मत्ती 13
13
सेन ताप्केन्गी पे
(मर्क ४:१-१२,२५; लूक ८:४-१०; १०:२३-२४)
1ओ़ह ङ्यिहमुराङ येशू ओ़ह खाङबालेगी थेन्दी छोगी सुहरला फेप्ती सुङदेन ख्येप्टा नाङज्येला ज़्य़ू नाङसीन। 2ओहले येशूगी कोर-क्यिहलेॱराङ मिह माहङबुराङ जोम ओहङग्यो सोङबे येशू टुह-छ्युङ च्यी़ला जा़दी ज़्य़ू नाङसीन। मिह मिह-माहङया़दी छोगी सुहरलाॱराङ लाहङदी तेहसीन।#लूक ५:१-३ 3ओहले येशूगी पे ज़्या़दी माहङबुराङ स्याहलया़ सुङ नाङसीन।
ओहले येशूगी सुङ नाङसीन, “मिह च्यी़ राहङगी स्यिहङला सेन ताप्च्येला काहल्सीन। 4ओहले सेन ताप-ताप्पा काहङला लाहला सेन लाहमला फार लेप्सीन ओहले च्यिहबीया़गी ओहङदी साहसीन। 5लाहला सेनया़दी तोहरो खाया़ॱलाङ लेप्सीन ओ़हला सासा माहङबु म़ेहबा सुङगोराङ सेन क्येज्येनी ग्यो़बाराङ क्येसीन, 6यिहॱनाङ तिहङ रिहङबु चार्ङ्यी सू़ह मा़हखुबा सोङबे ङ्यिहमा स्यार फान्ज्यो च्याहङबा काम्दी स्यिसीन। 7लाहला सेनदी छेर्मा तोहङबो नाहङया़ला लेप्सीन। यिहॱनाङ छेर्मा तोहङबोया़ छार्ती ओहङगेमु क्येक्योगी च्याहङबाया़ सेर्पु काहल्दी स्यिसीन। 8यिहॱनाङ लाहला सेनया़दी या़हबु साला लेप्सीन। ओहले ओ़ह च्याहङबा छार्ती लाहलागी बुदी क्याह च्यी़, लाहलागी बुदी खाल सुम, लाहलागी बुदी खाल फेदाङ ङ्यी़ ल़ेहमु या़हसीन। 9का़हन्दीगी नाम्ज्यो येहबा, ओ़हदीगी ङ्यिहन्ज्यु!”
10ओहले स्याहप्च्यीया़ येशूसाला ओहङदी, “च्यिबे राहङगी मिहया़ला सुङदेन नाङगेमु पे ज़्या़दी लोप्नाङगे?” म़ेदी स्युहसीन। 11येशूगी खुङया़ला सुङ नाङसीन, “त़ेदोङ, किन्ज्योगी क्याहल्सीला नाहङ-तामया़ ख्याया़ला ह्अ कोह च्य़ूक्यो येह, यिहॱनाङ खुङया़लादी ह्अ कोह च्य़ूदी म़ेह। 12च्यिबेमाना सु ङ्याम्बु येहबा, ओ़हदीला तोहरोङ तेर्च्ये येह ओहले खो ङ्याम्बु काहजे मामा ओहङज्ये येह। यिहॱनाङ सु ङ्याम्बु म़ेहबा, खो ङ्याम्बु सिपाज्यी येहकेन्दीॱआङ फ्रो़ज्ये येह।#मत्ती २५:२९; मर्क ४:२५; लूक ८:१८; १९:२६ 13ओ़ह सोङबे ङाहगी मिहया़ला लोप्च्युङ तेर्केमु पे ज़्या़दी लोप्क्यो यिहम्बा च्यिबेमाना खुङया़गी ते़दीॱआङ मेहथोङगे, ङ्यिहन्दीॱआङ मे़हथेगे ओहले ह्अ मेहकोएँ। 14खुङया़ ङ्याम्बु यशैया लुहङतेम्बागी सुङ नाङग्योकी दि स्याहल ठाबे डी़ ओहङगे–
‘ख्याया़ ङ्यिहन्ज्येनी ङ्यिहन्गे यिहॱनाङ ह्अ मेहकोएँ,
ताज्येनी ताएँ यिहॱनाङ मेहथोङगे। #यशै ६:९,१०
15 च्यिबेमाना दि मिहया़गी सेम ङोहॱराङ मे़हस्येएँ काहल्दी येह।
खुङया़गी नाम्ज्यो मे़हथेगे काहल्दी येह ओहले
खुङया़गी मी़ चुम्दी येह।
मिहन्सीमानानी खुङया़गी थोङज्ये दाङ थे़ज्ये येहकें ओहले सेमगी ङोह स्ये़ज्ये येहकें ओहले
खुङया़गी राहङगी सेम ङाह ङो़ले ग्युर्च्ये येहकें
ओहले ङाह खुङया़ला टा़ह च्य़ूज्ये येहकें’।”
16 “यिहॱनाङ ख्याया़दी काहजे काहवा, ख्याया़गी मी़गी थोङगे ओहले नाम्ज्योगी थे़गे। तेहम्बाराङ ङाह ख्याया़ला माएँ, ख्याया़गी थोङग्यो दाङ थे़क्योगी दि केच्याया़ माहङबुराङ लुहङतेम्बा दाङ टाहङबु मिहया़गी ताज्ये दाङ ङ्यिहन्ज्येला ज्यिबुराङ सेम पेहती येहकें। #
लूक १०:२३,२४ 17तेहम्बाराङ, खुङया़गी थोङॱआङ माहङ्युहङ, ओहले ङ्यिहनॱआङ माहङ्युहङ।”
सेन ताप्क्योगी पेगी तेहन्दा
(मर्क ४:१३-२०; लूक ८:११-१५)
18 “ता़ह, सेन ताप्क्योगी पेगी तेहन्दा ङ्यिहन्दोङ। 19काहजे मिहया़गी किन्ज्योगी क्याहल्सीगी तेहन्दाला लोप्च्युङ ङ्यिहन्ज्येनी ङ्यिहन्गे, यिहॱनाङ ह्अ मेहकोएँ ओहले ङ्येहम्बा ओहङदी खुङया़गी सेमला ताप्क्योगी लोप्च्युङ फ्रो़दी ख्येर्के। दिनी लाहमला लेप्क्योगी सेन ल़ेहमुराङ यिहम्बा। 20ओहले सा तोहरो खाला लेप्क्योगी सेनकी तेहन्दा च्यि यिहम्बा मासीमाना काहजे मिहगीदी किन्ज्योगी लोप्च्युङ थे़-लुहङ मे़हबाराङ क़ेहनाङ पेहती सेमला लेहन्गे। 21यिहॱनाङ दि लोप्च्युङ खुङया़गी सेमला या़हबु पेहती सू़हक्यो मेहयोहङगे ओहले ङ्यिहमा तोबा च्यी़राङ लिहकें। किन्ज्योगी लोप्च्युङ ङ्यिहन्ग्यो सोङबे तुहक्पु दाङ ङ्येन्ज्येन ओहङलुङ मे़हबाराङ खुङगी दि लोप्च्युङ क्युर्कें। 22येहपाराङ काहजे मिहगी सेमदी छेर्मा चेहरेप ल़ेहमुराङ ओहङगे। खुङया़गी किन्ज्योगी लोप्च्युङ ङ्यिहन्दीॱआङ दि जाम्बुलीङगी तेहन्दाला तुहङाल पेहकें ओहले क्युह-नोहर थो़ला सेम च्याङगे। ओ़ह सोङबे खुङया़गी ङ्यिहन्ग्योगी लोप्च्युङ तोर्ते डोएँ ओहले च्यिॱआङ सेदो मे़हयाहएँ। 23यिहॱनाङ काहजे मिहगी सेमदी सा या़हबु ल़ेहमुराङ ओहङगे। खुङया़गी किन्ज्योगी लोप्च्युङ ङ्यिहन्दी ह्अ कोहएँ ओहले सेदो या़हएँ। ओहले खोगी ताप्क्यो सेनलेगी बुदी क्याह च्यी़, बुदी खाल सुम, बुदी खाल फेदाङ ङ्यी़ ल़ेहमु या़हगे।”
युहक्पीगी पे
24येशूगी येहपाराङ पे ज़्या़दी सुङ नाङसीन, “त़ेदोङ, किन्ज्योगी क्याहल्सी राहङगी स्यिहङला सेन या़हबु ताप्केन्गी मिह च्यी़ ल़ेहमु ओहङगे। 25टाहगी नुहङमु थाम्ज्यी ङ्यि लो़हक्यो लोहङ त़ेदी ओ़ह ने़ह ताप्क्यो स्यिहङला युहक्पीगी सेन ताप काहल्सीन। 26ओहले ने़ह छार्ती ङ्येमा थेन्गेमु युहक्पीॱया़ङ छार्ती ओहङग्यो थोङसीन।”
27 ओहले स्यिहङ ताहक्पुगी योक्पुया़ ओहङदी खोला मासीन, “ताहक्पुगी स्यिहङला सेन या़हबुॱराङ ताप नाङग्यो मिहम्बा ले? ज़ी़-नाङदोङ लाह, दि युहक्पी का़हलेगी ओहङबा?” 28ओहले ताहक्पुगी मासीन, “सुज्यी टाहगी दि ल़ेहमु पेहपा यिहन्डो।” योक्पुया़गी मासीन, “आहन्डा यिहन्सीमाना ङ्यिह काहल्दी ओ़ह युहक्पीया़ पो़दोङ ले?”
29 यिहॱनाङ स्यिहङ ताहक्पुगी मासीन, “मिहम्बा, नाहरे पो़ माहन्डो। का़हलेॱआङ युहक्पी पो़ज्ये छोल्सीमानानी जोल्दी ऩेहॱआङ पो़ज्ये येह। 30तेन्दो टू़हगे ती़हजी माहकाहल थु ङ्यिकालाराङ ङ्याम्बु-ङ्याम्बुराङ छार च्य़ूदोङ ओहले तेन्दो तो़हगेन ती़हजीला ङाह ल़ेहमीया़ला तोहङले युहक्पी रुहप पेहती मेहला सा़ज्येला बिरा ताहम्दोङ ओहले ने़हदी ती़हदी चाहङला ज़्या़दोङ म़ेदी माएँ।”
राइ-सेन दाङ खमिरगी पे
(मर्क ४:३०-३४; लूक १३:१८-२१)
31येशूगी येहपाराङ लेहमेन पे च्यी़ ज़्या़दी सुङदेन नाङसीन, “किन्ज्योगी क्याहल्सी राइ-सेन ल़ेहमु ओहङगे। मिह च्यी़गी राइ-सेन लेहन्दे राहङगी स्यिहङला ताप्सीन। 32राइ-सेन सेनया़ नाहङला थाम्ज्यी म़ेदी फेमा येहॱनाङ क्ये फान्ज्यो स्यिहङला ओहङगेन्गी लेहमेन तोहङबोया़ म़ेदी ओ़ह छ्यिम्बु ओहङगे ओहले च्याह-च्यिहवाया़ ओहङदी राइ-सेनगी ताहङबो याहल्गाया़ला छाङ जे़दी तेहकें।”
33ओहले येहपाराङ येशूगी लेहमेन पे च्यी़ ज़्या़दी सुङ नाङसीन, “किन्ज्योगी क्याहल्सी खमिर ल़ेहमु ओहङगे। पी़हमी-पेहजा च्यी़गी सिपाज्यी खमिर लेहन्दी चाम्बा पादी सुमचेला से़एँ ओहले ओ़ह चाम्बा थाम्ज्यी फोर्ती ओहङगे!”
34येशूगी मिहया़ला ताम थाम्ज्यीलाराङ पे ज़्या़दी सुङ नाङगो येहकें। येशूगी खुङया़ला पे मा़हज्याबा जेती च्यिॱआङ सुङदेन माहनाङ। 35ओहले दि ल़ेहमु पेहती लुहङतेम्बागी सुङ नाङग्योकी दि स्याहल तेहन्दा डुप्सीन–
ङाह खुङया़ला पे ज़्या़दी ताम माज्ये येह
ओहले जाम्बुलीङ छ्या़गे यिहन्ज्यु पे़हदी ज़्या़क्योगी तामया़ ङाहगी स्येच्ये येह।#भज ७८:२
युहक्पीगी पेगी तेहन्दा
36ओ़ह तिङले येशू मिहया़ला क्युर ज़्या़दी खाङबा नाहङला स्य़ूह नाङसीन ओहले स्याहप्च्यीया़ ओहङदी येशूला, “ङ्यिहला युहक्पीगी पेगी तेहन्दा स्ये नाङदोङ लाह” म़ेदी स्युहसीन 37येशूगी सुङ नाङसीन, “सेन या़हबु ताप्के मिहदी मिहगी स़ेबु यिहम्बा। 38स्यिहङदी जाम्बुलीङ यिहम्बा ओहले सेन या़हबुया़दी किन्ज्योगी क्याहल्सीकी छार्क्यीन यिहम्बा ओहले युहक्पीदी ङ्येहम्बागी छार्क्यीन यिहम्बा। 39युहक्पीगी सेन ताप्केन टाहदी ती़ह गो-छ्येवा यिहम्बा ओहले तेन्दो तो़हगेन ती़हजी माक्योदी दि जाम्बुलीङ तोङगे ङ्यिहमा यिहम्बा ओहले तेन्दो टूहएँ दाङ तो़हगेन ल़ेहमीया़दी स्यिहङगामकी स्याहप्च्यीया़ यिहम्बा। 40युहक्पी मेहला सा़ज्येला रुहप पेहक्यो ल़ेहमुराङ दि जाम्बुलीङ तोङगे ङ्यिहमाॱलाङ ओ़ह ल़ेहमुराङ ओहङज्ये येह। 41ओ़ह ङ्यिहमाला मिहगी स़ेबुगी राहङगी स्यिहङगामकी स्याहप्च्यीया़ला ताङ नाङज्ये येह ओहले तिहक्पा पेह च्य़ूगेन्गी का़ह येहकेन से़हया़ दाङ ल़ेह ङ्येहम्बा पेहकें थाम्ज्यीलाराङ स्यिहङगामकी स्याहप्च्यीया़गी खुङया़गी क्याहल्सीलेगी रुहप पेहच्ये येह, 42मेहबुङ नाहङला ल़ू तेर्च्ये येह। ओ़हला खुङया़गी सो मुहर्ते ङुहप्रा तिहङरा पेहच्ये येह। 43किन्ज्योगी दिनला टाहङबु सी़हएँया़दी, राहङ किन्ज्यो याहपगी क्याहल्सीला ङ्यिहमा ल़ेहमुराङ येहसेर क्याहप्ती तेहच्ये येह। का़हन्दीगी नाम्ज्यो येहबा, ओ़हदीगी ङ्यिहन्ज्यु!”
स्यिहङला पे़ह ज़्या़क्योगी क्युह-नोहर दाङ या़हस्यो मोतीगी पे
44 किन्ज्योगी क्याहल्सीदी स्यिहङला पिहप्ते ज़्या़क्योगी क्युह ल़ेहमुराङ यिहम्बा। सु मिह च्यी़गी ओ़ह क्युहला ज्योर्के ओहले येहपाराङ पे़हदी ज़्या़गेन ओहले खो क़ेहनाङ पेहती काहल्दी राहङगी का़ह येहकेन्गी क्युहया़ चोङदी ओ़ह स्यिहङ ङ्योहएँ।
45 येहपाराङ किन्ज्योगी क्याहल्सी या़हबु मोतीया़ छोल्गेन्गी छोङबा च्यी़ ल़ेहमु यिहम्बा। 46माहङबु म़ेदी माहङबु रिहन डोएँगी मोती च्य़ेह सिहन्गेमु खोगी राहङगी का़ह येहकेन्गी से़हया़ चोङदी ओ़ह मोती ङ्योहएँ!
ङ्याह ज़ुङगेन ङ्याहटाकी पे
47 “येहपाराङ किन्ज्योगी क्याहल्सीनी छो-क्याहम्जोला क्याहप्क्योगी ङ्याहटा ल़ेहमुराङ यिहम्बा। ओ़ह ङ्याहटाला ना माहङबुराङगी ङ्याहया़ स्य़ूहगे। 48ओहले ङ्याहगी काहङ फान्ज्यो ङ्याह ज़ुङगे ङ्याहबाया़गी ओ़ह ङ्याहटाला छोगी सुहरला ख्योङगे ओहले ङ्याहया़ खा फ़ेगे। या़हबु-या़हबु ङ्याहया़दी खुङया़गी राहङगी कुर्माया़ला लू़एँ ओहले फेन मे़हथोएँगी ङ्याहया़दी क्युर चाहङगे। 49दि जाम्बुलीङ तोङगे ङ्यिहमाॱलाङ ओ़ह ल़ेहमुराङ ओहङज्ये येह। स्यिहङगामकी स्याहप्च्यीया़ ओहङदी किन्ज्योगी दिनला टाहङबु सी़हएँ मिहया़ ङ्याम्बु मिह ङ्येहम्बाया़ खा फ़ेदी 50मेहबुङ नाहङला ल़ू तेर्च्ये येह। ओ़हला खुङया़ सो मुहर्ती ङुहप्रा तिहङरा पेहच्ये येह।”
51येशूगी स्याहप्च्यीया़ला टी़ह नाङसीन, “च्यि ख्याया़गी दि तामया़ ङोह स्ये़बा?” खुङया़गी “ङोह स्येसीन लोबेन लाह” म़ेदी मासीन। 52ओहले येशूगी येहपाराङ सुङ नाङसीन, “ता़ह यिहन्ज्यु किन्ज्योगी क्याहल्सीकी तेहन्दाला सुङदेन ज़्योरक्योगी थाम्ज्यी छ्य़ेकी खेम्बुदी खाङबागी ताहक्पु च्यी़ ल़ेहमुराङ यिहम्बा। खाङबा ताहक्पुगी राहङगी चाहङलेगी साम्बा से़हया़ॱआङ तेन्गे, ओहले निङबा से़हया़ॱआङ तेन्गे।”
नासरतला येशूला मा-लोक पेहक्यो
(मर्क ६:१-६; लूक ४:१६-३०)
53दि केच्याया़ पे ज़्या़दी स्याहल सुङ छार फान्ज्यो येशू ओ़ह ग्या़ क्युर ज़्या़दी 54राहङ छारक्योगी ग्या़ला फेप नाङसीन। ओ़हला येशूगी छो़खाङला सुङदेन नाङसीन। येशूगी सुङदेन ङ्यिहन्गेनया़गी ह्अ ल़ेहदी मासीन, “दि ल़ेहमु रिहक्स्यी खोगी का़हलेगी ज्योर्पा यिहम्बानी? दि ल़ेहमु याहम्जेन छ्येवागी छ्या़लेया़ काहन्डुमु पेहती जे नाङगे यिहम्बानी? 55दि खोराङ ओ़ह स्यिङसो खे़बागी स़ेबु मिहन ले? च्यि खोगी आमागी छेन मरियम, ओहले खोगी नो़हया़ याकूब, योसेफ, सिमोन दाङ यहूदा मिहन ले? 56खोगी नोहमोॱया़ङ देलाराङ येहबा। खोगी दि ताम थाम्ज्यी का़हलेगी ज्योर्पानी?” 57दि ल़ेहमु म़ेदी खुङया़गी येशूला यिह मा़हछ्ये ओहले येशूगी खुङया़ला सुङ नाङसीन, “लुहङतेम्बाला लेहमेन युहलया़ला का़हला माॱनाङ चा़ पेहकें यिहॱनाङ राहङगी युहल दाङ राहङगी मिहया़गीराङ खोला चा़ मेहबेएँ।”#यूह ४:४४ 58खुङया़ला यिह-छ्य़े म़ेहबा सुङगोराङ येशूगी ओ़ह ग्या़ला माहङबु याहम्जेन छ्येवागी छ्या़लेया़ जे माहनाङ।
Okuqokiwe okwamanje:
मत्ती 13: HYLM
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Wycliffe Bible Translators, Inc. All rights reserved.