Yuhanna Is Buk Ke Baare Meñ
Is Buk Ke Baare Meñ
Yeeshu Maseeh kon hei? Yuhanna i sawaal ke jawaab i buk ke pahila chapṭa meñ de hei. Puraana jamaana ke Maseehi geet ke u vachan meñ, u Yeeshu ke “Shabd” ya “Bol” bole hei, jisse Parmeshwar puura dunia ke banaais aur yahi shabd (bol) ke jeewan dees (1.3,4). I buk meñ u i dekhaais ki kon rakam se Yuhanna baptisma de waala Yeeshu ke aawe ke khabar dees, “Yahi hei Parmeshwar ke memna, jon sansaar ke sab paap aapan uppar uṭhaay le jaai” (1.29). Jab Filip, Yeeshu se mila tab u jaan lees ki Yeeshu wahi hei “Jiske baare meñ Maozas aur nabi log kaanuun ke buk meñ likhis raha” (1.45). Aur Natanyel ke vachan meñ, Yeeshu, “Parmeshwar ke putr aur Israayel ke raaja” hei (1.49).
Yuhanna ke updes meñ ham Yeeshu Maseeh ke baare meñ bahut kuchh jaane sakta hei, jab ham dekha hei ki u keisan kaam karat raha, aur keise aur sab se baat kare hei aur u sab se keisan vyohaar kare hei. Is meñ i bhi paaya jaay hei ki jab Saamri aurat Yeeshu se jeewan ke paani ke daan paay hei, u aurat jon apne paap meñ jakṛi rahi, aur Laazras jon Yeeshu ke mitr raha, jiske Yeeshu fir se jiaais raha, aur Thomas jon Yeeshu ke pichchhe chalat raha lekin ḍaauṭ karis ki Yeeshu mara log meñ se jinda hoy gais hei. Yeeshu aapan baare meñ i bhi bole hei “Ham hei,” i baat wahi hei jon Heebru skripcha meñ Parmeshwar ke khaatir pawitr naam maana jaay hei. U yahi naam apne waaste kaam meñ laais hei jab u i saabit kare maañge hei ki wahi jeewan ke roṭi hei, sansaar ke jyoti hei, achchha shepaḍ hei, aur sachcha vaain hei.
Yeeshu saat chamatkaar dekhaay hei jon aur sab chamatkaar se bhi baṛa hei. Sab “Saain” hei, jon hame i bataay hei ki Yeeshu hee Parmeshwar ke putr hei. Jeise, langṛa ke achchha karna (5.19), aur Pita ke rakam “Putr bhi jiske maañge uske laaif de hei” (5.21).
Jon rakam Yuhanna Yeeshu ke baare meñ likhis hei, u baaki teen buk se alag hei. Hiañ pe Yeeshu sab log se lamba lamba baatcheet kare hei aur bataay hei ki u kon hei aur Parmeshwar uske kaa kare ke waaste bhejis hei. I sab baatcheet meñ wahi jaruuri baat sikhaay hei–jeise ki, wahi rasta, sachchaai aur jeewan hei.
Yuhanna kaahe ke likhis hei? Yuhanna khud bataay hei, “Yeeshu hee Parmeshwar ke laṛka Maseeh hei, aur tum sab biswaas karke uske naam se jeewan paao” (20.31). I keise hoy sake hei? Yeeshu iske jawaab Nikoḍimas ke de hei.
“Parmeshwar sansaar ke log se etna prem karis ki u aapan eklauta laṛka dunia meñ bhejis, ki jon koi uspe biswaas kari, u naas nai hoi lekin anant jeewan paai.” (3.16)
Is Buk Pe Ek Najar
Bol ke baṛaai meñ ek geet (1.1-18)
Yuhanna baptisma de waala ke sandes (1.19-34)
Yeeshu aapan pahila chela chune hei (1.35-51)
Yeeshu ke saat khaas chamatkaar (2.1–12.50)
Yeeshu ke aakhri sapta, uske ṭraails aur maut (13.1–19.42)
Yeeshu jinda hei (20.1-10)
Yeeshu aapan chela log ke saamne aay hei (20.11–21.25)
Okuqokiwe okwamanje:
Yuhanna Is Buk Ke Baare Meñ: FRHNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Fiji Romanised Hindi © Bible Society of South Pacific, 2016.