مَتّی 1
1
تَجِرَنُامچَه عیسی مسیح
1”تَجِرَنُامچَه عیسی مسیح“،
کُر داوود، کُر ابراهیم:
2ابراهیم، باوَه اسحاق،
اسحاق، باوَه یعقوب ئو
یعقوب، باوَه یهودا ئو بِرالی بی.
3یهودا، باوَه فِرِص ئو زِراح بی،
ئو دائو تامار نُم بیتی.
فِرِص، باوَه حِصْرون،
ئو حِصْرون، باوَه رام بی،
4رام، باوَه عَمّیناداب،
عَمّیناداب، باوَه نَحشون،
ئو نَحشون، باوَه سَلمون بی.
5سَلمون، باوَه بوعَز بی،
ئو نُم دا بوعَز راحاب، بی.
بوعَز، باوَه عوبید بی،
ئو دا عوبید روت نُم بیتی،
عوبید، باوَه یَسا،
6یَسا، باوَه داوودِ پاتِشا بی،
ئو داوود، باوَه سلیمان بی،
دا سلیمان وِرِکار ژَن اوریا بی.
7سلیمان، باوَه رِحُبعام،
رِحُبعام، باوَه اَبیّا ئو اَبیّا،
باوَه آسا بی.
8آسا، باوَه یِهوشافاط،
یِهوشافاط، باوَه یورام،
ئو یورام، باوَه عُزّیا بی.
9عُزّیا، باوَه یوتام،
یوتام، باوَه آحاز،
ئو آحاز، باوَه حِزِقیا بی.
10حِزِقیا، باوَه مَنَسی،
مَنَسی، باوَه آمون،
ئو آمون، باوَه یوشیا بی.
11یوشیا، باوَه یِکُنیا ئو بِرالی بی.
هَر ایی حِنَ یهودیَل تبعید بین اِرَه بابِل.
12دُما تبعیدَ بابِل:
یِکُنیا، باوَه شِئَلتیئیل،
ئو شِئَلتیئیل، باوَه زِروبابِل بی.
13زِروبابِل، باوَه اَبیهود،
اَبیهود، باوَه اِلیاقیم،
ئو اِلیاقیم، باوَه عازور بی.
14عازور، باوَه صادوق،
صادوق، باوَه اَخیم،
ئو اَخیم باوَه اِلیود بی.
15اِلیود، باوَه اِلعازار،
اِلعازار باوَه مَتّان،
ئو مَتّان، باوَه یعقوب بی.
16یعقوب، باوَه یوسف میردَه مریم بی،
گه عیسیِ مَشور وَه مسیح،
اژ او هاتَ دی.
17اُهُنَ، اژ ابراهیم تاگَه داوود اَرسر یَکا چواردَه نسِل ئو اژ داوود تاگَه زَمو تبعیدَ بابِل، چواردَه نسِل ئو اژ زَمو تبعیدَ بابِل تاگَه مسیح چواردَه نسِل بین.
وَه‌دی‌هاتِن عیسی مسیح
18وَه‌دی‌هاتِن عیسی مسیح هُنَ بیَ: مریم، دا عیسی، دسگیرو پیا یوسف نُمی بی. مِنتائای وِر اژ یَگه وَه‌گَرد یَک بِئسِن، کَتِ در گه مریم اژ روح‌القدس لَم پِرَسی. 19اَرِیَگه میردِه‌ی یوسف، پیا صالحی بی ئو نِمِهِستی آوِری مریم بیَری، هُنَ فگِر کِردی گه بی‌کِش اَژی جیاآ بوتی. 20مِنتائای وخدی وَه ایی چیئِلَ فگِرَ مَهَردی، یِگِلی فریشدَه خداون هاتیِ خاو ئو وِتی: «اِاِ یوسف، کُر داوود، زِلَت نَچو گه ژَن ووژِت مریم بُوازین، اَرِیَگه اَ چیئَه گه هایتیِ لَم اژ روح‌القدسَ. 21او کُری ماریَ دی گه تو نُمَ مَنینیَ ”عیسی“، اَرِیَگه او قوم ووژ اژ گنائَلو نجادَ مِ.» 22یوئنَ کُل اتفاق کَت تاگَه اَ چیئَه گه خداون وَه زوئو اِشعیا پِخَمَر وِتیَسی، اَنجوم بِگِری گه:
23«اِسگَه، اوزا لَم پِرَ ماوتی،
کُری ماریَ دی
ئو نُمَ مَنِنیَ عِمانوئیل،»
گه یانی ’خدا وَه‌گَرد ایمَه‘. 24وخدی یوسف بیَ خَوَر، اَ چیئَه گه فریشدَه خداون فِربو دائیَ بی، اَنجوم داتی ئو مریم حُاستی. 25مِنتائای وَه‌گَرد نَحیوَتی تاگَه او کُر ووژ آوِردیَ دی؛ ئو یوسف نُم ناءَ عیسی.
Okuqokiwe okwamanje:
مَتّی 1: LBT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
@ 2024 Korpu Company