Luka 23
23
1KO banto b’etakano ekiyo bauma baolemala, baolotomba ele Pilato. 2Ko baanga lofat’ende, baokela, Totanaki bont’one wete aolungusanya banto’akiso, ko aolasuka wae bafofute Kaisala mpuci, ko aokela wae ende mongo ale Masiya Bokulaka owa roi. 3Ko Pilato aolouola, aokela, W’ole Bokulaka ow’a-Yuda nde? Ko aolamba, We okela ngoko. 4Ko Pilato aokela nkanga ya joso la linyenga j’anto, Mpen’eloko ele bont’one. 5Lolonde baokemy’omwa la bolo, baokela, Aosomanya banto, ko ayolake lilako nda Yudea euma, aangaki nda Ngalilaya, ko aokita endoko. 6Lolo aki Pilato ookaka joi liko, aoluola nkina ale bosi Ngalilaya. 7Ko aki’nd’oeaka wae ale owa likulaka ja Elode, aolotoma ele Elode, eki’nde mongo nda Yelusalema ngoko nda bembil’eko.
8Ko aki Elode oenaka Yesu, aosalangana l’ekemo mongo: eki’nd’olangaka elingi mongo wae oene, la ncina eki’nd’ookaka lokumo lokande; ko ende aolendeza wae ene lotaza lomo lokelama l’ende. 9Ko aolouola la baoyi’auke; lolonde ende ntoamba joi limoko nye. 10Ko nkanga ya joso l’akoci b’enkanda bakemi eko, baoloaka baoyi la bolo mongo. 11Ko Elode la soldats bakande baolosotsa, ko baololengola, baololotsa benkoto bia jilangi mongo, ko baolouteya ele Pilato. 12Ko Elode la Pilato baoamana nd’oseka o mbil’eko: ek’iy’oinanaka jino nda joso.
13Ko Pilato aotakanya nkanga ya joso la ba-mpifo ko l’anto mongo, 14aolakela, Inyo lonjelaki bont’one ngol’om’ondungusany’anto: ko bala, njolouola nda joso likinyo, ko ncena ele bont’one eloko ea baoyi bak’iny’oakakanye; 15ko Elode nten’eloko el’ende ngoko; aolouteya el’iso; ko bala, ende ntakela joi lindeji l’iwa. 16Nd’ewel’eko, njifokunda lojiji, ko njifotungola. 17[Nd’ekeke e’elambo, ayotungoel’iyo loanga lomoko.] 18Lolonde baobeleza iy’auma bolongo, baokela, Imola bont’one, ko ototungoela Balaba: 19wae bont’omo ok’iy’oilaka nd’ilombe y’onyolo nd’ewela ea etumba eki’nd’ounaka nd’onanga, ko nd’ewel’eki’nd’oomaka banto. 20Ko Pilato aotefela l’iyo lenkina, eki’nd’olangaka wae atungole Yesu; 21lolonde baobeleza, baokela, Bak’ende nd’ekulusu, bak’ende nd’ekulusu. 22Ko aout’otefela l’iyo botefela w’esato, aokela, Eloko na? Joi j’obe liki bont’one okelaka na? Ncifen’eloko e’iwa el’ende; nd’ewel’eko, njifokunda la lojiji, ko njifotungola. 23Lolo baokama la lofoso ja lonene, baoluola wae aakeme nd’ekulusu. Ko lofoso lokiyo lolonga. 24Ko Pilato aotena likambo wae joi lik’iy’ouolaka likelame. 25Ko aotungol’oko okotungi nd’ilombe y’onyolo nd’ewela ea etumba la mbaoma e’anto, wae ende ok’iy’ouolaka; lolo aolekya Yesu ngok’iy’olangaka.
26Ak’iy’okendaka l’ende, baokanda Simona owa Kulene, oyaki lim’asala, ko baolafy’ekulusu el’ende, wae atomb’eko nd’afeka ba Yesu.
27Ko etukuluku mongo e’enene e’anto l’ea bamato bandolelaki ko bandoulelaki nkimo ya lokeseli baokimana l’ende. 28Lolo Yesu aokengwana el’iyo, aokela, Bana ba Yelusalema b’amato, talolelake nd’eloko ekami, lolo nd’eloko ekinyo ko la bana’akinyo. 29La ncina, bala, bembile beoya, be iy’okela, Iyo bataotaka, la bakunju bataotaki, ko la baele batalomyaki bale l’ekemo, 30Nkako bifoanga lokela ngongo, Lotokwele; ko la bekonji, Lotokuke. 31Nga bakel’aoyi’ane nd’otamba w’auku, joi lifokelama nd’otamba w’eonga na? 32Ko bam’afe, bakeli b’obe, baki eko, baotombama l’ende ngoko wae baomame.
33Ko ak’iy’okitaka nd’itenela itangema Loelenge, baoloak’eko nd’ekulusu, ko l’akeli b’obe nda bikulusu, omo nda wiji wa likata j’elome, omo nda wiji wa likata ja waji.
34Ko Yesu aokela, Fafa, w’atungol’iyo lima joi line; ef’iy’oea joi likel’iyo. Ko baokafel’iyo mongo benkoto bekae, la ntata ea mbese. 35Ko banto baolemala, bayoale te. Ko banto ba mpifo baololengola, baokela, Aikyaki bankina; kel’aiky’omongo, nkin’one ale Masiya owa Nzakomba, l’osonami’okae. 36Ko soldats baololengola ngoko, baoy’el’ende, baoloka vinaigre, 37ko baokela, Nkin’ole bokulaka owa Roi ow’a-Yuda, bikya we mongo. 38Ko ekotelo ene eki nd’aliko bakae, ONE WETE BOKULAKA OW’AYUDA.
39Ko omo owa bakeli b’obe oakemi aolofangwela, aokela, Ofa Masiya nde? Bikya we mongo ko l’iso. 40Lolonde onkina aolamba, ko aolosasa, aokela, Kamba ofoange Nzakomba nde, ele we ole nd’ekwa eko ea likambo? 41Ko nsosolo iso telama l’eko: el’iso tamba ndako endeji l’eketo bekiso; lolonde bont’one ntakela joi limoko j’oseketano nye. 42Ko aokela, Yesu, ae w’oya nda likulaka like, onjofw’emi. 43Ko aokela, Nsosolo, nkosangela, mbil’ene wifoyala l’emi nda Paladiso.
44Ko midi eokita, ko wilima bokwa nd’okili bouma elaka nko trois heures, 45eki jefa ntalingesa lenkina; ko eto e’ilombe ya Nzakomba eolatsa nda bitate bife. 46Ko aki Yesu obelezaka la lofoso ja lonene, aokela, Fafa, nkokitsa bolimo’okami nd’akata’akawe; ko aki’nd’otefelaka ngoko, aokenz’olimo. 47Ko aki capitaine oenaka joi likelami, aomemya Nzakomba, aokela, Nsosolo, one aki bonto owa liongi mongo. 48Ko bant’auma ba bitukuluku batakanaki nd’etalo ene, ak’iy’oenaka baoyi bakelami, baoluta, bayokundele ntolo ikiyo. 49Ko bant’auma bandoeaki, l’amato bakimanaki l’ende lima Ngalilaya, baolemala nd’esi, bayoale baoyi’ane. 50Ko bala, bonto otangema Yosefa, oki nda nteke ekiyo ea bingambe, bonto ow’olotsi la liongi, 51(ende ntimezaki wango l’oketo’okiyo) ko aki bosi Alamatayo, bonanga w’a-Yuda, aolendeza likulaka ja Nzakomba: 52bont’one aocw’ele Pilato ko aolomb’ilaka ya Yesu. 53Ko aokitez’iko ko aomb’iko l’eto ea mbenza, ko aoloambya nd’oomba bocimamaki nd’ekenje, botaf’onto oambema. 54Ko mbil’eko eki ea Njeeza, ko Sabata eotutama. 55Ko bamato bayaki l’ende lima Ngalilaya, baokima nd’afeka ko baolena boomba, l’elenge eki ilaka ikae oambemaka. 56Ko baoluta, ko baoleza baimi l’auta ba mpimbo. Ko nda mbile ea Sabata baoloma jomo eleng’ele esekyelo.
Okuqokiwe okwamanje:
Luka 23: NTMN58
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Bonkanda Wa Nzakomba W’aeyoko © Aliiance Biblique de la RD Congo, 1958.