San Marcos 16
16
Jutucta̱cp Jesús
1Inas̈ ayé po'cs̈ans̈ʉjw, María Magdalajway, María Jacobo ima̱m, mit Salomé, ijuygau perfume pa'cs̈u'cpay pa inʉs̈cawa'n iguijátscaja Jesús icuerpu. 2Mit jopoyito'gu, iprimer s̈ʉjw s̈ama̱na, ipichijn s̈ʉwáy, nʉs̈cau mam i-it ayé á̱nimacʉt. 3Mit inʉmgau je'jatu: ¿Pʉn nas̈acpogolgajáj tsa'na' á̱nimacʉt-auni'cway? 4I-e'pnʉ́s̈caj, i-is̈cau ni'c ayé tsa' jeme mʉjo'cway, chi'tiganu itsʉ̱na. 5Itʉ́gʉygaj á̱nimacʉtni'c, i-is̈cau tu'c ya̱wayna' ni'c tsʉ̱nap i-oyimaylajni'c, mit je' cutigatsic mit tu'c yagatsway jamuc po'pway. Mit je'jat nigu-épigʉjʉu mayo'c. 6Po je' inʉmgʉs̈au: Camnigu-épigʉjʉ, inche'ngap Jesús Nazaretway jeme iyajcaway cunu̱s̈ni'c. Je' jutucta̱cway. Capʉn yam. E'pca ayé lugar mam iguiyájcaj. 7Po nʉs̈ nʉmgaja ipʉctampajyat mit Pedro ni'c Jesús cojyʉ'gáj Galilea, mit jem is̈-e'pcawa'n as̈am je' is̈nʉmgajau. 8Ipíchingaj, icupo'jcau ayé á̱nimacʉtna', mit yaratcau mit ni-apʉ̱tigʉjʉu. Mit iganʉmgajawu nepʉn neti ni'c pʉ̱tcau.
Jesús ique's̈ta̱jcap María Magdalajway
9Ijutucta̱jc Jesús jopoyito'gu iprimer s̈ʉjw s̈ama̱na, ique's̈ta̱jcʉ'jcau María Magdalajway jeme i-acpichijnaway siete demo̱nyujat. 10Inʉjcs̈ María, i-actujawigʉs̈ jeme tsʉ̱ngaway mit Jesús, mit je'jat tu'ngapnaj ijo̱jtat mit jʉygap. 11Po je'jat iguimáraugaj ni'c Jesús jutucta̱cway, mit iguimáraugaj ni'c María i-is̈way, je'jat igacupʉjcawu.
Jesús ique's̈ta̱jcʉs̈ap mechc ipʉctampajyat
12I-íjtʉj más ratu, cuandu mechc ipʉctampajyat iyo'ydacnʉ́s̈caj to̱uni'c, Jesús ipichinda̱jcʉs̈au en jatu'c forma. 13Ayʉ̱́jat nʉs̈cau mit i-actujawigau japu̱jtat, po igacupʉjcawu-ey.
Jesús i-ajyu'tcʉs̈p i-apóstojlat
14Mit más tsu'jít Jesús ipichinda̱jcʉs̈au ayé once ipʉctampajyat mam itsʉ̱nga me̱s̈ani'c, mit iche'cta̱jcʉs̈ ni'c igacupʉjcap mit copacmʉgʉjcat. Iwat we'n Jesús ni'c igacupʉjcawu jeme igui-is̈caway je' jutucta'guic. 15Mit inʉmgʉs̈au: Nʉ́s̈ca nu'pʉjʉn mundu, nʉmdacyo'yga ayé oyway noticia pa nu'pʉjʉn jayajwat. 16Pʉmba'tu jeme icupʉgámpay mit jeme ninʉ'gutejmʉ́mpay, nisalva̱jtʉ̱́j. Po pʉmba'tu jeme igacupʉgámpay, togoyáj. 17Mit jeme tʉs̈cupʉjcapay i-actu-e'pcáj ayʉ̱́j milagrujat: tʉnyʉ'jyni'c i-acpichingáj demo̱nyujat, mit cotscáj nam-auni'jcat. 18I-actangáj tsanajyat icʉ'ni'jcat, mit te i-u̱jcap tu'c venenu jeme nas̈ago'cpay, iguigawatcajáj neti. Iyajcajáj icʉ'jat iyucuinmat tu'nijatway mit oytangáj.
Jesús cu'tp pa tsajpni'c
19Iguimucotscʉs̈ el Señor Jesús, Dios iguimunʉcs̈ pa tsajpni'c, mit nitsʉ̱nda̱jcʉu Dios i-oyimaycʉ'ni'c. 20Ipíchingaj je'jat, inʉmdacyo'ygau jʉmba'tu. El Señor imajyigʉs̈ je'jat, mit iwat milagrujat pa jayajwat ma jawga ni'c iyacs̈ta'cway lo que inʉmdacyo'ygapay ayé pʉctampajyat. Yam icʉs̈.
Currently Selected:
San Marcos 16: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
