مَتّی 2
2
هاتِن مُغَل
1اِسگَه دُما یَگه عیسی اِ زَمو سِلطنت هیرودیسِ پاتِشا، اِنوم بِیت‌لِحِم اِ هیال یهودیَه هاتَ دی، اِسگَه، چَن مُغ دونا گه سررشتَه‌ئونِ آسارَه‌شِناسی داشد اژ وِلات مشرق هاتِن اِرَه شیَر اورشلیم، 2ئو پِرسیو: «اَ پاتِشا یهودَ گه هاتیَسَ دی هار کو؟ اَرِیَگه آسارَه اومون اِ مشرق دیَ ئو هاتیمَ بِپِرَسیمی.» 3وخدی هیرودیسِ پاتِشا یَه شنَفتی پریشونا بی، ئو کُل اورشلیم‌یش وَه‌گَرد او پریشونا بین. 4اَسَه هیرودیس کُل رِئیسَل کاهنَل معبد یهود ئو مَلِمَل تورات قوم هِنا کِردی ئو اَژینو پِرسیتی: «اَ مسیحَ گه باس بای، اِ کو باس باءَ دی؟» 5جوواوُ دا: «اِنوم بِیت‌لِحِم اِ یهودیَه، اَرِیَگه میکا پِخَمَر اِبارَه یَه هُنَ نُیسونیِ:
6«”تو اِاِ بِیت‌لِحِم گه هاین اِنوم
وِلات یهودااِر،
تو اِنوم فرموندَه‌ل یهودا،
اصِلا کمتِر اَژینو نیئین،
اَرِیَگه اژ تو حکِمرونی مای
گه قوم مِه، اسرائیل، شوئونیَ مِهِه.“»
7اَسَه هیرودیس وَه بی‌کِشکی مُغَل هِنا کِردی اِرَه تک ووژ ئو اَژینو پِرسیتی گه کِ اَ آسارَه دیارا داسی. 8اَسَه اونَل کِل‌کِردی اِرَه بِیت‌لِحِم، وِتی‌ئونو: «بِچِن خو مِنِی اَ آویلَ بِهَن. وخدی کِردتونَ دی، دسگیرِم کَن تاگَه مِن‌یش بام، بپِرَسِمی.» 9مُغَل دُما شِنَفتِن قصَه‌ل پاتِشا، کَتِنِ رئی. ئو اَ آسارِه‌ی گه اِ مشرقو دوئی، اَر نوا اونَل مَچیاءَ رئیا تاگَه آخِری هوسیا اَر بِلِنگ جای گه آویلِهَه بیتی. 10وخدی اونَل اَ آسارَه‌ئونَ دی بی‌حد خَوشالا بین. 11وخدی چِن اِنوم مالِهَه، آویلِهَه‌ئونَ گَرد مریم دای دی، وَه رُیا کَتِن اَر زَمی، اَ آویلونَ پِرَسی. اَسَه صنُقچَه‌ل ووژو واز کِرد ئو پیشکَشیَل طِلا ئو ژوئی ئو مُرو پیشکَش کِرد اَری. 12ئو اَرِیَگه اِنوم خاو هُشتارو دان‌ئون گه گِلانیرِن اِرَه تک هیرودیس، وَه رئی‌ای‌تِرا چِن اِرَه وِلات ووژو.
حِیواین ویرِ مصر
13دُما یَگه مُغَل چِن، اِسگَه، فریشدَه خداون هاتِ خاو یوسف ئو وِتی: «هیزگِر، آویلِهَه ئو دای هیزدَ ئو بِحوا ویرِ مصر ئو بِمین اَر اورَه تاگَه دستگیرِت کَم، اَرِیَگه هیرودیسِ پاتِشا ها مِنِی آویلِهَه تاگَه بِکُشتی.» 14اَسَه یوسف شو هیزگِرتی، آویلِهَه ئو دای هیزداتی ئو چی اِرَه مصر، 15ئو مَن اَر اورَه تا موقَع مِردِن هیرودیسِ پاتِشا، یَه اَنجوم گِرتی تاگَه اَ چیئَه گه خداون وَه زوئو هوشَع پِخَمَر وِتوئیتی وَه اَنجوم برَسی گه «کُر ووژِم اژ مصر هِنا کِرد.»
16وخدی هیرودیس فیَمی گه مُغَل سرو فن داءَ، فِرَه عصبونیا بی ئو کسَلی کِل‌کِردی تاگَه کُل کُرَل دو سالون ئو گُجَرتِر اِنوم بِیت‌لِحِم ئو کُل اَ هیالَ، مِطابق اَ زمونی گه مُغَل مَیِّنو کِردوئی، بِکُشِن. 17اَسَه اَ چیئَه گه اِرمیا پِخَمَر وِتوئیتی، اَنجوم گِرتی، گه:
18«دَنگی اژ رامَه مَرَسی گوش،
دَنگ گیری ئو شوین کَلِنگی.
راحیل اَرِه آیلَلیَ مَگیری
ئو نِمِیتی دلگُوئی بو،
اَرِیَگه دیَر نیِن.»
گِلاهُاردِن اِرَه ناصرَه
19دُما مِردِن هیرودیس، اِسگَه، فریشدَه خداون اِ مصر هاتِ خاو یوسف، 20وِتی: «هیزگِر، آویلِهَه ئو دای هیزدَ ئو بِچُ اِرَه وِلات اسرائیل، اَرِیَگه اونَلی گه قَصو کِردوئی آویلِهَه بِکُشِن، مِردنَ» 21اَسَه یوسف هیزگِرتی آویلِهَه ئو دای هیزداتی ئو چی اِرَه وِلات اسرائیل. 22مِنتائای وخدی شنَفتی آرْکِلائوس اِجال باوِه هیرودیس، اَر یهودیَه حکِمرونیَ مِهِه، زِلَه چِتی گه بِچو اِرَه اورَه، ئو اَرِیَگه اِنوم خاو هُشتار گِرتی، چی اِرَه هیال جلیل. 23ئو لیز گِرتی اِنوم شیَری گه نُم ناصرَه بیتی، ئو ایی چیَ اتفاق کَت تاگَه کلوم پِخَمَرَل اَنجوم بِگِری گه وِتوئیو موشِنی‌ئون ’ناصری‘.
Okuqokiwe okwamanje:
مَتّی 2: LBT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
@ 2024 Korpu Company