Mateu 11
11
Jesu no Joani u mukolobezi
(Luk 7:18-35)
1Jesu aa sa la mani uku laga a bazigigwa bakwe be kumi no bo bile, kale ga ja bu zimbuluka mu minzi no mu bibaka bimwinya bya mwilonga lya Galileya, na ja bu ziga no ku tandaza ijwi lya Nyambe.
2Joani uju ka li mu ntolongo, kale ga shugwa i bintu byonse ibi ka tenda Kilesite. Mi kale ga tuma a bazigigwa bakwe kwa Jesu buti ba ka mu buze buti, 3“Ndigwe Mushaligwa ko tegwa buti u li botele uku keza kampa tu lindile jumwinya?”
4Jesu kale ga ba taba nage, “Mu bogole mu ka lugwile Joani ibi mu la shugwi no ku bona, 5a baofu se ba la bona, aba ta ka ba jenda se ba la jenda, bo cisenda se ba li lwalukite mi a baulu se ba la shugwa, aba ba fwa ba sa busigwa mi a makande a malotu se ga la tandazigwa ku bampale. 6Imfwijaguzi nja muntu uju ta sitagali angu.”
7A bazigigwa ba Joani aa se ba la bogoli, Jesu kale ga tatika uku gambagula bya Joani ku bantu nage, “Aa na mwa ja kwa Joani aa ka ka li mu lugole, muntu gwa buti na mwa ka bona? Izo ndutaka ka lu ungisigwa ku nkuli? 8Kampa mbinzi ka mu gaja u ka bona, nu nkosi ka zwesi mu bizwato bi tula lwini? Afwoku, a bantu ba zwata i bizwato bi tula mu minzi jo bumfumu ba joja. 9Kono ncinzi na mwa ka bona? Muboni gwa Nyambe? Ee, mane a la ita u muboni gwa Nyambe. 10Kakuli Joani ndege na ba ñola mu Mañolo aga ga ta buti,
‘Nga mu lole, kuti na ndi tume u mutumigwa gwangu uju na li tangize ku buso bwako mi kuti na ka ku shabwile inzila.’#Malaki 3:1.
11“Mbyaconse ndi mi lugwila buti, ku bantu bonse aba na ba joja aano ansi, takuli u munene uju a ita Joani u mukolobezi. Kono kame, u mununu mu mubuso gwegulu, munene ku mu ita. 12Mi ku zwa mu nako na ga tatika Joani u mukolobezi uku tandaza ijwi lya Nyambe ku leta aano, u mubuso gwa kwigulu gu li kwesi uku janduluka ko nguzu#11:12 A mabuka gamwinya mbuti ku ñolelwe buti, “U mubuso gwa Nyambe gwa sa lwisigwa.” mi a bankosi bo kazula ba sa gu muna. 13Kakuli a baboni ba Nyambe mane no mulao gwa Mushe byonse na bya sebeza ko buboni ku leta ku nako ja Joani. 14Mi ati na mu shaka uku bi tambula, Joani nde Eliya uju ka tegwa buti ka botele uku keza.#Malaki 4:5. 15U muntu gense uju a kwesi a matwi go ku shugwisa, a shugwe.
16“Ncinzi sa ka ndi kozanise a bantu ba shunu-aano? Mba ku koza sinagwe mbanuke ba zana a nkanza. Aba ba li kuga-kuga mwalyabo nabo,
17‘Tu la mi zimbili inimbo jo mukiti ko ku litusisa insengo
kono ta mu la nengi,
kame tu la mi zimbili inimbo jo mafu, kono ta mu la lili.’
18“Kakuli Joani na ga keza uku ta li i bilyo no ku nywa, kono na ba mu ta buti, ‘Ndiyauma li mu munite.’ 19Kono ime nde Mwana Muntu na nda keza na ndi lilila no ku linywina, kono kame se ba la ta buti, ‘Ngwa malyabi jojo kame ncidakwa, musele go batentesi no bantu bo bitendantu i bimangoju.’ Kono a magano ga la ku li bonaazanga buti ga li kele nenja ko bitendantu byago.”
U bumpai bo bantu ta na ba siguluka
(Luk 10:13-15)
20Cwale Jesu kale ga tatika uku nyaza a bantu ba mu minzi u mu na ga tenda a mamakazo a mangi kono kakuli ta na ba leka i bitendantu byabo i bimangoju no ku sigulukila kwa Nyambe. 21“U bumpai mbwenu mwe bantu ba mu munzi gwa Kolazini nenwe mwe bantu ba mu munzi gwa Bbesaida! Kakuli a mamakazo na nda tendela mu minzi jenu, kali na ndi la ga tendeli mu minzi ja Taya no Sidoni, a bantu ba jejo i minzi nkale na ba la siguluki ko ku jabala a masaka no ku li singa itwe. 22Ta ndi mi omi, u bumpai bo bantu ba mu minzi ja Taya no Sidoni kuti na bu be u buuba ku ita bwenu mwijuba lyo nkatulo.
23“Nenwe mwe bantu ba mu munzi gwa Kapenauma, buti kuti na mu ka nanunigwe no ka kutikigwa kwigulu? Afwoku! Kuti na mu ka tininikizwe kwinsi mu cibaka co bafu. Kakuli a mamakazo na nda tendela mu munzi gwenu kali mu munzi gwa Sodoma na ndi la ga tendeli, gogo u munzi na gu si kele no shunu-aano. 24Kono nda sa mi lugwila buti, u bumpai bwenu kuti na bu be bunene mwijuba lyo nkatulo ku ita bo bantu ba mu munzi gwa Sodoma.”
Inkuluwizi jo ku wisa kwa ba ba kotele
(Luk 10:21-22)
25Mwa jejo inako, Jesu kale ga lapela nage, “Tata gwe Mfumu gwa kwigulu no ansi. Nda sa ku lumba kakuli na gwa zindila a bantu aba ba kwesi a magano no bantu a bagomba u bulotu bo bintu bi zinditwe, ibi bi zibigwa bulyo ku bantu ba kozete a banuke-gana kakuli ba la zumina kwako. 26Ee Tata, kakuli mbobo ko shakile.
27“Tata sa ndi wa i bintu byonse. Takuli uju a ndi zi ime nde Mwana Nyambe mbwita Tata, mi takuli uju e zi Tata mbwita ime nde Mwana Nyambe na ba na nda li shalila buti ndi mu ba ganwine.”
28“Mu keze kwangu inwe mwense se mu kotele no ku koleka i mizigo jo ku lema, mi kuti na ndi mi we uku wisa. 29Mu inde ijokwe lyangu mu li li kambike mi mu li zige kwangu kakuli ndi li mugomba no bulotu u mojo, mi kuti na mu gwanine i miuja jenu uku wisa. 30Kakuli ijokwe lyangu ndi tole uku li koleka mi u muzigo gwangu muuba.”
Tans Gekies:
Mateu 11: TOI
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
2026 The Seed Company
