JUAN 17
17
Yachachisqankunapaq Jesuspa mañakusqan
1Chaykuna rimasqan qhepatan Jesusqa hanaq pachata qhawarispa nirqan: —Yayáy, horan chayamunña, ñoqa Churiykita hatunchaway, Churiykipas qanta hatunchanasuykipaq. 2Qanmi ñoqaman atiyta qowarqanki lliw runakunata kamachinaypaq, lliw qowasqayki runakunaman wiñay kawsayta qonaypaqwan. 3Chay wiñay kawsayqa kaymi: Qan sapallayki cheqaq Diosta, kachamuwasqayki ñoqa Jesucristotawan reqsiyninku.
4Ñoqan kay pachapi hatunchayki, ruwanaypaq kamachiwasqaykitan tukuniña. 5Yayáy, kunanqa, qayllaykipi hatunchaway manaraq kay pacha kashaqtin hatunchawasqayki hatunchaywan.
6Kay pachamanta qowasqayki runakunamanqa ñan willaniña pichus kasqaykita, qanpan karqanku, chaymi paykunata qowarqanki, simiykitataq kasukunku. 7Kunanqa yachankuñan tukuy ima qowasqaykipas qanpa kasqanta. 8Simiykikunatan paykunaman willaniña, hinan paykunaqa chaskikunku, qanmanta lloqsimusqaytapas cheqaqtapunin yachankuña, hinaspan qanpuni kachamuwasqaykita creenku.
9Paykunapaqmi rogakuyki. Paykunaqa qanpan kanku, chaymi mana kay pacha runakunapaqchu rogakuyki aswanpas qowasqaykikunapaqmi rogakuyki. 10Lliw runaykunapas qanpan, qanpa runaykikunapas ñoqaqmi. Paykunan sut'inchanku may musphana kasqayta.
11Manan kay pachapiñachu kasaq, paykunan ichaqa kay pachapiraq kanqaku, ñoqaqa qanmanmi hampushaniña. Ch'uya Yayáy, atiyniykitan qowarqanki, qan kikiyki atiyniykiwan paykunata waqaychay, ñoqanchis hina hukllapuniña kanankupaq. 12Kay pachapiraq paykunawan kashaspayqa qowasqayki atiyniykiwanmi paykunata waqaycharqani, cuidarqanin, manan mayqenninkupas chinkarqanchu, aswanpas chinkananpuni kaq runallan, simiyki Qelqa hunt'akunanpaq.
13Kunanqa qanmanmi hampushani. Kay pachapiraq kashaspaymi kaykunata rimani, kusikuyniywan anchatapuni kusikunankupaq. 14Ñoqaqa ñan paykunaman simiykita willaniña, chaymi runakunaqa paykunata cheqnikun, mana kay pachamanta kasqankurayku, ñoqapas manallataqmi kay pachamantachu kani. 15Manan kay pachamanta paykunata horqonaykipaqchu mañakuyki, aswanpas saqramanta paykunata waqaychanaykipaqmi. 16Manan kay pachamantachu kanku, ñoqapas manallataqmi kay pachamantachu kani. 17Cheqaq-kayniykiwan paykunata t'aqay qanllata servinankupaq, simiykiqa cheqaq-kaymi. 18Imaynan kay pacha runakunaman kachamuwarqanki, chay hinatan ñoqapas paykunata kay pacha runakunaman kachashani. 19Paykunaraykutaq ñoqaqa qanllata servinaypaq t'aqakuni, paykunapas cheqaqtapuni t'aqasqa kaspa qanllata servinankupaq.
20Manan paykunallapaqchu rogakuyki, aswanpas paykunaq siminta uyarispa ñoqapi iñinqaku chaykunapaqwanmi. 21Yayáy, llapallanku hukllapuniña kanankupaqmi mañakuyki, imaynan qanpas ñoqawan huklla kashanki, ñoqapas qanwan huklla kashani, chay hinallataq paykunapas ñoqanchiswan hukllapuniña kanankupaq, ahinapi kachamuwasqaykita runakuna creenankupaq. 22Hatunchawasqaykiwanmi ñoqapas paykunataqa hatuncharqani, imaynan ñoqanchispas hukllapuni kanchis, chay hina paykunapas hukllapuni kanankupaq. 23Chay hinallataq ñoqapas paykunawan huklla kasaq, qanpas ñoqawan huklla kanki, ahinapi hukllapuniña kanankupaq. Chay hina kaqtinqa runakunan kachamuwasqaykita yachanqaku, ñoqata munakuwasqaykita hina paykunata munakusqaykitapas yachanqaku.
24Yayáy, qanmi paykunata qowarqanki, chaymi munani ñoqaq kasqaypi paykunapas ñoqawan kuska kashanankuta, ahinapi hatunchawasqaykita rikunankupaq. Manaraq kay pacha kamasqa kashaqtinmi munakuwaspa hatunchawarqanki. 25Chanin Yayáy, runakunaqa manan reqsisunkichu, ñoqan ichaqa reqsiyki, paykunapas yachankun qanpa kachamuwasqaykitaqa. 26Ñoqan paykunaman pichus kasqaykita yachachirqani, yachachisaqraqtaqmi kanpas, munakuwasqaykita hina paykunapas hukkunata munakunankupaq, ñoqapas paykunawan huklla kanaypaq, nispa.
Currently Selected:
JUAN 17: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
