Die Here Is My HerderVoorbeeld

Hanna se lofsang

Hanna het nie in ’n eenmalige krisissituasie God se hulp afgesmeek nie. Haar kinderloosheid het oor jare gestrek. In haar magteloosheid maak sy ’n gelofte aan God dat sy, indien Hy haar ’n seun sou gee, hom aan sy diens sou toewy. God antwoord haar smeekroep en Samuel word gebore. Hanna vergeet nie gerieflikheidshalwe haar gelofte aan God nie. Nadat sy klein Samuel gespeen het, bring sy hom met hul gesin se jaarlikse besoek aan die tempel na Eli — soos sy belowe het.

Boonop hef sy ’n lofsang tot eer van God aan waarin sy sy heerskappy en heiligheid besing. Hoe swaar dit ook al vir haar as ma moes gewees het om haar kind agter te laat, kon sy sê: "Ek is sterk in die Here." In die jare toe sy onder Peninna se gespot moes deurloop, het sy reeds geleer dat haar krag van God alleen kom.

Wanneer ons in die nood is, maak ons maklik beloftes aan God. Hanna het egter geweet dat God dade toets. Sy kon die toekoms in sy sorg laat, wetende dat sy haar gelofte nagekom het.

Sy kon opreg sê: "Ek jubel in die Here."  Want sy het God absoluut vertrou.

God is alsiende en alwetend. Hy ken ons motiewe. Hy ken ook reeds die uitkoms, al is dit nog nie vir ons duidelik nie.

Here, help my om getrou te wees en om my geloftes aan U te betaal. Amen