MARK 7
7
Jisu Sar-larhel Abi-pun Alam Kithan
(Mot. 15:1-20)
1Minonke konam Jerusalem para kiwang Pharisi, aro angkhan kanong paklang hel chikomwolsi wang kido, 2anali angkhan adun helyok ari chichamche si akisim ari pensi kicho thek duno. 3Piyok pu tene Pharisi aro ahuwit Jihudi helke me-atsi anali arihel chichamche lengke choche, ladisi sar-lar hel abi-pun mainot do, 4aro anali hathi-chari para wangsi me-at chichamche lengke jatsi cho-junje; aro labadi kamprek ajat-jat abi-pun do lake senge kangthel, langhan, suria, phule, aro ladi abihini hel langlong kicham ajat-jat abi-apun do. 5Lasi Pharisi aro kanong paklang abang Jisu yok arjulo, “Piyok te nang adun hel ke sar-larhel abi-pun badi kengkam chijorje, manta akisim aripen piyok cho-jun do?” 6Jisu analiyok thano, “Jisoya po nali nengsik hel me-atsi turkisi thantango, aro kiwi do, ‘Labang arleng hel de-tur penke neyok mainot do, manta anali angthinke ne para kaholo do; 7anali arleng awe-awe para kapangning abi-pun helsi kapaklang nange alam pusi pachirli do, akijolsi anali neyok chirdom do.’ 8Nali Arnam kanong tikango aro awe awe para munusi abi-punsi meng phakngo.” 9Laparake anang analiyok pulo, “Nalike nali sar-lar hel abi-pun chi-enthipsi, Arnam kanong hel me-atsi tikang detno! 10Piyok pu tene Mosi po kipu, ‘Nang aipe aro nang apa yok mainotpon;’ aro ‘Inghosi anang aipe, lale anang apa yok kangho ingjeye khanangsi thiye.’ 11Manta nali thando, ‘Inghone bak arleng nang wangrap dun pu tene ne para ‘Korban’ chokpeno hoi, (lake Arnam aphan ingtonsi pilo)— 12laparake nang apa lale aipe aphan penebak jatsi patiki kelo, 13ladisi nali awe-awe parasi kiwang abi-pun hel pachirlisi Arnam alamthe hel pa-orsi wangdo. Aro labadi prek asal tikisi do.” 14Laparake arleng helyok anang dung taramdun phakngo aro pulo, “Nali ahuwit, ne lam onenot, aro abhu pahlong: 15mokol para arleng apok lut ke kapasuwa un isi abihini ingjong, manta arleng para potsi mokolyok ole, labang helsi arlengyok pasuwaman. 16Ingho ka-one ano do, anang onenot.” 17Aro konam anang ratyok tikangsi idon ahem lutdamo, anang adun hel labang athenghlan acho alampo Jisu yok arjulo. 18Anang analiyok pulo, “Laparake nali ta abhu hlonghe lang ma? Mokol para arleng apok arloyok potsi lut, labang ke anangyok pasuwa un-eh, 19anang angthin arlo ke lutle, manta anang apok arlo damsi bayot kidam amun mokol ole detde ma?” (Ladi pusi Jisu ahuwit kicho abihini majit ke kangthir pulo.) 20Aro anang pulo, “Arleng apok arlo para potsi ole, labang posi arlengyok pasuwaman. 21Piyok pu tene arlo para apot, lake arleng angthin arlo para, kangho kachiron, kidoner, kachunghu, arleng kamari, 22kachopak, alop, kasotonga, kachobel, mek-er, kapatharak, kaborai, kamango, lamehel olesi wang man. 23Labang ahuwit kangho hel angthin arlo para olesi wangman, aro lamehel si ihut arleng ayok pasuwaman.
Seropheniya Arlosope Kikrol
(Mot. 15:21-28)
24Lalong para Jisu thursi, Tayar aro Sidon aholyok damo. La-amun anang idon ahem lutno, aro kaita kachithan un-eh badisi kidoyok anengdo lo, manta chibutike do un-eh yongo, 25manta ihut arloso aso peyok si-ik kihap, labang arlosope, jongsi Jisu alamthe arjulo, aro adungyok wango aro anang keng-ri long chirdomo. 26Labang arlosope Bang-ajat kido, lake Seropheniya ajat kido. Anang asope para si-ik ka-ujhar aphan anang keng chingdukngo. 27Jisu yok pulo, “Angoke oso helyok pachotang sonang, piyok pu tene osohel kicho ahim ensi aro hik ayok kipidun akime kalek.” 28Manta arlosope anangyok pulo, “Oik Hemphu, hong arlo kido hik helta osohel para kicho kachidat ahim hel chodun hlong do.” 29Laparake Jisu pulo, “Labadi alam kithan anat, nang damot— nang sope para si-ik tikangsi damo.” 30Lasi anang ahem damsi, asope hong along isi kido thekngo, aro si-ik katno.
Nothong Aro Kalar Arleng Kapame
(Mot. 15:29-31)
31Laparake anang Tayar ahol asitem para chirulo, Sidon akengthun damsi Galili langpe aga damsi, Dekapolis ahol yok damo. 32La-amun anali ihut nothong pen ade alamthe kangwe kalar arleng ihutyok anang dungyok wano; aro anali anang thak ari pa-ot tol yok chingduk ngo. 33Lalong anang amokha arleng asitem para, anangyok ahudet prek athem ayok pono, aro anang ari munso pen lili ano otno, aro anang ingthi ingthokngo aro kalar arleng ade ot no. 34Laparake ethakpe yok langsi, asithe ensi, arlengpo yok pulo, “Eph pha-tha,” lake “chingpunot.” 35Aro lajongsi ano hel chingpu pen pano, aro anangdeso chiphlok ngo, aro anang lamthe wangdak si thano. 36La-aphel arleng ihut yokta pathanmo ayok thano, manta nengrong ongsi labang alam pahar pono. 37Aro arleng hel asombhik hlongsi, pulo, “Anang ahuwit yokta sal pamesi tikilo; anangsi ano nothong yokta karjuyok aro debal ta lam pathan pilo.”
Tans Gekies:
MARK 7: AMRI-BSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.