<div class="version vid6 iso6393afr" data-vid="6" data-iso6393="afr">
 <div class="book bkACT">
 <div class="chapter ch11" data-usfm="ACT.11">
 <div class="label">11</div><div class="s1">Petrus verantwoord hom voor die gemeente in Jerusalem</div><div class="p"> 1Die apostels en die ander gelowiges in Judea het gehoor dat mense wat nie Jode is nie, ook die woord van God aangeneem het. 2Toe Petrus dan in Jerusalem kom, het die Joodse gelowiges hom verwyt: 3&#8220;Jy het mense besoek wat nie besny is nie en het selfs saam met hulle ge&#235;et.&#8221;</div><div class="p"> 4Petrus het toe vir hulle alles mooi uiteengesit: 5&#8220;Ek was in Joppe besig om te bid toe ek in geesvervoering 'n gesig gesien het,&#8221; het hy ges&#234;. &#8220;Ek het iets soos 'n groot doek wat aan sy vier punte neergelaat word, uit die hemel sien afkom, en dit het tot by my gekom. 6Toe ek goed daarna kyk, sien ek daarin viervoetige diere van die aarde, wilde en kruipende diere, en wilde vo&#235;ls. 7Ek het toe 'n stem gehoor wat vir my s&#234;: &#8216;Kom, Petrus, slag en eet.&#8217; 8Maar ek het geantwoord: &#8216;Nooit nie, Here! Ek het nog nooit my mond aan iets gesit wat onrein of onheilig is nie.&#8217; 9'n Tweede keer het ek die stem uit die hemel gehoor: &#8216;Wat God rein verklaar het, mag jy nie onrein ag nie.&#8217; 10Dit het drie keer gebeur, en daarna is alles weer in die hemel opgetrek.</div><div class="p"> 11&#8220;Terselfdertyd het daar drie mans wat van Sesarea af na my toe gestuur is, by die huis aangekom waar ons tuis was. 12Die Gees het vir my ges&#234; dat ek nie moet aarsel om saam met hulle te gaan nie. Ek en hierdie ses broers is toe saam met hulle, en ons het in Kornelius se huis ingegaan. 13Hy het vir ons vertel hoe hy die engel in sy huis sien staan het, wat vir hom ges&#234; het: &#8216;Stuur iemand na Joppe toe en laat vir Simon daar haal wat ook Petrus genoem word. 14Hy het 'n boodskap vir jou waardeur jy gered sal word, jy en jou hele huisgesin.&#8217;</div><div class="p"> 15&#8220;Skaars het ek begin praat, of die Heilige Gees kom op hulle net soos op ons in die begin. 16Toe dink ek aan die woorde wat die Here ges&#234; het: &#8216;Johannes het wel met water gedoop, maar julle sal met die Heilige Gees gedoop word.&#8217; 17Hulle het net soos ons in die Here Jesus Christus geglo, en God het aan hulle ook dieselfde gawe as aan ons gegee. Wie was ek dan om God te probeer verhinder?&#8221;</div><div class="p"> 18Toe die gelowiges dit hoor, was hulle tevrede. Hulle het God geprys en ges&#234;: &#8220;God het selfs mense wat nie Jode is nie, tot inkeer gebring om aan hulle die lewe te gee.&#8221;</div><div class="s1">Die gemeente in Antiogi&#235;</div><div class="p"> 19Deur die vervolging wat na Stefanus se dood ontstaan het, is die gelowiges uitmekaar gejaag. Party van hulle het na Fenisi&#235;, Siprus en Antiogi&#235; toe gegaan, maar hulle het die woord aan niemand anders as net aan Jode verkondig nie. 20Onder die vlugtelinge was daar sekere mense wat van Siprus en Sirene afkomstig was en wat in Antiogi&#235; gekom en daar ook aan die Griekssprekendes die evangelie dat Jesus die Here is, verkondig het. 21Die Here het die gelowiges gehelp, sodat daar baie mense tot geloof gekom en hulle tot die Here bekeer het.</div><div class="p"> 22Die berig hieroor het die gemeente in Jerusalem bereik, en hulle het vir Barnabas na Antiogi&#235; toe gestuur. 23Toe hy daar kom, was hy bly om te sien hoe God in sy genade onder hulle gewerk het, en hy het hulle almal aangespoor om met hart en siel aan die Here getrou te bly. 24Barnabas was 'n goeie man, vol van die Heilige Gees en met 'n vaste geloof.</div><div class="p">'n Aansienlike groep mense is tot geloof in die Here gebring, 25en Barnabas is na Tarsus toe om vir Saulus te gaan soek. 26Toe hy hom kry, het hy hom na Antiogi&#235; toe gebring, en hulle twee het 'n hele jaar lank saam in die gemeente gewerk en baie mense onderrig. In Antiogi&#235; is die gelowiges die eerste keer Christene genoem.</div><div class="p"> 27In di&#233; tyd het daar profete van Jerusalem af na Antiogi&#235; toe gekom. 28Een van hulle, met die naam Agabus, is deur die Gees gelei om te voorspel dat 'n groot hongersnood die hele w&#234;reld sou tref. Dit het dan ook in die tyd van keiser Claudius gebeur. 29Die gelowiges het toe besluit dat elkeen na sy vermo&#235; sou bydra tot 'n hulpfonds wat vir hulle medegelowiges wat in Judea woon, gestuur sou word. 30Hulle het dit gedoen en die geld met Barnabas en Saulus aan die ouderlinge in Jerusalem gestuur.</div>
 </div>
 </div>
</div>

<div class="version vid6 iso6393afr" data-vid="6" data-iso6393="afr">
 <div class="book bkACT">
 <div class="chapter ch12" data-usfm="ACT.12">
 <div class="label">12</div><div class="s1">Jakobus word doodgemaak en Petrus gevange geneem</div><div class="p"> 1In di&#233; tyd het koning Herodes party van die gemeentelede laat vang en hulle mishandel. 2Hy het vir Jakobus die broer van Johannes met die swaard laat doodmaak.</div><div class="p"> 3Toe Herodes sien dat dit by die Jode byval vind, het hy nog verder gegaan en ook vir Petrus gevange laat neem. Dit het tydens die fees van die ongesuurde brood gebeur. 4Nadat Herodes vir Petrus laat vang het, het hy hom in die tronk gesit en hom deur vier afdelings van vier soldate elk laat bewaak. Herodes wou hom n&#225; die paasfees voor die volk bring. 5So is hy dan in die tronk bewaak, maar die gemeente het aanhoudend vir hom tot God gebid.</div><div class="s1">Petrus word uit die tronk bevry</div><div class="p"> 6Die nag voordat Herodes hom voor die volk sou bring, het Petrus tussen twee soldate geslaap. Hy was met twee kettings geboei, en voor die deur het wagte die tronk bewaak.</div><div class="p"> 7Meteens staan daar 'n engel van die Here en skyn daar 'n lig in die sel. Die engel vat toe aan Petrus se sy om hom wakker te maak en s&#234; vir hom: &#8220;Staan gou op.&#8221;</div><div class="p">Onmiddellik het die boeie van sy hande afgeval. 8Toe s&#234; die engel vir hom: &#8220;Maak jou gordel vas en trek jou skoene aan.&#8221;</div><div class="p">Petrus het dit gedoen, en toe s&#234; die engel vir hom: &#8220;Trek jou bokleed aan en kom saam met my.&#8221;</div><div class="p"> 9Petrus het agter die engel aan uitgegaan sonder om te besef dat hy werklik bevry word. Vir hom het dit gelyk asof hy 'n gesig sien. 10Hulle is by die eerste wag verby en ook by die tweede, en toe hulle by die ysterdeur kom wat na die stad toe lei, het dit vanself vir hulle oopgegaan. Toe hulle buite kom en 'n ent met die straat af was, het die engel vir Petrus skielik verlaat. 11Toe dring dit tot Petrus deur wat met hom gebeur het en hy dink: nou besef ek eers regtig dat die Here sy engel gestuur het om my uit die hande van Herodes te red en van alles wat die Joodse volk van plan was om te doen.</div><div class="p"> 12Met di&#233; gedagte is hy na die huis van Maria, die moeder van Johannes wat ook Markus genoem is, waar baie gelowiges saam was om te bid. 13Hy het aan die voordeur geklop, en 'n diensmeisie met die naam Rod&#233; het kom hoor wie dit is. 14Toe sy Petrus se stem herken, was sy so bly dat sy nie die deur oopgemaak het nie, maar binnetoe gehardloop het om te vertel dat Petrus by die deur staan. 15Maar hulle s&#234; vir haar: &#8220;Jy is mal.&#8221;</div><div class="p">Toe sy egter daarmee volhou, s&#234; hulle: &#8220;Dan is dit sy gees.&#8221;</div><div class="p"> 16Intussen het Petrus aangehou klop. Toe hulle die deur oopmaak en hom sien, was hulle baie verbaas. 17Hy het met sy hand vir hulle gewys om stil te bly en vir hulle vertel hoe die Here hom uit die tronk uitgelei het.</div><div class="p">&#8220;Vertel dit vir Jakobus en die ander gelowiges,&#8221; het hy ges&#234; en na 'n ander plek toe vertrek.</div><div class="p"> 18Toe dit dag word, was die soldate nie min ontsteld oor wat van Petrus geword het nie. 19Herodes het hom laat soek, en omdat hulle hom nie kon kry nie, het hy die wagte verhoor en bevel gegee dat hulle doodgemaak moet word.</div><div class="p">Hierna het Herodes van Judea af na Sesarea toe gegaan en 'n tyd daar gebly.</div><div class="s1">Herodes se dood</div><div class="p"> 20Die mense van Tirus en Sidon het hulle die woede van Herodes op die hals gehaal. Daarom het hulle saam 'n afvaardiging na hom toe gestuur. Nadat hulle vir Blastus, die koning se kamerheer, op hulle hand gekry het, het hulle vrede gevra, omdat hulle land van die koning s'n afhanklik was vir lewensmiddele. 21Op die vasgestelde dag het Herodes sy ampsklere aangetrek, op sy troon gaan sit en hulle toegespreek. 22Die mense het toe geskreeu: &#8220;Dit is 'n god wat praat, nie 'n mens nie!&#8221;</div><div class="p"> 23Op daardie selfde oomblik het 'n engel van die Here hom getref, omdat hy nie die eer aan God gegee het nie. Herodes is deur wurms verteer, en het gesterwe.</div><div class="p"> 24Maar die woord van God het verder versprei en veld gewen.</div><div class="p"> 25Barnabas en Saulus het teruggekom nadat hulle hulle opdrag in Jerusalem uitgevoer het, en hulle het vir Johannes, wat ook Markus genoem is, met hulle saamgevat.</div>
 </div>
 </div>
</div>

HandelingeVoorbeeld

Skrif

Aangaande hierdie leesplan

Verwante Leesplanne