Jang 1
1
Tơrsau ndroong
(1:1-18)
Baak Mor but koon bnih
1Ptơơm geh Baak Mor,#1:1 Baak mor: Knông baak Hi-lap lah Logos rơih laa mor lah. Knông ch'bap rêh Hi-lap, a au chong teq u baak mor n'hai gơrninh knông bôôk rklook, kot chong teq u ntil wêêng rwet jôm baak u tak pưt knông teh trôôk. Knông sm'bưt Jo-thai, Baak lah tơt bnih sun mon trôôk teh. Baak Mor gôq n'hai Brah Ưn, u Baak Mor laa Brah Ưn. 2A daak bôôk, Pang gôq n'hai Brah Ưn. 3Mrơk 'bơk chhư kot kươt Pang tơmbut, 'bưn geh di til tơmbut sun ơơn kươt tơmbut baah 'bưn geh Pang. 4Knông Pang geh baak rêh, baak rêh laa rơn aang aan koon bnih. 5Rơn aang yơr knông jơ ngôw, dôh jơ ngôw 'bưn wơơt pơih#1:5 'bưn wơơt pơih: Paich laa 'bưn geh tơngơt kươt. rơn aang.
6Geh mbu bnih baah Brah Ưn maanh lôh chhak laa Jang.#Mat 3:1; Mak 1:4; Lu 3:1-2. 7Bu lôh bei jah lơh ndraanh, jah lơh ndraanh teq u rơn aang, rlach chkhôm bu aan jôm bnih kươt jơ. 8Nơơm bu 'bưn geh laa rơn aang, dôh bu lôh jah lơh ndraanh teq u rơn aang. 9Au laa rơn aang ngan ja tơt swich teh jah yơr sm'baang jôm bnih. 10Baak Mor a knông swich teh u swich teh ja kươt tơmbut đươm Pang, dôh swich teh 'bưn grnưt Pang. 11Pang lôh knông teh nggoor Pang pa raih Pang 'bưn chơp wơơt Pang. 12Dôh paich 'bơơn chơp wơơt Pang, nei laa jơ saak Pang, nei Pang ươn bơl bu kmheng but Brah Ưn ri, 13laa bơl bnih kươt lgơơch kơơi 'bưn geh đươm mhaam, paich đươm êch kmbưng pêêk pai, paich đươm rnđêch bu, dôh đươm Brah Ưn.
14Baak Mor ja but pêêk pai, rêh#1:14 S'bt: jlơp naam. a nggơl klung bơl bơn, bêêng brêêng smlaang u soong klanh. Bơl bơn ja trôông a sroh a srong Pang, ngan laa a sroh a srong Koon Dôl ri lôh a ktôk Bươp. 15Jang lơh ndraanh u Pang nei tơmbơh laah: “Au laa Yaang pa hei ja mor: ‘Yaang lôh a kơơi hei rluôt huôih hei đươm Pang ơơm geh noor hei.’” 16U đươm bêêng rlai Pang ri, leq sêch bơl bơn kot dơơp kươt brêêng smlaang dươn top brêêng smlaang. 17Đươm ch'bap ja kươt tơmbơh rlach Môi-se, nha brêêng smlaang u soong klanh nei lôh a Brah Jê-sus Krist.#1:17 Chôôl laa Jê-sus Kơ-rít; paich nhôq saak chôôl Jê-sus Koon Brah. 18Ndah 'bơơn sau Brah Ưn, dơơn Koon Dôl gôq knông chưt Bươp laa Yaang ja tơrsau Bươp aan bơl bơn gưt.
Baak riap kaar Brah Jê-sus ri
(1:19-51)
Baak chhuôr preh Jang ri
(Ma-thi-ơ 3:1-12; Mak 1:1-12; Lu-ka 3:1-18)
19Au laa baak tơmbơh Jang ri: Tơt bơl bnih Jo-thai maanh bơl yau thwaai u bnih Lê-wi a poh Jê-ru-sa-lem lôh ôp bu laah: “Ay laa 'bơơn?” 20nei bu tơmbơh spong ngan, 'bưn geh pôn dmôw ơơn broih. Bu lah: “Hei 'bưn geh laa Yaang Krist.” 21Bu kươi ôp: “Bei nei ay laa 'bơơn? Geh lah laa Ê-li 'bưn?” Bu ơh: “'Bưn laang.” “Nei ay geh lah laa yau grnưt noor 'bưn?” Bu ơh: “'Bưn laang.” 22Bu lah: “Bei nei ay laa 'bơơn jah bơl hei gưt ơh baak aan bơl bnih maanh lôh bơl hei? Ay sơm nơơm laa 'bơơn?” 23Bu ơh:
“Hei laa bnih khuôl teh knông trenh sngat:
‘Phrui lơh aan song troong Brah ri’,
bei baak grnưt noor Ê-sai ja mor.” 24Bơl bnih kươt maanh lôh klung phung Pha-ri-si, #1:24 Mơq baak rơih gôq Mat 3:7. 25ôp bu laah: “Mơq ay 'bưn geh laa Yaang Krist, 'bưn geh laa Ê-li, kot 'bưn geh laa grnưt noor, bei nei a hay ay leet lơh bap-tem?” 26Jang ơh: “Hei lơh bap-tem u daak, dôh geh mbu Yaang plah a klung bơl 'bei baah bơl 'bei 'bưn grnưt; 27Yaang nei lôh kươi hei, pa hei 'bưn klanh dip doh chhei sroom Pang.” 28Pal kaar au lôh tơt tu Bê-tha-ni mak tôw daak glung Jô-đanh, ktôk Jang lơh bap-tem.
29Nar a ôi, Jang sau Brah Jê-sus lôh u nơơm bu, nei mor laah: “Tôw Koon Bưr Brah Ưn ri, laa Yaang prap dôih 'baap swich teh ri! 30Au laa Yaang pa hei ja lah: ‘Yaang lôh kươi hei bu glat rluôt huôih hei, đươm Pang ơơm a mat hei.’ 31Nơơm hei kot 'bưn gưt Pang, dôh hei lôh lơh bap-tem dơng daak jah Pang kươt tơrsau aan raih I-sra-ên.” 32Jang kot lơh ndraanh laah: “Hei ja sau Brah Wêêng kjưr a trôôk bei pi traap bat lơ Pang. 33Nơơm hei kot 'bưn gưt Pang, dôh Yaang ja maanh hei lơh bap-tem u daak geh lah n'hai hei: ‘Yaang pa 'bei sau laa Brah Wêêng kjưr, gôq lơ trôôk, nei laa Yaang lơh bap-tem u Brah Wêêng.’ 34Hei ja sau u lơh ndraanh laah, au đươm laa Koon Brah Ưn.”
Bơl jơrnơ ptơơm Brah Jê-sus ri
35Nar a ôi, Jang kươi ta yoong tu nei n'hai baar du knông nak bơl jơrnơ nơơm bu ri. 36Tơt mơq sau Brah Jê-sus han rloot, bu mor: “Tôw, Koon Bưr Brah Ưn ri!” 37Baar du jơrnơ ttang bu mor, kơndaal han tênh Brah Jê-sus. 38Brah Jê-sus wih kươi, sau bu han tênh nei ôp: “Bơl 'bei wơng 'bơơn?” Bu ơh: “Ra-bi (rơih laa nnơơm kne), Yau plah drơm a êch?” 39Pang lah: “Phrui lôh mơq.” Bu lôh mơq ktôk Pang drơm, u gôq kươi n'hai Pang knông nar nei. Plah nei lap tơmlai puôn bêl mau.#1:39 S'bt: bêl ttal jmơt, awap laa bêl klap jmơt. 40Mbu knông baar du ja ttang Jang mor u han tênh Brah Jê-sus, nei laa Anh-rê, oh Si-môn Phi-e-rơ ri. 41Noor leq, bu wơng bi nơơm laa Si-môn Phi-e-rơ u mor: “Bơl hei ja a mơp Yaang Mê-si-a” (rơih laa Yaang Krist). 42Bu ndơơp bi nơơm lôh u Brah Jê-sus. Brah Jê-sus mơq Si-môn u lah: “'Bei laa Si-môn, koon Jang ri,#1:42 Jang: Knông m'baak plơơp 'bian ti laa Jô-na. 'bei a kươi kươt khuôl laa Sê-pha”, rơih laa Phi-e-rơ.#1:42 Leq baar chhak Sê-pha (knông baak A-ram) n'hai chhak Phi-e-rơ (knông baak Hi-lap) kot geh rơih lah “tmau”.
43Nar a ôi, Brah Jê-sus êch han rloot kwaal Ga-li-lê. Pang wơng Phi-lip u lah laah: “Phrui tênh Hei.” 44Phi-lip laa bnih Bêt-sai-đa, pôl poh n'hai Anh-rê u Phi-e-rơ. 45Phi-lip wơng Na-tha-na-ên u mor: “Bơl hei ja a mơp Yaang pa Môi-se ja 'bian knông ch'bap, u bơl grnưt noor kot geh 'bian kươi; nei laa Brah Jê-sus, koon Jô-sep ri, a poh Na-sa-ret.” 46Na-tha-na-ên mor: “Geh ntil ơơn klanh sot a Na-sa-ret kươt laang?” Phi-lip mor: “Phrui han mơq!” 47Brah Jê-sus sau Na-tha-na-ên lôh u Pang nei mor teq u bu laah: “Au laa mbu bnih I-sra-ên ngan, knông bu 'bưn geh ntil lhiat lboor.” 48Na-tha-na-ên ơh: “Lơh bei êch Yau gưt hei?” Brah Jê-sus ơh: “Di mat Phi-lip khuôl 'bei, Hei ja sau 'bei gôq a teh tơơm lwi.” 49Na-tha-na-ên ơh: “Ơi Yau, Yau laa Koon Brah Ưn! Yau lah snđach I-sra-ên!” 50Brah Jê-sus ơh: “Geh lah đươm Hei mor Hei sau 'bei gôq a teh tơơm lwi nei mơ 'bei jơ? 'Bei a kươi sau pal kaar ttih đat huôih nha.” 51Ja nei Pang lah: “Ngan, Hei lah ngan n'hai bơl 'bei: Bơl 'bei a kươi sau trôôk a pơơk u lênh brah Brah Ưn ri jưr hao lơ Koon Bnih.”
© 2024 Bible Society Vietnam. All rights reserved.