لشهر ماي؛ رحمات جديدة كل صباحعينة

الهدية ديال الحياة الأبدية كتضمن أنني مغفور من قبل ومازال غنتغفر، وبلّي كل حاجة مهرسة فيّا غتّصلح كليّا.

كلشي على حساب البلاصة فين كاين نت. إلا كنتي بغيتي تعيش بسلام ديال القلب وبأمل وشجاعة، خاصك تعرف فين بلاصتك في عمل الله. كاينين جوج أنواع ديال العلامات في هاد العمل اللّي كيحددو بلاصتك، وكيورّيوك شنو كيدير الله، وكيقولو ليك كيفاش خاصك تعيش هنا ودابا. كيما قلت من قبل، نت كتعيش بين "من قبل" و "مازال".

أوّلاً، ضروري ليك وليّا باش نعقلو ديما أننا كنعيشو في الوقت ديال "من قبل" ديال الغفران الكامل. الغفران هو ماشي حاجة ديال "كنتمنّا تكون". هو حاجة ديال "كمل". ماخاصكش تتمنى باش يتغفرو دنوبك. ماخاصكش تخمّم على واش عملية الغفران غتفشل بشي طريقة. علاش؟ حيت غفرانك الكامل والنهائي من قبل كمل على صليب يسوع المسيح. الدبيحة المتالية ديال الحمل التقي كليّا كملات والمتطلبات المقدسة ديال الله خلاتك تقي وبلا عقوبة قدّام عينيه. هادشي علاش ماتخمّمش على واش غتكون خايب لدرجة أن الله غيرفضك. ماخاصكش گاع تخبّع خطيتك. ماخاصكش گاع تدير أعمال باش تربح الرضا ديال الله. ماخاصكش گاع تحس بالعار. ماخاصكش گاع تعطي مبرّرات، أعدار، تدافع على راسك، أولا تلوح اللومة. ماخاصكش گاع تتضاهر بلّي راك حسن من الواقع. ماخاصكش گاع تقدّم حجج على التقوى ديالك. ماخاصكش گاع تخاف باش تبان حقيقتك ويشوفوك الناس. ماخاصكش گاع تقارن حجم خطيتك بحجم خطية شي واحد أخر. ماخاصكش گاع تورّي التقوى ديالك باش يشوفوها الناس. ماخاصكش گاع تتساءل على واش الله غادي يعيا من شحال من مرة كتدنب. كل هادو هما أعمال شي إنجيل ماشي منطقي حيت راك سبق ليك خديتي غفران كامل.

من ناحية خرا، ضروري تفهم "مازال" ديال إصلاحك الأخير. أه، راك خديتي غفران كامل، ولكن راه مازال ماولّيتيش كليّا داكشي اللّي النعمة بغاتك تولّي. مازال الخطية كاينة، ومازال الحرب من أجل قلبك شاعلة، ومازال العالم اللّي ضاير بيك مكسور، ومازال الخطر الروحي كاين، ومازال ماتجدّدتيش كليّا باش تولّي على صورة الرب يسوع المسيح. صليب يسوع كيضمن أن كل هاد الحوايج المهرسة غاتّصلح، ولكن راه مازال ماتصلحات.

هادشي علاش، وأنا كنستمتع بالغفران الكامل اللّي خديت وكنستمتع بالحرية من التخمام في أنني ماعمري نوصل لعند الله، مانقدرش نعيش بلا حكمة. مازال واحد الخطر (الخطية) كيعيش فيّا وخطر أخر (تجربة الإغراء) ما زال كاين برّا منّي، هادشي علاش أنا مازال شخص محتاج للنعمة يوميًا. الغفران هو كامل. التجديد النهائي مازال ماجا. باش تعرف أنك كتعيش بين هاد الجوج هو مفتاح الحياة المسيحية المريحة والحكيمة.

من أجل دراسة وتشجيع كتر: بطرس التانية 3: 1-13