Mateu 10
10
Jesu aa tuma a bazigigwa be kumi no bo bile
(Male 3:13-19; Luk 6:12-16)
1Jesu kale ga kuga a bazigigwa bakwe bonse be kumi no bo bile no ku ba wa inguzu jo ku tanda i myoya i mibi, no ku oza a malwele gonse ga andene-andene. 2A mazina go batumigwa be kumi no bo bile nga gaga,
mba Simoni (uju ka kugigwa Pitolosi),
no Andileya (mwancegwe gwa Pitolosi),
no Jakobo (mwana Zebedeya),
no Joani (mwancegwe gwa Jakobo),
3Filipi no Bbatolome, Tomasi no Mateu (u mutentesi),
Jakobo (mwana Alufeyasi),
no Tediyusi,
4Simoni (uju ka kugigwa Ziloti)
no Judasi Isikaliota (uju na ga legeza Jesu).
5Jesu kale ga tuma be kumi no bo bile no ku ba lugwila nage, “Mu leke uku ja ku bantu aba ta ba li a Majuda kampa a Masamaliya. 6Kono mu je bulyo ku bantu ba Isilaele aba ba kozete ingu ji jobete. 7Mu je bu ba tandaza buti, ‘U mubuso gwa kwigulu se gu li li afuwi.’ 8Mu je bu oza a balwele no ku busa a bafu mane no ku oza aba ba lwala i cisenda. Mu je bu tanda no mayauma aga ga tembeka a bantu. Mu je bu tusa a bantu bulyo mu leke ku zunda uku lifigwa. Kakuli mbulyo na mwa wegwa inguzu, mi ta na mwa ji lifela, mu ji we bulyo ku bantu mi mu leke ku ba lifisa.
9“Mu leke uku inda a masheleñi, gauda, kampa a masheleñi go buwaya-waya. 10Mu leke uku inda nanga mukotana go myabi, i cizwato cimwinya, inshangu kampa u lutaga. Mi mu leke ku li kalililwa kakuli a bantu kuti na ba je bu mi tambula. Kakuli a bantu ba sebeza ba li botele uku wegwa co ku lya.
11“Aa mu ngina mu munzi u munene kampa u mununu, mu shake u muntu go ngana mi mu kale a mubanda gwakwe ku twala aa na mu zwemo. 12Aa mi tambula, mu mu we imfwijaguzi ige no luasi lwakwe. 13Ati lolo u luasi lu li botele jejo imfwijaguzi, imfwijaguzi jenu kuti ba ji gwane. Kono ati takuli, imfwijaguzi jenu kuti ji mi bogwele. 14U muntu gense uju ta na mi tambule no ku tegeleza ku majwi genu, sa ka na mu zwe a mubanda gwakwe kampa momo mu munzi, na mu kunkumune isukwe ku matende genu. 15Mbyaconse ndi mi lugwila buti, uku bangisigwa kwa gogo u munzi kuti na ku be u kunene lwini ku ita ko minzi ja Sodoma no Gomola mwijuba lyo nkatulo.
A mapenzi go bazumini
(Male 13:9-13; Luk 21:12-17)
16“Nga mu lole, nda sa mi tuma sinagwe ningu mukati ko bambogela, kebaka lelyo mu talife sinagwe majoka mi mu bule u mulandu sinagwe mbanziba. 17Kono mu zibe buti kuti na mu twaligwange ku makuta no ku shapigwa no ndupwa mu majugo go malapelelo go Majuda. 18A babusisi no bamfumu kuti na ba mi zekise kakuli mu li baumpilili bangu. Kono jejo ne nako na ji be jenu jo ku gambaguza a bajendesi no bantu aba ta ba zumine byangu. 19Aa mu shuminigwa, mu leke uku li kalililwa bo ka tabila kampa bo ka gambila. Kakuli Nyambe kuti na mi we a majwi go ku gamba mu nako ji botete. 20Kakuli ta li ndinwe sa ka mu gambange kono Moya gwe Senu sa ka gu mi tusange mu ku gamba.
21“Mwanca-muntu, kuti na legeze mukulwe go nkosi buti a yagigwe, mi isi gwa muntu, kuti na legeze mwane go muninzana. Mi a bana kuti na ba zokele no ku lwisa a bazazi babo no ku ba yagisa. 22A bantu bonse kuti na ba mi zimbe kebaka lyangu. Kono u muntu gense uju na zundamine ku twala ku mamaninino, kuti na jojeswe. 23Aa mu pengisigwa mu munzi gumwinya, mu tigile mu munzi gumwinya. Mbyaconse ndi mi lugwila buti ime nde Mwana Muntu kuti na ndi ka bogole na mu sini uku mana u musebezi mu minzi jonse jelonga lya Isilaele.
24“U muzigigwa ta iti u muzigi gwakwe, no muika ta iti mfumwe. 25Kono u muzigigwa a li botele uku ba sinagwe muzigi gwakwe mi no muika a li botele uku ba sinagwe ni mfumwe. Ati u muzazi na kugigwa buti ndi Bbeluzebule#10:25 A bañoli bo mabuka gamwinya kame na ba ñola Bbeluzebule kakuli nde zina limwinya lya Satani u mfumu go myoya i mibi jonse., u luasi lwakwe kuti lu kwagigwe ko mazina a mabi lwini.
Uju a botele uku jogigwa ndi Nyambe
26“Cwale mu leke uku ba joga. Takuli ici ci zinditwe ici ta na ci zibigwe, kampa ici ci bikamite ici ta na ci bikululwe. 27Ibi ndi mi lugwila mu masiku, na mu bi gambe a kamwi. Ici ndi mi shobotela mu matwi genu, na mu ci lugule ko ku gongoza buti a bantu bonse ba ci shugwe. 28Mu leke uku joga aba ba gola uku yaga u mubili kono ta ba goli uku yaga u muuja. Kono mu joge uju a gola uku yaga u mubili mane no muuja bulyao mwileba lyo mulilo. 29U tulumbu to bile nanga na mu tu gulisa, ndi bukai mu gola uku gwanao, ta li nka sheleñi ko muwaya-waya konke bulyo? Kono takuli nanga nkalumbu konke ka li fwila bulyo uku Isenu ta la zibi. 30Mane no nshuki jenu ja ku mitwi ji li balitwe. 31Cwale mu leke uku joga, inwe mu li ba butokwa lwini ku ita u tulumbu u tungi.
Uku zumina Kilesite kampa uku mu shampula
32“Uju a ndi lugula ku bantu, neme kuti na ndi mu lugule kwa Tata mwigulu. 33Mi uju a ndi shampula ku bantu, neme kuti na ndi mu shampule kwa Tata gwa kwigulu.
Tali nku joja nenja na nda leta
34“Mu leke uku gaja buti nku joja nenja na nda leta mwilonga! Ta li nku joja nenja, kono ni nkondo na nda leta. 35Ici na nda kezela nkuta buti,
u muntu a zokele isi,
no mwana go mukazana a zokele nyina,
u mwanakazi a sesetwe kuti na zokele mukwe gwakwe go mwanakazi.
36Mi aba na ba zimbe u muntu mbantu bo luasi lwakwe.#Mika 7:6.
37“U muntu a shaka lwini isi kampa nyina ku ita ubu a ndi shakila, ta botele uku ba gwangu. Mi u muntu gense uju a shaka lwini mwane go muninzana kampa go mukazana ku ita ubu a ndi shakila, ta botele uku ba gwangu. 38Mi u muntu gense uju ta indi i cifapaano cakwe no ku ndi umpilila, ta botele uku ba gwangu. 39U muntu gense uju a shaka lwini u bumi bwakwe kuti na bu jonekelwe, mi uju a jonekelwa u bumi bwakwe kebaka lyangu kuti na bu gwane.
Byo mipuzo
40“U muntu gense uju a mi tambula, ndime a la tambuli, mi uju a ndi tambula ga sa tambula uju sa ndi tuma. 41Uju a tambula u muboni gwa Nyambe kebaka lyo ku ta buti muboni gwa Nyambe, kuti na tambule u mupuzo go muboni gwa Nyambe. Mi uju a tambula u muntu a lulikile, ko ku ba u muntu a lulikile, kuti na tambule u mupuzo go muntu a lulikile. 42Mi ati u muntu gense na wa nanga ni nkomoki jo menzi go ku tontola ku banunu bamwinya ba baba a bazigigwa bangu, mbyaconse ndi mi lugwila buti, jojo u muntu ta na jonekelwe u mupuzo gwakwe.”
Tans Gekies:
Mateu 10: TOI
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
2026 The Seed Company
