Saam op jou lewenstrand

’n Onbekende tyd lê dalk voor ons uitgestrek, soos ’n onbesoedelde strand waarvan die gistermerke toegespoel is met nóú se hoog- en laagwaterbranders. Net so lê ons lewenstrand voor ons uitgestrek sodat ons weer nuwe kurwes, getye en seisoene kan ervaar. Nuwe spore kan maak. Spore wat hopelik ’n nalatenskap laat …

’n Nuwe begin gaan altyd gepaard met onsekerheid, maar ook opwinding, met vrees, maar ook verwagting. Met twyfel, maar tog ook geloof. Geloof in die terugkyk en sien dat God ons nog nie een keer alleen op ons lewenstrand gelos het nie; ook nie wanneer ons van Hom vergeet het nie.

Iemand wat diep bewus was van God se sorg en krag, was Dawid. Hy was die koning van Israel, hy was dapper genoeg om ’n reus met vyf klippies aan te durf en kon vanuit sy diep geloof die mooiste psalms skryf, máár Dawid was ook bang. Hy wou ook soms wegkruip vir die wêreld. En dan … dan het hy geweet by Wie hy moes skuil: By sy Here wat vir hom ’n veilige Rots was.

Weet vandag dat die God van Dawid ook jou Here is. Dat Hy by jou sal wees wanneer die somerson jou lewe verryk, wanneer branders van vreugde oor jou hart spoel én wanneer storms jou bedreig. Vertrou Hom!

My Here en my God, dankie dat U saam met my op my lewenstrand is. Altyd.