu, “Nawr-aq, aqdir aqmar Miqyaer-euq Zaqyo ngar-a.”
Yeqsur-anr Toeqciv-eu Tsawrhaq Taqler-euq
Mk 6:53-56
34Aqyawfmaf, lan tsaevdov-awr, Geqneqsaqlaer mirkhanq-anr irkeuv-euq mae. 35Khoergar jawr-eu tsawrhaq deuq, Yeqsur-anr hawsiq-awr, mirkhanq khoerkhanq doeni bi tsafgaq-ir-awr, nar-eu tsawrhaq dawqtawvluf, aqyawf jawr-eu gar bi sheuqlaf-euq mae. 36Nar-eu tsawrhaq khoerdeuq, Yeqsur-anr aqyawf-euq paerkhanq paerdanq-anr taef-aer khawf, bi toeqciv naeqlaf-awq laer shar-awr khar toeqciv-euq tsawrhaq taqler jir-euq mae.
2018 ©
Bibles International ®
The Bible Society of Baptist Mid-Missions