Maqtaeq 17
17
Yeqsur-euq Mawrdo Parlar-euq
Mk 9:2-13; Lk 9:28-36
1Kof nan dzeur-euq nar-aq, Yeqsur-aq, Beqtuvluv, Yaqkov hawr-eu Yaqkov-euq aqnyir Yorhaq, heudeuq-anr taef-aer sheuq-awr, gawqjawq yawgor-anr davler-euq mae. 2Khoerngae, aqyawf maf-euq maeqshi Yeqsur-euq mawrdo parlar-euq mae. Aqyawf-euq myavpyawq nanrma lof-aer yawshaef bya-awr, aqyawf-euq maeqtsoeq khawf pyurdeuqni narguir guir-eu mae. 3Morseq hawr-eu Erlirya, aqyawf maf-euq maeqshi dovle-awr, Yeqsur naeq-aer dawq ngaeqcawq luf-eu mae.
4Khoerngae, Beqtuvluv, Yeqsur-anr aernaeq-eu, “Sanqpaq-or! Aqduimaf heugar jawr-eu arnavni muiq-eu nga. Nawr nuima tsaq nar-aq, nga’maf heugar saeqghawv smq ghawv ghawv ma. Nawq-euq gharduq tiq ghawv, Morseq-euq gharduq tiq ghawv hawr-eu Erlirya-euq gharduq tiq ghawv ghawv ma.”
5Beqtuvluv, dawq ngaeqluf ngae, yawshaef bya-eu mqdmr tiq tsanq aqyawf maf-anr uvtaeq le-awr, mqdmr-anr nae dawq ngaeqdov lef-eu, “Heughaq-aq, ngar zawr gaq-eu ngaq-euq Zaqyo ma. Ngar, aqyawf-anr nuikhanrshir duidui ma. Nawmaf, aqyawf-euq dawq narhaq geuf-awq.”
6Zaqlanr deuq dawq khoerdawq-anr yagaq ngae guv duidui-eu mirnae, mirtsa awbyav taq-euq mae. 7Khoerngae, Yeqsur lar-awr, aqyawf maf-anr toeqciv-awr aer-eu, “Taqguv, tur-awq.” 8Aqyawfmaf, uqduq ghawrleur-awr haw ngae, Yeqsur maqngeur nar-aq, yawqghaqyawq tiqghaq-iq jawr-eu maqmawr-a.
9Aqyawfmaf, gawqjawq-anr nae zafkale ngae, Yeqsur, aqyawf maf-anr dawq bif-eu, “Tsawrhaq-euq Zaqyo shir-awr maq ghofdaef lar-euq khoer-aq, nawmaf nae ya’mawr-euq jeq tiqghaq-anr-iq taq ja’naeq de-eq.” 10Khoerngae, zaqlanr deuq, Yeqsur-anr narhaq-eu, “Tox-aer mar-iq, aqjeq mirnae, zanr maeq-eu deuq, Erlirya jeqhu ya’oe-eu mae laer aer-eu la?”
11Yeqsur, aqyawf maf-anr heulof-aer aerkhof naeq-euq mae, “Ngeur mae. Erlirya jeqhu oe-awr, yawqjeq navluf-anr lavmuiq khofle taef-a. 12Ngar, nawmaf-anr aernaeq nyar, Erlirya oedzeur-euq mae. Aerkhawf, aqcawq, aqyawf-anr maq siqnya-aer, khar janrmawf-eu jeq janrnaeq-euq mae. Khoerlof-aer durni, Tsawrhaq-euq Zaqyo khawf, aqyawf maf-euq aqlaf-euq lafkhoer yadaq taef-a.”
13Zaqlanr deuq khoerngae hawr-eu taef-aer, Yeqsur-aq, Bartirsaq mrnaeq-eu Yorhaq-euq garkawv ngaeqluf nga laer ghovshaw-euq mae.
Mawrbawq Coq-eu Bi Taqler-euq
Mk 9:14-29; Lk 9:37-43
14Yeqsur hawr-eu zaqlanr deuq, tsawrhaq armaf mafma jawr-eu gar ghofkeuvle ngae, tsawrhaq tiq ghaq, Yeqsur jawr-eu gar lar-awr pawqtsuif pawqdmq dmq-awr heulof-aer aer-eu mae, 15“Sanqpaq-or! Ngaqli-anr ghawqshaq gaqnaeq laf-awq. Aqyawf mawrbawq coq-awr, shaq duidui luf-eu mae. Aqyawf ghawqmya pov miqdzaq-anr coqpuiv-awr, ghawqmya pov ircuf-anr coqpuf-eu mae. 16Ngar, aqyawf-anr nawq-euq zaqlanr deuq jawr-eu gar sheuqlaf-euq khawf, aqyawfmaf, aqyawf-anr maq lavtaqnya nga.”
17Khoerngae, Yeqsur aer-eu, “Arma-er-e! Nuijan maqanr-aer, nanrpov-aer daef-eu heuzir-euq tsawrhaq deuq-or! Ngar, nawmaf naeq-aer aqmyan keuvni yajawr-awr ya’or-eu la siq? Aqyawf-anr, ngar jawr-eu gar sheuqlaf-awq.”
18Yeqsur, naef khoermawr-anr daeq ngae, naef khoermawr, aqyawf-anr nae dovle-euq mae. Khoerngae yamq-anr nae nar-aq, aqli khoerghaq taqler-euq mae.
19Khoernar-aq, zaqlanr deuq yawzaf zaf-aer Yeqsur jawr-eu gar lar-awr narhaq-eu, “Aqjeq mirnae, nga’maf, naef khoermawr-anr maq taedov nya-eu nga?”
20Khoerngae, Yeqsur, aqyawf maf-anr heulof-aer aernaeq-euq mae: “Nawmaf jan-eu ghaq maqkhav-eu mirnae mae. Ngar, nawmaf-anr aqdirma-aer aernaeq nyar, nawmaf jan-eu jeq ghawqpaf arnuiv huini anr nar-aq, ‘Nawr heugar nae khoerpaw jiv-ir-awq’ laer gawqjawq heujawq-anr aernaeq ngae jiv-ir taef-a. Khoeruqtaf, nawmaf maq janrnya-eu tiqjeq-iq maqjav-ar. 21Aerkhawf, naef heujeq-anr-aq, dzardzaq sheuq-awr guiqlanq shar-eu maqngeur nar-aq, maq taedov nya-a.”
Yeqsur, Aqyawf Yashir Mae Laer Paraer-eu
Mk 9:30-32; Lk 9:43-45
22Aqyawfmaf, Gaqliqlaer mirkhanq-anr uiqler-awr jawrluf ngae, Yeqsur, zaqlanr deuq-anr heulof-aer aernaeq-euq mae, “Tsawrhaq-euq Zaqyo, aqcawq-euq aqlaf-euq lafkhoer ya’anr-ir taef-a. 23Aqyawfmaf, aqyawf-anr saef taef-a. Aerkhawf, smq nan keuvlar nar-aq, aqyawf ghofdaeflar taef-a.” Khoerngae, zaqlanr deuq noeqshaq duidui-eu mae.
Uqduq Tanqnymr Nymrma-euq Gharduq, Jeq Dovnaeq-euq
24Aqyawfmaf, Gaqbeqneqoq-anr larkeuv ngae, uqduq tanqnymr nymrma-euq gharduq jeq taf-eu tsawrhaq, Beqtuvluv jawr-eu gar lar-awr narhaq-eu, “Nawmaf-euq saqlaq, uqduq tanqnymr nymrma-euq gharduq, jeq maqdov-a lor?”
25“Dov mae-eq” laer Beqtuvluv aerkhof naeq-awr, aqyawf irkanr-euq lafkhoer urler ngae, Yeqsur, aqyawf-anr jeqhu ngaeqcawq-awr aer-eu, “Sirmoq-or! Nawr aqjox-aer noeq-eu nya? Mirtsaq-euq khoertav-euq sanqpaq deuq, myawq taf-eu maqngeur nar-aq, jeq taf ngae, aqsur ghaq-anr taf-eu la? Yawqha-euq zaqdeuq-anr taf-a lor? Maqngeur nar-aq, aqcawq-anr taf-eu la laq?”
26Beqtuvluv, “Aqcawq-anr taef-aer jeq taf-eu mae” laer aerkhofnaeq ngae, Yeqsur aer-eu, “Tox-aer ngeur nar-aq, aqyawf-euq zaqdeu-aq, jeq maqdov khawf geufnya nga-eq. 27Aerkhawf, khoerlof-aer janr nar-aq, aqyawfmaf sanqtif tif-eu jeq nga. Khoermirnae, nawr, lan-anr ir-awr ngaqjuif juif-ir-awq. Juifmi baebae-euq ngaqshaq khoermawr-anr nyaef-awr, khaqmae ngawqnga ngae, pyur tiq byav anr-eu gar ya’mawr taef-a. Pyur khoerbyav yur-awr, arnyaf-euq gharduq, aqyawf maf-anr jeq dovler-awq.”
2018 ©
Bibles International ®
The Bible Society of Baptist Mid-Missions