MARK 6
6
Najareth Arlenghel Jisu yok Kachidengde
(Mot. 13:54-58; Luk. 4:16-30)
1Jisu lalong para olesi, abithang arong ayok wango; aro anang adun helta anang aphel aphel wang duno. 2Kisang-arni apot, anang kachirdom ahem along kapaklang yok cheng pono, aro ako-ong karju arleng hel asombhik pahlongo. Anali pulo, “Labang arlengpo lamehel daklong para hlongo? Anang kipi agiyan pot badi? Aro labang arideng parasi la-an ajakong asal tikido, anang ke inghote? 3Lake hem kakundar po kalek ma? Mary pe asopo, aro Jems po, Josep po, Judas po aro Simon po anangka kalek ma? Anang angjirpe hel ta ili pen kidohel kalek ma?” Ladisi anang anali pen ado pangthek ngo! 4La-amun Jisu analiyok pulo, “Abithang alongri, abithang adon-arat, abithang ajat, abithang ahem aparke, prek along turki ihut jotmahal aman wephoke chiplangple.” 5Aro lalong Jisu asombhik asal tiki un-eh yongot, angkhan kiso arleng ayok ari kibat detsi kiso pame uno. 6Aro anali kikrol mo anat Jisu asombhik hlongo.
Bang Kere-Hiniyok Kitol
(Mot. 10:5-15; Luk. 9:1-6)
La-aphel ke anang kamprek arong-arong arting-worsi paklang pono. 7Laparake anang la bang kere-hini adunyok adung taramsi, bang-hini bang-hini pachiloksi analiyok kitol cheng pono, aro analiyok si-ik hel aphuthak apharan si, labang alam thano, 8“Nali kidam kiwang aphan tokok detsi enot, chul, him lale, nohok, lamehel isita enponek; 9manta keng-op chi-ikngot, aro chol pak-ni chingcholek.” 10Anang analiyok aro pulo, “Nali daklong potsi idon ahem lutdam, lalong para olesi damde lengke, lalongne do. 11Daknebak athem long nali chidengde tene, aro arleng hel nali lamthe onene pu tene, lalong para olesi kidam amun, analiyok hakhi kichok aphan, nali kengtak chihijir detnot.” 12Lasi anali olesi damo aro arlenghel neng chipharlep nange pusi paharpono. 13Anali ako-ong si-ik ujharo, aro ako-ong kiso-kilak abangyok jangthu helsi, aro anali kiso pamelo.
John Baptist poyok Kamari
(Mot. 14:1-12; Luk. 9:7-9)
14La-amun Jisu amen chitha-ang detno apot, Herod recho po arjusi pulo, “Johon Baptist po kithi asitem para ingthur phakngo; la-anatsi labang ahuwit jakong kithe anali long tikisi pachok undo.” 15Manta kamprek helke pulo, “Anang ke Elija po.” Aro kamprek helke pulo, “Anang atono badi ihut turki po.” 16Manta konam Herod po arjulo, anang pulo, “Ne angphun kithuhlet, Johon po burphak ngo.” 17Piyok pu tene Herod po abithang amuso Philip po apiso Herodiyas pe yok chi-eno, anang phan ango abithang arleng tolsi, Johon po yok nepsi, akrol along kithal. 18Piyok pu tene Johon po Herod po yok kipu, “Nang muso apisope yok ki-enpo, nang phan labangpo kanong longke ingjong.” 19Aro La-amun Herodiyas pe anangyok lang un-ehsi, aro anangyok kamariyok rono. Manta anang un-eh yongo, 20piyok pu tene Herod po Johon po yok ihut dhorom aro kangthir arleng pusi kithan un, aro Herod po anangyok kiral dun. Konam anang lam arjulo, chiron un-eh phosi dolo; aro anang lam karjuyok akime kihlong. 21Manta akime adin wangchok ngo, konam Herod po kiplang adin kamainot asel arni, anang kithe-kiding, thawang helyok aro Galili kido kithe-kiding helyok taramsi anuwe an kapacho ayok honjok ngo. 22La-aphel Herodias pe abithang asope hem arloyok wango, aro kano, anang Herod poyok aro anang pen kicho don-ratyok aneng pangsamo; aro recho po asope yok pulo, “Nang pot si anengdo ma nehangot, aro ne nangpiye.” 23Aro anang hopot ta chosi anang yok thano, “Nang neyok chihange pu tene, longripo adha yokta, nangyok nang piye.” 24So-arloso pe mokol ayok damo, aro anang aipe yok arju damo, “Ne pot abihini chohang nang?” Anang aipe thano, “Johon Baptist po aphu.” 25La-jongsi anang parjangsi hem arloyok rechopo adung ayok wang si hango, Johon Baptist po aphu po ipak sengelong minon jong-jong neyok nepinot, ne labang nangchihang do.” 26Recho po aneng aduk do ong-ngo; yongta abithang hopot kicho apot, aro kicho adonhel ango apotsi, anangyok mo ke pu-un-eh yongo. 27Lajongsi rechopo atoruhel ayok Johon po aphu kapawan yok sonturi ihutyok thansi tolo. La-amun sunturipo damo aro akrol along Johon po aphu po thatsi, 28ipak senge along wano, aro so-arlope yok pilo. aro so-arlope ke anang aipe yok pilo. 29Konam anang adun hel arjulo, anali wango, aro anang abang abeng po pono aro thiri long bidamo.
Hajar Phongo Arlengyok Kapacho
(Mot. 14:22-33; Jhn. 6:15-21)
30La-aphel kangthir adun hel Jisu adung ayok wang chingrumsi, anali potsi tikilo, aro potsi paklango, lamehel anang ango panirsi thano. 31La-amun anang analiyok pulo, “Nali ahudet nisotjot athem yok wangne, bekso apor sang dammot; piyok pu tene ako-ong arleng hel dam-wangsi kido anat; anali kichoyok aporso ta hlonghle yongo.” 32La-amun anali bithang tilong long arlusi ahudet isi nisotjot athem long damo. 33Lalong ako-ong arleng analiyok kidam thekngo aro chinisi, anali lalong kihlenghle ango si ahuwit rongso hel para katsi, analiyok ta parjangsi lalong yok hlengo. 34La-amun anang olesi, konam suno isi ako-ong arat thekngo aro anang anali phuthak kachineng-ot wang detno; piyok pu tene anali ihut khokhre kangwepho bherabik bik hel badi kido; aro anang analiyok ako-ong alamthe paklang cheng pono. 35La-aphel konam apor damo, anang adun hel Jisu adungyok wangsi pulo, “Labang athem nisotjot, aporta aporjoro; 36arleng hel kichoyok ahuwit rong hel long damne penebak kicho aphan pachinam nang, analiyok tolnot.” 37Manta Jisu anali yok pulo, “Nali anali phan penebak kichoyok pinot.” Anali anang yok pulo, “Hali damsi phoro hini rupa atheng pen him namsi analiyok labang po pacho nang ma?” 38Manta anang analiyok pulo, “Konbak ako-ong ahim nali long do? Damne langdamot.” La-aphel konam anali langsi hlongo, anali pulo, “Him plang phongo aro ok jon-ni.” 39Laparake anang analiyok thano, “Ahuwit yok pachingrum chom-chomsi bap-aju along pangning yok thano. 40Lasi anali asem asemsi angkhan ke phoro isi, angkhan ke kep-phongo, dosi chijeng kri-kri si iningo. 41Anang him plang-phongo aro ok-joni ensi, ethakpe yok lango, aro Arnam bor-eh hango, aro himhel ingbengo, aro adun helyok pisi arleng helyok pathak tolo; aro ok jon-ni ta anali ahuwit yok pathak tolo. 42Aro anali ahuwit ta chosi aneng ingsamo; 43aro anali abeng anohel aro ok abeng pangrumsi pachik kere-hini rungsi wano. 44Labang him kicho arleng hajar phongo kido.
Jisu Lang Athak Keng-kamsi Kidam
(Mot. 14:22-33; Jhn. 6:15-21)
45Lajongsi anang arleng helyok padamtol si, anang adun helyok, anang ango ha aga apar Bethsaida ayok kidam tilong athak parlusi tolo. 46La-amun anang kitol tang kreng aphel inglong along kapingkit ayok damo. 47Lapara ke anithulo apot, tilong langpe asitem kido, manta anang hudet bam along dolo. 48Konam apor tomon kijapsi, adun abang tilong besi aduk kihlong apot, jarlo baji phili apun, langpe athak anang kengkam chijorsi anali dung yok wangsi, analiyok letchorsi kidam ayok chirono. 49Manta anang lang athak keng-kam chijorsi kiwang theksi, anali lake si-ik hele pusi hang taramo; 50piyok pu tene ahuwit anangyok kithek, aro anali chiron hapmo. Manta jongsi anang analiyok thano, “Ne si, neng chipachip; phereyek.” 51Laparake anang tilong ayok arlulo aro tomon ta hamo. Aro anali lang phrongsi chiron un-eh pho ateng asombhik hlongo, 52piyok pu tene him kicho alam anali abhu hlongkelo, manta anali angthin chiparthat phakngo.
Jisu Genesaret Long Kiso Kapame
(Mot. 14:34-36)
53Konam anali arpat tangsi, Genesaret arong hlengsi, aro tilong pasango. 54La-amun anali tilong para wang kisun jong-jongsi, rat Jisu yok chini uno, 55aro labang alongri dung si arleng hel parjangsi kiso arleng helyok ki-ih tarlong chirung chibatsi Jisu kido along yok wano. 56Aro jotmahal rongpe aro rongso anang kilut, la-ahuwit long kiso helyok hathi-chari kido kiso kilak arleng helyok bisi, Jisu yok anali ape so ta pa-ot hlongyok chihango, aro konbak arlengyok otno, lahel ahuwit ta kiso melo.
Tans Gekies:
MARK 6: AMRI-BSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.