YAHYA 16
16
Sabbara
16:1-4a
1”Iangase'na inni Kupau mange ri kaui, solanna andai ammassa nyahamu na a'bokoko ri Nakke. 2Laripelakiko dere, la'bipa pole larie' hattunna sallo' ma'nassana sikuanna tau lahuno injoko pa'ngare'na ia anggeokangi nubaji' ri a'rakanna Allataala. 3Iyai injo a'bua' appakonjo, kanara geleinna laisse' baji' ri Amma iyareka ri Nakke. 4aMingka iangase'na inni Kupau mange ri kaui, solanna ampa larapi'mu hattunna akkulle muu'rangi ma'nassana Nakke maemmu Kupau mange ri kaui.”
Jamaang Nyaha Paurang-urang injo
16:4b-15
4b”Passala inni gelei Kupau mange ri kaui minang ri pakaramulana, kanara sikonni inni assurangi juapaki, 5mingka konni-konnina Nakke laa'lampa lamange ri Ia Tumaeng assuro injo ri Nakke, na gele rie' manna se're tau ri kaui akkuta'nang mae ri Nakke: Laantee mae lampaTa? 6Mingka kanara Nakke appau passala injo mange ri kaui, jari pa'risi nyahamui. 7Mingka toje'i nuKupau inni mange ri kaui: Iamo intu la'bi riekang matu-matunna ri kaui, ampa Nakke a'lampa. Saba' ampa Nakke gelea a'lampa, Nyaha Paurang-urang injo gele todo'i larie' mange ri kaui, mingka ampa a'lampa, Nakke lassuro ri Ia mange ri kaui. 8Ampa Iamo rie', Ia laappiu'rangi lino rikadorakaang, katojekang na hukkungang; 9battu ri kadorakaang, saba' iyai tuli gele tappa' mae ri Nakke; 10ri katojekang, saba' Nakke a'lampaa mange ri Amma na gelema lamujanjangi; 11battu rihukkungang, saba' tukahasana lino inni maemmu rihukkung.
12Lohe juapa passala nuparallu Kupau mange ri kaui, mingka konni-konnina kaui gelepai akkulle muerangi. 13Mingka ampa Iamo rie', iamo intu Nyaha Katojekang, Ia laurangiko antama' risikonjo katojekang; saba' Ia gele appau battu ria'ra' kale-kalena, mingka sikonjo numaeng lalangngere injomo lalapau na Ia laappabattu mange ri kaui passala nularie' injo sallo'. 14Ia laappakala'biri mae ri Nakke, saba' Ia laappabattu mange ri kaui apa numaeng latarima battu ri Nakke. 15Iangase'na nulaampunnai Amma injo anungKu; injomo saba'na Nakke appau: Ia laappa'rupai mange ri kaui apa numaeng latarima injo battu ri Nakke.”
Pa'risi laappabattu te'ne
16:16-33
16”Gelemu sallo hattunna, kau gele lanjanjang ri Nakke na gele tommoi pole sallo hattunna, kau lanjanjang ri Nakke.” 17Rilalangngerinna injo lohemo battu ri ana'-ana' gurunNa assilagari, ”Apamo battuanna Ia appau appakonjo mae ri ditte: Gelemu lasallo hattunna, kaui gele lanjanjang ri Nakke na gele tommo pole lasallo hattunna kaui lanjanjang ri Nakke? Na: Nakke laa'lampa mange ri Amma?” 18Jari appau ngasekimu, ”Apa battuanna Ia appau: Gelemu sallo hattunna? Ditte gele riisse' apa Ia lakuangang.” 19Isa laisse'i ma'nassana iyai rie' nua'ra' lapakkuta'nang mange ri Ia, jari Ia appau mange ri iyai, ”Barang injo pauKu sumpae' mulagari, iamo intu: Gelemu lasallo hattunna, kaui gele lanjanjang ri Nakke na gele tommoi lasallo hattunna, kaui lanjanjang ri Nakke. 20Sitoje'na Nakke appau mange ri kaui: Laapparau ngase'ko surang lassi'na-si'naiko, mingka larannu lino inni; lapa'risi nyahamu, mingka pa'risi'na nyahamu laminrai a'jari te'ne. 21Se're inni bahine sanna' pa'risi'na rihattunna lamana', mingka ri maennamo lalassukang ana'na, ia gelemu lau'rangi kamarasaianna rihattunna mana', saba' te'nena ma'nassana se're tau maemmu laanakang mae ri lino. 22Appakonjo todo'i kau konni-konnina laappuko pa'risi, mingka laKujanjangi juapako pole surang late'ne atimu na gele rie' manna se're tau akkulle lapaari kate'neammu injo battu ri kaui. 23Rihattu injo geleiko akkuta'nangi mae ri Nakke. Sitoje'na Nakke appau mange ri kaui: Sikuanna numuera mange ri Amma, Ia lapassareangi mange ri kau lalang arengKu. 24Sa'genna hattu inni, geleipako minang ngera lalang arengKu. Ngeraimoko lamutarimai, solanna sangka'i kate'neammu.
25Iangase'na inni Kupau mange ri kaui lalang ripakkalebarang. Larie' hattunna Nakke gelemo laa'bisara mange ri kaui lalang ripakkalebarang, mingka Kupau lambusui Amma mange ri kaui. 26Rihattu injo langera dowaangiko lalang arengKu. Gele Kupau mange ri kaui ma'nassana Nakke ngera tujummu mange ri Amma, 27saba' Ammamo ngamaseang ri kaui, kanara kaui maeng ngamaseang ri Nakke na tappa'ko ma'nassana Nakke rie' mae battu ri Allataala. 28Nakke rie' mae battu ri Amma na Nakke rie' antama' ri lino; Kubokoi pole lino inni na Nakke a'lampaa lamange ri Amma.”
29Lakua ana'-ana' gurunNa, ”Janjangi, konni-konnina Ripau lambusumu na gelemuKi make pakkalebarang. 30Konni-konnina taisse'mu ma'nassana Ditte ngisse' ri iangase'na na gelei parallu tau inni akkuta'nang mange ri Ditte. Injomo saba'na kambe tappa'kang ma'nassana Ditte rie' mae battu ri Allataala.” 31Appihali Isa mange ri iyai, ”Konni-konnina tappa'moko? 32Janjangi, larie' hattunna, na larapi'mu, rihattunna kau ripasia'-siara massing-massing ri tampa'na to'jua na Nakke mubokoi a'kale-kale. Mingka gele kale-kalengKu jua, saba' Amma minahangi ri Nakke. 33Iangase'na injo Kupau mange ri kaui, solanna nguppaiko dame salehangang lalang ri Nakke. Lalang ri lino inni lasissaiko ripama'ri'-ma'risi, mingka pakasa'ga'i nyahamu, saba' Nakkemo ambeta lino.”
Tans Gekies:
YAHYA 16: LAI_SLY
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2012 Indonesian Bible Society (Lembaga Alkitab Indonesia)
