Chukusakị 26
26
Aịzịk Ḅe Gira Ḅie Ḅụ Angamẹ
1Jịn ḅuruḅaa ḅomẹ, tatarị Ebraham ḅe sịkị ḅụ ḅo ḅuruḅaa mị sikima ọkụma. Aịzịk ḅe, ò Gira ḅie Filistia amanyanaḅọ Abimẹlẹk ḅe damamunmẹ. 2Nyanaḅọ Ḅe, ọ̀ ḅụse Aịzịk ḅe ḍiese nwọ ḅẹmẹ, “Ijipt mị munma, mị ama mị ḅie sime, àrị ị́ ḅe na sime nwọ ḅẹ nyọ mị. 3Mịanga anga, à pịkị ị́rị́ na simeḅịa, se pịkị ị́ ḅẹlẹmaḅịa. Nyọ mị mgba à se ị́rị́ na ị́ furo ḅie pakaḅoḅịa apụma na pịrịḅịa. À ḅereni ị́ ḍa Ebraham ḅe pịrị yemị à nwọ mịẹ ḅeinmaḅịa. 4Sotọrụ sime loliama ḅaka ọkụ ḅaka apụ à nwọse ị́ pịrịḅịa, à pịkị mị bebe nyọ mị mgba se ini pịrịḅịa. Sẹ mamgba ị̀ ḅẹḅịa na à nwọ ị́ furo ḅie pakaḅo-apụ ma ḅẹlẹma ọkụ nwọse ini ḅẹlẹma. 5Àrị ị́ ḅẹlẹmaḅịa, anịatịḅị Ebraham ḅe ori ị̀ ḅịpị poki pịkị ị̀ya oloko mamgba kokokokomẹ, pịkị à tọn aye mamgba mịẹmẹ.”
6Anị gose Aịzịk ḅe ò Gira ḅie angamẹ. 7Anịanga sime owuapụma tarọ ma ḅụye nwọse ò gbela sịkị, ọ̀ nwọ ḅẹmẹ na árị nụmbụrarọ-ẹ. Árị tarọ-ẹ nwọ ḅe yemị ò ḅerenikẹ, anịatịḅị ọ̀ ḅalafamẹ na anịanga sime owuapụma ini ọ̀ ḅaaḅịa se Ribeka ma ọkịḅịa ẹrẹchị, anịatịḅị árị opuma ḍikitọrụgbẹịnmẹ. 8Aịzịk ḅe ori anịanga sime se sịkị kele ḅọrọ sịkị, Amanyanaḅọ Abimẹlẹk ḅe oria pẹlẹḅọkọ ḅie tọrụ toluma kiri ḍiki ọkụma, Aịzịk ḅe na Ribeka ma na ḅẹlẹma ti kọn aḅẹ. 9Abimẹlẹk ḅe Aịzịk ḅe chịn se nwọ ḅẹmẹ, “Sembe árị ị́ ta-ẹ! Cheye gose ị́ nwọ ḅe na árị ị́ mbụra-ẹ?”
Ọ̀ nwọ pẹkẹrẹmẹ, “À nwọ chịnmẹ ini ị̀ ḅaaḅịa, à nemikase ḅẹ na árị ị̀ ta-ẹ ḅẹ ọkụma.”
10“Mị cheye ị́ nwọse wa mịẹ?” Abimẹlẹk ḅe ọkọ ḅẹmẹ. “Ị̀ya owuapụma ḅie gbọrịḅọ ineda nemika ḅara ḅụ ị́ ta ma na gbolomaḅịa, anịsịkị anị ḅẹrẹḅarasi mị ị́rị́ mịẹmẹ.” 11Abimẹlẹk ḅe ori oria tomoni mamgba ḅeri jine se nwọ ḅẹmẹ, “Siḅara se ḅeḅọ ḅe anịkanịka tarọ ma na angaḅọ goyegoye ini nụḅọ ḅaaḅịa.” 12Aịzịk ḅe anị kiri mị ḅie ò ye ḍipimẹ se anị kụra mị ḅie ò ḍipiye la-ọkụ la-ọkụ ḅe kiri-a sọnọasi ọ̀ nwọ sokumẹ, anịatịḅị Nyanaḅọ Ḅe ori ọ̀ ḅẹlẹmamẹ. 13Ye ori na lọkọlọkọ ḅụ ọ̀ dachịẹ nyanakẹ ọkịmun ò ḅo opu ngọ kọnḅọ nwọ sọmẹ. 14Anịatịḅị ọ̀ tọntọn-a anana ogbo na, tọrụ kịrịkịrị nama na pịkị fịrịnwẹngịapụ na nwọ nyanamẹ, Filistia apụma ini ò ḍiki pụkọsolimẹ. 15Anịgose tiḅe mamgba ini pụnmamẹ anị ḍawu, Ebraham ḅe oria fịrịnwẹngịapụma, ò ḍumo sịkị soku ayema.
16Anịsịkị Abimẹlẹk ḅe nwọse Aịzịk ḅe ḅẹmẹ, “Mịna sẹ ḅie so. Ị́ opuma kụrọ wa nẹngịsam.” 17Anịgose Aịzịk ḅe ò somẹ se mun Gira Pẹsịkiri mị ḅie oria ikowarị mị pike anga se kele anịanga simemẹ. 18Ebraham ḅe ò ḍumo sịkị ḅụ soku tiḅe ma, se ọ̀ fịḅọrọso se Filistia apụma pụnma ayema, Aịzịk ḅe pịkịna àrị sokumẹ. Aịzịk ḅe ḍawu ḅe se tiḅe ma chịn gbọrị ẹrẹ ma mị ò seni àrị chịnye-ẹ.
19Aịzịk ḅe oria fịrịnwẹngịapụma pẹsịkiri mị ḅie ini tiḅe sokumẹ, se mengi pakaḅomẹ. 20Gira mị ḅie anana koruapụma ini Aịzịk ḅe oria anana koruapụma na kamụ sọmẹ se nwọ ḅẹmẹ, “Mị mịna mengi-ẹ.” Anịgose Aịzịk ḅe nwọse tiḅe mị chịnmẹ “Kamụ.”
21Aịzịk fịrịnwẹngịapụma ini jịn tiḅe sokumẹ, anị mị sọnị anị kamụ dekiḅoḅomẹ anịgose ọ̀ nwọse anị chịnmẹ, “Taraka.” 22Ori anịanga ḅụsikima se jịn tiḅe sokumẹ. Mịn mị ḅụ ịgbanịaye ofori-ẹ anịgose ọ̀ nwọse anị chịnmẹ, “Ḅụḅalaḅala Ofori-ẹ.” Ọ̀ nwọ ḅẹmẹ, “Mịọkụ anị Nyanaḅọ Ḅe, ḅụḅalaḅala oforiḅụ ò ḅereni wa pịrịsaye-ẹ, na wa mị ama ḅie anga-ẹ, mịanga wa pịkị lọkọlọkọ nyanaḅịa.”
23Aịzịk ḅe ò so Biashiba mun mẹ. 24Anị ḍin mị ḅie Nyanaḅọ Ḅe ọ̀ ḅụ se ò ḍiemẹ se nwọ ḅẹmẹ, “Ị̀rị̀ anị ị́ ḍa Ebraham Tamụnọ Ḅe-ẹ. Ḅalafama; àrị ị́rị́ na omi-ẹ. Àrị ị́ ḅẹlẹmaḅịa, à pịkị tọn-a awọ se ị́ pịrịḅịa, ị́ furo ḅie pakaḅoḅịa apụ anịatịḅị à ḅereni ị̀ya fịrịnwẹngịḅọ Ebraham ḅe pịrịye mị ẹrẹchị.” 25Aịzịk ḅe ori anịanga agbamịẹ ẹbẹ pike se Nyanaḅọ Ḅe tẹkẹtẹkẹmẹ. Anịsịkị ọ̀ pịkị oria ikowarị mị nwọ pike chịẹmamẹ anị nyọ, se oria fịrịnwẹngịapụma ini pịkị jịn tiḅe sokumẹ.
Aịzịk Ḅe Na Abimẹlẹk Ḅe Na Nyana Ḅịpịogbosọ
26Abimẹlẹk ḅe na ò tetema-tetemaḅọ Ahuzat ḅe na pịkị oria ọmụogbo tịḅịnịḅọ Fịkọl ḅe na Gira ḅie ḅụ so mun Aịzịk ḅe ḍiki-emunmẹ. 27Aịzịk ḅe nwọse ini gbelamẹ, “Cheye gose mịọkụ ó ḅo ị̀ ḍiki-eḅo, ómine ikiaḅara se ị̀ ọkịka yegose àrị ọ́mịna sẹ wẹrịsoka?”
28Ini nwọ pẹkẹrẹmẹ, “Mịọkụ anị wa nemiye-ẹ na Nyanaḅọ Ḅe ori ị́rị́ na omi-ẹ, wa ḅimẹ na ị́rị́ na mine na ogboku iḅi ḅịpịogbosọ sime. Wa ḅimẹ na ị́ ḅereni 29na ị́ yese wa lama-ẹkẹ, mine sọnị pịkị yese ị́ lamaka ọkụ mị. Wa iḅiọkụ se ị́rị́ na angamẹ, wa mịẹmẹ dein ḅụ ị́ somẹ. Mịọkụ anị ḍiepakụmamẹ na Nyanaḅọ Ḅe ori ị́ ḅẹlẹmasam.” 30Aịzịk ḅe ọ̀ fịye chụọ ini pịrịmẹ, se ini fị pịkị ḅumẹ. 31Eneḅa dedeḅie, ḅọḅọ ye ḅerenimẹ, se yekarịfị nụḅọ ḅereniye ma mịẹkụrọmamẹ. Aịzịk ḅe ḅaḅa se ini ḅẹmẹ, se ikiapụ ḅaraḅụ ini somẹ.
32Anị ene mị Aịzịk ḅe oria fịrịnwẹngịapụma ini soku tiḅe ḅẹrẹ mị ḅo nwọ ḍuko ọ̀ pịrịye-ẹ. Ini nwọ ḅẹmẹ, “Wa mengi ọrịsam.” 33Ọ̀ nwọse tiḅe mị chịnmẹ, “Ọḅọkụ.” Mị anị Biashiba opuama mị anịa ẹrẹ nyanaḅo ọkụ-ẹ.
Isọ Ḅe Sime Jịn Sẹ Eremeni Ma
34Isọ ḅe ọ̀ kụra mesi nwọ lasịkị Hitaị mama eremeni ọ̀ nwọ simemẹ. Judịt, Beraị ḅa ma na pịkị Basemat Ilọn ḅa ma na. 35Mịn mị anị ḅakama ḅụḅalaḅala se Aịzịk ḅe na Ribeka ma na pịrịmẹ.
Okuqokiwe okwamanje:
Chukusakị 26: OBTP
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The Bible Society of Nigeria