Luke 4
4
Jesus Ikł̣igutchaktinniaġusiaŋa
(Matthew 4.1-11; Mark 1.12-13)
1Tavra Jesus aŋalałługu Ilitqusiġiksuam, aullaŋaruq kuugmiñ Jordan-miñ aasii Ilitqusiġiksuam aullaqtinŋagaa 2nunagluktuamun. Tavrani ikł̣igutchaktinniaŋagaa tuunġaum malġukipiani uvluni. Aasii taapkunani uvluni, niġiŋaitchuq sumikunnii. Aasii isukłiñmata, Jesus kaaliŋaruq.
3Tuunġaum uqallautiŋagaa, Iġñiġipiaqpatin God-im, una uyaġak punniġuquuŋ. 4#Dt 8.3.Jesus kiuŋagaa, Aglausimaruq Bible-ni, Iñuk iñuuniaŋitchuq niqikun kisiagun, [aglaallu ukpiġilugich uqalupayaaŋi God-im.] 5Tavrasuli tuunġaum mayuutiŋagaa qutchiksuamun iġġimun, aasii satqummiutivlugu iluqaiññik umialgutiŋiñik nunam akkupauraq. 6Aasii uqallautivlugu, iliŋnun aitchuutiginiaġiga iluqaan taamna ataniġnaqun kamanautaallu, qanuq aitchuutauŋaruq uvamnun, aasii kimulliqaa pisukkuma aitchuutigiyumiñaġiga. 7Tavraasii ilivich sitquġlutin aŋaiyyuvigigumŋa, iluqaisa aitchuutiginiaġitka tamatkua iliŋnun. 8#Dt 6.13.Tavra Jesus kiuŋagaa, [Aullaġiñ Satan.] Aglausimaruq Bible-ni inna, Aŋaiyyuvigisaġiñ Ataniq God-in, suli kisian savautilugu.
9Tavra Tuunġaum aullautiŋagaa Jerusalem-mun, aasii inillakługu nuvuquyuanun aŋaiyyuvikpaum, aasii uqallautivlugu, Iġñiġipiaqpatin God-im, tavraŋŋa nautkiaġiñ, 10#Ps 91.11, 12.qanuq aglausimaruq Bible-ni inna, “God-im tiliñiaġai isaġuliŋni munaġitqulutin.” 11Aasii isaġulgich qaunaginiaġaatin piyaqququŋiḷḷutin. 12#Dt 6.16.Tavra Jesus kiuŋagaa, Uqallautauŋaruq Bible-ni, Uuktuġniaŋitkiñ Ataniq God-in. 13Tavra Tuunġaum aġiuganikkamigich iluqaisa ikł̣igutchaktinniutit, ilaa qimautiŋaruq ilaaniñ nalautitchiaġisaqługu uuktuatqigviksrani.
Jesus Aullaġniigaa Savaani Galilee-mi
(Matthew 4.12-17; Mark 1.14-15)
14Tavra Jesus aŋalałługu Ilitqusiġiksuam Galilee-mun utiŋaruq aasii quliaqtuaġiŋagaat nunaaqqipayaanun sumulliqaa. 15Tavra ilaa iḷisaurriŋaruq aŋaiyyuviŋiññi, aasii iluqaġmiŋ iñuich nanġaŋagaat.
Jesus Ukpiġiŋitkaat Nazareth-mi
(Matthew 13.53-58; Mark 6.1-6)
16Tavra Nazareth-muŋaruq iñuguġviŋmiñun, aasii aŋaiyyuviŋmuŋaruq piḷġusikaamisun Jew-guruat savairvianni. Tavra makinŋaruq taiguaġniaqłuni. 17Aasii qaiñŋagaich makpiġaaŋi Isaiah-m uqaqtaata God-im. Ilaan isivinŋagai makpiġaat aasii paqiłługu aglausimaruaq inna,
18 #
Is 61.1, 2. “Ilitqusiġiksuaŋan Atanġum aŋalatkaaŋa,
qanuq ilaan nalunaiqsaġiŋagaaŋa alġaqsruitquvluŋa tusaayugaaġiksuanik kamasaaŋitchuanun. [quviasaaquvlugiḷḷu isumaaġutituqtuat.]
Ilaan tiliŋagaaŋa quliaqtuaġitquvlugich tamatkua aŋalatittuat piḷuunmun
annaurrauyumiñaġnivḷugich, suli qiñillasiḷugich ayauŋaruat,
atanġiqsitautquvlugiḷḷu tamatkua nagliksaaqtitauruat piḷuun pisigivlugu.
19Ilaan suli tiliŋagaaŋa quliaqtuaġutitquvlugich iñuich
paŋmapak akuqtuġumiñaġniḷugich Ataniġmun.”
20Tavra Jesus imuŋagai makpiġaat, aasii utiqtiłługich kivgamun tutququvlugich, aasii aquviłłuni. Tavrani iluqaġmiŋ iñuich aŋaiyyuviŋmiittuat takunnaakkiutiŋagaat. 21Tavra uqautirraqsiŋagai, Uvlupak taamna tusaakkaqsi Bible-niñ taŋŋiqsauganiktuq. 22Tavra iluqaġmiŋ uqautigilluataŋagaat, suli kamasuutigiŋagaich uqalulluatat uqautigiraŋi. Uqallaŋammiut, Uvvauna Joseph-gum iġñiġigaa. 23Tavra uqallautiŋagai, Nalupqinaitchuamik uqallagviginiaġivsiŋa uumiŋa uqalugaamik. Taaktii, iliŋnik iłuaqsiiñ. Tusaaŋaravut kamanaqtuat savaatin Capernaum-mi maaniḷu savaaġikkich ilivich nunaŋni. 24#Jn 4.44.Jesus uqallavsaaŋaruq, Iḷumun uqallautigivsi, uqaqtaa God-im akuqtuqtaulaitchuq nanmiñiq iñuŋmiñi. 25#1 K 17.1.Aglaan iḷumun uqallautigivsi, iñugiaktuat uiḷgaŋaruat iñuuŋarut Israel-mi Elijah iñuumman. Sialulaiñŋaruq ukiuni piŋasuni itchaksraniḷu tatqiñi, kaaksiuqpaŋmata iñuich iluqaani nunaŋanni. 26#1 K 17.8-16.Tavra Elijah tilirauŋaitchuq nalliannun unnii taapkua iñuich, aglaan uiḷgaŋaruamun Jew-guŋitchuamun, iñuuruamun Zarepheth-mi nunaaqqimi Sidon-miittuami. 27#2 K 5.1-14.Suli God-im uqaqtaa Elisha iñuumman iñugiaŋarut kiḷḷiġruaqtuqtuat Israel-mi, aasii nalliŋich unnii iłuaqsirauŋaitchut. Aglaan Naaman, Syria-ġmiu kisimi iłuaqsirauŋaruq. 28Tavra tusaakamirruŋ taamna, iluqaġmiŋ aŋaiyyuviŋmiittuat qinnapiaġataŋarut. 29Tavra iliŋich maksriŋarut aasii tiguniqłakługu annisiŋagaat Jesus iniqpaŋmiñ, saqigrugivlugu siñaanun qimiqqam siŋitchukługu. Iniqpaŋat ittuaq qimiqqam qaaŋani. 30Tavra akunniraqługich iñusalaich, Jesus aullaŋaruq.
Iñuk Ilitqusiqł̣ulik
(Mark 1.21-28)
31Tavra Jesus Capernaum-muŋaruq iniqpaŋmun Galilee-mi. Tavraasii ilaan iḷisautiŋagai Jew-guruat savairvianni. 32#Mt 7.28, 29.Tavra iñuich kamasuutiqaŋarut iḷisaurriñiŋanik, qanuq ilaan uqaluŋi kamanaŋarut. 33Tavra aŋaiyyuviŋmi inŋaruq iñuk ilitqusiqł̣uqaqtuaq, aasii nipatutilaamisun nivliŋaruq, 34uqaqłuni, Jesus Nazareth-miu, summan iḷaksiavisigut? Uvaniitpich suksraunġiġuqłuta? Iḷisimagiga kiutilaan. Ilaa Piḷuutaitchuaq God-im pia. 35Tavra Jesus suaŋagaa uqallautivlugu, Nipaisaaġiñ. Anniiñ ilaaniñ. Tavra ilitqusiqł̣uum ulġutqaaqługu sivuġaanun Jesus, aniŋaruq ilaaniñ anniġaluaġnagu. 36Tavra iluqaġmiŋ aliuŋarut aasii avanmun uqaagaqsivḷutiŋ, Sunauna uqallaun? Qanuq sumiñ ataniġnaqutiqaqłuni suaŋŋatiqaqłuniḷu piraksriḷḷagai ilitqusiqł̣uich, aasii ilaisa kamagillavlugu. 37Tavra uqaluk ilaagun siaminŋaruq inipayaanun tamatkunani nunani.
Jesus Iłuaqsigai Iñugiaktuat Iñuich
(Matthew 8.14-17; Mark 1.29-34)
38Tavra Jesus anivḷuni aŋaiyyuviŋmiñ Simon aimaaġvianuŋaruq. Tavra Simon aakaruaŋa naŋinŋaruq uunnautiqpaqaqłuni, aasii ilaisa ikayuqtaiḷiqutiŋagaat ilaanun. 39Tavra Jesus makitchaqtuŋaruq siñigviŋisa saniġaannun, aasii suakługu uunnautaa, aasii uunnautaiŋaruq. Tavrauvvaa makiłłuni niqłiuġutirraqsiŋagai.
40Tavra siqiñiq nipisaġataaqsimman, iluqaġmiŋ tamatkua naŋittuaqaqtuat qanusiḷimaanik naŋirrutinik qaġġisiŋagaich Jesus-mun. Tavra ilaan aksiuŋagai iluqaisa aasii iłuaqsivḷugich. 41Suli ilitqusiqł̣uich unnii animmiraqtut iñugiaktuaniñ iñuŋniñ nipaalavlutiŋ, Ilivich Iġñiġigaatin God-im. Tavra Jesus suagaġigai, suli uqaqtitchaiḷivḷugich, qanuq iḷisimagaat Christ-gutilaaŋanik, Iġñiŋa God-im.
Jesus Alġaqsruiruq Judea-mi
(Mark 1.35-39)
42Tavra uvlaaġmagu Jesus aullaŋaruq aasii iñuił̣aamukłuni. Tavra iñuich ivaŋagaat. Aasii paqinnamirruŋ, qimaktaiḷiŋarut ilaanun. 43Tavra ilaan uqallautiŋagai, Alġaqsruiruksrauruŋa tusaayugaaġiksuanik atanniqsimmataata God-im, allanullu iniqpaŋnun, qanuq God-im tiliŋagaaŋa taamna savaaġitquvlugu. 44Tavra ilaa alġaqsruiŋaruq aŋaiyyuviŋiññi Judea-m.
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)