Mar. 2
2
Kitaŋaleu Yesu ekile ŋolo alilimiyorito ŋakoyo ka akuwan
(Mat. 9:1-8; Luk. 5:17-26)
1Kelunyarosi ŋirwa ŋice, toboŋo Yesu Kaperenaum, kiirasi nai ŋituŋa atemar eyai iŋes lore. 2Potu ŋituŋa ŋulu alalak nooi, kilelebun tari lokek ŋolo ka akai a ŋina etatamya Yesu ŋakiro ŋuna ka Akuj. 3Kilepuleput ŋituŋa ŋiomwon ekile ŋolo alilimiyorito ŋakoyo ka akuwan neni a Yesu. 4Nyepedosi ikes adolyo iŋes neni keŋ, aŋuna amamukar neni kitoro. Todokasi kidiama akai, toketasi alowae a ŋolo ayai Yesu, kiyooliyosi nai iŋes tooma. 5Ani eyenuni Yesu anupit kec, tolimok ekadyakan tema, “Lokoku, esyoni ŋasecisya kon.”
6Aya ŋiketatamak a Ŋikisila kai ŋin. Kiŋitanaros alotai kec ebasi, 7“Kaanukiro irworor ekile logo ikona? Erae ŋin akiyany Akuj, anerae emam ituŋanan epedori akisyon ŋasecisya, mati Akuj bon.”
8Ani eyenuni Yesu alotau keŋ atemar etamete ikes alotai kec, kiŋit ikes tema, “Kaanukiro itamyata iyes ŋakiro ŋun alotai kus? 9Nyo epatana, atemar neni ke ekaŋwalan, ‘Esyoni ŋakonisecisya’, kori atemar, ‘Tonyou, tolema akonidaket, tolot?’ 10Nai acamit ayoŋ iyes toyenut atemar eyakar Lokoku a Ituŋanan apedor ŋinakisyoniyet ŋasecisya anakwap.” Tosodi tolimok ekadyakan ŋol tema, 11“Akalimokini ayoŋ iyoŋ atemar, tonyou, tolema akonidaket, tolot lore!”
12Tonyou nai iŋes atipei, tolema adaket keŋ iteete ŋituŋa daadaŋ. Toumokis ŋituŋa ŋakiro ŋun nooi kipuro Akuj ebasi, “Okoe, nyeanyuna ŋinapei koloŋ ŋakiro nu!”
Tonyarau Yesu Lepi
(Mat. 9:9-13; Luk. 5:27-32)
13Tolot nabo Yesu lokipetot ka anam a ŋina a Galileya. Potu ŋasepico neni keŋ, togeu iŋes akitatam ikes. 14Ani elosi iŋes alorot, toanyuwa ekeriran ocur ŋolo anyaritae Lepi, lokoku ka Alipayo, iboi anapis a ŋina etacere ocur. Tolimok Yesu iŋes tema, “Kiwuapakinae ayoŋ”. Tonyou nai Lepi, kiwuapak Yesu.
15Ani imuji Yesu alokai a Lepi, potu ŋikerirak ocur ŋulu alalak ka ŋikasecak, kiboikinos neni ayai Yesu ka ŋikasyomak keŋ. Alalak ŋituŋa ŋulu ewuapito iŋes nooi. 16Ani iŋolikinete ŋiketatamak a Ŋikisila ŋulu arae Ŋiparisayon Yesu imujete ka ŋikerirak ocur ta ŋikasecak, kiŋita ikes ŋikasyomak temasi, “Kaanukiro imujata iŋes ka ŋikerirak ocur ta ŋikasecak?”
17Ani iirari Yesu akiŋiset ŋin, tema, “Nyiitanito ŋituŋa ŋulu eŋaleete emuron, nai ŋulu edyakasi. Nyabunit ayoŋ anyarare ŋulu iyookino, nai ŋikasecak”.
Kiŋitae Yesu ŋuna ka akikany akimuj
(Mat. 9:14-17; Luk. 5:33-39)
18Alorwa a ŋulu ekanyata ŋikasyomak a Yoana ka Ŋiparisayon, potu ŋicetuŋa neni a Yesu temasi, “Kan nyo ikanyata ŋikasyomak a Yoana ka ŋulu a Ŋiparisayon akimuj, tomam nyikanyete ŋulu kon?”
19Toboŋok Yesu ikes tema, “Epedorete mono ŋituŋa ŋulu enyaraunitae lokiitanu akikany eriŋa ekeitan erukito ka ikes a? Nyikanyete ikes eriŋa ekeitan erukito ka ikes. 20Nai epote ŋirwa ŋulu elemarere ekeitan aneni kec. Ŋirwa ŋul nai ikanyata ikes.
21“Emam ituŋanan epedori adapakin arac ŋina kitete lolou ŋoloŋorot; ani kedapaki, ecilar ŋina kitete alolou a ŋoloŋorot, kiyatakin acilat nooi. 22Kori emam ituŋanan ŋini epedori atikakin ewinyiwiny lotwol ŋulu eŋorotonito; ani ketikaki, ebwaŋabwaŋaar ŋitwol, tosodi tobukor ewinyiwiny daŋ. Nai etikanakinio ewinyiwiny lotwol ŋulu kitet.”
Akiŋita apolou ŋina a Sabato
(Mat. 12:1-8; Luk. 6:1-5)
23Apeipaaran ŋina araakar akoloŋit ŋina a Sabato, kitoro Yesu ka ŋikeekasyomak lomanikor a ŋimomwa. Kisyakis ŋikasyomak keŋ agyere ŋimomwa tolosete. 24Kiŋita Ŋiparisayon iŋes temasi, “Toanyuwa! Nyo itiyaata ŋikasyomak kon ŋuna italeo akoloŋit ŋina a Sabato?”
25Toboŋok Yesu ikes tema, “Nyesyoma iyes ŋuna abu Daudi kitiya lotuŋa keŋ apaki ŋina anyamitor ikes akoro a? 26Ŋina abunio iŋes toloma kai ŋinakilipet Akuj, ŋirwa ŋulu araakar Abiasar Esacaradoti ŋolo Apolon nooi, bu tonyam ŋamugati ŋuna ainakinitae Akuj, ŋuna acamakinitae ŋisacaradotin bon akinyam. Ani kenyam, inak ŋikeerukitos daŋ tonyama.”
27Tolimok nabo Yesu ikes tema, “Asubunio Sabato aŋuna a ituŋanan, meere ituŋanan aŋuna a Sabato. 28Aŋun, Lokoku a Ituŋanan iŋes erae Ekapolon tari a Sabato.”
Ngakarimojong Interconfessional Bible © Bible Society of Uganda, 2008.