Jang Baak ptơơm bôôk
Baak ptơơm bôôk
Baak Sroong Klanh tênh Jang tơrsau Brah Jê-sus bei laa Baak Rêh Yoot Yôw Brah Ưn ri, lah Yaang ja jưr teh bơ bnih u gôq klung bơl bơn (1:14). Baak Sroong Klanh Jang lah srlah, sm'bưt au kươt 'bian jah bnih chôôl awap jơ laah Brah Jê-sus lah nơơm Brah Đoh Kwaai tênh baak pơn, Koon Brah Ưn ri, u chkhôm chưt jơ lơ Brah Jê-sus baah bu chơp kươt baak rêh yoot yôw (20:31).
Di kươi tơmbơh baak chôl lah Baak Mor nơơm laa Brah Jê-sus, pak bôôk sm'bưt Baak Sroong Klanh Jang tơrsau ntil chmlih chmleek nei mơ Brah Jê-sus laa Brah đoh kwaai tênh baak pơn, Koon Brah Ưn ri. Tênh di kươi ntil baak au lah pal wưt ta jưmlưm rơih ntil baak kươt tơrsau rlech pal chmlih chmleek. Pak au sm'bưt kot tơrsau bei êch m'baak bnih ja jơ u but jơrnơ Brah Jê-sus ri, knông khal nei m'baak nday ja geh ta wal u 'bưn jơ Pang. Pal tap 13 tơt 17 'bian kươi prơơi ơk hưl neh u ha glơm ta tưt lwah Brah Jê-sus n'hai bơl jơrnơ u mang Brah bu nhôp, u ntil baak kne, pơrlay Brah ri aan bu noor tơt Brah dol pơng đênh lơ chhư rglaang. Pal tap ptut krơơ kươi srlah ntil baak Brah Jê-sus bu nhôp, bu lưm, pơng đênh, rêh kươi, u pal wưt lôh sot Pang ri di kươi rêh kươi.
Ndroong chhuôr u bnih mei dơur pơơn bu nhôp jrôq jrơm (8:1-11) kươt teq knông rngech đươm ơk plơơp ndơm u pal plơơp kơơi gway teq lơi ndroong chhuôr au, knông nei ơk plơơp nday teq a ơk ktôk êêng nday.
Baak Sroong Klanh Jang lah kơndang tơt baak rêh yoot yôw knông Yaang Krist, lah di tkôm nar au riêp ơơm aan bơl 'bơơn ơh kươi u jơ Brah Jê-sus lah troong song, soong klanh, u baak rêh. Di ktôk lư knông sm'bưt Baak Sroong Klanh Jang lah kaar kươt pal ntil ruup gui rnđơơih lơh spun knông klap rêh jah mor lôh pal spoong wêêng chưt bei daak, nom, chrah aang, bnih gwaal, u bưr, tơơm nho u play bu ri.
Kôq dap
Bôh ptơơm baak (1:1-18)
Jang Bap-tit u bnih jơrnơ bôôk daak Brah Jê-sus ri (1:19-51)
Kênh kaar srlah srlom Brah Jê-sus ri (2:1 – 12:50)
Ơp pal nar ptut pơtiêng dơơh u ktôk Jê-ru-sa-lem (13:1 – 19:42)
Baak rêh kươi u ơp wưt Brah lôh tơrsau (20:1-31)
Bôh ptut leq: Ơp wưt lôh tơrsau nday êng a Ga-li-lê (21:1-25)
© 2024 Bible Society Vietnam. All rights reserved.