YAHYA 17
17
Isa lapangera dowaangi ana'-ana' gurunNa
17:1-26
1Appakonjomu pauna Isa. Maeng injo Ia ammongai nai' ri langi' na appaui, ”Amma, larapi'mu hattunna; pakala'birimu Ana'Ta, solanna Ana'Ta appakala'biri ri Ditte. 2Assimpole Ditte maeng assare mange ri Ia kahasa risikonjo nuattallasa, appakonjo todo'i Ia assare tallasa mannannungang mange risikonjo numaeng injo Ripassareang mange ri Ia. 3Iamo inni tallasa mannannungang, iamo intu ma'nassana iyai ngisse'i ri Ditte, Allataala tide' ruana, na laisseki todo'i Isa Almase Tumaeng injo Risuro. 4Nakke maeng appakala'biri ri Ditte ri lino inni lalang Kupa'maenna jama-jamaang Ripassareang injo mange ri Ia lalageokang. 5Na konni-konnina, o Amma, pakala'birima ri a'rakanTa surangang kala'birang Kuuppa injo ri a'rakanTa rigelenapa rie' lino.
6Nakke maemmu Kupappiissekang arengTa mange risikuanna tau Ripassareang injo mae ri Nakke nubattu injo ri lino. Iyai injo anunTa na maeng Ripassareammu mae ri Nakke na iyai maeng laturuki ngase'i pauTa. 7Konni-konnina laissekimu ma'nassana sikuanna nu Ripassareang injo mae ri Nakke assala'na nubattu ri Ditte. 8Saba' sikuanna pau nuRipabattu injo mae ri Nakke maemmu Kupabattu mange ri iyai na maemmu latarimai. Iyai injo laisse'i ma'nassana Nakke rie' battu ri Ditte na iyai tappa'i ma'nassana Dittemo assuro ri Nakke. 9Nakke ngera dowaang tujunnai. Gele tujunna lino inni Nakke ngera dowaang, mingka tujunna jua iyai, tumaeng Ripassareang injo mae ri Nakke, saba' iyai injo anunTa 10na sikonjo anungKu iamo anunTa, na anunTa iamo anungKu, na Nakke maeng ripakala'biri lalang ri iyai. 11Nakke gelema rie' lalang ri lino, mingka iyai rie' juapai lalang ri lino, na Nakke battu mange ri Ditte. O Amma matangkasa, piarai iyai inni lalang arenTa, iamo intu arenTa numaeng Ripassareang injo mae ri Nakke, solanna iyai a'jari se're assimpole ditte.
12 #
Mzm. 41:10; Yah. 13:18 Rihattu assurangingKu juapa, Kupiara ngase'i lalang arenTa numaeng Ripassareang injo mae ri Nakke; maeng Kujagai ngase'i jari gele rie' manna se're tau battu ri iyai lamate passangadinna tumaeng injo jua ritantuang lamate, solanna ripa'rupa nuta'ukiri injo lalang ri Kitta' Tangkasa. 13Mingka konni-konnina, Nakke battu mange ri Ditte na Kupau ngase'i inni rihattu rie'Ku juapa lalang ri lino inni, solanna sukku'i kate'neangKu lalang ri iyai. 14Maemmu Kupabattu pauTa mange ri iyai na lino inni likingi ri iyai, saba' iyai gelei battu ri lino inni, assimpole Nakke gelea battu ri lino inni. 15Gelei Kuera, solanna Mualle ngase'i battu ri lino inni, mingka solanna iyai Rijagai battu risikuanna nudaa. 16Iyai gele battu ri lino inni, assimpole Nakke gelea battu ri lino. 17Tangkasa ngase'i rikatojekang; pauTamo katojekang. 18Assimpole Ditte maeng assuro ri Nakke antama' lalang ri lino inni, appakonjo todo'i Nakke maeng assuro mange ri iyai antama' lalang ri lino inni; 19na Kupakatangkasa kalengKu mange ri iyai, solanna iyai pole ripakatangkasai lalang rikatojekang.
20Gele sangga iyai jua inni Kupangera dowaang, mingka pole mange risikuanna tau, tutappa' injo mae ri Nakke sallo' kanara pau-paunai; 21solanna iyai ngase' a'jari se're, assimpole Ditte, o Amma, lalang ri Nakke na Nakke lalang ri Ditte, solanna iyai lalang todo'i ri ditte, solanna lino inni tappa'i ma'nassana Dittemo maeng assuro ri Nakke. 22Maeng Kupassareammu mange ri iyai kala'birang numaeng Ripassareang injo mae ri Nakke, solanna iyai a'jari se're, assimpole ditte nuse're: 23Nakke lalang ri iyai na Ditte lalang ri Nakke solanna iyai sangka' paa'jari se'rena, solanna lino inni laisse'i ma'nassana Dittemo maeng assuro ri Nakke na ma'nassana Ditte ngamaseang ri iyai, assimpole Ditte ngamaseang ri Nakke.
24O Amma, Kukaa'raki solanna, ri antee-tee mae Nakke ammari, ri injo todo'i iyai ammari, iyai tumaeng Mupassareang injo mae ri Nakke, solanna iyai lajanjangi kala'birangKu numaeng Mupassareang injo mae ri Nakke, saba' Kaumo ngamaseang ri Nakke rigelenapa ripaa'jari lino. 25O Amma kaminang adele, toje'i lino inni geleKi laisse', mingka Nakke ngisse' ri Ditte, na iyai inni laisse'i ma'nassana Dittemo maeng assuro ri Nakke; 26na Nakke maemmu Kupappiissekang arenTa mange ri iyai na laKupappiissekang juapai, solanna pangamaseang Ripassareang injo mae ri Nakke rie'i lalang ri iyai na Nakke lalang ri iyai.”
Tans Gekies:
YAHYA 17: LAI_SLY
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2012 Indonesian Bible Society (Lembaga Alkitab Indonesia)
