Mar. 1
1
Akitatam a Yoana ke Ekebatisan
(Mat. 3:1-12; Luk. 3:1-18; Yoa. 1:19-28)
1Erae nugu Ŋakiro ŋuna Ajokak ŋuna a Yesu Kristo a Lokoku ka Akuj. 2Isyakinito ŋakiro nu alopite a ŋolo koloŋ adwarya Isaya ebe,
“Abu Akuj tema, ‘Eyakiyari ayoŋ ekaakiyakia kiŋaren
eriŋa iyoŋ nyeloto.’
3Ebuni iŋes akiwor analoŋisat ebala,
‘Kitemonokisi erot ŋolo ke Ekapolon;
kisidiiryata neni itori iŋes!’ ”
4Tolot Yoana Ekebatisan naloŋisat akitatam ka akibatis, ebala, “Tokiwa ŋasecisya kus, ikotere ikisyoni iyes Akuj.” 5Toloto neni a Yoana ŋituŋa daadaŋ ŋulu a Yudeya ka Yerusalem; ani kedaut ikes akiki ŋakecesecisya, kibatisa iŋes ikes anaŋolol a ŋina anyaritae Yorodan.
6Anapit Yoana elou ŋolo etiyaunitae a ŋajul a ŋuna ke ekaal ka tonapite arokoba anacir keŋ, kimuji emaase ka ao analoŋisat. 7Kitatam iŋes ŋituŋa tema, “Ebunit alokaku kaŋ ŋolo epol akilo ayoŋ, ŋolo nyitemokino ayoŋ tari okukokin olacak ŋarukanes ŋuna a ŋamuk keŋ. 8Ekebatisae ayoŋ iyes a ŋakipi, nai ikibatisae iŋes iyes a Etau a ŋolo Asegan.”
Akibatisao ka akitemio a Yesu
(Mat. 3:13-17, 4:1-11; Luk. 3:21-22, 4:1-13)
9Alorwa a ŋul, bu Yesu alore a Nasaret, anakwap a Galileya, kibatisa Yoana iŋes daŋ alo Yorodan. 10Ani elomuni Yesu anakipi, toanyuwa nakuj eŋaara, bu Etau ŋolo Asegan kidiama keŋ ikoni akuri.
11Ŋinapeipaki kirworik etoil anakuj ebala, “Irae iyoŋ Lokoku kaŋ ŋolo minat ŋolo alelyania ayoŋ.”
12Ŋolopeikiro ya Etau Yesu naloŋisat. 13Kiboi Yesu analoŋisat ŋirwa ŋatomoniomwon, kitem nai Satan iŋes. Ayakasi ŋityaŋ daŋ naloŋisat ŋin, nai apotu ŋimalaikan kiŋarakis iŋes.
Tonyarau Yesu ŋikekamak ŋikolya
(Mat. 4:12-22; Luk. 4:14-15, 5:1-11)
14Kedaun akiwuakin Yoana mabus, bu Yesu Galileya, kitatam Ŋakiro ŋuna Ajokak ŋuna ka Akuj, 15ebala, “Adolu apaki, aapuu Apukan ka Akuj. Tokiwa ŋasecisya kus, tonupa Ŋakiro ŋuna Ajokak!”
16Ani itori Yesu diye anam ŋina a Galileya, kiŋolik Simoni ka lokaato keŋ Anderia ecakakinete atibait nanam, anerae arae ikes ŋikekamak ŋikolya.
Ŋikekamak ŋikolya eya nataker
17Tolimok Yesu ikes tema, “Kiwuapakinae ayoŋ, eketuruwori ayoŋ iyes ŋikekamak ŋituŋa.” 18Kimyekis ikes ŋatibae kec atipei, kiwuapakis iŋes.
19Torotok iŋes kiŋaren iwadio, kiŋolik Yakobo ka Yoana, ŋidwe a Sebedeo, eyakasi nataker erucete ŋakecetibae. 20Tonyarau Yesu ikes atipei, kiwuapakis nai iŋes, toesikis papa kec ka ŋiketiyak ŋulu eotyak anataker.
Kitaŋaleu Yesu ekile ŋolo ekamunit ekipye
(Luk. 4:31-37)
21Tonyout Yesu ka ŋikeekasyomak, toloto Kaperenaum. Ani akoloŋit ŋina a Sabato, tolot Yesu losinagoga kisyak akitatam ŋituŋa. 22Toumokis daadaŋ aŋuna ka akeekitatam, anerae etatami iŋes erae ŋolo eyakar apedor, meere ikwa ŋiketatamak a Ŋikisila.
23Keyai tooma losinagoga ekile ŋolo ekamunit ekipye, kiworou 24tema, “Icamit iyoŋ akikokin isua ai, iyoŋ Yesu ŋolo a Nasaret? Ibunit iyoŋ amunyar isua a? Akayeni ayoŋ iyoŋ atemar irae epei bon ŋolo Asegan, ŋolo ka Akuj.”
25Kiŋenyak Yesu ekipye tema, “Kililiŋ, tolomu alokile a lo!” 26Kitamaranik nooi ekipye iŋes kidesak kwap, kiworou nooi. Apaki ŋin, tolomu ekipye aneni keŋ.
27Toumokis daadaŋ, kiŋitanaros ebasi, “Anukiro nu? Erae mono akitatam na ŋina kitete a? Anerae itatami iŋes ka apedor, ka epupete tari ŋipyan ŋakeekiro!” 28Kielakin atipei ŋakiro a Yesu akwap daadaŋ ŋina edunyatar Galileya.
Kitaŋaleu Yesu nakamuran a Simoni ka ŋicekadyakak
(Mat. 8:14-17; Luk. 4:38-41)
29Ŋinapeipaki alomuniata Yesu ka ŋikeekasyomak alosinagoga, torukosi ka Yakobo ta Yoana kai a Simoni ka Anderia. 30Toryamut nakamuran a Simoni ikamunit elekes nooi; aponi tolimokinae Yesu atipei. 31Kikamu Yesu iŋes akan, kitonyou. Toŋaleu iŋes, kisyak akisimuj ikes.
32Ataboŋ ŋin edoiyori akoloŋ, yaut ŋituŋa ŋikadyakak ŋulu ekamunito ŋipyan neni a Yesu. 33Tocunakinos ŋituŋa ŋulu ke etaun a ŋol daadaŋ lokek ŋolo ka akai; 34kitaŋaleu iŋes ŋituŋa ŋulu alalak ŋulu adyakasi ŋidekesyo ŋulu agelegelya. Kirita daŋ ŋipyan ŋulu pa acamit iŋes elimunete adiokirot, anerae ayenete ikes iŋes.
Kitatam Yesu ŋituŋa alo Galileya
(Luk. 4:42-44)
35Ani taparacu eriŋa akoloŋ nyipiripiruna, tonyou Yesu, tolot neni asilon akilip. 36Toloto Simoni ka ŋikeerukitos akiwarit iŋes; 37ani eryamunete iŋes temasi, “Ikiwarito iyoŋ ŋituŋa.”
38Toboŋok Yesu ikes tema, “Apena lorerya ŋice alodiye a ne, ikotere etatam aina daŋ, anerae ŋakiro abunitor ayoŋ ŋun.”
39Tolot nai Yesu lorerya ŋulu a Galileya daadaŋ akitatam alosinagogae, kiritana ŋipyan alotuŋa.
Kitaŋaleu Yesu ekile ŋolo ka atapon
(Mat. 8:1-4; Luk. 5:12-16)
40Bu ekile ŋolo adyaka atapon neni a Yesu, kimaima iŋes, toryedik alokiŋaren keŋ tema, “Ani kicamit iyoŋ, ipedori akitaŋaleun.”
41Abu Yesu kisyoni iŋes, torwaa akeekan, totap iŋes tema, “Acamit; toŋaleu!” 42Ŋolopeikiro, todaun atapon alokile a ŋol, toŋaleu iŋes. 43Tolimok Yesu iŋes alosit atipei, kicik daŋ nooi tema, 44“Nyilimok idiotuŋanan, nai tolot kitoodiyar neni ke esacaradoti, ikisyem iŋes iyoŋ; ido tolemu ainakinet aŋuna ka ajokun kon, ikwaŋina icikakinitor Moses, ikotere toanyunia ŋinituŋanan atemar ijoku iyoŋ.”
45Nai tolot iŋes kisera ŋuna ka aŋaleun keŋ emam akuryanu, kirwor ŋakiro ŋuna alalak nooi. Todaun Yesu epite ŋololomaret lotaun ileere. Aŋun, kiboi iŋes alokiŋa etaun. Ponito ŋituŋa neni keŋ alowaetin a daadaŋ.
Ngakarimojong Interconfessional Bible © Bible Society of Uganda, 2008.