لشهر دجنبر؛ رحمات جديدة كل صباحعينة

الخدمة ديال الله فيك هي عملية وماشي حدث واحد. عملية ماشي في شي تلاتة أولا ربعة ديال اللحضات الكبار في حياتك، ولكن في عشرة آلاف لحظة تغيير صغيرة.

واخّا، جا داك الوقت عوتاني. بحال مازوت للمواعد الإخبارية، مقالات الجورنالات، وبرامج المجلات التلفزية وبزّاف ديال التعليقات في وسائل التواصل الاجتماعي. جا الوقت ديال الطقوس السنوية ديال دوك القرارات الدرامية باش يبدا العام الجديد اللّي عامر بالأمل والرجاء باش يوقع شي تغيير فوري وكبير في الحياة الشخصية.

ولكن الحقيقة هي أن قليل من الناس اللّي كيكميو قطعو الگارو بسباب لحضة وحدة ديال شي قرار قوي. قليل من الناس اللّي كيعانيو من الوزن المفرِط طيحو الوزن ديالهم وصحّتهم ولات مزيانة بسباب لحضة وحدة ديال شي قرار قوي. قليل من الناس اللّي عامرين كريديات غيّرو نضام حياتهم المالية حيت قرّرو يديرو هادشي مع البدية ديال العام الجديد. وعلاقات زواج قلال تغيّرو وتحسّنو من خلال قرار درامي واحد.

واش التغيير هو مهم؟ أه، هو مهم لينا كلنا بشي طريقة. واش الالتزام ضروري؟ أكيد! بطرق مختلفة، تتشكل حياتنا كلها من خلال الالتزامات اللّي كنقرّرو نلتازمو بيهم. ولكن النمو في النعمة - اللّي إنجيل يسوع المسيح كاين في القلب دياله – بكل بساطة ماكيحطش الرجاء دياله فوق لحضات التغيير الكبيرة والمتيرة.

الحقيقة هي أن عمل النعمة التغييري هو عملية دنيوية كتر من كونه سلسلة ديال شي أحدات درامية قليلة. القلب الشخصي والتغيير ديال الحياة هما ديما عملية. وفين كتوقع هاد العملية؟ كتوقع في البلاصة فين كنعيشو أنا ويّاك كل نهار. وفين كنعيشو؟ واخّا، كلنا عندنا نفس العنوان. حياتنا ماكتنقّزش من لحضة كبيرة للحضة كبيرة. لّا، حنا كلنا كنعيشو في الأمور الدنيوية الصغيرة.

الأغلبية فينا ماغنكونوش في الكتب ديال التاريخ. الأغلبية فينا غناخدو غير تلاتة أولا ربعة ديال القرارات المهمة في حياتنا، ومن بعد ما نموتو بشي عقود، الناس اللّي خلّيناهم مورانا غيلقاو صعوبة باش يتفكرو شنو درنا. أنا ونت كنعيشو في لحضات صغار، وإلا ماحكمش الله في اللحضات الصغار وماخدمش باش يعاود يشكّلنا في الوسط، فراه ماعندنا رجاء.

اللحضات الصغار ديال الحياة عندهم أهمية عميقة خصوصا حيت هما اللحضات الصغار فين كنعيشو واللّي كيشكلونا. هنا فين كنضن بلّي "المسيحية الدرامية الكبيرة" كتدخّلنا في المشاكل. تقدر تخلّينا نقلّلو من الأهمية ديال اللحضات الصغار في الحياة والنعمة ديال "التغيير الصغير" اللّي كنلقاو تمّا. وحيت حنا كنقللو من الأهمية ديال اللحضات الصغار اللّي كنعيشوهم، فراه ماكنلاحضوش الخطيّة اللّي كتبان تمّا. كنفشلو نقلبو على النعمة اللّي كتعطا لينا. كيما كتشوف، الشخصية والشكل ديال الحياة ماكيتحدّدش من خلال جوج أولا تلاتة ديال اللّحضات الدرامية، ولكن من خلال عشرة آلاف لحضة صغيرة. الشخصية اللّي كتتشكل في دوك اللحضات الصغار كتحدّد كيفاش كنستاجبو للحضات الكبار ديال الحياة. وشنو اللّي كيخلّي كل هاد التغيير ممكن؟ النعمة اللّي ماكتعياش، كتغيّر، ديال اللحضات الصغار. هادشي علاش كنفيقو كل نهار ملتزمين باش نعيشو في اللحضات الصغار من حياتنا اليومية بعينين مفتوحين وقلوب متواضعين كيتسنّاو الله.

من أجل دراسة وتشجيع كتر: يوحنا 1: 16