Chukusakị 25
25
Ebraham Ḅe Furo Ḅie Pakaḅo Jịn Apụ
(1 Ama 1.32-33)
1Ebraham ḅe ọ̀ jịn eremeniḅọ simemẹ, árịa ẹrẹ anị Kẹtura. 2Á Zimran ḅe na, Jọkshan ḅe na, Midan ḅe na, Midian ḅe na, Ishbak ḅe na pịkị Shụa ḅe na nwọ yi ọ̀ pịrịmẹ. 3Jọkshan ḅe anị Shiba ḅe na Didan ḅe na ḍa-ẹ, pịkị Didan ḅe ḅụ pakaḅo apụ anị Ashurim apụma na, Letushim apụma na, pịkị Lẹọmim apụma na-ẹ. 4Midian awọma anị Ifa ḅe na, Ifẹ ḅe na, Henọk ḅe na, Abaịda ḅe na pịkị Elda ḅe na-ẹ. Mịnapụ mamgba anị Kẹtura ma furo ḅie pakaḅo apụ-ẹ.
5Ebraham ḅe ọ̀ nyanaye goyegoye ò se koroma Aịzịk ḅe pịrịmẹ; 6ọkụma ma ọ̀ fịka simeogbo, ò ḍiepịrịaye seni ísí ịgwa eremenima yi ọ̀ pịrị owuapụ awọma pịrịmẹ. Anịsịkị ori ísí owuapụ awọma se Aịzịk ḅe ḅụ sasama Ịrụapakapaka nyọ sime amama sẹịnmẹ.
Ebraham Ḅe Fị Na Oria Ḍipi Mị Na
7-8Ebraham ḅe ori olomu sọnọfa kụra esenie-a asi la se ọ̀ fịmẹ. 9Oria owuapụ awọma, Aịzịk ḅe na Ishmẹl ḅe na, Makpẹla pokolo mị ḅie ini ò ḍipimẹ; anị Mamre ḅụ ịrụa mị pakapaka nyọ daọrụ ele mị ḅie, anị gbọrị sịkị Zoha tọkụ Ifrọn, Hitaịḅọ ḅe nyana nyọ mị. 10Anị Ebraham ḅe Hitaị apụma ḅara fẹ ele mị-ẹ; Ebraham ḅe na tarọ Sera ma na ini inise anị nyọ ḍipimẹ. 11Ebraham ḅe fịḅọrọ sịkị, Tamụnọ Ḅe oria tọkụ Aịzịk ḅe ḅẹlẹmamẹ. Anịsịkị mị ḅụ Aịzịk ḅe “Ị̀ Ọrị Ḍumoḅọ Ḅe Oria Tiḅe” ini nwọse chịn ye mị na kpekima angamẹ.
Ishmẹl Furo Ḅie Apụ Ma
(1 Ama 1.28-31)
12Ishmẹl, anị Sera ma árịa Ijipt omoni eremeniḅọ, Hega ma yi Ebraham ḅe pịrị owutọkụ ḅe, 13mịna owuapụ awọma yimẹ ini ḍin se jịnḅọ jịnḅọ nẹngị ḅaraḅụ: Nebaịọt ḅe na, Kida ḅe na, Adbiẹl ḅe na, Mibsam ḅe na, 14Mishma ḅe na, Duma ḅe na, Masa ḅe na, 15Hedad ḅe na, Tima ḅe na, Jẹtu ḅe na, Nefish ḅe na, pịkị Kẹdema ḅe na. 16Ini anị oyimaịn sẹ fịnjịma ḅe opu-a ḍapụ-ẹ, inia ẹrẹ ma ini nwọse inia ịwọamama na ini anga nyọma na chịnmẹ. 17Ishmẹl ḅe tẹrẹfa kụra sọnọmasi ò ḍumo nwọ lase ọ̀ fịmẹ. 18Ishmẹl furo ḅie apụma Havila na Shọ mị na eke, anị Ijipt ḅụ ịrụapakapaka nyọ ọkịmun Asiria la ateli mị nyọ ḅụ ini angamẹ. Ebraham ḅe ḅụ pakaḅo ísíapụma ḅụ ini sikima angamẹ.
Isọ Ḅe Na Jekọb Ḅe Na Yi Mị
19Mị Ebraham tọkụ Aịzịk ḅe ḅụ ḅẹrẹ mị-ẹ. 20Aịzịk ḅe kụra mesi ọ̀ nwọ lase mị ò Ribeka, Bẹtuẹl ḅa ma simeye-ẹ (ori anị Mẹsopotemịa ḅie ḅo Aramḅọ-ẹ) árị anị Leban ḅe nụmbụrarọ-ẹ. 21Ribeka ma á yikaye gose, Aịzịk ḅe ori á tịḅị gose, Nyanaḅọ Ḅe tẹkẹtẹkẹmẹ. Nyanaḅọ Ḅe pịkị oria tẹkẹ mị pẹkẹrẹse, Ribeka ma á ḅo simekọnmẹ. 22Mama ịkpatụ awọ á nwọ yiḅịa, ma árị ini yika sịkị ḅụ ḅụlọḅie ngịsị ini ịgbanịaye nyanamẹ. Á nwọ ḅẹmẹ, “Cheye gose nwọ simeye ị̀ ḅụ paka-ao?” Anịgose á mun Nyanaḅọ Ḅe gbelamẹ, anịa pẹkẹrẹḅịpị gose.
23Nyanaḅọ Ḅe nwọse á ḅẹmẹ,
“Mama sẹ ị́ furo ḅie omi-ẹ;
Ịgbanịaye nyana mama apụ ị́ nwọ yiḅịa.
Gbọrịḅọ kụrọ ísíḅọ ḅe nẹngịḅịa;
Sẹnịḅọ ḅe ọ̀ fịrịnwẹngị kalaḅọ ḅe pịrịḅịa.”
24Á yiḅịa sịkị mị ḅola sịkị, mama ịkpatụ owuapụ awọ á nwọ yimẹ. 25Tatarịḅọ ḅe oria oju pulo-pulo-pulomẹ, oria oju pịkị ịchuka-ịchuka-ịchuka opu ḅụchụaye ọkụ simemẹ, anị gose ini nwọse ọ̀ chịnmẹ Isọ. 26Maịn karamaḅọ ḅe ini oyi sịkị ọ̀ gagama Isọ ḅe ḅụọ-tongu ọlọ waraḅẹ, anị gose ini nwọse ọ̀ chịnmẹ Jekọb. Aịzịk ḅe kụra tesi ọ̀ nwọ lasịkị ini ini yimẹ.
Isọ Ḅe Tatarị Yi Tọkụ Kiri Mị Dẹrịmẹ
27Owuapụ awọma ini sẹnị pakamẹ, Isọ ḅe namatẹịn ḅụ ori opuma ọbịrịmẹ, warị sọka ḍumo ọ̀ ḅụ ḅeinmẹ, ọkụma Jekọb ḅe ori anị dein, pịkị warị ḅie simesimeḅọ-ẹ. 28Aịzịk ḅe ori Isọ ḅe ḅẹlẹmamẹ, anịatịḅị Isọ ḅe tẹịn ḅoḅo namama pẹị mị ọ̀ ḅịpịḅie ḅẹlẹḅẹlẹmẹ, ọkụma Ribeka ma Jekọb ḅe á nwọ ḅẹlẹmatẹịnmẹ.
29Gbọrị ene Jekọb ḅe pulo-pulo pikiri fịye nwọ chụọ àrịogbo mị Isọ ḅe ọ̀ namatẹịn nyọḅụ ḅoye-ẹ. Fịye iḅiọkụma ọ̀ tarịmẹ 30se ọ̀ nwọse Jekọb ḅe ḅẹmẹ, “Fịye ị̀ tarịḅaa aḅẹ; kele anị pulo-pulo-pulo pikiri fịye mị ḅụ yese ị̀ pịrị.” (Anị ini gose Idọm se ọ̀ chịnchịnye-ẹ.)
31Jekọb ḅe nwọ pẹkẹrẹmẹ, “À se ị́ pịrịḅịa ị́ nemikase ị́ya tatarị owutọkụ kiri mị se ị̀ pịrịḅịa ọkụma.”
32Isọ ḅe nwọ ḅẹmẹ, “Anị iḅimẹ! À fị-ẹtọn aḅẹ, ị̀ya tatarị yi owutọkụ kiri mị anị che sọye mịẹ ị̀ pịrị ḅe?” 33Jekọb ḅe nwọ pẹkẹrẹmẹ, “Tatarị yekarịfị ị̀ pịrị na, tatarị yi owutọkụ kiri mị ị́ se ị̀ pịrịḅịa.”
Isọ ḅe ò yekarịfịmẹ, se sime ọ̀ pịrị ḅẹlẹma ma saḅama Jekọb ḅe pịrịmẹ. 34Anịsịkị Jekọb ḅe, fịturu na pikiri fịye mị na ḅụ ye se ọ̀ pịrịmẹ. Ọ̀ fị, pịkị ḅumẹ se ọ̀ sịsẹ somẹ. Mị Isọ ḅe oria tatarị yi owutọkụ kiri mị ḍikisima ọkụ-ẹ.
Okuqokiwe okwamanje:
Chukusakị 25: OBTP
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The Bible Society of Nigeria