JEREMIA 6:10-30

Deel

JEREMIA 6:10-30 Die Bybel 2020-vertaling (AFR20)

Met wie moet ek praat? Wie moet ek as getuies roep, sodat hulle kan luister? Kyk, onbesnede is hulle ore, sodat hulle nie kan ag gee nie. Kyk, die woord van die HERE het vir hulle 'n bespotting geword; hulle aanvaar dit nie. Ek is met die woede van die HERE vervul; ek is moeg daarvan om my in te hou. “Stort dit uit oor kinders op straat, en tegelyk oor die groep jongmense. Ja, mans sowel as vroue sal gevange geneem word, oues saam met bejaardes. Hulle huise sal na ander oorgaan, hulle landerye en vroue daarmee saam. Want Ek steek my hand uit teen die inwoners van die land,” is die uitspraak van die HERE. “ Ja, klein en groot maak almal onregverdige wins. Van profeet tot priester – hulle almal pleeg bedrog. Hulle wil die ineenstorting van die dogter van my volk op 'n maklike manier herstel deur te sê, ‘Vrede, vrede!’ Maar daar is geen vrede nie. Staan hulle beskaamd omdat hulle afstootlik opgetree het? Hulle skaam hulle hoegenaamd nie, ken selfs geen skaamte nie. Daarom sal hulle val onder die gesneuweldes; in die tyd wanneer Ek hulle tot verantwoording roep, sal hulle tot 'n val kom,” het die HERE gesê. So sê die HERE: “Gaan staan langs die paaie en kyk; vra na die weë uit die voortyd. Vra waar die pad na die goeie is, en volg dit! Vind so sielerus! Maar hulle het geantwoord, ‘Ons sal nie gaan nie.’ Toe het Ek wagte oor julle aangestel, ‘Gee ag op die geluid van die ramshoring!’ Maar hulle het geantwoord, ‘Ons sal nie ag gee nie.’ Daarom, luister, nasies! Neem kennis, volksvergadering, van wat met hulle gaan gebeur! Luister, land! Kyk, Ek gaan onheil bring oor hierdie volk – die vrug van hulle planne. Want op my woorde het hulle nie ag geslaan nie, en my wet, dit het hulle verwerp. Waarom nog vir My wierook uit Skeba laat kom, of kosbare kalmoes uit 'n ver land? Julle •brandoffers is nie aanvaarbaar nie, en julle •maaltydoffers geval My nie. ” Daarom, so sê die HERE: “Kyk, Ek gaan voor hierdie volk struikelblokke lê waaroor hulle sal val – ouers en kinders saam; bure en vriende sal ten gronde gaan.” So sê die HERE: “Kyk, 'n volk kom uit 'n land in die noorde; 'n groot nasie is wakker gemaak by die uithoeke van die aarde. Boog en kromswaard hou hulle gereed; harteloos is hulle, en genadeloos. Hulle klink soos die see wat dreun, op perde ry hulle; hulle is manne wat in 'n gevegslinie opgestel is teen jou, dogter van Sion.” Ons het die gerug oor hulle gehoor; ons moed het ons begewe. Benoudheid het ons beetgepak, angs soos wanneer 'n vrou geboorte gee. Moenie na die veld uitgaan nie! Op pad moet julle nie gaan nie! Ja, die vyand het 'n swaard; daar is verskrikking aan alle kante! Dogter van my volk, omgord jou met rouklere en rol in die as! Rou soos oor 'n enigste kind – 'n bittere roubeklag! Want onverwags kom die verwoester oor ons. “As toetser van silwer het Ek jou by my volk aangestel, as 'n versterkte stad, sodat jy hulle optrede kan ken en toets. Hulle is almal rebels, onversetlik – koper en yster! Hulle gaan rond as kwaadstokers. Hulle almal is ontaard. Die blaasbalk blaas; uit die vuur kom lood ongeskonde. Tevergeefs word daar aanhoudend gesmelt; die slegtes word nie afgeskei nie. ‘Verworpe silwer’ word hulle genoem, want die HERE het hulle verwerp.”

JEREMIA 6:10-30 Bybel vir almal (ABA)

Met wie moet ek praat, wie sal na my luister wanneer ek hom waarsku? Die mense van Jerusalem wil nie hoor wat ek sê nie, hulle wil nie luister nie. Hulle hou nie van die woorde van die Here nie, hulle spot met sy woorde. Maar ek moet vir hulle sê die Here is kwaad, ek kan nie stilbly nie. Die Here het gesê: “Praat met die kinders in die strate, en met die jongmanne waar hulle bymekaar is. Praat met mans en vroue en met oumense, ook met die oumense wat baie oud is. Ander mense sal hulle huise kom vat, en ook hulle grond en hulle vroue. Ja, Ek wil die mense van Jerusalem straf, want almal, kinders en grootmense, wil ryk word van ander mense se goed. Die profete en priesters bedrieg my volk, want hulle dink hulle kan alles regmaak wanneer hulle sê: ‘Daar is vrede, daar is vrede.’ Maar daar is nie vrede nie. Hulle het slegte dinge gedoen wat Ek haat, maar hulle het nie skaam geword nie, hulle is nie jammer nie. Daarom sal hulle ook sterf in die oorlog. Ek sal hulle straf, en hulle sal sterf.” Dit het die Here gesê. Die Here het gesê: “Wanneer julle sien daar is meer as een pad waar julle kan loop, en julle vra waar die ou paaie is, dan moet julle die regte pad kies en daarop loop. Dan sal dit goed gaan met julle. Maar die mense van Jerusalem het gesê: ‘Nee, ons sal nie op daardie pad loop nie.’ En wanneer Ek mense vir julle laat wagstaan, dan moet julle luister wanneer die ramshoring blaas. Maar die mense van Jerusalem het gesê: ‘Nee, ons sal nie luister nie.’ Daarom, volke, julle moet luister, en julle, my volk wat tussen die ander volke is, julle moet weet, en almal in die land, julle moet luister: Ek sal nou hierdie volk straf. Hulle het planne gemaak om slegte dinge te doen, en nou sal slegte dinge met hulle gebeur, want hulle het nie geluister na wat Ek gesê het nie. Hulle het gedink die dinge wat Ek vir hulle leer, is nie belangrik nie. Julle bring vir My wierook uit die land Skeba, julle bring kalmoes uit 'n ver land, maar dit beteken vir My niks. Ek hou nie van julle brand-offers nie, Ek wil nie offers van julle hê nie.” Daarom, die Here sê: “Ek sal nou dinge laat gebeur wat hierdie volk sal laat sterf. Pa en seun, buurman en vriend sal saam sterf.” Die Here sê: “Daar sal nou 'n volk kom uit 'n land in die noorde. Dit is 'n groot volk wat uit 'n ver land sal kom. Elkeen het 'n pyl en boog en 'n spies in sy hand. Hulle is wrede mense, hulle is vir niemand jammer nie. Wanneer hulle skree, dan is dit soos die see wat hard raas. Hulle ry op perde en hulle is gereed om oorlog te maak teen julle, mense van Sion.” Die mense van Jerusalem het gesê: “Toe ons hoor hierdie vyande kom, het ons groot geskrik, ons was so bang soos 'n vrou voor sy 'n baba kry. Julle moenie uitgaan uit die stad nie, julle moenie op die paaie loop nie, want die vyande kom met hulle swaarde, en hulle sal oral wees. My volk, julle moet rouklere aantrek en op die ashoop rondrol. Julle moet huil en treur soos mense treur wanneer hulle enigste kind gesterf het. Julle moet rou, want die vyande kom vinnig, en hulle sal alles verwoes.” Die Here het vir my gesê: “Ek het jou gestuur om my volk te toets soos 'n mens metaal smelt en toets, Ek het jou sterk gemaak sodat jy sal kyk wat hulle doen en sodat jy hulle sal toets. Hulle is almal hardkoppige en opstandige mense wat sleg praat van ander mense. Hulle is oneerlik wanneer hulle moet oordeel. Hulle is so hard soos brons en yster. Wanneer die blaasbalk die vuur warm blaas, dan moet die lood uitsmelt, maar dit gebeur nie met my volk nie, die slegte metaal smelt nie uit nie. Hierdie volk is soos silwer wat 'n mens moet weggooi. Die mense sê hulle is so, want die Here het hulle weggegooi.”

JEREMIA 6:10-30 Afrikaans 1933/1953 (AFR53)

Wie sal ek toespreek en waarsku, dat hulle kan hoor? Kyk, hulle oor is onbesnede, sodat hulle nie kan luister nie. Kyk, die woord van die HERE is vir hulle 'n smaad, hulle het daar geen behae in nie. Daarom is ek vol van die grimmigheid van die HERE; ek het my moeg gemaak om uit te hou. Giet dit uit oor die kinders op die straat en oor die versameling van jongmanne, oor almal; want ook die man saam met die vrou sal gevang word, die grysaard saam met die oue van dae. En hulle huise sal oorgaan op ander mense, landerye en vroue, alles tesame; want Ek sal my hand uitstrek teen die inwoners van die land, spreek die HERE. Want van hul kleinste tot hul grootste maak hulle almal onregverdige wins, en van die profeet tot die priester pleeg hulle almal bedrog. En hulle genees die verbreking van die dogter van my volk op die maklikste manier deur te sê: Vrede, vrede! — terwyl daar geen vrede is nie. Hulle kom in die skande, omdat hulle gruwel bedryf het; tog skaam hulle hul nie in die minste nie, tog weet hulle nie om te bloos nie. Daarom sal hulle val onder die wat val; in die tyd dat Ek aan hulle besoeking doen, sal hulle struikel, sê die HERE. So spreek die HERE: Staan op die weë, en kyk en vra na die ou paaie, waar tog die goeie weg is, en wandel daarin; en julle sal rus vind vir julle siel. Maar hulle het gesê: Ons wil daarin nie wandel nie. Ek het ook wagte oor julle gestel en gesê: Luister na die geluid van die basuin. Maar hulle het geantwoord: Ons wil nie luister nie. Daarom, hoor, o nasies! En weet, o vergadering, wat onder hulle is! Hoor, aarde! Kyk, Ek bring onheil oor hierdie volk, die vrug van hulle planne; want na my woorde het hulle nie geluister nie, en my wet, dié het hulle verwerp. Waarom sou daar tog vir My wierook uit Skeba kom en die kosbare kalmoes uit 'n ver land? Julle brandoffers is nie welgevallig nie, en julle slagoffers is My nie aangenaam nie. Daarom, so sê die HERE: Kyk, Ek gooi struikelblokke voor hierdie volk waaroor hulle sal struikel, vaders en seuns tesame; die buurman en sy vriend sal omkom. So sê die HERE: Kyk, daar kom 'n volk uit die Noordland, en 'n groot nasie word opgewek uit die agterhoeke van die aarde. Boog en lans hanteer hulle; hulle is wreed en sonder barmhartigheid; hulle stem bruis soos die see, en hulle ry op perde, gewapend soos 'n man vir die oorlog, teen jou, o dogter van Sion! Ons het die gerug daarvan gehoor, ons hande het slap geword, benoudheid het ons aangegryp, smart soos van een wat baar. Gaan nie uit in die veld en loop nie op die pad nie; want die swaard van die vyand is daar, skrik rondom! Dogter van my volk, omgord jou met 'n roukleed en wentel jou in die as; bedryf rou soos oor 'n enigste kind, 'n bitter rouklag; want skielik kom die verwoester oor ons. Ek het jou onder my volk as toetser gestel, as vesting, dat jy hulle weg kan ken en toets. Hulle is almal die oproerigstes van die oproeriges wat omgaan met kwaadsprekery; koper en yster is hulle; hulle handel almal verderflik. Die blaasbalk blaas hard; wat uit die vuur gereed kom, is lood; tevergeefs hou hulle aan met smelt, maar die slegtes word nie afgeskei nie. Hulle word genoem: Verworpe silwer; want die HERE het hulle verwerp.

JEREMIA 6:10-30 Afrikaans 1983 (AFR83)

Met wie sal ek praat, wie sal ek waarsku, wie sal na my luister? Hulle ore is doof, hulle is nie in staat om te hoor nie. Hulle praat smalend oor die woord van die Here, dit kan hulle nie skeel nie. Die toorn van die Here brand in my, ek kan dit nie verduur nie! Giet dit uit op die kinders in die straat en op die jongmanne waar hulle bymekaarkom; laat mans én vrouens daardeur verteer word, selfs mense wat grys is, wat baie oud is. Hulle huise sal ander mense s'n word, en ook hulle lande en hulle vrouens, want Ek gaan die inwoners van die land straf, sê die Here. Almal, klein en groot, wil hulleself net verryk, almal, selfs profete en priesters, is uit op bedrog. Hulle het 'n goedkoop raat vir die wonde van my volk. Hulle sê net: “Alles is reg! Alles is reg!” Maar niks is reg nie. Wanneer hulle aan die kaak gestel word oor die gruwelike dinge wat hulle gedoen het, skaam hulle hulle nie eens nie, hulle weet nie van skaamte nie. Daarom sal hulle tot 'n val kom soos al die ander voor hulle; wanneer Ek hulle straf, sal hulle omkom, sê die Here. So sê die Here: Staan by die kruispaaie en kyk, en vra na die ou paaie. Vra watter pad die beste is en loop dit, dan sal julle rus vind. Maar hulle het gesê: “Ons sal nie daardie pad loop nie.” Toe het Ek wagte oor julle aangestel en gesê: Luister na die ramshoring! Maar hulle het geantwoord: “Ons sal nie luister nie.” Daarom moet julle luister, nasies, en kyk wat met hulle gaan gebeur. Luister, aarde! Ek bring onheil oor hierdie volk, hulle sal die vrugte pluk van hulle planne, want hulle het hulle nie aan my woorde gesteur nie, hulle het verwerp wat Ek hulle geleer het. Waarom sou Ek omgee vir wierook uit Skeba of kalmoes uit 'n ver land? Ek aanvaar nie julle brandoffers nie, Ek hou nie van julle offers nie. Daarom sê die Here: Kyk, Ek lê in die pad van hierdie volk struikelblokke dat hulle daaroor kan val; vaders en kinders, vriende en bure sal omkom. So het die Here gesê: Kyk, 'n volk kom uit 'n land in die noorde, 'n groot nasie staan op in 'n uithoek van die aarde. Hulle is gewapen met pyl en boog en swaard, hulle is wreed en hulle spaar niemand nie. Hulle krygsgeskreeu dreun soos die see, hulle kom aan op hulle perde, hulle soldate is reg vir die aanval op jou, Sion. Ons het die gerug oor hulle gehoor, ons hande hang slap, angs het ons beetgepak, benoudheid soos die pyn van 'n vrou wat 'n kind in die wêreld bring. Moenie in die veld ingaan nie, moet ook nie met die pad langs loop nie, want die wapens van die vyand jaag oral skrik aan. My volk, trek rouklere aan, rol in die as, treur soos oor die dood van 'n enigste kind, huil bittere trane, want die verwoester is op ons. Ek stel jou aan om my volk te toets, Ek maak jou sterk; ondersoek en toets wat hulle doen. Hulle is almal hardkoppige rebelle, hard soos brons en yster; hulle loop mekaar en beswadder, hulle is almal korrup. Die blaasbalk blaas, maar die vuur kry nie die lood afgeskei nie; die smelter smelt verniet, hy kry die afvalstowwe nie uitgesmelt nie. Hulle bly weggooisilwer; dit is wat hulle genoem word, want die Here het hulle verwerp.

JEREMIA 6:10-30 Contemporary Afrikaans Bible 2023 (CAB23)

Met wie sal ek spreek en waarsku, dat hulle kan hoor? kyk, hulle oor is onbesnede, en hulle kan nie luister nie; kyk, die woord van die HERE is vir hulle 'n smaad; hulle het geen behae daarin nie. Daarom is ek vol van die grimmigheid van die HERE; Ek is moeg om vas te hou: Ek sal dit uitgiet oor die kinders in die buiteland en oor die vergadering van die jongmanne saam; En hulle huise sal na ander oorgedra word, met hulle landerye en vroue saam; want Ek sal my hand uitstrek teen die inwoners van die land, spreek die HERE. Want van die geringste onder hulle tot die grootste van hulle is elkeen aan hebsug oorgegee; en van die profeet af tot die priester handel almal vals. Hulle het ook die seer van die dogter van my volk effens genees deur te sê: Vrede, vrede! wanneer daar geen vrede is nie. Was hulle skaam toe hulle gruwels gepleeg het? ja, hulle was glad nie beskaamd nie en kon nie bloos nie; daarom sal hulle val onder die wat val; in die tyd wat Ek hulle besoek, sal hulle neergewerp word, spreek die HERE. So sê die HERE: Staan op die weë en kyk en vra na die ou paaie, waar is die goeie weg, en wandel daarin, en julle sal rus vind vir julle siele. Maar hulle sê: Ons sal nie daarin wandel nie. Ek het ook wagte oor jou aangestel en gesê: Luister na die geluid van die basuin. Maar hulle sê: Ons sal nie luister nie. Daarom, hoor, o nasies, en weet, o gemeente, wat onder hulle is. Hoor, o aarde, kyk, Ek bring onheil oor hierdie volk, ja, die vrug van hulle gedagtes, omdat hulle nie na my woorde en na my wet geluister het nie, maar dit verwerp het. Waartoe kom daar vir my reukwerk uit Skeba en die soet riet uit 'n ver land? julle brandoffers is nie aanneemlik nie, en julle slagoffers is vir My nie soet nie. Daarom, so sê die HERE: Kyk, Ek lê struikelblokke voor hierdie volk, en die vaders en die seuns saam sal op hulle val; die naaste en sy vriend sal omkom. So sê die HERE: Kyk, daar kom 'n volk uit die noordelike land, en 'n groot nasie sal opstaan uit die uithoeke van die aarde. Hulle sal boog en spies gryp; hulle is wreed en ontferm hulle nie; hulle stem dreun soos die see; en hulle ry op perde, opgestel as manne vir oorlog teen jou, o dogter van Sion! Ons het die gerug daarvan gehoor: ons hande het slap geword; benoudheid het ons aangegryp en pyn soos van 'n baarende vrou. Gaan nie die veld in en loop nie op die pad nie; want die swaard van die vyand en vrees is rondom. O dogter van my volk, omgord jou met rouklere en wentel jou in as; laat jou treur soos oor 'n enigste seun, 'n bitter klaaglied, want die verwoester sal skielik oor ons kom. Ek het jou as 'n toring en 'n vesting onder my volk gemaak, sodat jy hulle weg kan ken en beproef. Hulle is almal wrede oproeriges wat met lastering wandel: koper en yster is hulle; hulle is almal korrupters. Die blaasbalk is verbrand, die lood word deur die vuur verteer; die grondlegger smelt tevergeefs, want die goddelose word nie uitgeruk nie. Verworpe silwer sal mense hulle noem, want die HERE het hulle verwerp.

JEREMIA 6:10-30 Die Boodskap (DB)

Met wie sal ek praat? Wie sal luister as ek ’n waarskuwing gee? Dit lyk of hulle ore toe is, want hulle luister nie na wat ek te sê het nie. Hulle maak grappies van wat die Here sê en neem nie sy woorde ernstig op nie. Ek kan aanvoel hoe kwaad die Here vir hulle moet wees. Ek kan my woede nie langer inhou nie. Die Here sê: “My woede gaan uitbars oor Jerusalem. Laat die kinders wat in die strate speel, mooi verstaan hoe kwaad Ek is, ook die jongmense, waar hulle ook al bymekaar is. Ek sal ook nie mans, vroue, oupas en oumas spaar nie. Die vyand sal kom en hierdie mense wat My so kwaad maak se huise vat. Hulle sal ook hulle landerye afvat en wat meer is, ook hulle vroue. Ek sal die burgers van hierdie land straf,” sê die Here. “Almal, van die eenvoudigste tot die vernaamste mense, probeer op ’n skelm manier ryk word. Selfs ook die profete en die priesters doen oneerlike dinge. Hulle probeer die probleme van die Here se mense met goedkoop raad oplos. Hulle maak of alles reg en goed is, terwyl dit eintlik baie sleg gaan. Is hulle enigsins skaam as hulle uitgevang word oor die gruwels wat hulle gedoen het? Glad nie! Hulle bloos nie eens omdat hulle skaam is nie. Daar is nie hoop vir hulle nie. Hulle sal ondergaan net soos ander mense voor hulle ondergegaan het. Dit sal hulle einde wees wanneer Ek hulle die dag straf,” sê die Here. Die Here sê: “As julle by ’n plek kom waar julle belangrike besluite moet neem, moenie oorhaastig wees nie. Wag ’n bietjie en kyk eers wat mense vroeër gedoen het. Doen dan wat die beste is. Julle sal dan weet dat julle die regte ding gedoen het. Maar julle het gesê: ‘Dit is nie wat ons wil doen nie!’ Ek het wagte aangestel om julle te waarsku as daar gevaar is, maar julle het gesê: ‘Ons sal nie luister nie!’ Al die nasies moet luister na wat Ek sê. Kyk gerus wat met my volk gaan gebeur. Die aarde moet ook oplet wat gaan gebeur. Ek gaan my mense slegte dinge laat beleef. Hulle pluk net die vrugte van hulle eie planne. Hulle het hulle nie gesteur aan wat Ek te sê gehad het nie. My opdragte het hulle verwerp. Dit help net mooi niks dat hulle vir My wierook uit Skeba bring nie. Hulle kan die ander speserye wat uit ander ver lande kom, ook maar hou. Ek weier om offers te aanvaar wat hulle vir My bring om in my goeie boekies te kom. Dit bring vir My geen plesier nie.” Daarom sê die Here: “Ek sal stuikelblokke in die pad van hierdie volk bring waaroor hulle sal val. Ouers en hulle kinders sal hieroor val. Ook hulle bure en vriende sal sterf.” Die Here sê: “Kyk, ’n baie sterk mag kom uit die noorde na Israel toe. Die land waar hulle vandaan kom, is ver van hier af. Hulle is baie goed gewapen. Verder is hulle bekend vir hulle wreedheid. Hulle het geen genade vir niks en niemand nie. As hulle leër so optrek op hulle perde, klink dit soos die gedruis van die see. Hulle soldate is reg om jou te vernietig, Jerusalem.” Ons het stories gehoor oor hierdie wrede vyand. Ons is skoon lam van vrees vir hulle. Ons is baie benoud. Dit is soos die pyn wat ’n vrou ervaar as sy op die punt is om aan ’n kind geboorte te gee. Moenie waag om in die veld te stap nie! Bly weg van die paaie af! Die vyand is gewapen en terroriseer mense oral. My volk, trek die klere aan wat julle altyd dra as julle rou. Doen ook wat julle gewoonlik doen as julle rou oor iemand wat dood is. Gaan lê in die as en huil met ’n stukkende hart asof julle enigste kind dood is. Doen dit, want die vyand wat alles voor hom platvee, sal julle skielik aanval! Die Here sê: “Jeremia, Ek stel jou aan om my volk te toets net soos ’n mens die gehalte van metaal sou toets. Doen jou toetse en vind uit of dit wat hulle doen, goed is. Hulle is almal hardkoppig en opstandig. Hulle loop oral en kwaadpraat van mekaar. Blaas maar die vuur aan om dit so warm te kry as wat kan kom, dit sal nie help nie. ’n Mens kry dit nie reg om die afvalstowwe uit die metaal te kry nie.” Die mense van Israel sal die naam “weggooisilwer” kry, want die Here het hulle weggegooi.

JEREMIA 6:10-30 Nuwe Lewende Vertaling (NLV)

“Met wie sal Ek praat? Wie sal luister as Ek ’n waarskuwing gee? Hulle ore is toe, hulle kan nie luister nie. Hulle minag die woorde van die HERE, hulle vind geen vreugde daarin nie. Die woede van die HERE brand in my. Ek kan dit nie langer inhou nie! Ek stort dit uit op kinders in die straat en ook jongmense waar hulle bymekaarkom. Sowel mans as vroue en oumense sal getref word. Die vyand sal kom en hierdie mense se huise, landerye en vroue afvat. Ek sal die inwoners van hierdie land straf,” sê die HERE. “Almal, van die eenvoudigste tot die vernaamste mense, probeer rykdom bekom op ’n onregmatige manier. Selfs die profete en priesters doen oneerlike dinge! Hulle probeer om my mense se wonde op ’n oppervlakkige manier gesond te maak. Hulle maak of daar vrede is, terwyl daar eintlik geen vrede is nie. Is hulle enigsins skaam oor die gruwels wat hulle doen? Nee, hoegenaamd nie! Hulle weet nie eers hoe om te bloos nie! Daarom sal hulle tussen die gesneuweldes lê. Hulle sal verneder word wanneer Ek hulle straf,” sê die HERE. HERE Die HERE sê: “Staan by die paaie en kyk. Vra na die ou paaie. Vra na die beste pad en volg dit, want julle sal daar ware rus vind. Maar julle het gesê: ‘Ons sal nie luister nie.’ Ek het mense aangestel om oor julle te waak, en hulle roep: ‘Luister na die trompetgeskal!’ Maar julle sê: ‘Ons sal nie luister nie!’ Luister, al die nasies. Kyk wat met my volk gaan gebeur. Let op wat gaan gebeur, aarde! Ek bring rampe oor my volk. Hulle pluk net die vrug van hulle eie planne, want hulle het hulle nie gesteur aan wat Ek sê nie. Hulle het my opdragte verwerp. Daar is geen nut in om vir My wierook uit Skeba te brand, of kalmoes uit ’n ver land te bring nie. Julle brandoffers aanvaar Ek nie, julle offers verskaf My geen vreugde nie.” Daarom sê die HERE: “Ek bring struikelblokke op die pad van my volk. Pa’s en seuns sal daaroor val. Bure en vriende sal saam omkom.” Die HERE sê: “Kyk, ’n leër kom uit die noorde. Dis ’n sterk nasie uit ’n verafgeleë land. Hulle is gewapen met pyl en boog en spiese. Hulle is wreed en toon geen genade nie. As hulle ruiters optrek, klink dit soos die gedruis van die see. Jerusalem, soldate trek op in formasie, gereed om jou te vernietig.” Ons het berigte gehoor oor die vyand. Dit maak ons lam van vrees. Vrees en pyn oorval ons soos geboortepyne wat ’n vrou ervaar. Moenie waag om in die veld te stap nie! Bly weg van die paaie! Die vyand is gewapen, hulle bring oral vrees. My volk, trek rouklere aan, en gaan sit in sak en as! Rou en huil met stukkende harte asof ’n enigste kind dood is. Die vernietigende vyand gaan julle skielik aanval! “Jeremia, Ek stel jou aan om die gehalte van my volk te toets net soos ’n mens die gehalte van metaal sou toets. Hulle is almal hardkoppig. Hulle loop oral en kwaadpraat. Hulle is soos brons en yster, almal is korrup. Blaas maar die vuur aan om dit witwarm te kry. Maar die suiwering is tevergeefs! Niemand kry dit reg om onreg uit te suiwer nie. Ek noem hulle ‘weggooisilwer’, want die HERE het hulle weggegooi.”