Maqtaeq 15
15
Tawqka Lef-euq Zanroer
Mk 7:1-23
1Khoerngae, Paqliqsaer deuq hawr-eu zanr maeq-eu deuq, Yeqlursaqlaeq-anr nae Yeqsur jawr-eu gar oe-awr aer-eu, 2“Aqjeq mirnae nawq-euq zaqlanr deuq tsawrmawq deuq nae tawqka lef-euq zanroer-anr mrbanq mrlaeq-eu la? Aqjeq mirnae aernar-aq, aqyawfmaf hawq dzaq ngae, aqlaf maqdzuif-eu nga.”
3Khoerngae, Yeqsur, aqyawf maf-anr heulof-aer aerkhof naeq-euq mae: “Nawmaf aqjeq mirnae nawmaf-euq zanroer tawqnya’ni, Miqyaer nae biftaq-euq zanrdawq khofdawq-anr mrbanq mrlaeq-eu le?
4 ‘Nawqma nawqda-anr yawzeu baw-awq.’ (Di 20:12; Dm 5:16)
‘Yawqha-euq aqma aqda-anr yaqkhaer yaq-eu tsawrhaq-aq, yabi saef taef-a’ (Di 21:17; Lb 20:9)
laer Miqyaer nae dawq biftaq-euq mae. 5Aerkhawf, nawmaf aer-eu, ‘Aqsur ghaq maqkaq, yawqha-euq aqma aqda-anr, “Nawq-anr bif paq-aer ghae-eu jeq, ngar, Miqyaer-anr bifdzeur-euq ma” laer aernaeq-euq nar-aq, 6aqyawf, yawqha-euq aqma aqda-anr bosav-eu laer maqya ghae-ar’ laer nawmaf aeraer-aer zanroer tawq-eu mirnae, Miqyaer-euq zanrdawq khofdawq-anr lavcawv-eu mae. 7Yawmuiq janrgeuf-eu tsawrhaq deuq-or! Miqyaer gharduq ngaeqdan-eu Irsaqyar nae, nawmaf-euq garkawv aertaq-euq heudawq-aq, tsaq duidui-eu mae:
8 ‘Tsawrhaq heudeuq-aq, khaqmae nae ngar jawr-eu gar lar-awr,
Maeqluq nae taqhuiq taqmanr-eu khawf,
Aqyawf maf-euq nuima-aq, ngaq-anr nae garmanr kaq-eu gar javluf-eu mae.
9 Aqyawfmaf, tsawrhaq-euq zanrtaq khoftaq deuq, maeqdawq tsovdawq lof-aer maeq-eu mirnae,
Aqyawfmaf, ngaq-anr uqduq tanq-eu-aq, tiqjeq-iq gardanr maqtsoeq-a.’ ” (Isy 29:13)
10Khoernar-aq, Yeqsur, tsawrhaq armaf mafma deuq-anr kur-awr heulof-aer aernaeq-euq mae, “Nawmaf narhaq-awr ghovshaw geuf-awq. 11Khaqmae-anr nae anr-ir-eu jeq-aq, tsawrhaq-anr maqshawrni bi pyeuflar-eu maqngeur-a. Khaqmae-anr nae dovlar-eu jeq taef-aer tsawrhaq-anr maqshawrni bi pyeuflar nya-eu mae.”
12Khoerngae, aqyawf-euq zaqlanr deuq, aqyawf jawr-eu gar lar-awr aer-eu, “Paqliqsaer deuq, nawq nae aer-euq dawq heudeuq-anr yagaq ngae coeqler-aq laer nawr siqnya ma lor?”
13Khoerngae, Yeqsur heulof-aer aerkhof naeq-euq mae: “Arbawq yawqbawq navluf mq-euq khoertav jawr-eu ngaqDa nae kataq-euq maqngeur nar-aq, yawqbawq navluf-anr dawqpaeq duqpur laevni yabi ghawrdzae taef-a. 14Yawqha navni jav luf-ur. Aqyawf maf-aq, myavbaef pyeuf-eu khawf, garma sheuqmaeq-eu tsawrhaq geufluf-eu mae. Myavbaef yawkaq myavbaef garma sheuqmaeq nar-aq, nyiq ghaqluf duqkhanq-anr ga’anr taef-a.”
15Khoerngae, Beqtuvluv, Yeqsur-anr aernaeq-eu, “Yawjeq majeq dawq heudawq-euq dawqtsuif, nga’maf-anr maeqnaeq laf-awq.”
16Khoerngae, Yeqsur heulof-aer aernaeq-euq mae: “Nawmaf khawf, nymq-mr keuvni maq ghovshaw-aq siq lor? 17Khaqmae-anr nae anr-ir-eu yawqjeq navluf uqmav-euq lafkhoer anr-ir-awr, lafnyir paw dovle-eu gar nawmaf maq ghovshaw-aq siq laq? 18Aerkhawf, khaqmae-anr nae dovlar-eu jeq-aq, nuima-euq lafkhoer nae dovlar-eu mirnae, khoerdeuq-aq, tsawrhaq-anr maqshawrni bi pyeuflar-eu mae. 19Aqjeq mirnae aernar-aq, nuima-euq lafkhoer nae heudeuq dovlar-eu mae: yawdoer jeq sharnoeq-eu, tsawrhaq saef-eu, banq-awr joe-eu, banq-awr muv-eu, smrkhoeq khoeq-eu, maqtsaq maqdawr-eu sarkir kamq-eu hawr-eu, yaeqbawq saerlu-aer aer-eu 20heudeuq-aq, tsawrhaq-anr maqshawrni bi pyeuflar nya-eu mae. Aerkhawf, aqlaf maqdzuif-aer hawq dzaq-eu-aq, tsawrhaq-anr maqshawrni maqbi pyeuflar nya-a.”
Kaqnaqma Tiq Ghaq-euq Nuijan
Mk 7:24-30
21Yeqsur khoergar nae dov-ir-awr, Durlu hawr-eu Sirdoq mirkhanq paw ir-euq mae. 22Khoerngae, Kaqnaq tsawrhaq-euq zaqmiq aqbur tiq ghaq mirkhanq khoercoer-anr nae lar-awr heulof-aer gur-eu mae, “Daqbir-euq Zaqyo, Sanqpaq-or! Ngaq-anr ghawqshaq gaqnaeq laf-awq. Ngaqbur-anr naef urler-awr yadaq duidui luf-eu mae.”
23Aerkhawf, Yeqsur tiqdawq-iq maq ngaeqcawq naeq-aq. Khoerngae, aqyawf-euq zaqlanr deuq, aqyawf jawr-eu gar lar-awr shar-eu, “Aqma heughaq, aqdui maf-euq maeqnan gurgur-aer cantae luf-eu mirnae, aqyawf-anr taeghof ghae-awq.”
24Khoerngae, Yeqsur aerkhof naeq-eu, “Irsaqleqlav tsawrhaq-euq lafkhoer, byov-ir-euq yawrdeuq jawr-eu gar taef-aer ngaq-anr khaerghae lef-euq mae.”
25Aqma khoerghaq, aqyawf-anr uqduq tanqtanq-aer shar-eu, “Sanqpaq-or! Ngaq-anr cawba naeqlaf-awq!”
26Yeqsur aerkhof naeq-eu, “Zaq dzaqluf-eu jeq yurdov-awr, aqkuiq-anr dzaenaeq-eu maqtsaq-a.”
27Aqma khoerghaq aer-eu, “Ngeur mae, Sanqpaq-or! Aerkhawf, aqkuiq-aq, yawsanr ghaq-euq hawqje-anr nae gaka le-euq dzaqngaeq dawrdzae-anr ghovdzaq-eu mae.”
28Yeqsur, aqyawf-anr aernaeq-eu, “Zaqmiq-or! Nawr-aq, jan-eu zawr-aer zif-eu tiq ghaq ngar-a. Nawr geufmawf-eu lof-aer nawq-euq gharduq pyeuflar-euq mae.” Khoerngae yamq-anr nae nar-aq, aqyawf-euq zaqmiq taqler-euq mae.
Tsawrhaq Ghawqmya Ni-anr Lavtaq Naeq-euq
29Yeqsur, khoergar nae dov-ir-awr, Gaqliqlaer lan landzer ir-awr, gawqjawq-anr davler-awr khoergar nuir-euq mae. 30Tsawrhaq armaf mafma, aqyawf jawr-eu gar lar-euq mae. Aqyawfmaf lar ngae, kuircawv tsawrhaq, myavbaef baef-eu tsawrhaq, aqdzawq deuq, arsaer cawv-ir-euq tsawrhaq hawr-eu nuijeq nar-eu tsawrhaq-anr khawf, Yeqsur-euq aqkuir-euq dawqpae baftaq lar-euq mae. Khoerngae, Yeqsur, aqyawf maf-euq nargawr lavtaq naeq-euq mae. 31Aqdzawq deuq dawq ngaeqnyalar, arsaer cawv-ir-euq deuq muiqlar, kuircawv deuq cannya lar-euq uqtaf, myavbaef deuq mawrnya lar-euq mae. Tsawrhaq armaf mafma deuq, heudeuq-anr ya’mawr ngae zanqler-awr, aqyawfmaf, Irsaqleqlav-euq Miqyaer-anr ciqhuiq ciqmanr-eu mae.
Tsawrhaq 4,000 Ghaq-anr Bidzaq-euq
Mk 8:1-10
32Yeqsur, zaqlanr deuq-anr kur-awr aernaeq-eu, “Ngar, tsawrhaq heudeuq-anr ghawqshaqgaq nya. Aqyawfmaf, ngaq naeq-aer heugar jawrluf-eu smq nan byanlar-awr, tiqjeq-iq dzaq-eu maqpar anr-eu ngar-a. Ngar, aqyawf maf-anr hawqmaef maef-eu lafkhoer maqbi ghof-ir mawf nya. Bighof-ir nar-aq, garpaer-anr myafler-eu baw-mr.”
33Aqyawf-euq zaqlanr deuq aer-eu, “Tsawrhaq armaf mafma-anr bi dzaqdaev-eu gharduq, heulof-aer ghae-eu bawrtsanq bawrdanr-anr kaqmur aqgar povlaq-ir nmr-mq?”
34Yeqsur, aqyawf maf-anr narhaq-eu, “Nawmaf kaqmur armyav siq anr-eu le?” Khoerngae, aqyawfmaf aer-eu, “Kaqmur shif siq hawr-eu ngaqshaqzaq heumyav mawr anr-eu ma.”
35Yeqsur, tsawrhaq armaf mafma-anr mirtsa nuirni, dawq bif-euq mae. 36Khoernar-aq, kaqmur khoer shif siq hawr-eu ngaqshaq khoermyav mawr yur-awr, Miqyaer-euq guiqlanq-anr jaceuq-awr, ngawqpyaeq-euq mae. Khoernar-aq, zaqlanr deuq-anr bifnaeq-awr zaqlanr deuq nae, tsawrhaq armaf mafma-anr birnaeq-euq mae. 37Aqyawfmaf dawqtawvluf tiqdaev yadzaq-euq mae. Yawpyaeq yawmeur deuq ghovuiq ngae, khavpuq puqma shif puq byan-eu mae. 38Khardzaq-euq tsawrhaq deuq, zaqmiq aqbur hawr-eu zaqdeuq maqsawx-aer, zaqyo aqli taef-aer 4,000 ghaq byan-eu mae. 39Khoernar-aq, Yeqsur, tsawrhaq armaf mafma deuq-anr bighof-ir-awr, lawq-anr ur-awr, Maqgaqdaq mirkhanq-anr ir-euq mae.
2018 ©
Bibles International ®
The Bible Society of Baptist Mid-Missions