Maqtaeq 18
18
Huiqdzaeq-eu Ghaq
Mk 9:33-37; Lk 9:46-48
1Khoerngae, zaqlanr deuq, Yeqsur jawr-eu gar lar-awr narhaq-eu, “Mqtav mirkhanq-euq lafkhoer aqsur ghaq huiqdzaeq-eu la?”
2Khoerngae, Yeqsur, zaq yawnyir tiq ghaq-anr kurlaf-awr, aqyawf maf-euq ghanrcae biyawf-awr nae, 3heulof-aer aer-eu mae: “Ngar, nawmaf-anr aqdirma-aer aernaeq nyar, nawmaf nuima par-awr, zaq yawnyir lof-aer maq pyeuflar nar-aq, mqtav mirkhanq-anr tiqjeq ghaenae-iq maqya urler-a. 4Khoermirnae, zaq yawnyir heughaq lof-aer nuima nanqyuni taq-eu tsawrhaq-aq, mqtav mirkhanq-euq lafkhoer huiqdzaeq-eu ghaq mae.
5Ngaq-euq tsawrmyanr-euq uqmov heulof-aer ghae-eu zaq yawnyir tiq ghaq-anr hageuf-eu tsawrhaq-aq, ngaq-anr hageuf-eu mae.
Sanqtif Bi Tiflar-eu Garkawv
Mk 9:42-48; Lk 17:1-2
6“Aqsur ghaq maqkaq, ngaq-anr jan-eu tsawrhaq heudeuq-euq lafkhoer nae yawnyir tiq ghaq-anr bi mrlaeq nar-aq, khoerghaq-euq kawqlanr-anr lolaeq laeqma paftawf-awr, iqmalavshav yawnaf-anr bafpuf-eu-aq, muiqdzaeq taef-a.
7Aqcawq-anr sanqtif bitifni mr-eu mirtsaqzaq-aq, ghawqshar shaq-aer ya ghaesaef taef-a. Aqcawq-anr sanqtif bitif-eu jeq javlar-eu yawduq baw-eu mae. Aerkhawf, aqcawq-anr sanqtif bitifni mr-eu tsawrhaq-aq, ghawqshar shaq-aer ya ghaesaef taef-a.
8“Nawq-euq aqlaf tiq laf maqngeur nar-aq, aqkuir tiq kuir nawq-anr bi mrlaeqlar nar-aq, deuvtsaev-awr biqdzae-awq. Nyiq kuir nyiq laf tsof-awr, miv-ir-eu maqbawni dofluf-eu miqdzaq-euq lafkhoer bi bafanr ghae-eu navmaqtser, kuirdanq lafdanq danq-ir-awr, daef-eu jeq-euq lafkhoer ya urler-eu-aq, muiqdzaeq taef-a. 9Nawq-euq myavnuiv tiq nuiv nawq-anr bi mrlaeqlar nar-aq, kheufdov-awr biqdzae-awq. Myavnuiv nyiq nuivluf tsof-awr, shiqbuir lanma-euq miqdzaq-euq lafkhoer bi bafanr ghae-eu navmaqtser, myavnuiv tiq nuiv taef-aer tsof-awr, daef-eu jeq-euq lafkhoer ya urler-eu-aq, muiqdzaeq taef-a.
Byov-ir-euq Yawr Tiq Mawr
Lk 15:1-7
10“Nawmaf, zaq yawnyir heudeuq-euq lafkhoer tiqghaq-anr-iq yaeqbawq saerlu-aer maqya ghaeni yanr-awq. Ngar, nawmaf-anr aernaeq nyar, aqyawf maf-euq mqtav ghaqkhaer, mq-euq khoertav jawr-awr, aqmyanluf ngaqDa-euq myavpyawq-anr mawrluf-eu mae. 11Tsawrhaq-euq Zaqyo-aq, byov-ir-euq tsawrhaq-anr kakhof-eu laer oe-euq mae.
12“Tsawrhaq tiq ghaq, yawr 100 mawr jawr-eu gar, tiq mawr canbyov-euq nar-aq, aqjox-aer janr nmr-mq laer nawmaf noeq-eu nya? Khoer 99 mawr gawqjawq-anr bi gavyaf-awr, canbyov-euq yawr khoermawr-anr pov-ir-eu maqngeur-a lor? 13Ngar, nawmaf-anr aqdirma-aer aernaeq nyar, aqyawf, yawr khoermawr-anr povmawr-euq nar-aq, maq canbyov-euq yawr khoer 99 mawr-anr laqkhaq caer-eu navmaqtser, povmawr khof-euq khoermawr-euq baqda’nae laqkhaq caerdzaeq taef-a. 14Khoerlof-aer durni, mq-euq khoertav jawr-eu nawmaf-euq Aqda khawf, zaq yawnyir heudeuq, tiq ghaq taef-aer khawf maqbi cawv-ir mawf-a.
Gardzaq Garkawv Shawq-eu
Lk 17:3-4
15“Nawq-euq aqyuif aqnyir, nawq-anr mrlaeq-euq nar-aq, aqyawf jawr-eu gar ir-awr, nawnyaf taef-aer jawr ngae, aqyawf nae mrlaeq-euq jeq toeqmaeq naeq-awq. Aqyawf, nawq-euq dawq narhaq nar-aq, nawr, nawq-euq aqyuif aqnyir-anr zakhof-euq mae. 16Aerkhawf, aqyawf, nawq-euq dawq maq narhaq nar-aq, nawq naeq-aer tsawrkaq tiq ghaq nyiq ghaq sheuqcaw ghae-awq. Aqjeq mirnae aernar-aq,
‘Dawq kharngaeq-euq yawqdawq navluf yagaq-euq tsawrkaq nyiq ghaq smr ghaq jawr nar-aq, ngeur-eu gar aer-eu mae laer sawxnya taef-a’ (Dm 19:15)
laer aertaq-euq mae. 17Aqyawf khoerdeuq-euq dawq khawf maq narhaq nar-aq, baqmaf baqmur-anr aernaeq-ir-awq. Baqmaf baqmur-euq dawq khawf maq narhaq nar-aq, aqyawf-anr aqcawq tsawrjeuq tsawrca hawr-eu jeq taf-eu tsawrhaq lof-aer sawx-awq.
18“Ngar, nawmaf-anr aqdirma-aer aernaeq nyar, mirtsaq-euq khoertav nawmaf nae khar paftawf-euq jeq, mq-euq khoertav khawf paftawf taef-a. Mirtsaq-euq khoertav nawmaf nae khar puirpyaeq-euq jeq, mq-euq khoertav khawf puirpyaeq taef-a.
19“Ngar, nawmaf-anr aqdirma-aer par aernaeq nyar, mirtsaq-euq khoertav, nawmaf-euq lafkhoer tsawrhaq nyiq ghaq nuima gm-awr, tiqjeqnav shar nar-aq, mq-euq khoertav jawr-eu ngaqDa-aq, aqyawfnyaf shar-eu lof-aer aqdir bi pyeuflar taef-a. 20Aqjeq mirnae aernar-aq, aqgeugar maqkaq, tsawrhaq nyiq ghaq smr ghaq, ngaq-euq tsawrmyanr-anr ghoe-awr uiqler nar-aq, ngar khoergar, aqyawf maf-euq ghanrcae jawr ma.”
Dzirdzov Maqbyaer-eu Kuirlaf Zaqkhav
21Khoerngae, Beqtuvluv, Yeqsur jawr-eu gar lar-awr narhaq-eu, “Sanqpaq-or! Ngaq-euq aqyuif aqnyir, ngaq-anr mrlaeqlar nar-aq, ngar, aqyawf-euq iqbax armyav pov keuvni ya pyaeqnaeq-eu la? Shif pov keuvni lor?”
22Yeqsur, aqyawf-anr heulof-aer aerkhof naeq-euq mae, “Shif pov keuvni taef-aer maqngeur-eu, shif shif-aer 70 pov keuvni ya pyaeqnaeq-eu mae. 23Aqjeq mirnae aernar-aq, mqtav mirkhanq-aq, sanqpaq tiq ghaq, aqyawf-euq kuirlaf zaqkhav deuq naeq-aer dzirdzov sawx-eu gar dur-eu mae. 24Aqyawf sawxdanqbae ngae, pyur 10,000,000 byav dav-eu kuirlaf zaqkhav tiq ghaq, aqcawq, aqyawf jawr-eu gar sheuqlaf-euq mae. 25Aqyawf tiqjeq-iq tsoeqkhof naeq-eu maqjav-eu mirnae, aqyawf-euq mawrdo, aqyawf-euq miqsawrzaq, zaqkhav geufni anq-awr, aqyawf kharjav-eu jeq dawqtawvluf khawf anq-awr bi tsoeqlar-awq laer sanqpaq khoerghaq dawq bif-euq mae.
26Khoerngae, kuirlaf zaqkhav khoerghaq, aqyawf-euq maeqshi awbyav-awr shar-eu, ‘Sanqpaq-or! Ngaq-anr tiqkhaeq or-awr dawq naeqlaf-awq. Ngar dawqtawvluf tsoeqkhofnaeq ma.’ 27Kuirlaf zaqkhav khoerghaq-euq yawsanr ghaq, aqyawf-anr ghawqshaq gaq-awr, dzirdzov byaernaeq-awr bighof-ir-euq mae.
28“Aerkhawf, kuirlaf zaqkhav khoerghaq dov-ir-awr, aqyawf-anr pyur 100 byav dav-eu aqyawf-euq gar mrcawq tiq ghaq-anr pov-ir-euq mae. Aqyawf, aqyawf-euq gar mrcawq khoerghaq-anr gheutaeq-awr, kuqbyanq-anr tsuvtaeq taq-awr nae aer-eu, ‘Nawr, ngaq-anr dav-eu dzirdzov tsoeqkhof laf-awq.’
29Aqyawf-euq gar mrcawq khoerghaq pawqtsuif pawqdmq dmq-awr shar-eu, ‘Ngaq-anr tiqkhaeq or-awr dawq naeqlaf-awq. Ngar, nawq-anr dawqtawvluf tsoeqkhofnaeq ma.’
30Aerkhawf, aqyawf maq narhaq-aer, gar mrcawq khoerghaq-anr dzirdzov maq tsoeqtsaev-euq khoerkeuvni, kuv-anr nyaefur taq-awr bijawr-euq mae. 31Aqyawf khoerlof-aer janrnaeq-eu gar, gar mrcawq nuideuq ya’mawr-awr noeqshaq duidui-eu mae. Khoernar-aq, garkawv khoer dawqtawvluf yawsanr ghaq-anr tsafnaeq ler-euq mae.
32Khoermirnae, yawsanr ghaq, aqyawf-anr kur-awr heulof-aer aernaeq-euq mae, ‘Zawr cawv-eu kuirlaf zaqkhav-or! Nawr, ngaq-anr tanqshar-eu mirnae, ngar, nawq-euq dzirdzov dawqtawv luf-anr byaernaeq-euq ma. 33Ngar, nawq-anr ghawqshaq gaqnaeq-euq lof-aer, nawr khawf nawq-euq gar mrcawq-anr ghawqshaq gaqnaeq paq-aer ghae-eu maqngeur-a lor?’ 34Yawsanr ghaq nuima paer duidui lar-awr, dzirdzov dawqtawvluf maq tsoeqtsaev-euq khoerkeuvni, aqyawf-anr khaeq-awr khav-eu deuq-euq aqlaf-euq lafkhoer a’naeq-euq mae.
35“Nawmaf yawqghaq navluf khawf, nuima-euq lafkhoer nae yawqha-euq aqyuif aqnyir-anr, mrbanq lavbanq-euq iqbax maq pyaeqnaeq nar-aq, mq-euq khoertav jawr-eu ngaqDa khawf, nawmaf-anr khoerlof-aer janrnaeqlaf taef-a.”
2018 ©
Bibles International ®
The Bible Society of Baptist Mid-Missions