Лука 5
5
«Гьамусдихъантина адмийирин юкӀвар дисидива»
1Сабан, Аллагьдин гаф ебхьбан бадали, халкь Исайилан илтӀишуру, хъа Думу Учв Геннисарет гьюлихъ дийигъну айиган, 2Дугъаз гьюлʼин кьюб лютке рякъюру. Дурариан эдеу балугъчйири чулар марцц апӀурайи.
3Люткйирикан Симондинубдиъ учӀвну, Исайи дугъхьан лютке гъирагъдихъан цӀиб тинаси хъапӀуб ккун гъапӀну ва гьадлин, деъну, аьгъювалар улупуз хъюгъру.
4Чан улхуб ккудубкӀиган, Исайи Симондиз кӀуру:
– Яв лютке гьюлин кьялариз хъапӀ, хъа яв чулра ккип.
5Симонди Исайиз жаваб вуди гъапну:
– Я Мялим! Ярхи йишвди чалишмиш духьну, учхьан фукӀа бисуз гъабхьундарчухьан, амма Яв гафназ лигну чул ккипарза.
6Хъа гьаци дапӀну, дурари гьадмукьан балугъар гъидиснуки, гьеле чул чӀябгъюзра цӀибтӀан имдайи.
7Дурари тмуну люткейиъ айи юлдшаризра кюмекназ дих дапӀну, дурарра дуфну кьюбиб люткйирра гьаци арцӀруки, люткйир ккадрахьди саб нуфт гъубзнийи.
8Му гъябкъиган, Петр кӀуру лакӀам хъайи Симонди, Исайин кьамкьариина ис духьну: «Я Агъа! Узхьан гьудучӀв, гьаз гъапиш узу гунагькар вуза», гъапи. 9Фицики Симон ва дугъахъ хъайидар, чпи гъидису аьхючӀвеъ балугъариз лигну, русвагь гъахьнийи. 10Хъа Симондин дустар вуйи Зеведейин баяр Якьубдикна Югьандик Симондиксиб пис гучӀ кабхъру. Симондиз Исайи: «ГучӀ мапӀан, гьамусдихъантина инсанарин юкӀвар дисидива», кӀуру.
11Хъасин кьюбиб люткйирра гъирагъдихъна кадагъну, вари душваъ гъибтну, дурар Исайин кьяляхъди гъягъюру.
Хамран аьзар марцц апӀувал
12Иса саб шагьриъ айиган, Дугъахьна хамран аьзар кабхьнайи сар кас гъюру. Иса гъяркъиган, жилʼина ккадакну, думу Дугъаз ккарагуру:
– Я Агъа! Увуз ккун гъабшиш, узу марцц апӀуз шулвухьан.
13Исайи, хил гьачӀабккну, дугъак кубкӀну, кӀуру:
– Ккундузуз, марцц йихь!
Ва дишлади дугъан хам аьзарнахьан марцц шулу. 14Исайи дугъаз: мидкан саризра макӀан, хъа маллайихьна душну, жвув улуп, халкьдиз уву марцц хьпан шагьидвал вуди, Муса пайгъамбри дупнайиганси, гъурбан апӀуз ужуб гъайибх, кӀури, табшурмиш гъапӀу.
15Амма гьаци вушра, Исайикан аваза гъарабгъу, ва Дугъахъ хъпехъуз, чпин уьзрар сагъ апӀуз гизаф халкь гъюз хъюгъру. 16Хъа Иса, фужкӀа адру йишвариз гъягъюри, ккарагури шулу.
Паралич кайир сагъ апӀуб
17Сад йигъан Исайи аьгъювалар улупурайиган, Галилейна Ягьудия уьлкйириан ва гьацира Ерусалимдиан Дугъахьна дуфнайи фарисйирна къанунчйир деънайи. Дугъу аьзарлуйир Аллагьди туву кьувватниинди сагъ апӀурайи, 18ва магьа Дугъахьна ахниин алди паралич кайи сар кас хуз хъюгъю. Думу хулаз духну, Исайин улихь дитуз ккун гъабхьи. 19Му кас гизаф илтӀишнайи халкьдин арайигъян гъахуз йишв дибрихъди, хулан гъваина за дапӀну, гъваъланди, ахниин илмиди, Исайин улихьна хулан кьялʼина ирхру. 20Исайира, дурарин зурба хъугъвал рябкъюри, гьадму касдиз кӀуру:
– Эй инсан, яв гунгьарилан хил алдабгъураза.
Къанунчйиризна фарисйириз Исайин гьюкум улупуб
21Къанунчйирина фарисйири чиб-чпикди фикир гъапӀу:
– Аллагьдиз къаршуди улхурайир гьаму фуж ву? Сар Аллагьдилан гъайри, сарун шлихьан гунгьарилан хил алдабгъуз шулухъа?
22Исайи, дурарин фикрарин гъаври ахъну, жаваб тувру: «Гьаз дицдар фикрар ичв юкӀвариъ тӀаърачва? 23„Яв гунгьарилан хил алдабгъураза“ пуб рягьят вуйин, даршиш „гъудужвну лиц“ пуб? 24Инсаниятдин Бализ жилиин гунгьарилан хил алдабгъуз гьюкум айиб учвуз аьгъю хьпан бадали, магьа лигай» – пну, Дугъу паралич кайириз: «Гъудужв кӀуразавуз, гъадабгъну яв ахин, яв хулаз гъарах», – кӀуру.
25Думура дишла гъудужвну, учв дахънайи ахинра гъадабгъну, Аллагьдин адар апӀури, чан хулаз гъягъюру.
26Хъа вари мюгьтал шулу ва, Аллагьдин тярифар апӀури, гучӀбаан зегьле дубшну, гьамци кӀури гъахьну:
– Гъи аьжаб кереметнан ляхнар гъяркъюндарин ухьуз!
Левийиз дих апӀуб
27Мидхъан хулʼан удучӀву Исайиз налук уч апӀури деънайи Левий кӀуру гъуллугъагьли рякъюру ва дугъаз Чахъди гъач кӀуру. 28Думура, чан кеспи гъибтну, Дугъан кьяляхъди, гъудужвну, гъягъюру.
29Хъасин дугъу чан хулаъ Исайиз аьхю хялижвʼвал апӀуру. Душваъ аьхючӀвеъ налукар уч апӀрудар ва дурарихъди гутйириз гъюн йивну дахьнайи жара хяларра айи. 30Аьлимарина фарисйири наразивал кади Исайин ученикариз: «Учву налукар уч апӀрударихъдина гунагькрарихъди гьапӀуз ипӀури-убхъури шулчва?» – кӀури гъахьну.
31Исайи дурариз жаваб вуди гъапну:
– Духтир сагъидариз ваъ, хъа аьзарлуйириз лазим ву. 32Узу марцци касари ваъ, хъа гунагькрари, чпин гунгьар гардандиъ дидисну, уьмур дигиш апӀбан бадали, дуфнайир вуза.
Ушвар дисбакан
33Дурари кӀуруш Исайиз гъапи:
– Гьаз Ягьʼяйин ва гьацира фарисйирин ученикар кми-кмиди ушвар дисури ва ккарагури шулу, хъа Явдар чпиз ккун гъабши вахтна ипӀури-убхъури гьаз шулу?
34Исайи дурариз кӀуру:
– Швушв хурайирихъди хъайи сумчрин хяларихьди учвхьан ушвар дисуз гъитуз шулинхъа? 35Хъа швушв хурайир гужназ гъадагъру вахт гъибди, ва гьадму йигъари ушварра дисиди.
36Мидихъди сабси Дугъу саб тахалус ктибтуру:
– Гьич сарира, цӀийи палатдикан кадабтӀну, йирси палатдик цӀил ктривур, даршиш дугъу цӀийи палатра чӀябгъиди, хъа гьацира дидкан ктабтӀу цӀил йирсибдик балгидира дар. 37Ва гьич сарира таза чяхир йирси иржариъ убзидар, фицики таза чяхри иржар гьутӀурччвиди, учвра удубзиди ва иржарра пуч хьиди.
38Гьаддиз таза чяхир цӀийи иржариъ убзуб лазим ву.
39Ва гьич саризра, кюгьне чяхир дубхъну, дишлади таза чяхир ккун хьидар, фицики «кюгьне чяхир ужу ву» – кӀури шулу.
Currently Selected:
Лука 5: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
