Jang 2
2
Kaar Brah Jê-sus ri tu Ga-li-lê u Ju-đê
(2:1 – 12:50)
Ta kliêr tu Ka-na
1Laap nar pei, geh ta kliêr tu poh Ka-na knông kwaal Ga-li-lê; mei Brah Jê-sus geh mat tu nei. 2Brah Jê-sus u bơl jơrnơ Pang kot kươt siêr joq sa. 3Tơt leq bih, mei Brah Jê-sus mor n'hai Pang: “Bu 'bưn geh bih hôm.” 4Brah Jê-sus ơh: “Ơi mei, kaar au geh ta dơơh ơơn tơt mei u hei? Bêl hei ri ndah tơt.” 5Mei Pang mor n'hai bơl bnih jraih kaar laah: “Bu maanh ơơn nei phrui lơh bei nei.” 6Tu nei geh prau ơơk drap dơng tmau nhôq jah rao jrơh tênh ryơơng Jo-thai, di drap dơơm kươt baar pei thông daak.#2:6 thông: Jôm thông tơmlai 38 lit. 7Brah Jê-sus maanh bu: “Phrui khut daak bêêng pal drap au.” Bu khut bêêng rlaai. 8Ja nei Pang maanh nha: “Bei au phrui gưnh daak, liêu tơt aan bnih krai sa kliêr.” Bei nei bu liêu tơt aan bnih nei. 9Tơt bnih kray kliêr liêp daak ja r'bian but bih (dôh 'bưn gưt bih lôh a êch, nha pal bnih jraih kaar ja gưnh daak nei gưt), bu khuôl sai lau 10u mor: “Jôm bnih kot ddôk bih kah noor, u tơt bu ôn ơk hôm mơ ddôk bih kah prơơi, dôh bi nei prap bih kah aan tơt bei au.” 11Au laa chmlih chmleek daak bôôk Brah Jê-sus ja lơh tu poh Ka-na, knông kwaal Ga-li-lê, u tơrsau a sroh a srong Pang nei mơ bơl jơrnơ jơ Pang. 12Kơơi nei, Pang pôl n'hai mei, bơl oh, u bơl jơrnơ han jưr tơt poh Ka-bê-na-um u gôq kươi nei ndêq nar.#Mat 4:13.
Brah Jê-sus mưt u nhi r'bưn
(Ma-thi-ơ 21:12,13; Mak 11:15-17; Lu-ka 19:45,46)
13Ryơơng Chloong Rlach raih Jo-thai ri êch dơơh tơt, Brah Jê-sus han hao poh Jê-ru-sa-lem. 14Pang sau knông nhi r'bưn geh bơl bah tach gôw, bưr, pi traap, u bơl bnih gơl prak nha gôq. 15Pang pech di mlơm kong rbat dơng chhei, prơh leq sêch sot rlach nhi r'bưn, leq bưr, gôw; khut prak bơl bnih gơl prak u pơrlơơt bliêng grei bu ri. 16Pang maanh bơl bnih tach pi traap laah: “Phrui kwaih leq pal ntil nei rlach au, khơơm lơh aan nhi Bươp Hei but nhi tach brôw.” 17Bơl jơrnơ Pang gênh kươi baak ja 'bian: “Chưt sang rmeh teq u nhi Brah chhu huur hei.” 18Bnih Jo-thai ôp Pang: “Yau geh chmlih chmleek ơơn jah tơrsau aan bơl hei sau Yau geh ch'bap lơh ntil au?” 19Brah Jê-sus ơh: “Phrui km'bach teq nhi r'bưn au ơơi, knông pei nar Hei a kươi kơldơk kơơi.”#Mat 26:61; 27:40; Mak 14:58; 15:29. 20Bnih Jo-thai kươi mor: “Bnih nday sun moon nhi r'bưn au tơt puôn jơt prau snam, baah Yau nei a kươi kơldơk kơơi knông pei nar neh?” 21Dôh Pang mor teq u nhi r'bưn laa chhak jan Pang ri. 22Bei nei, tơt Pang a ktôk chhưt rêh kươi, bơl jơrnơ gênh Pang ja mor ntil au, nei jơ Sm'bưt Brah u baak Brah Jê-sus ja mor.
23Plah Brah Jê-sus gôq tu poh Jê-ru-sa-lem knông jơl ryơơng Chloong Rlach, ơk bnih sau pal chmlih chmleek Pang lơh nei jơ saak Pang. 24Dôh Brah Jê-sus 'bưn junh ndơơp chhak nơơm aan bu, đươm Pang gưt srlah jôm bnih. 25Pang 'bưn chkhôm 'bơơn lơh ndraanh teq u bnih 'bơơn ơơm, đươm nơơm Pang gưt srlah jôm ntil knông chưt bnih.
© 2024 Bible Society Vietnam. All rights reserved.