Maqtaeq 16
16
Bisiq Bimawr-eu Jeq Sharhaw-eu
Mk 8:11-13; Lk 12:54-56
1Paqliqsaer deuq hawr-eu Saqduqgaer deuq, Yeqsur-anr tsermrhaw mawf-eu mirnae, mq-anr bisiq bimawr-eu jeq janr-awr bimawr naeqlaf-awq laer shar-eu mae.
2Yeqsur, aqyawf maf-anr heulof-aer aerkhof naeq-euq mae, “Uqcif cifle ngae, mqnerner nar-aq, ‘Nishawq-aq, mq yawmuiq ngar-a’ laer nawmaf aer-eu mae. 3Uqshawq paw mqnerner-awr, zanrtsuini ghae nar-aq, ‘Iqnan-aq, mqjeq jaqlaer jav-eu ngar-a’ laer nawmaf aer-eu mae. Yawmuiq janrgeuf-eu tsawrhaq deuq-or! Nawmaf, mq-anr haw-awr, uqyaer uqtsar tofnya-eu gar nae, heuyamq heulaw-anr taf-eu bisiq bimawr-eu jeq-anr maq tserpav nya-eu beu. 4Zawr cawv-awr banq-awr muv-eu heuzir-aq, bisiq bimawr-eu jeq sharpov-eu mae. Miqyaer gharduq ngaeqdan-eu Yornav-euq bisiq bimawr-eu jeq khoer maqngeur nar-aq, aqyawf maf-anr nuijeq maqbi mawr.” Khoernar-aq, Yeqsur, aqyawf maf-anr nae ghawq-awr dov-ir-euq mae.
Daeqtseq-anr Yanr-awq
Mk 8:14-21
5Aqyawf-euq zaqlanr deuq, lan-euq nuibaq-anr irkeuv ngae, kaqmur maq yurlafni ngaeryaf-euq mae. 6Khoerngae, Yeqsur, aqyawf maf-anr aernaeq-eu, “Nawmaf, Paqliqsaer deuq hawr-eu Saqduqgaer deuq-euq daeqtseq-anr haw-awr yanr de-eq.”
7Zaqlanr deuq, aqyawf maf-euq yawkaq aer-eu, “Aqduimaf, kaqmur maq yurlef-euq mirnae, aqyawf teulof-aer aer-eu jeq ngar-a.”
8Yeqsur garkawv khoer-anr siqnya-awr heulof-aer aernaeq-euq mae: “Jan-eu ghaq baq-eu tsawrhaq deuq-or! Aqjeq mirnae kaqmur maq yurlef-euq garkawv nawmaf-euq yawkaq jaluf-eu le? 9Nawmaf nymq-mr keuvni maq ghovshaw-aq siq lor? Kaqmur khoer ngaq siq nae tsawrhaq 5,000 ghaq dzaqdaev-awr, dzaeqlar-euq deuq nawmaf armyav puq ghovbyan-euq gar ngaer-euq mir-a laq? 10Khoeruqtaf, kaqmur khoer shif siq nae 4,000 ghaq dzaqdaev-awr, dzaeqlar-euq deuq nawmaf khavpuq puqma armyav puq ghovbyan-euq gar khawf ngaer-euq mir-a lor? 11‘Paqliqsaer deuq hawr-eu Saqduqgaer deuq-euq daeqtseq-anr yanr-awq’ laer ngaq nae nawmaf-anr aernaeq-euq dawq khoerdawq-aq, kaqmur-euq garkawv-anr aermawf-eu maqngeur nga laer, nawmaf aqjox-aer maq ghovshaw nya-eu le?”
12Zaqlanr deuq khoerngae hawr-eu, kaqmur janr-eu gar dawv-eu daeqtseq-anr yanr-awq laer Yeqsur aermawf-eu maqngeur-aer, Paqliqsaer deuq hawr-eu Saqduqgaer deuq-euq dawqmaeq dawqtsov-anr yanr-awq laer aermawf-eu law hawrngaq laer ghovshawnya lar-euq mae.
Beqtuvluv, Yeqsur-aq, Kali Mae Laer Aer-eu
Mk 8:27-30; Lk 9:18-21
13Yeqsur, Gaersaqlir Pirlirpuv mirkhanq-anr lekeuv ngae, aqyawf-euq zaqlanr deuq-anr narhaq-eu, “Aqcawq, Tsawrhaq-euq Zaqyo-anr aqsur ghaq nga laer aerluf-eu la?”
14Aqyawfmaf aerkhof naeq-eu, “Tiqpavnav deuq-aq, Bartirsaq mrnaeq-eu Yorhaq nga laer aer-awr, tiqpavnav deuq-aq, Erlirya nga laer aer-eu mae. Tiqpavnav deuq-aq, Yeqlaqmir maqngeur nar-aq, Miqyaer gharduq ngaeqdan-eu tiqghaqnav ngar-a laer khawf aer-eu mae.”
15Yeqsur, aqyawf maf-anr narhaq-eu, “Nawmaf lawr nae? Ngar, aqsur ghaq nga laer aer le?”
16Khoerngae, Sirmoq Beqtuvluv aerkhof-eu, “Nawr-aq, daefluf-eu Miqyaer-euq Zaqyo pyeuf-eu Kali#16:16 Kali Heqlaqsar dawq heudawq-aq, Heqbyaer dawq “Meqsirya” laer aer-awr, Miqyaer nae “Tsaqtsov-awr tsir laef-euq ghaq” laer aermawf-eu mae. mae.”
17Khoerngae, Yeqsur, aqyawf-anr heulof-aer aernaeq-euq mae, “Yornav-euq zaqyo Sirmoq-or! Nawr-aq, guiqlanq huiq-eu mae. Aqjeq mirnae aernar-aq, garkawv heu tsawrhaqzaq nae nawq-anr panmaeq naeq-euq maqngeur-a. Mq-euq khoertav jawr-eu ngaqDa nae nawq-anr panmaeq naeq-euq mae. 18Ngar, nawq-anr aernaeq nyar, nawr-aq, Beqtuvluv ngar-a. Ngar, khaqlo heu-euq khoertav ngaq-euq armur tsovdav ma. Shir-eu mirkhanq-euq larghov-aq, armur heumur-anr maq ghaqlar nya-ar. 19Ngar, nawq-anr mqtav mirkhanq-euq mawqtawfdur bif ma. Mirtsaq-euq khoertav nawq nae khar paftawf-euq jeq, mq-euq khoertav khawf paftawf taef-a. Mirtsaq-euq khoertav nawq nae khar puirpyaeq-euq jeq, mq-euq khoertav khawf puirpyaeq taef-a.” 20Khoerngae, Yeqsur-aq, Kali mae laer tiqghaq-anr-iq maqbi ja’naeq-eu gharduq, Yeqsur, aqyawf-euq zaqlanr deuq-anr dawq bif-euq mae.
Yeqsur, Aqyawf Yashir-eu Garkawv Ngaeq-eu
Mk 8:31; 9:1; Lk 9:22-27
21Khoerngae yamq-anr nae nar-aq danqbae-awr, Yeqsur, aqyawf-aq, Yeqlursaqlaeq-anr yale-awr, aqyuif aqtsu deuq, pirma aqyuif deuq hawr-eu zanr maeq-eu deuq-euq aqlaf-euq lafkhoer, ghawqmya jeq yadaq-eu uqtaf, yabi saef-awr, smq nan byanlar nar-aq, ya ghofdaeflar mae laer aqyawf-euq zaqlanr deuq-anr byacaevni bisiq-euq mae.
22Khoerngae, Beqtuvluv, Yeqsur-anr gardzer paw sheuqghawq-awr daeq-eu lafkhoer aer-eu, “Sanqpaq-or! Khoerlof-aer ghae-eu jeq nawq-euq khoertav tiqjox-iq maq keuvle khmq-ar!”
23Khoerngae, Yeqsur nanrghof ghofhaw-awr Beqtuvluv-anr aernaeq-eu, “Naef Saqdaq-or! Ngaq-euq narkhan paw caev-awq. Nawr, ngaq-anr sanqtif bitif-eu laer ghae-eu nga. Aqjeq mirnae aernar-aq, nawq-euq nuinoeq-aq, Miqyaer-euq nuinoeq maqngeur-eu, tsawrhaq-euq nuinoeq sharnoeq luf-eu nga.”
24Khoerngae, Yeqsur, aqyawf-euq zaqlanr deuq-anr heulof-aer aernaeq-euq mae: “Tsawrhaq tiq ghaq, ngaq-euq maeqnan cantaelar mawf nar-aq, yawqha-euq nuikhanr byaerdzae yaf-awr, yawqha-euq lafyaq baf-awr nae, ngaq-euq maeqnan ya cantae lar-eu mae. 25Aqjeq mirnae aernar-aq, aqsur ghaq maqkaq, yawqha-euq daefzir bibuq-ir mawf nar-aq, daefzir yasmq taef-a. Aerkhawf, aqsur ghaq maqkaq, ngaq-euq gharduq yawqha-euq daefzir bismq-ir nar-aq, daefzir za taef-a. 26Tsawrhaq tiqghaqnav mirtsaq dawqtawvluf za-euq khawf, aqyawf-euq nuima saflar smq nar-aq, aqyawf-euq gharduq aqjeq gardanr tsoeq-eu? Tsawrhaq tiq ghaq, aqyawf-euq nuima saflar-anr aqgeu jeq nae zeurkhof dawqkhof nya-eu la? 27Tsawrhaq-euq Zaqyo-aq, aqyawf-euq Aqda-euq yawshaef khanqsaer-euq lafkhoer, aqyawf-euq mqtav ghaqkhaer deuq naeq-aer zafkale taef-a. Khoerngae, tsawrhaq yawqghaq navluf-anr yawqha nae khar mrtaq-euq lof-aer janrkhofnaeq taef-a.
28“Ngar, nawmaf-anr aqdirma-aer aernaeq nyar, heugar yawfluf-eu tiqpavnav deuq-aq, maqshir-euq minav-aer, Tsawrhaq-euq Zaqyo, aqyawf-euq tsawrhaq-anr uvlanr le-eu gar ya’mawr taef-a.”
2018 ©
Bibles International ®
The Bible Society of Baptist Mid-Missions