sēnt mātyo 27

1ispi māka ēti kēkisēpāyāk, kahkiyaw kihci ayamihēwiyiniwak mina kā nikānēyitākosicik ayisiyiniwak ki māwaciitowak ē oyasowēcik kita nipahācik cisasa; 2ispi māka kā mamacikwapitācik, ki sipwētahēwak, ēkosi ē ki pakitinamawācik pantas pailat oyasowēwikimāwa.

3 # isihcikēwiniwāwa 1:18,19 ēkwa māka cotas, kā ki misimāt, ispi wiyāpahtahk, ē ki oyasowātimiht ki mihciyawēsiw mina kawi ē ki pē miyāt kihci ayamihēwiyiniwa mina kā nikānēyitākosiyit anihi nistomitanaw tahtwāpisk soniyāwa, 4ōmisi ē itwēt, ni ki maci isihcikān, ē ki misitamān kā kanātahk mihko. omisi māka ki itēwak, kēkway niyanan kēnawāpamikoyāhk ēwakwanima? kanawapata kiya ēwako. 5ki pakiciwēpinēw māka anihi nistomitanaw tatwapisk soniyāwa anita kihci ayamihēwikamikohk, ēkosi ē ki sipwētēt, ē ki natawi akotisot. 6aniki māka kihci ayamihēwiyiniwak ki otinēwan anihi soniyāwapiskwa, omisi māka ē ki itwēcik, namawiya miwāsin kita pakitinicik anita pakitināsowinihk, cikēmā mihko ki ohtatāwāniwan. 7ēkosi māka ki oyasowatēwak, ē ki atawēcik māka otaskiwiyākanihkēwa o kistikaniyiw, ēkota kita ki nainimiht manitēwa. 8ēwako māka ohci anima kistikan kā ki isiyihkātēk, mihkowi kistikan, piyis anohc kā kisikāk. 9#sēkarāya 11:12,13ēkospi māka kā tipipayik anima kā ki itwēt okiskiwēhikēw cērimāya, omisi ē itwēt, ēkosi māka ki otinēwak nistomitanaw tahtwapisk soniyāwa, anima kā ki itakimit ana kā ki atawaniwik, anihi kā ki itakimācik isrēil ot awasimisa; 10ēkosi māka ē ki mēkicik miskoc anima otasiskiwiyakanihkēw o kistikan, mwēhci kā tipēyihcikēt kā ki itasowasit.

11cisas māka ki otiskawikapawistawēw oyasowēwikimawa; ana māka oyāsowēwikimaw ki kakwēcimēw, omisi ē itāt, kiya ci ot okimāmiwāwa cowak? cisas māka omisi ki itēw, kit itwān. 12ispi māka ē atāmimikot kihci ayamihēwiyiniwa mina kā nikānēyitākosiyit, nama kēkway ki isi naskwēwasimēw. 13ēkwa māka pailat omisi ki itēw, nama ci ki pēhtawāwak tānisi mihcēt kēkwaya ē ayitacimiskik? 14namawāc māka naskwēwasimēw kanakē pēyak ayamiwin; ēwako māka ohci nāspic ki māmaskātam oyasowēwikimaw. 15ēkospi māka kā wihkohtonāniwik oyasowēwikimaw ki māna pakitinamawēw ayisiyiniwa pēyak kipawākana pikwanii ē natawēyimayit. 16ki ayawēwak māka pēyak ē ātotākosiyit kipawākana, parapas ē isiyihkāsoyit. 17ēwako māka ohci, ispi kā mamowi māwaciitocik, pailat omisi ki itēw, awēna kē natawēyimāyēk kita pakitinamatakok? parāpas ci? ahpo cisas ana Christ ēsiyihkāsot? 18cikēmā ki kiskēyihtam isawanakēyimowin piko ē ki ohci pakitinamākot.

19ispi māka kā nahapit oyasowēwapiwinihk, wiwa ki pē isitisaamāk, omisi ē itikot, ēkāwiya nānitaw totaw ana kā kwayaskwātisit ayisiyiniw; cikēmā ni ki kakwatakiikon mihcēt kēkwaya anohc kā kisikāk wiya ē pawatak. 20māka kihci ayamihēwiyiniwak mina kā nikānēyitākosicik ki kakēskimēwak anihi ayisiyiniwa kita natotamayit parāpasa, ēkosi wiya kita nisiwanāciimiht cisasa. 21oyasowēwikimaw māka ki naskwēwasimēw omisi ē ki itat, tānāna oko kā isi nisicik nētawēyimāyēk kita pakitinamātakok? omisi māka ki itēwak, parāpas. 22pailat māka omisi itēw, tānisi māka wiya kē totawak cisas, Christ kā isiyihkāsot? kahkiyaw māka omisi itēwak, kiyām kita cistaskwataw. 23oyasowēwikimāw omisi ki itēw, tānēki, kēkway kā maci totahk? māka āhci piko sohki awasimē ki tēpwēwak, omisi ē itwēcik, kiyām kita cistaskwataw.

24 # tiyotaranami 21:6-9 ispi māka pailat wiyāpahtahk ēkā kēkway kita ki sākohtāt, māka ayiwak ē ayāsihkwēwiht, ki otinam nipi, ēkosi ē ki kāsicihcēt ē kanawāpamikot ayisiyiniwa, omisi ē itwēt, niya namawiya nit atāmēyitākosin o mihko awa kā kwayaskwātisit ayisiyiniw; kanawapahtamok kiyawāw. 25ēkosi māka kahkiyaw ayisiyiniwak ki naskwēwasimēwak, omisi ē ki itwēcik, o mihko kiyām niyanān ni ka patakoskakonan, mina nit awāsimisinanak.

26ēkwa māka ki pakitinamawēw parapasa ispi māka kā papasastēwāt cisasa, ki pakitinēw kita cistaskwatimiht. 27anihi māka o simākanisima ana oyasowēwikimāw ki itohtahēwak cisasa anita kihci okimāwikamikohk ē ki māmawi natomācik māka kahkiyaw simākanisa. 28ēkosi māka ki kētasākēnēwak, ē ki postasākaācik māka mihkwēkinwēsākāyiw.

29ispi māka okawiminakasiya kā ohci apikatahkik okimāwastotiniyiw ki postastotinaēwak ostikwaniyihk, mina āniskawask o kihciniskiyihk; ēkosi māka ki ocihcikwanapistawēwak, mina ē ki mētawākatācik omisi ē itwēcik, ēl, ot okimamiwawa cowak! 30ki sasikwatēwak māka, mina ē ki otinamwācik aniskawask, ē pakamawācik ostikwaniyihk. 31ispi māka kā poni mētawākātācik, ki kētasakēnēwak, ē ki postasakaacik mina oskotākāyiw, ēkosi ē ki sipwētahācik kita cistaskwatācik.

32ē ati wayawicik māka, ki mēkwaskawēwak sairiniwi iyiniwa, saiman ē isiyihkasoyit; ēokoni kā sikimācik kita pimiwitayit o pimitaskwaikaniyiw. 33ispi māka kā takosihkik anitē kalkota kā isiyihkātēk, ēkwanima ē itwaniwik, ostikwanikan.

34 # nikamona 69:21 ki miyēwak siwikāpoyiw kita minikwēyit ē asitinikātēyik kā wisakahk; ispi māka kā kocistahk, namawiya ki wi minikwēw. 35#nikamona 22:18ēkosi māka ki cistaskwatēwak, mina ē ki matinamātocik ot ayowinisiyiwa; ē astwātocik, kita tipipayik anima kā ki itwēt okiskiwēhikēw, matinamatowak niso ayowinisa, mina nit akwaowin ki astwatowak. 36ēkosi ē ki nahapicik, ki kanawāpamēwak; 37ē ki astawācik māka ēkota ispimihk ostikwaniyihk, o misimikowi masinaokōwin, ēwako awa cisas ot okimamiwāwa cowak. 38ēkota māka ēkospi niso kimotiskak asici ki cistaskwatawak; pēyak o kihciniskiyihk, mina kotak o namatiniyihk.

39 # nikamona 22:7; 109:25 aniki māka ēkota kā pimi mamiyaskawācik ki kikāmēwak ē wēwēpiskwēyicik, 40#mātyo 26:61; cān 2:19omisi māka ē itwēcik, kiya kā nisiwanācihtāyan kihci ayamihēwikamik, ēkosi kā cimatāyan nisto kisikāki, pimācihiso. kispin kiya kisēmanitowikosisān, pēci nisatawi pimitaskwaikanihk ohci. 41wistawāw māka kihci ayamihēwiyiniwak ē mētawākatācik, asici masinahikēwiyiniwak mina kā nikānēyitākosicik omisi ki itwēwak, 42kotaka ki pimaciēw; wiya namawiya ki pimācihiso. kispin ēwako isrēil kihci okimāw kiyām ēkwa pimitaskwaikanihk kita pē ohci nitakosiw, ēkosi māka ki ka tāpwētawānaw. 43#nikamona 22:8mamisitotawēw kisēmanitowa; kiyām ēkwa kita pimaciik, kispin wa ayawikokwē; cikēmā ki itwēw, niya kisēmanitowikosisān. 44wistawāw kimotiskak, kā wici cistaskwasomācik, ēkosi ki ayitēwak.

45ispi māka nikotwasik ē ispayik tipahipisimwān ki wanitipiskaw misiwē askihk piyis ē otihcipayik kēkat mitataht ē ispayik tipahipisimwān. 46#nikamona 22:1nānitaw māka kēkat mitātaht ē ispayik tipaipisimwān, cisas ki mistahi tēpwēw, omisi ē itwēt, ilay, ilay, lāma sēpāktanay? ēkwanima ē itwanik, ni kisēmanitom, ni kisēmanitom, tānēki kā ki nakasiyan? 47atiht māka aniki ēkota kā nipawicik ispi piyēhtahkik ēwako, omisi ki itwēwak, awa ayisiyiniw natomēw ilayasa. 48#nikamona 69:21pēyak māka sēmāk ki ispatāw, ē ki otinat māka pākokwēona, ē ki sakaskinaāt māka siwikwāpoyiw, mina ē ki astāt aniskawaskosihk, ēkosi ē ki miyat kita minikwēyit. 49māka wiya kotakak ki itwēwak, ēkā totāhk, kiyām wapatātāk māhti ilayas kē pē itotēkwē kita pimaciāt.

50cisas, māka mina ispi kā mistahi tēpwēt, ki pakitinēw ot ahcāhkwa. 51#ēksatas 26:31-33cist māka, ākoēkaikan kihci ayamihēwikamikohk ki tātopayiw ē nisotāpayik ispimihk ohci piyis tapasis; mina māka aski ki kihkwan, mina ē kakistapiskāk ki tataskipayiw; 52yikwahaskāna māka ki papaskitēpayiwa; mihcēt māka aniki okanātisiwak wiyawiwāwa kā nipācik, ki waniskāwak, 53ē ki pē ohci wayawicik māka yikwahaskānihk ispi ē ki waniskāyit mina ē ki itohtēcik kanaci otēnāhk, mihcēt māka ē ki nokohisostawacik.

54ispi māka kihci simākanisiwikimāw, mina anihi kā wicēkot, ē kanawāpamācik cisasa, wiyapatahkik ē nanamaskamikipayik, mina anima kā ki ayihkiniyik, nāspic ki sēkisiwak, omisi ē itwēcik, tāpwē isa awa ki kisēmanitowi kosisaniwiw. 55#lok 8:2,3mihcēt māka iskwēwak ēkota ki ayawak, wāhyaw ē osapicik, aniki kalalihk kā ohci pimitisahwācik cisasa, ē papamihācik; 56oko māka ki wiciiwēwak ēkota mēri maktilin, mina mēri okāwiya cēmis, mina cosis, mina o kawiwawa aniki sēpiti ot awasimisa.

57ispi māka ēti otākosik, ēkota ki takosin wēyotisiwiyiniw aramētia kā ohcit, cosip ē isiyihkasot, wista kā ki okiskinohamawākanimikot cisasa; 58awa ki natēw pailata, ē ki natotamawāt māka cisasa wiyawiyiw. pailat māka ki itwēw kita pakitinamamit miyawiyiw. 59ispi māka cosip kā otinahk miyawiyiw, ki wēwēkinam ē kanātaniyik wapiski papakiwayanēkinohk. 60ē ki astāt māka anita tipiyawē o oski yikwahaskānihk anima asinihk kā ki monahahk; ē ki isi tihtipinat māka mistasiniya anita ē iskwatēmiwahk yikwahaskānihk, ē ki ati sipwētēt māka. 61ēkota māka ki ayāw mēri maktēlin, mina kotak mēri, ē ohtapistahkik yikwahaskāniyiw.

62kotak māka ē kisikāk anima ē wāpahk kā wawēyiwikisikak, kihci ayamihēwiyiniwak mina parasiyak ki pē māmawi nātēwak pailata, 63#mātyo 16:21; 17:23; 20:19; mārk 8:31; 9:31; 10:33,34; lok 9:22; 18:31-33omisi ē itwēcik, okimāw, ni kanokiskisinān ana owayēsihiwēw kā ki itwēt, ē mēkwa pimātisit; ki nisto kisikāki mina ni ka waniskān 64itasowē māka, anima yikwahaskān mitoni kita kanawēyicikatēk piyis kita nisto kisikāk, ēkā o kiskinohamawākana kita pē nipa itohtēyit kita kimotiyit wiyaw omisi māka kita itācik ayisiyiniwa, apisisin; ēkosi māka anima iskwāyac wanitotamowin nawac kita māyipayiw ispic nistam. 65pailat māka omisi ki itēw, kit ayawawawak okanawēyicikēwak; sipwēhtēk, mitoni kanawēyihtamok iyikohk ē isi kaskihtayēk. 66ēkosi māka ki sipwētēwak, mina mitoni ē ki kanawēyihtahkik yikwahaskān, ē ki akoskiwaswacik asiniya, ē wicēkocik okanawēyicikēwa.

Currently Selected:

sēnt mātyo 27: KKMR

Highlight

Copy