Jesus Se Woorde Vir Elke DagVoorbeeld

Sonder woorde

Dade praat soms harder as woorde. Jesus het by meer as een geleentheid niks gesê nie, maar sy houding, kyk of dade het boekdele gespreek.

Een van die mees aangrypende gedeeltes in die Bybel is toe Petrus vir Jesus verloën het. Die oomblik wat die haan gekraai het, het Jesus, wat in aanhouding en onder kruisverhoor was, omgedraai en reguit in Petrus se oë gekyk. Ek glo nie Jesus se bedoeling was om Petrus seer te maak of om leedvermakerig te wees nie, maar daardie kyk het Petrus aan sy bravade en arrogansie herinner toe hy gesê het dat hy Jesus nooit sal verloën nie.

By ’n ander geleentheid verwag die veroordelaars van die vrou wat op owerspel betrap is dat Jesus haar ook veroordeel. Hulle vra Hom spesifiek of die ou verbond se wet toegepas moet word; of sy met klippe doodgegooi moet word. Jesus het eers nie geantwoord nie. Hy het vooroor gebuk en met sy vinger in die grond geskryf. Ons weet nie wat Hy geskryf het nie, maar ons weet wel dat die vrou se “regters” skaam weggestap het.

Dink aan die keer toe Jesus tydens die aandete die skottel met water geneem, ’n handdoek om sy heupe gebind en sy dissipels se voete begin was het. Hulle sou hierdie daad nooit vergeet nie, en dit was eers ná sy stil, nederige daad dat Hy vir hulle verklaar het wat die betekenis daarvan is.

En die manier waarop Jesus gely het, het boekdele gespreek. Jesaja 53:7 sê: “Hy is soos ’n lam wat na die slagplek gelei word – ja, Hy het sy mond nie oopgemaak nie” (Bybel in Afrikaans 1933/1953).

Soms praat die Here ook geen woord teenoor my en jou nie, maar sy liefdevolle teenwoordigheid vertroos en bemoedig ons.