JOAN 6
6
Éjar Pilngo Amiem Jisuke Donam Biname
(Mt 14:13-21; Mk 6:30-44; Lk 9:10-17)
1Sok méélamlo, Jisu bí Galil siyéngem (depe emnamde Tiberia siyénge) koola rotkonlo gíto, 2delo ami milung ludíko bíkkíng gímín geto kapeila bulu bíkke kina kídílo irisinyo iyod sangot ibinamem kaato. 3Delokrongem Jisu bí etpang danpe saala bíkkelo luyilsuna kídíem duubosuto. 4Delo Judai kídílokke Gíbong gíídí domane anín dubong. 5Jisu bí kaaname milung ludíko bíkkíng aadakpe kaayédelo, Philipme poto, “Ingkolokyi ngolu sok ami kídí sokke donampe rotiem relayéne?” 6Bí sim bím aapí aang ikaanape íngkíto, kapeila bí kape ipe míídudí dem aapílo gedubong.
7Philip bí bím poyansula poto, “Poolo píínyi hajirangem rena tokom mipile dokí dopete rotie píímayé!”
8Bíkkelo luyilsuna akon, Andria, Simon Pitorke bírode polenkai, 9“Sina ansoona lub roti pilngo kolang améngona engo pumsu bomnako koo aménako dune, idokom kape kísa dekede deddína amiso pííbo suyéne?”
10Jisu bí poto, “Ami kídíem duumotoka.” Delo amodelo miijéb mílí idungai, delo ami kídíde éjar pilngokope dungangkai. 11Jisu bí delo lub kídarem laala, yidgeto, delokrongem buluke míínampe dungana ami kídílo orgooto. Bí engo demte depe ito. 12Edílo bulu takame dodar kadí, bí bíkkelo luyilsuna kídídem poto, “Dongadem laadum sutolangku. Ipak siak mapeka.” 13Dekepe iname bulu dekedem giidum sutoku delokke de ami kídílokke dongonge lub pilngo delok aapé bíína íying kolang annyiko ito.
14Jisuke dekepe irisinyo iyodem kaala, ami kídíe poto, “Berokpe simin tani amoso aapena kaaluna miride.” 15Ami kídarke bím rojape imorupe emla míínamem kénsula Jisu bí etpadelo saanyok gekaku.
Asi Teyolok Jisuke Gíname
(Mt 14:22-23; Mk 6:45-52)
16Adenge pííyédem, bíkkelo luyilsuna kídíe sine paatang delo oitoku, 17Delo bulu etkung kolo aala delokrongem Kapernaumpe sine paatang delok kooto. Depe idodem kaamue ikabong, delokke Jisu bí bulum gíbo sumang. 18Gumnam asarko yapname delo aside kanínge irepkai. 19Bulu mail angum ngatna kope yutrodem, Jisume asi teyolok gíla etku delo píínín dope kaala delo pesue ito. 20Idola bí bulum sikepe poto, “Si ngomino, pesomapeka.” 21Delokrongem bulu bím etkudelo laaríksuto, delo etkude menang asak buluke píípeko moopí delo pííto.
Amikídíe Jisume Mataname
22Longekon delo sine paatang rotkon delo yéna mibamde, etkunge atel komin duuduane, delo Jisu bí bíkkelo luyilsuna kídíem lekope koobo sumape, idola bulu petom koosu tonape emla kénkai. 23Depe iduem Teberialok aana etkung ayoko Ruutumke yidge pala binam rotiem ami kídílokke doko amongdelo píído. 24Mibamde Jisuteng delokke bíkkíng luyilsuna kídíete delo kayimang emla kénsu yédem, bulu etkudelo rengala Kapernaumlo Jisume matakape emla gílento.
Jisumin Turmona Rotisue
25Edílo bulu bím sine paatang rotkonlo paatodí, bulu bím íngkíto, “Saare, edílo no so aatone?”
26Jisu bí pobito, “Ngo nolum aruem pobidung, nolu ngokke irisinyo iyodem kangkolok nolu ngom matamang, idakkom nolu rotiem dola kiidar kolokmin matadune. 27Nyokmopena donam legape agér gérmapeka, idakla Tanike Oolokke bipenam turyarna yénamlope duuyarna donam legape agér gérlangka. Bíkkímin Abu Shédíke tolíknamem soktam tupket líktone.”
28Delo bulu bím íngkíto, “Shédíke agérem ngolu ingkokoi iperune?”
29Jisu bí poyansuto, “Shédíke agérde si: bíkke melíknam amidem arope míngke sunamde.”
30Depe iname bulu bím tatkíto, “Demílo ingkona irisinyo iyod sangodkoi ngolu dem kaala delokke nom arope míngke sudope no ibiyéne? No ingkoko ibiyéne? 31Ngoluke abukídíe mooruklo mannem doto; de sikepe atnam kísape ikai; ‘Bí bulum teyong telok roti dope namem bito.’ ”#Gílen 16:4; Miri 78:24
32Jisu bí bulum poto, “Nolum ngo aruem pobidung, teyong telok nolum roti binade Mosimang, idakkom ngokke Abuemino nolum teyo telok roti aruem binade. 33Legade teyong telok tokna delokke tani amongem turnam binademin Shédíke rotie.”
34Bulu pokai, “Saare, supak kelokke ila ngolum dem rotidem biyar langka.”
35Delo Jisu bí poyansuto, “Turmona ettíde ngomino. Séko ngokkíng aadudí bí kenola duumayé; delokke séko ngom arope míngke sududí bí asi tíílíng kayimayé. 36Idakkom ngokke potonam kísape ngom kaado lateng nolu míngke sumateteng. 37Abuke binam takamde ngokkíng aadung, delokke séko ngokkíng aadudí ngo edílokom monpak mayé. 38Legade ngo teyong telok tokla ngokke míínamem ipe emla tokmang idakla ngom melíkna lokke míínamem ipe emlamino toktone. 39Delokke simin ngom melíkna delokke míínamde, bíkke binam takamem atelkote ngo mepak madope, idola bulum yéyin longelo gakrep dokupe inamde. 40Kapeila ngokke Yayike míínamde Uem kaana delokke bím arope míngkesuna mipíde turyar namem paadope, delokke ngo bím yéyin longelo gakrepyéku.”
41Sim tatla Judai ami kídíe bím lugeto kapeila bí “Teyong telok tokna ettíde ngomino,” emsuto. 42Bulu pokai, “Si Josephke oo Jisu manía? Kape kísa bí ‘Ngo teyong telok tokne’ emlayéne?”
43“Noluke aralo luge namem melangka” emla Jisu bí poyansuto. 44“Ngom melíkna Abude bím ruulíkma tetedem sékote ngokkíng aalamang, delokke ngo bím yéyin longelo gakrepyéku. 45Kaaluna miri agom kídarlo sikepe attung; ‘Bulum takam Shédí bí agíe luyilsuyé.’#Isa 54:13 Abuke agomem tatla delokke bíkkelok luyilsuna demino ngokkíng aadune. 46Sékote Abuem kaana kamang idola Shédí kelok aana petomde Abuem kaane. 47Ngo nolum aruem podung, séko arope míngke sududí bí duuyarna turnamem paadung. 48Turmona ettíde ngomino. 49Noluke buku kídíe mannem mooruk amolo doto, depe ilate bulu nyokkai. 50Sina, tanie nyokyi madope dopenam teyong telok tokna ettínge. 51Teyong telok tokna turna ettíde ngomin. Tanie sim ettí sim domílo, bí agínpe duuyaryé. Si ettí si ngokke amíl adíne, sim ngo tani amosokke turnam legape biyé.”
52Delokrongem Judai ami kídíe buluke arasulo lukí mankísula poto, “Kape kísa si ami si bíkke amíl adínem ngolum dodope biyéne?”
53Jisu bí bulum poto, “Ngo nolum aruem pobidung, nolu Tanike Oo adínem domamílo delokke bíkke iyyiem tíímamílo, nolukíng turnam kamayé. 54Séko ngokke adínem dodudí delokke ngokke iyyiem tíídudí bíkkíng turyar name dung, delokke ngo yéyin longelo bím gerep moyéku. 55Legade ngokke adín simin dotké arode delokke ngokke iyyi simin tíípenam arode. 56Séko ngokke adínem dodudí delokke ngokke iyyiem tíídudí bí ngokkíng dunggapdung, delokke ngo bíkkíng dung. 57Kape kísa ngo Abukelok turla, turna Abu bí ngom melíkdudí, dekepe séko ngom dodudí bí ngokkelok turyé. 58Teyong telok tokna ettíde simoko. Ngoluke buku kídíe mannem doto ilate nyokkai, idakkom séko sim ettí sim dodudí bí turla duuyaryé.”
59Sikesim bí Kapernaum kumkeng ekumlo luyil bodula poto.
Turyar Mopena Agome
60Dem tatla, bíkkíng luyilsuna kídíe bojéko, “Si bomram runam agomko, sékodí sim torík sulayéne?” emla poto. 61Sok legape bíkkelo luyilsuna kídíe luge poge namem ansula, Jisu bí bulum poto, “Si nolum míínying modunía? 62Tanike Uem bíkke kerangke dungkolo saado kupe kaamílo nolu kape iyén! 63Aide turnamem bidung; adínde emmumne. Ngokke nolum potonam agom kídarde aide#6:63: Demangkom “Aide”. delokke bulu turmone. 64Depe ilate nolu ayokone arope míngke sumape idung.” Kapeila Jisu bí kerango pekai buluke aralo séko buludí arope míngke sumape yédune delokke sékodí bím míírí míínyo penade dem kénsuto. 65Bí pongunsula pokai, “Sikepe ilamin ngo nolum potone Abue ruulík madem sékote ngokkelo aalamang.”
66Delokke ilangala bíkkíng luyilsuna kídíe bojéko bíkkíng gímape gílat sukaku. 67“Nolute mekupe míídunía?” emla Jisu bí midum íying kolang annyidem íngkíto.
68Simon Pitor bí bím poyansuto, “Ruutume sékokíng ngolu gípene? 69Nomin Shédíke Deena Amide emla ngolu kénla arope míngke sudung.”
70Delo Jisu bí poyansuto, “Nolum íying kolang annyiem ngo ullen manía? Depe idokom noluke akonde uyupe dung!” 71Bíkke depe emnamde Simon Iskariotke oo íying kolang annyi lokke akonpe ituakom, méélamlo bím mirulo yadlík pena Judas me míídola poto.
Tans Gekies:
JOAN 6: adiBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
