Luka 21
21
Impo jo mwanakazi go mfwilwa
(Male 12:41-44)
1Jesu aa lola, kale ga bona a bantu bo lubono ba tula a mampo gabo mu cibiko co tempele. 2Kale ga bona kame no mwanakazi go mfwilwa umpale a tulamo u tusheleñi to bile u tununu to buwaya-waya. 3Jesu kale ga ta nage, “Nda sa mi ta wawa buti, joju u mwanakazi go mfwilwa umpale a la tulimo i bingi ku ita a bantu bonse. 4Bonse baba a bantu ba la wi a mampo gabo ku zwisa a lubono lwabo, kono joju u mwanakazi, mu bumpale bwakwe a la tuli byonse ibi ka botele uku joja a byo.”
Injoneko jo tempele no majuba go mamaninino
(Mat 24:1-2; Male 13:1-2)
5A bazigigwa bakwe bamwinya kale ba gambagula byo bulotu bobu ka ji jakilwe i tempele ko mabwe a malotu no ko mampo ka ga wegwa kwa Nyambe. Kono Jesu kale ga ta nage, 6“Ka byebyo i bintu mu wene aano, inako kuti na ji keze aa ta na ku lekigwe ibwe nanga ndyonke na li kambi a limwinya. Gonse gaga kuti na ga showelwe ansi.”
I nako jo mapenzi
(Mat 24:3-14; Male 13:3-13)
7Abo kale ba buza nabo, “Muzigi, ni nakonzi na bi tendaale byebyo i bintu? Mi ncinzi na ci julike buti se bye ku tendaala?”
8Jesu kale ga taba nage, “Mu mamele buti mu leke ku omigwa. Kakuli a bangi kuti na ba keze mwizina lyangu, na ba li gamba nabo, ‘Ndime Mushaligwa,’ mi, ‘I nako se ji li li a fuwi.’ Mu zwe ku ku ba umpilila. 9Aa na mu shugwe byo nkondo no nsetuko jo bintu, na mu leke uku joga. Bebyo i bintu bi li botele uku tendaala tanzi, kono a mamaninino ta na ga keze aobulyo.”
10Cwale kale ga ba ta nage, “A bantu belonga limwinya kuti na ba zimane ku lwisa belonga limwinya, mi u mubuso na gu lwise u mubuso gumwinya. 11Kuti na ku be no ku ukutanga kweevu u kunene, injala no malwele mu bibaka bi andene-andene, no bitendaalantu ibi bi jogisa no bijuliko i binene ku zwa kwigulu.
12“Kono byebyo na bi sini ku tendaala, kuti na ba mi kwate no ku mi pengisa. Kuti na ba mi we ku majugo go malapelelo go Majuda no ku mi tula mu ntolongo, mi kuti na mu letigwe ku bamfumu no babusisi, mi byonse nkebaka lyezina lyangu. 13Mi kuti na mu ba we u bupaki bwangu. 14Mu litukiseze tanzila mu ngana jenu buti mu zwe ku ntongausi jo bu na mu li lamwinine mwebeni. 15Kakuli kuti na ndi mi we a majwi no magano buti ku bule kwa ba ba mi zimbite aba na ba gole uku mi kananisa kampa uku mi lwisa.
16“Kuti na mu legezigwe mane no ko bazazi, bakwenu no basele benu, mi kuti na ba yage bamwinya benu. 17A bantu bonse kuti na ba mi zimbe kebaka lyangu. 18Kono takuli u lushuki lo mutwi gwenu ulu na lu joneke. 19Mu zimane bu gongwele, mi kuti na mu gwane u bumi.
20“Aa na mu bone u munzi gwa Jelusalema gu zimbulukitwe ku masole a mangi, na mu zibe buti injoneko jago se ji li li a fuwi. 21Cwale a bantu ba li mwilonga lya Judeya na ba andile ku malundu, mi aba na ba kale mu munzi na ba zwemo. Mi aba na ba gwanaale kunze jo munzi na ba leke ku ngina mu munzi. 22Kakuli jejo ne nako jo ku bangisa mu ku vumbiliza byonse ibi na bya ñoligwa. 23U bumpai u bunene kuti na bu be ku banakazi basumbele momo mu majuba no ku banakazi ba nyonsa! Kuti na ku be inkalilwa inene mwilonga no bushanshu ku lwisa baba a bantu. 24Kuti na ba gwe ko kafulo a kanene mi kuti na ba indigwe sinagwe mbashuminwa ku ba twala mu malonga gonse. Jelusalema kuti na lyataguligwe ku bantu aba ta ba li a Majuda ku twala inako jo bantu aba ta ba li a Majuda aa na ji vumbilizwe.
25“Kuti na ku be no bijuliko mwijuba, ku kwezi no ntungwezi. Ansi, a bantu bo malonga kuti na ba kale mu nkalilwa no bujoge kebaka lyo ku tutuma no ku shanshuwa ko makupezi gewate. 26A bantu kuti na ba zilikange kebaka lyo lyoga, ku li kalililwa ibi bi keza elonga, kakuli i bintu bya mwigulu kuti na bi ukuswe. 27Momo mu nako kuti na ba ndi bone nde Mwana Muntu na ndi keza mwijoba ko nguzu no mpazimo inene. 28Aa na bi tatike uku tendaala byebyo i bintu, na mu zimane bu nangukite i mitwi jenu, kakuli indamwino jenu se ji li li a fuwi.”
Inguli jo cishamu co mulya-nshwi
(Mat 24:32-35; Male 13:28-31)
29Jesu kale ga ba lugwila jeji inguli nage, “Mu lole ku cishamu co mulya-nshwi no bishamu byonse. 30Bi si tumpila a mani, mu la gola uku bona mwebeni no ku ziba buti imvumbi se ji li li afuwi. 31Nanga na ku ba bulyao, mu si bona byebi i bintu bi tendaala, mu zibe buti u mubuso gwa Nyambe se gu li li afuwi.
32“Mbyaconse ndi mi lugwila, lo luno luasi wawa ta na lu mane byonse byebi i bintu uku ta bi la tendaali. 33Igulu nelonga kuti na bi mane, kono a majwi gangu ta na ga zweko.
34“Mu mamele, buti i myojo jenu ji leke ku kokelwa ansi ko mikiti, u budakwa no nkengejezi jo bumi, buti lelyo ijuba na li mi kwate wangu-wangu sinagwe nkaswa. 35Kakuli kuti na li kezele a bantu bonse aba ba joja elonga lyonse. 36Mu kale na mu li bambite inako jonse, no ku lapela buti na mu gole uku anda ku bintu byonse ibi se bi shaka uku tendaala, buti mu ka gole uku zimana afuwi neme nde Mwana Muntu.”
37Mwijuba-mwijuba, Jesu ka ziga mu malapa go tempele, mi a matengu no matengu ka janga no ka kala a masiku gonse elundu li kugigwa Ilundu lya Olive. 38Mi a bantu bonse ka ba menekelanga ku tempele a masiku-siku keza ku mu tegeleza.
Tans Gekies:
Luka 21: TOI
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
2026 The Seed Company
